1. Ndi nlem évé bôte ba bo beta minseme be bili?

 AYÉ’É ya mvus, bi nga yen aval avé nlômane Paul ô nga kôme mbia jam a nga boban ékôane bekristene ya Corinthe. Môt a nga bo beta nsem a nji kôñelane nlem, ajô te, é nga sili na be vaa nye ékôane bekristen. Ve avale nlô ajô wongane ya ayé’é di wo liti, Zambe a ne volô mbo nseme na a kôñelane nlem. (Rom. 2:4) Aval avé Yéhôva a belane bemvendé na be volô mbo nseme na a kôñelane nlem?

2-3. Jé bia yiane bo nge bia yeme na mojañe nge sita éziñ a te bo beta nsem, a amu jé?

² Bemvendé ba yiane taté jeñe na be kôme yem ajô ôsusua na ba volô môt éziñ. Ajô te, jé bia yiane bo nge bia yeme na mojañe nge sita éziñ a te bo beta nsem a ne bo na be vaa nye ékôane bekristen? Bia yiane kate nye na a ke jeñe mvolane be bemvendé.—Ésa. 1:18; Mame mi. 20:28; 1 P. 5:2.

³ Jé bi ne ñhe bo, nge mbo nsem a bene ke laan a bemvendé? Biabebiene bia yiane ke yene bemvendé asu na bi tabe ndi na môt ate a ye bi mvolane wo yian. A ne mbamba jame bia yiane bo amu bi nji kômbô jañele monyañe wongane nge kale jangane bia nye’e. Nge a kele ôsu a bo beta nsem ate, a ye tu’a ndamane mbamba élat a ne zañe ba Yéhôva. A ne fe ve ékôane bekristen ése mvit. Ajô te, to’o ane jam éte é nji bo tyi’ibi, bia yiane ke yene bemvendé amu bia nye’e Yéhôva a mojañe nge sita ate. (Bsa. 27:14).

 MAME BEMVENDÉ BA BO ASU NA BE VOLÔ BEKRISTENE BA BO BETA NSEM

 4. Nsôñane bemvendé ô ne ôvé éyoñe ba laan a môt a te bo beta nsem?

⁴ Éyoñe môt éziñe ya ékôane bekristen a bo beta nsem, bemvendé ba tobe bobejañe belal e zañe jap asu na be ke laan a nye. a Bôte bete ba yiane bo éjote nyul. Nté ba jeñe na be volô môt a te bo beta nseme na a kôñelane nlem, ba yiane yeme na be vo’o tindi môt ate a ngule na a tyendé. (Deut. 30:19) Bemvendé ba yeme na, sa ke môt ase nnye a ye kôñelane nlem avale Njô bôte David a nga bo. (2 Sam. 12:13) Bôte béziñe ba bo minseme be ne tyi’i na ba vô’ôlô ki melebe me Yéhôva. (Mett. 4:​6-8) Ve nsôñane bemvendé ô ne na be bo jam ése da sili mfa’a ya na be volô môt a te bo beta nseme na a kôñelane nlem. Miñye’elane mivé ya Kalate Zambe mi ne volô bemvendé éyoñe ba laan a môt a te bo nsem?

 5. Jé bemvendé be nji yiane vuan éyoñe ba ke laan a môt a te bo nsem? (2 Timothée 2:​24-26) (Fombô’ô fe fôtô.)

⁵ Bemvendé ba yeme na to’o môt a te bo beta nsem, môt ate a ngenan édima e mise me Yéhôva. (Luc 15:​4, 6) Ajô te, éyoñe bemvendé ba laan a mbo nsem, ba kobô ki nye abé nge bo njet a nye. Be nji simesane na susu’a jôme ba yiane bo é ne ve na be sili nye minsili asu na be yeme jame da te boban. Ve bemvendé ba ye liti mefulu bia koone me e kalate 2 Timothée 2:​24-26. (Lañe’e.) Bemvendé ba yiane bo évôvoé a mbamba nlem éyoñe ba jeñe na be nambe nleme môt a te bo nsem.

 6. Aval avé bemvendé be ne kômesane minleme miap ôsusua na ba ke laan a môt a te bo nsem? (Beromain 2:4)

⁶ Bemvendé bebiene ba kômesane minleme miap. Bemvendé ba simesane mejô me Paul ma: “Zambe a zene ya mbamba nleme wé, a jeñe na a dutu wo na ô kôñelane nlem.” Ajô te, ba jeñe na be vu mbamba nleme Yéhôva a avale ba nyoñe bôte ba bo minsem. (Lañe’e Beromain 2:4.) Bemvendé be nji yiane vuane na be ne beba’ale, a na Yésus Krist nnye a wulu be. (Ésa. 11:​3, 4; Matt. 18:​18-20) Ôsusua na ba ke laan a môt a te bo nsem, émo’o bemvendé ja yiane taté fase meye’elan été nsôñane wop, ñwô ôte ô ne na be volô mbo nseme na a kôñelane nlem. Ba ye bo minjeñan a zene ya Kalate Zambe, a bekalate bangane bevok a ye’elan asu na be bi atyeñe  meyen. Ba ye jeñe na be yeme jôm é nga yiane tindi môt ate na a bi ôsimesan éziñ a bo mbia jam.—Mink. 20:5.

7-8. Aval avé bemvendé be ne vu ôjibi Yéhôva éyoñe ba laan a môt a te bo nsem?

⁷ Bemvendé ba vu ôjibi Yéhôva. Ba vuane ki avale Yéhôva a nga nyoñe bôte ya melu mvuse be nga bo minsem. Éve’an é ne na, Yéhôva a nga laan a Caïn a ôjibi ôse, a nga kate nye mbia be mame bese ba ye kui nye nge a bo nsem a bibotan a ne bi nge a tyendé. (Mett. 4:​6, 7) Yéhôva a nga komekane David a zene ya be nkulu mejô Nathan, nnye ate a nga belan éve’an é nga nambe nleme njô bôt. (2 Sam. 12:​1-7) Yéhôva a “nga ke [fe] ôsu a lôme” bone be Israël bekulu mejô bé “biyoñe biyoñ” éyoñe be nga bo nye melo. (Jér. 7:​24, 25; MN) A nji yange na bebo bisaé bé be kôñelane minlem ôsusua na a volô be. Ve éyoñe be mbe be ngenane be nyiñi’i nsem été, Yéhôva a nga jô be na be kôñelane minlem.

⁸ Bemvendé ba vu mbamba éve’ela Yéhôva éyoñe ba jeñe na be volô bôte ba te bo beta minsem. Avale kalate 2 Timothée 4:2 a liti, éyoñe bemvendé ba laan a mojañe nlem ô ne ntya’an, ba bo de “a ôjibi ôse.” Ajô te, mvendé ja yiane bo kom ése évôvoé a ôjibi asu na é volô mbo nseme na a bi nkômbane ya bo mame me ne zôsô. Nge mvendé éziñ é taté na ja wôk ôlune nge dutu asu, mbo nsem a ne bo teke vô’ôlô melep a ve nye nge na, a ne bene kôñelane nlem.

9-10. Aval avé bemvendé be ne volô mbo nseme na a yemelane mbia jam a te bo?

⁹ Bemvendé ba jeñe na be yeme jame da te tindi môte na a bo nsem. Jé ja te te’elan élate jé a Yéhôva? Ye môt ate a bo ki fe ayé’é dé ya Kalate Zambe nge na a kañete ki fe? Ye a ye’elane ki fe mbane nge na, ye meye’elane mé me ntoo ve yôbe yôp? Ye a nga jô’é na mbia minkômbane mi woone nye? Ye a nga dimine tobe bemvôé bé, nge ki mimvômane mié? Aval avé mintyi’an a nga nyoñe mi nga nambe ôsimesane wé a minkômbane mié? Ye a yeme fo’o na mintyi’an a ndeme nyoñ a mimboone mi mame mié mia bo Ésa wé Yéhôva nleme mintaé?

¹⁰ Éyoñe bemvendé ba sili mbo nseme minsili mia yian a mbamba nlem ase, nalé a ne volô nye na a kate be jame da te tindi nye na a bo nsem. (Mink. 20:5) Nde fe, bemvendé be ne belane bive’ane bi ne volô nye na a fas a yen abim avé mimboone mié mi ne abé, avale Nathan a nga bo a David. Éko éziñ éyoñe ba ye laan a nye éyoñ ôsu, a ne taté na a jôbane mbia jam a nga bo. A ne fe kôñelane nlem.

11. Aval avé Yésus a mbe a nyoñe’e bebo minsem?

¹¹ Bemvendé ba jeñe na be vu Yésus. Éyoñ a nga laan a Saul ya Tarse e zu koon a wômôya, Yésus a nga sili nye beta nsili nyi: “A Saul, a Saul, amu jé wo tibili ma?” A zene ya nsili ôte, Yésus a nga volô Paul na a yeme na jam a mbe a bo’o é mbe abé. (Mame mi. 9:​3-6) Mfa’a ya be “minga ba loone na Jézabel,” Yésus a nga jô na: “Me nga ve nye éyoñe ya kôñelane nlem.”—Nlitan 2:​20, 21.

12-13. Aval avé bemvendé be ne ve mbo nsem éyoñe ya kôñelane nlem? (Fombô’ô fe fôtô.)

¹² Bemvendé ba liti na ba vu Yésus éyoñe be nji bo ôjeja’a ya ji’a tyi’i na môt a te bo nsem a ye kôñelane nlem. Bôte béziñe be ne kôñelane minlem éyoñ ôsu bemvendé ba laan a be, ve asu bôte bevok é ne sili abui éyoñ. Ajô te, bemvendé be ne bo nta’ane mame na ba ye laan  abui biyoñ a môt a te bo nsem. Éko éziñ, éyoñe be laaneya a nye éyoñ ôsu, kristene ja te bo nsem é ne taté na ja kôme fase mame ba te nye kat. A ne sili émiene si a ye’elane Yéhôva na a jamé nye amu abé a nga bo. (Bsa. 32:5; 38:18) Mvuse ya valé, éyoñe ba beta laan a nye, a ne bi été nsisime ja selan a ji a mbe a bili éyoñ ôsu be nga laan a nye.

¹³ Asu na be volô mbo nseme na a kôñelane nlem, bemvendé ba yiane yeme tebe été jé a bo mbamba nlem a nye. Ba ye’elane Yéhôva be too ndi na a ye botane ngule ba ve, a na kristene ja te bo nsem é ne beta taté na ja fase mvo’é a kôñelane nlem.—2 Tim. 2:​25, 26.

14. Za a yian ôlu’u éyoñe mbo nsem a kôñelane nlem, a amu jé?

¹⁴ Éyoñe mbo nsem a kôñelane nlem, bi ne angôndô ya mevak! (Luc 15:​7, 10) Za a yian a ôlu’u ya jam éte? Ye bemvendé? Simesa’ane jame Paul a nga tili a lat a bôte ba bo minsem. A nga jô na: “Éko éziñe Zambe a ne ve be nkôñelane nlem.” (2 Tim. 2:25) Ajô te, Yéhôva nnye a volô kristen éziñe na é tyendé asimesane dé a mimboone mié, sa ke môta binam. Paul a kate mbamba be mame môt a ne bi éyoñ a kôñelane nlem. A jô na môt ate a ne tu’a bi nya ñyemane ya benya mejôô, a ne tyendé abo dulu dé a bo te ku melame me Satan. —2Tim. 2:26.

15. Aval avé bemvendé be ne ke ôsu a volô mbo nsem a kôñelaneya nlem?

¹⁵ Éyoñe mbo nsem a kôñelane nlem, émo’o bemvendé ja bo nta’ane mam asu na bemvendé be ke ôsu a jome nye, ndemben a ne bi mvolane wo yiane nye na a ke ôsu a sa’ale melame me Satan a tyendé abo dulu dé. (Héb. 12:​12, 13) É ne été na, bemvendé ba kate ki bôte jame mbo nsem a nga bo. Ve mame mevé me ne sili na ékôane bekristen é yem?

“KOMEKA’AN . . . E MISE ME BÔTE BESE”

16. Avale kalate 1 Timothée 5:20 a liti, “bôte” bevé Paul a jô be?

¹⁶ Lañe’e 1 Timothée 5:20. Paul a nga jô Timothée, mvendé fok na a komekane  “ba be bili fulu ya bo nsem” e mise me bôte bese. Jé nalé a tinan? Nalé a tinane na, “bôte” ba jô be éfuse ji be nji be be yiane bo bôte bese ya ékôane bekristen. Ve Paul a mbe a kobô’ô ajô ya bôte be mbe be nga yeme minseme bôte bete ba bo. Bôte bete be mbe ve bo ba be nga wô’ô jam é nga boban, nge ke ba bebo minseme bebiene be nga ke kate jame be nga bo. Bôte bete mbe étame bemvendé be mbe ve kate na be kômeya ajô éte.

17. Éyoñ é mbe na, ékôane bekristen ése é nga yeme na môt a te bo beta nsem, nge na ja ye su’ulane yeme jam éte, foé fé be mbe be kate’e, a amu jé?

¹⁷ Biyoñe biziñ, é mbe é yiane kui na ékôane bekristen ése é nga yeme na môt a te bo beta nsem, nge na ja ye su’ulane yeme jam éte. Avale biyoñ éte, e “bôte” ba jô be éfus éte be mbe ékôane bekristen ése. Ajô te, mvendé é mbe é yiane kat ékôane bekristen ése na mojañe nge sita éziñ a te bi minkomekan. Amu jé? Paul a yalan a jô’ô na: “Ndembene ba bevo’o ba ye tabe ntyele” ya bo te ku nsem.

18. Nge mongô a dubaneya a ngenane teke bi mimbu 18 a bo beta nsem, jé bemvendé ba yiane bo? (Fombô’ô fe fôtô.)

¹⁸ Jé bemvendé ba yiane bo éyoñe mongô a dubaneya a ngenane teke bi mimbu 18 a bo beta nsem? Bemvendé bese ba ye bo nta’ane mam asu na bemvendé bebaé be ke laan a mongô ate, nsamba a bebiaé bé be ne bekristen. b Bemvendé ba ye jeñe na be yeme mintyi’ane bebiaé be nga nyoñ asu na be volô mone wop na a  kôñelane nlem. Nge mongô ate a vô’ôlô melebe bebiaé bé a tyendé asimesane dé a mimboone mié, bemvendé bebaé be ne tyi’i na bebiaé be ke ôsu a volô mone wop. Nde fe, ke bebiaé mbe Zambe a nga ve mbe’e ya lebe bone bap nye’an été. (Deut. 6:​6, 7; Mink. 6:20; 22:6; Éphé. 6:​2-4) Mvuse ya valé, bemvendé ba ye bo be jeñe’e na be yeme nge bebiaé ba ve mone wop mvolane wo yian. Ve jé bemvendé be ne bo nge mongô a te bo beta nsem a kôñelane ki nlem a ke ôsu a bo jam é ne abé? Éyoñe te nje ñhe émo’o bemvendé ja ye laan a mongô ate nsamba a bebiaé bé be ne bekristen.

“YÉHÔVA A WÔ’Ô BÔTE MINTAÉ NYA ABUII, A MVAMANE FE BE”

19. Aval avé bemvendé be ne jeñe na be vu Yéhôva éyoñe ba laan a môt a te bo nsem?

¹⁹ Bemvendé be bili mbe’e mise me Yéhôva ya ba’ale ékôane bekristene mfuban. (1 Cor. 5:7) Ba jeñe fe na be volô bôte ba bo minseme na be kôñelane minleme nge ba kañese. Éyoñe ba volô bôte bete, bemvendé ba ke ôsu a tabe ndi na be ne tyendé. Amu jé? Amu ba kômbô vu Yéhôva, nnye “a wô’ô bôte mintaé nya abuii, a mvamane fe be.” (Jacq. 5:11) Tame yen avale nlômane Jean ô nga liti aval été nsisim éte. Ô nga tili na: “A ayôme bone dam, ma tili mia mame ma asu na mi bo teke bo nsem éziñ. Ve nge môt a bo nsem, bi bili mvolô wongane be Zambe, a ne zôsô, nnye a ne Yésus Krist.”—1 Jean 2:1.

20. Jé bia ye yen ayé’é da su’ulane meyé’é ya Nkume mmombô a bete nyi?

²⁰ Éngôngole jam é ne na, biyoñe biziñ, kristen é ne bene kôñelane nlem. Éyoñe nalé a boban, ba yiane vaa nye ékôane bekristen. Jé bemvendé be ne bo éyoñ avale jam éte da kui? Bia ye bi éyalane ya nsili ôte ayé’é da su’ulane meyé’é ya Nkume mmombô a bete nyi.