Nlômane Paul ô nga tili bekristene ya Thessalonique na: “Ve nge môt éziñ a bene tôñe melebe bia ve mia a zene ya kalate nyi, taba’ané ntyel a môt ate.” (2 Thes. 3:14) Ôsusua, bi mbe bi jô’ô na abendé éte é ne asu bemvendé étam. Éyoñe môt éziñ a mbe a kele’e ôsu a biasé metiñe ya Kalate Zambe akusa bo be mbe be va’a nye melep éyoñ ése, be mbe be bo’o nkañete wo liti na ékôane bekristene ja yiane tabe nye ntyel. Mvuse ya valé, bobejañ a besita be nji be be beta yeñ a avale môt éte.

Ve ntyendan éziñe wo te yiane boban. Teke bisô na melebe me Paul me mbe me fombô’ô jame môt ase ya ékôane bekristen a yiane bo éyoñ a tele avale bité éziñ. Ajô te, é nji be é sili’i na bemvendé be bo nkañete wo liti na ékôane bekristene ja yiane tabe ntyel a avale môt éte. Amu jé avale bi mbe bi wô’ô 2 Bethessalonicien 3:14 da selan a avale bia wôk éyoñe ji? Tame yene jame Paul a mbe a kômbô’ô jô éyoñ a nga ve melebe mete.

Paul a nga jô na bôte béziñe ya ékôane bekristene be “nji wulu avale da yian.” Be mbe be biasé’é melebe ya Kalate Zambe. Éyoñ a nga jome be, a nga ve be abendé di: “Nge môt éziñ a nji kômbô saé, a nji yiane di.” Bôte béziñe be mbe be bene’e saé na be nyoñe ngap a bebien a too ke na be mbe ngule ya bo de. Nde fe, be mbe be kobô’ô éza mam. Aval avé bekristene be mbe be yiane lep avale bôt éte?—2 Thes. 3:​6, 10-12.

Paul a nga jô na: “Taba’ané ntyel a môt ate.” Éfia Grec ba belane je va ja tinane na be mbe be yiane jeñ avale môt éte a tabe de ntyel. Paul a nga ve abendé éte asu ékôane bekristen ése, sa ke bemvendé étam. (2 Thes. 1:1; 3:6) Ajô te, môt ase ya ékôane bekristen a mbe a yene’e na mojañ éziñ a tôñe ki miñye’elane ya Kalate Zambe, a mbe ve nyoñe ntyi’ane ya bo te “ke ôsu a yeñ” a avale môt éte.

Ye nalé a tinane na be mbe be yiane nyoñe môt ate ane nyu ba te vaa ékôane bekristen? Momo, amu Paul a nga beta jô na: “Kelané ôsu a ve nye mebendé amu a ne monyañe wônan.” Ajô te, kristen éziñ é mbe ve tyi’i na ja ye ke ôsu a yeñ a avale môt éte bisulane nge ke ésaé nkañete, ve na ja ye ke yeñ a nye biyoñe mimvômane nge ke biyoñe bife. Amu jé? Paul a nga jô na: “Asu na a wôk ôson.” E sa’ale mojañ ate a mbe ve bo na a wôk ôson amu mboone wé a jeñe na a tyendé.—2 Thes. 3:​14, 15.

Aval avé bekristene ya melu ma be ne tôñe melebe mete? Jam ôsu bia yiane yem é ne nge môt ate a ne avale môte Paul a nga jô de, môt a nji “wulu avale da yian.” A nji be a kobô’ô ajô ya bôte mia be be mia yene ki mam avale da nge bôte be ne bo mame mone môte wôé ya nlem a kañese ki, a too ki na be nji tyame miñye’elane nge ke metiñe ya Kalate Zambe. Nde fe, a nji be a kobô’ô ajô ya bôte be nga bo mame me nga balé wo. Ve Paul a mbe a kobô’ô ajô ya bôte be mbe be vañe’e bo melebe ya Kalate Zambe melo.

Melu mangane ma, nge bia yene kristen éziñ é bili fulu éngana’a, a biabebiene bia ye tyi’i na bia vômane ki nge bo mame mefe a nye. Mbôl a ne ntyi’ane wo fombô biabebien, bi ne tyi’i na bia ye kate bôte befe nge ô vaa ve bôte ya nda bôte jangane be ne Bengaa be Yéhôva. Ve bia ye ke ôsu a yeñ a avale môt éte bisulane nge ke ésaé nkañete. Nge a tyendé ntabane wé, bia ye beta taté na bia vôman a bo mame mefe a nye.