AYÉ’É 5
JIA 108 Nye’ane Yéhôva ô ne mban
Avale bi ne bu’ubane nye’ane Yéhôva
“Krist Yésus a nga zu be bôte ya si na a zu kôté bebo minsem.”—1 TIM. 1:15.
BETA BE MAME BIA ZU YEN
Ayé’é di bia zu yene mbamba be mame ntañe wo soo bia a avale bi ne liti na bia ve Yéhôva akiba amu nye’ane wé.
1. Jé bi ne bo asu na bi ve Yéhôva nlem avak?
TAME simesane na wo ve môte wo nye’e das é ne ngum aval é too fe te ne abeñ. Ngo’o abim avé nleme wo ye taé wo, nge môt ate a nyoñe dase wo te ve nye a ke wua de kobot été a teke beta fase fas ajô ya été! Ve teke bisô na, wo ye bo angôndô ya meva’a nge a ve wo akiba amu dase wo te ve nye, a nge a yeme belane de. Ñye’elan ôvé bi ne nyoñ été? Yéhôva a nga ve Mone wé asu mfi wongan. Ngo’o abime mevak a yiane bo éyoñ a yen ane bia ve nye akiba amu édima das a nga bo bia a amu nye’ane wé, ñwô ôte ô nga tindi nye na a ve ntañ!—Jean 3:16; Rom. 5:7, 8.
2. Jé bia zu yen ayé’é di?
2 Ve ane éyoñe ja lôt, bi ne taté na bi nga yene dase ya ntañ ane jôme bia yiane je. Nalé a ne bo ve ane bia wua dase Zambe a nga bo bia e kobot été. Bi ne fo’o meva’a ya bi das éte, ve bia viane ke naane de vôme bia ye ke de yene tyi’ibi. Asu na bi bo teke bo avale jam éte, bia yiane bo mbane ya ve Yéhôva ba Yésus akiba amu jame be nga bo asu dangan. Nlô ajô wu ô ne volô bia na bi bo de. Bia zu yen avale bi ne bu’ubane ntañe melu ma a avale bia ye bo ngule ya bu’ubane wô melu ma zu. Bia zu fe yen avale bi ne liti na bia ve Yéhôva akiba amu nye’ane wé e dañedañ éyoñe ya Mesimesa’ane.
AVALE BIA BU’UBANE NTAÑE MELU MA
3. Aval avé bia yene mfi ya ntañe melu ma?
3 Bia yene mfi ya metuna’a Yésus a nga bo. Éve’an é ne na, Yéhôva a jamé minseme miangan a zene ya ntañ. A nji bo ntindane ya jamé bia. Ve a kômbô de bo. Ntili Besam a nga ve Yéhôva akiba amu a nga jamé nye. A nga jô na: “Amu wo, a Tat, ô ne mvaé, a avôle ya jamé.”—Bsa. 86:5; 103:3, 10-13.
4. Yéhôva a nga ve ntañ asu avale bôt avé? (Luc 5:32; 1 Timothée 1:15)
4 Bôte béziñe be ne simesane na be nji yiane njamane Yéhôva. É ne fo’o nalé, amu teke môt éziñe ya be bia a yiane njamane wé. Nlômane Paul ô nga wô’ô jam éte éyoñ ô nga jô na ô “nji bo môt a yiane loobane na nlôman.” Ve ô nga beta jô na: “Me ne môte me ne, a zene ya beta mvame Zambe.” (1 Cor. 15:9, 10) Yéhôva a jamé bia éyoñe bia kôñelane minlem. Amu jé? A nji bo amu bia yiane njamane wé, ve a ne amu a nye’e bia. Nge wo simesane na wo yiane ki njamane Yéhôva, ba’ale’e na Yéhôva a nga ve ntañ, sa ke asu bezôsô be bôt, ve asu bebo minseme ba kôñelane minlem.—Lañe’e Luc 5:32; 1 Timothée 1:15.
5. Ye môt éziñe ya be bia a yiane simesane na a yiane mvame Yéhôva? Timi’in.
5 Teke môt éziñe ya be bia a yiane simesane na a yiane mvame Yéhôva, to’o bi boya abui mimbu ésaé jé. É ne été na Yéhôva a vuane ki mame mese bi boya asu dé. (Héb. 6:10) A nga ve bia Mone wé zezé, sa ke asu na a ya’ane bia ésaé bia bo nye. Nge bi simesane na bia yiane mvame Yéhôva nge na ba yiane nyoñe bia aval é ne ngum aval, a ye bo ve ane bia jô na Krist a nji yiane wu asu dangan.—Ve’ek a Begalate 2:21.
6. Amu jé Paul a nga bo ésaé Yéhôva a ngule jé ése?
6 Paul a mbe a yeme’e na a nji yiane mvame Zambe. Ve amu jé ñhe a nga jô na a nga bo ésaé Yéhôva a ngule jé ése? A nji be a kômbô’ô jô na a yiane mvame Yéhôva, ve a mbe a kômbô’ô liti na a ve Yéhôva akiba amu mvame jé. (Éphé. 3:7) Aval ane Paul, bia ke ôsu a bo Yéhôva ésaé a ayôñ ése, sa ke asu na bi liti na bia yiane mvame jé, ve asu na bi ve nye akiba amu mvam éte.
7. Ntañ ô ne fe bia mfi a zene fé melu ma? (Beromain 5:1; Jacques 2:23)
7 Ntañ ô ne fe bia mfi melu ma, amu wo volô bia na bi bi ngul élat a Yéhôva. a Avale bi nga yen ayé’é ya mvus, éyoñe bi nga bialé, bi nji be bi bili élat éziñ a Zambe. Ve amu ntañ, bi ne bu’ubane “mvo’é a Zambe” a subu nye bebé.—Lañe’e Beromain 5:1; Jacques 2:23.
8. Amu jé bia yiane ve Yéhôva akiba amu mvome ya meye’elan?
8 Tame fase fo’o ve ajô ya jame da é tii a élate jangan a Yéhôva, nje éte é ne mvome bi bili na bia ye’elane nye. Yéhôva a vô’ôlô ki fo’o ve meye’elane bebo bisaé bé ba bo éyoñe be ne ntôkane vôme wua. Ve a vô’ôlô fe meye’elane môt ase ya be bia a bo nye nlem été. Éyoñe bia ye’elan, minleme mia bômbô bia si. Ve sa ke susu’a jame meye’elane ma bo le. Me ne fe bo na élate jangan a Zambe é tu’a bo ngul. (Bsa. 65:2; Jacq. 4:8; 1 Jean 5:14) Éyoñ a mbe si va, Yésus a mbe mbane ya ye’elan amu a mbe a yeme’e na Yéhôva a vô’ôlô nye a na meye’elane mé ma ye bo na élat é ne zañe ba Ésa wé é tu’a bo ngul. (Luc 5:16) Ngo’o abime meva’a bi ne éyoñe bia yeme na, metuna’a me Yésus ma volô na bi bo bemvôé be Yéhôva a laan a nye a zene ya meye’elan!
AVALE BIA YE BU’UBANE NTAÑE MELU MA ZU
9. Aval avé bebo bisaé be Yéhôva ba wulu ba’aba’a a nye ba ye bu’ubane ntañe melu ma zu?
9 Aval avé bebo bisaé be Yéhôva ba wulu ba’aba’a a nye ba ye bu’ubane ntañe melu ma zu? Ba ye bi ényiñe ya nnôm éto. Abui bôte da simesane na nalé a vo’o boban, amu bôte ba wu den a nga ke betoyini mimbu. Ve nsôñane Yéhôva ya atata’a ô mbe na bôte be nyiñe nnôm éto. Nge Adam a nji ye bo nsem, môt éziñ a nji ye simesane na ényiñe ya nnôm éto é ne fo’o ve minlañe mi saison. A to’o é ne ayaé ya simesane na melu ma môt a ne kôme nyiñe nnôm éto, bi ne tabe ndi na bia ye nyiñe nnôm éto melu ma zu. Nalé a ne été amu bia yeme na Yéhôva a nga ya’ane beta tañ, nnye ate a ne ényiñe Mone wé asu na jam éte é boban.—Rom. 8:32.
10. Jé miñwo’on a mintômba mife mia yange a ôjeja’a ôse?
10 Akusa bo bia yeme na, ényiñe ya nnôm éto é ne asu melu ma zu, Yéhôva a yi na bi taté na bia simesan ajô ya nyiñe nnôm éto éyoñe ji. Miñwo’one mi ne ôjeja’a ya ke nyiñe yôp été a Krist asu na ba be nye be jôé si. (Nlitan 20:6) Mintômba mife ki mi ne ôjeja’a ya nyiñe si va e paradis, vôme mintaé a minju’u mia ye bo momo. (Nlitan 21:3, 4) Ye ô ne môte wua ya mintômba mife a bili ndi nleme ya nyiñe nnôm éto si va? Ndi nlem éte é nji bo ndi nleme ya nyoñ éngbwemese! Amu nde nsôñane Yéhôva ôbien ô mbe na bôte be nyiñe si. E nyiñe si va a ye jalé bia minlem a mevak.
11-12. Bibotane bivé bi ntoo ve simesane na bi ne bi paradis? (Fombô’ô fe befôtô.)
11 Tame simesan aval ényiñe jôé ja ye bo paradis si va. Wo ye ke beta ko ôkone woñe nge awu. (Ésa. 25:8; 33:24) Yéhôva a ye jalé mbamba ñyian ase wo ye bi. Mbamba be mame bevé wo ye nye’e ô bo’ok? Ye wo ye kômbô yé’é abui mam a lat a betit? Ye wo ye kômbô yé’é avale ba bôm éko mezik éziñ? Ye wo ye kômbô yé’é avale ba kañe biôm? Teke bisô na da ye sili abui bekañe menda, belôñe menda a bôte ba yem ane ba bé mefup. Da ye fe sili bôte ba bé mefup a ba ba yame bidi, ba ba kôme biôm a ba ba bé mefube mesam a nyoñe ngap a me. (Ésa. 35:1; 65:21) Ényiñe ya nnôm éto ja zu ja ye ve wo fane ya bo mame mese wo kômbô bo.
12 Ngo’o abime meva’a bia ye wôk éyoñe bia ye nyoñe bôte ba ye wômô mesoñ! (Mame mi. 24:15) Tame fe simesan abim avé wo ye bo meva’a ya yé’é abui mam a lat a Yéhôva a zene ya abui bitétéa a nga té. (Bsa. 104:24; Ésa. 11:9) Jame da dañedañ é ne meva’a mese bia ye bi na bia kôme bo Yéhôva ésaé a mone môte ya nlem a ne mfuban! Ye wo ye sube bibotane bite bise amu “meva’a ya nseme me ne fo’o ve étun éyoñ”? (Héb. 11:25) Momo! Bibotane bite bia lôte mame mese bi ne nyume biabebien éyoñe ji. Te vuane na, éyoñ éte, paradis a ye ke beta bo jôme bia yange. A ye bo a ntoo étaba’a jangan ébien. Bi vo’o bi mame mese ma, nge Yéhôva a nji ye liti na a nye’e bia abui a ve bia Mone wé!
Bibotane bivé wo dañe yange paradis? (Fombô’ô abeñ 11-12)
VA’A YÉHÔVA AKIBA AMU NYE’ANE WÉ
13. Aval avé bi ne liti na bia ve Yéhôva akiba amu nye’ane wé? (2 Becorinthien 6:1)
13 Aval avé bi ne ve Yéhôva akiba amu a nga ve bia ntañ? Éyoñe bia telé ésaé jé ôsu ényiñe jangan. (Matt. 6:33) Nde fe, Yésus a nga wu “ndembene ba ba nyiñ, ba yiane ke fe beta nyiñ asu bebien, ve asu nyu a nga wu asu dap a wômô miñwuan.” (2 Cor. 5: 15) Mvame Yéhôva é bili ngume nsôñan, teke bisô na, bi nji kômbô sube nsôñane ya été.—Lañe’e 2 Becorinthien 6:1.
14. Aval avé bi ne tabe ndi a zene Yéhôva a liti bia?
14 Bi ne fe liti na bia ve Yéhôva akiba amu nye’ane wé éyoñe bi too ndi a zen a liti bia. Aval avé bi ne bo de? Éyoñe bi bili na bia nyoñe mintyi’an. Mintyi’ane mite mi ne bo a lat a avale sikôlô bia kômbô bo nge asu ésaé bia kômbô top. Avale biyoñ éte, bia yiane jeñe na bi yeme jame Yéhôva a yi na bi bo. (1 Cor. 10:31; 2 Cor. 5:7) Éyoñe bia liti na bi bili mbunan a zene ya mimboone miangan, mbamba jame bia ye bi a ne na, mbunane wongan a amvôé dangan a Yéhôva bia ye tu’a bo ngul. To’o ndi nleme jangane fe ja ye tu’a bo ngul.—Rom. 5:3-5; Jacq. 2:21, 22.
15. Aval avé bi ne liti na bia ve Yéhôva akiba éyoñe ya Mesimesa’ane?
15 Bi ne beta lañe zene fe bi ne liti na bia ve Yéhôva akiba amu nye’ane wé. Zen éte é ne éyoñe bia belan éyoñe ya Mesimesa’ane na bi liti Yéhôva abim avé bia ve nye akiba amu ntañ. Nge ô vaa na biabebiene bia yiane bo nkômesane ya zu tabe Mesimesa’ane, ve bia yiane fe bañete bôte bevo’o na be zu tabe. (1 Tim. 2:4) Kate’e bôte wo bañete mame ma ye bobane Mesimesa’ane. Ô ne belane bevidéo be ne nlô ajô na, Amu jé Yésus a nga wu? a Simesa’an awu Yésus e jw.org. Bemvendé ba yiane jeñe na be bañete bôte be maneya voé nsisim. Tame simesan abime mevak é ne yôp a si éyoñe mintômba mi Yéhôva miziñe mi nga jañe mia kôñelane minlem a bulan abemba dé été! (Luc 15:4-7) Môse Mesimesa’ane, njeña’ané na bi bo teke batane ve bia bia, ve na bi dañedañe fe batane beyeñe nge ba be kandaneya zu tabe ésulan. Bia yi na be wô’ôtane ve ane be ne nda jap!—Rom. 12:13.
16. Amu jé bia yiane nene ésaé nkañete jangan éyoñe ya Mesimesa’ane?
16 Ye ô ne tu’a nene ésaé nkañete jôé éyoñe ya Mesimesa’ane? Nge ô bo de, yeme’e na a ne mbamba zene ya liti Zambe ba Yésus Krist na wo ve be akiba amu jame be nga bo asu dangan. Ane bia ye tu’a bo abui mam ésaé Yéhôva nde fe a ye su’u bia nalé. Asu’ulane ya été é ne na, ndi nleme jangane ja ye tu’a bo ngul. (1 Cor. 3:9) Jeñe’e fe na ô bo nlañane Kalate Zambe ya Mesimesa’ane a zene ya nsoé kalate ô ne nlô ajô na, Emfasané éfuse ya môs nge ke nkpwas ô ne e kalate bisulan. Ô ne fe belane bifuse biziñe ya été éyoñe wo bo ayé’é étame dôé.
17. Jé ja ve Yéhôva nlem avak? (Fombô’ô fe nka’ale ô ne nlô ajô na, “ Mam ô ne bo ma liti na wo ve Yéhôva akiba amu nye’ane wé.”)
17 É ne été na bité biziñe bi ne kamane wo na ô bo mame bia te yene nlô ajô wu. Ve te vuane na, Yéhôva a nji vek abime mame wo bo a ma bôte bevo’o ba bo; a yene jam é ne wo nlem été. A ne mevak éyoñ a yene na nleme wôé ô ne njalan a mvean akiba asu édima das a nga bo bia, ntañ.—1 Sam. 16:7; Marc 12:41-44.
18. Amu jé bia yiane ve Yéhôva ba Yésus Krist akiba?
18 A ne fo’o ve amu ntañe nde bi bili njamane ya mam abé mangan, nde bi ne bo bemvôé be Yéhôva a bi ndi nleme ya nyiñe nnôm éto. Ngo’o nge bia ve Yéhôva kom ése akiba amu nye’ane wé, ñwô ôte ô nga tindi nye na a ve bia bibotane bite bise. (1 Jean 4:19) Ngo’o nge bia ve fe Yésus akiba, nnye ate a nga nye’e bia angôndô ya abui a ve ényiñe jé asu dangan!—Jean 15:13.
JIA 154 Nye’an wo ye ke man
