AYÉ’É 4
JIA 18 Bia ve akéva amu ntañ
Jé ntañ ô ne ye’ele bia?
‘A zene nyi nje Zambe a nga liti nye’an.’—1 JEAN 4:9.
BETA BE MAME BIA ZU YEN
Bia zu yene mame ntañe wo ye’ele bia a lat a mbamba mefulu me Yéhôva Zambe ba Yésus Krist.
1. Amu jé bia yiane tabe Mesimesa’ane ya awu Yésus mbu ôse?
TEKE bisô na ô too ndi na ntañ ô ne édima das! (2 Cor. 9:15) Ô ne ngule ya bo mvôé Yéhôva Zambe amu Yésus a nga ve ényiñe jé. Ô ne fe bi ndi nleme ya nyiñe nnôm éto. Bi bili abui beamu ya ve Yéhôva akiba, nnye ate a nga ve ntañ amu a nye’e bia angôndô ya abui! (Rom. 5:8) Asu na bi ke ôsu a ve Yéhôva akiba a bo te vuane jame ba Yésus be nga bo asu dangan, Yésus a nga jô bia na bi tabe Mesimesa’ane ya awu dé mbu ôse.—Luc 22:19, 20.
2. Jé bia zu yen ayé’é di?
2 Mbu wu, Mesimesa’ane a ye bobane môs éwônga ya Ngone nyini é too melu 12, mbu 2025. Teke bisô na, bia bese bia kômesane na bia ye tabe Mesimesa’ane. Da ye bo mvo’é nge môt ase ya be bia a kôme nyoñ éyoñe ya fase mame Yéhôva ba Mone wé be nga bo asu dangane besondô ya ôsusua na Mesimesa’ane a boban a besondô bevo’o ba tôñe valé. Ayé’é di, bia zu yene jame ntañe wo ye’ele bia a lat a Yéhôva ba Mone wé. Ayé’é da tôñe valé da ye volô bia bi kôme yem avale bi ne bu’ubane mbamba be mame ba so a zene ya ntañ a avale bi ne liti na bia ve Yéhôva akiba amu ntañ.
MAME NTAÑE WO YE’ELE BIA A LAT A YÉHÔVA
3. Aval avé awu môte wua é mbe ve kôté bemillion be bôt? (Fombô’ô fe fôtô.)
3 Ntañe wo ye’ele bia mam a lat a zôsô Yéhôva. (Deut. 32:4) Aval avé? Tame yene jame di: Amu Adam a nga bo melo, a nga kôé bia nseme wo kee bia awu. (Rom. 5:12) Asu na a kôté bia nsem a awu, Yéhôva a nga bo nta’ane mam asu na Yésus a zu ya’ane ntañ. Ve aval avé metuna’a me môte wua a ne zôsô me ne kôté bemillion be bôt? Nlômane Paul wo jô na: “Fo’o ve aval ane melo me môte wua [Adam] me nga bo na abui bôt é bo bebo minsem, avale da fe mewô’ô me môte wua [Yésus] ma ye bo na abui bôt é loobane zôsô.” (Rom. 5:19; 1 Tim. 2:6) Paul a mbe a kômbô’ô jô na bôte bese be be’e metyi ya abé, a ba yian awu amu zôsôa môte wua a nga bo Zambe melo. Ajô te, é mbe é sili’i na môt a ne zôsô a bo Zambe mewôk a kôté bia nsem a awu.
Môte wua nnye a nga bo na bi bo alo ya nsem a awu. Avale te da da, môte wua nnye a nga kôté bia nsem a awu (Fombô’ô abeñe 3)
4. Amu jé Yéhôva a nji jô’é na mvoñe bôt Adam ja bo nye mewôk é nyiñe nnôm éto?
4 Ye é mbe fo’o é sili’i na Yésus a wu asu na a nyii bia? Nga Yéhôva a mbe ve tyi’i na a jô’é na mvoñe bôt Adam ja bo nye mewôk é nyiñe nnôm éto? Bi ne simesane na mboon ôte ô nga ye bo mbamba zene ya kôm ajô éte. Yéhôva a nji ye liti na a ne zôsô nge a nga ye bo de. Ve mbôl a ne zôsô, a ye ke ve’ele vuane melo Adam a nga vañe nye bo.
5. Aval avé bi ne tabe ndi na Yéhôva a ye bo kom ése mame me ne zôsô?
5 Nge Yéhôva a nji ye ve ntañ a kañese na bone be Adam be nyiñe nnôm éto akusa bo be be’e metyi ya abé, nalé a nga ye liti na a bisi ki memvinda mé a lat a mvaé a abé. Asu’ulane ya été é ne na, bôte be nga ye ko woñe na Yéhôva a ye beta biasé memvinda mé, a na a ye ke bo mam a nga ka’ale na a ye bo melu ma zu. Bôte be nga ye sili bebiene nge Yéhôva a ye fo’o tôé bengaka’a bé bese. Bi nji yiane ko avale jam éte woñ. Amu jé? Amu Yéhôva a nga liti zôsô wé. To’o ane é nji be tyi’ibi asu dé, a mbe a yiane ve Mone wé metuna’a. Ajô te, bi ne tabe ndi na a ye bo kom ése jam é ne zôsô.
6. Jam avé afe ntañe wo ye’ele bia a lat a nye’ane Yéhôva? (1 Jean 4:9, 10)
6 Ntañe wo volô bia na bi yeme na Yéhôva a ne zôsô, ve wo dañedañe fe liti bia abim avé a ne nye’an. (Jean 3:16; Lañe’e 1 Jean 4:9, 10.) Ntañe wo ye’ele bia na Yéhôva a nji yi fo’o ve na bi nyiñe nnôm éto, ve a yi fe na bi bo bibu’a ya nda bôte jé. Yene’e na, éyoñ Adam a nga bo nsem, Yéhôva a nga titane nye nda bôte jé. Nalé a bo na bôte bese ba bialé, be nji bialé be too nda bôte Yéhôva. Ve a zene ya ntañ, Yéhôva a jamé abé dangan, a ye fe su’ulane bo na bôte bese ba bo nye mewôk a buni ntañe be zu nyiine nda bôte jé. To’o den, bi ne bi mbamba élat a Yéhôva a bobenyañe bangane ya nsisim. Teke bisô na bia bu’ubane fo’o nye’ane Yéhôva!—Rom. 5:10, 11.
7. Aval avé minju’u Yésus a nga tôbane mie mia volô bia na bi yem abim avé Yéhôva a nye’e bia?
7 Bi ne tu’a wôk abim avé Yéhôva a nye’e bia éyoñe bia fas abime mintaé a nga wôk éyoñ a nga ve ntañ. Satan a jô na teke mbo ésaé Zambe éziñ a ye ke ôsu a kabetane Yéhôva éyoñ a tele minjuk été. Yéhôva a nga kañese na Yésus a tôbane minjuk ôsusua na a wu, asu na a liti na Satan a ne nlaa minsos. (Job 2:1-5; 1 P. 2:21) Yéhôva a nga yen ane bepharisien a bescribe ba kpwe’ele Yésus, ane bezimbi ba bôme nye a ane ba bômôlô nye élé. Mvuse ya valé, a nga yen ane Mone wé a nye’e a duk akekui awu. (Matt. 27:28-31, 39) A mbe ve kamane na mame mete mese me bo te kui nye. Éve’an é ne na, éyoñe besiñe be Yésus be nga jô na: “Zambe ate a za’a nyii nye, nge a bisi nye,” Yéhôva a mbe ngule ya bo avale be nga jô. (Matt. 27:42, 43) Ve nge Zambe a nga ye de bo, Yésus a nji ye ya’ane ntañ, a bi nga ye nyiñe teke ndi nlem éziñ. Ajô te, Yéhôva a nga kañese na Mone wé a tôbane minjuk akekui a nga suu mvebe.
8. Ye Yéhôva a nga wô’ô mintaé éyoñ a nga yen ane Mone wé a tôbane minjuk? Timi’in. (Fombô’ô fe fôtô.)
8 Bi nji yiane simesane na Yéhôva a wô’ô ki mintaé amu a ne Zambe ya ngul ése! A nga kôme bia a éve’ela jé. Mame méziñe me ne bo na bi wô’ô mintaé a nalé a tinane na Yéhôva fe a yeme wô’ô mintaé. Kalate Zambe a liti na mame bôte ba bo me ne “ve [Yéhôva] ôlune nlem” a ‘tindi nye na a yaa.’ (Bsa. 78:40, 41) Tame fe yene jam é nga kui Abraham ba Isaac. Simesa’ane na, Yéhôva a nga jô Abraham na a ve atyi’i mone dé metuna’a. (Mett. 22:9-12; Héb. 11:17-19) Bi ne ve’ele simesan abime mintaé Abraham a nga wôk éyoñ a mbe a nga zu wôé mone wé Isaac a ôtyeñ. Ngo’o ki abime mintaé Yéhôva a nga yiane wôk, éyoñ a nga yen ane mbia be bôte ba tibili Mone wé a njet ése akekui awu!—Fombô’ô vidéo a ne nlô ajô na, Vuané mbunane wop—Abraham e ngabe baa, e jw.org.
Yéhôva a nga wô’ô mintaé éyoñ a nga yen ane Mone wé a tôbane minjuk (Fombô’ô abeñe 8)
9. Aval avé kalate Beromain 8:32, 38, 39 a volô wo na ô wôk abim avé Yéhôva a nye’e wo a bobenyoñe ya nsisim?
9 Ntañe wo ye’ele bia na teke môt éziñ a ne nye’e bia a dañ abime Yéhôva a nye’e bia, to’o a ne évuvumane jangane bia nye’e nge mvôé jangan. (Lañe’e Beromain 8:32, 38, 39.) Teke bisô na Yéhôva a nye’e bia a dañ abime bia nye’e biabebien. Ye wo kômbô nyiñe nnôm éto? Ba’ale’e na Yéhôva nnye a dañe yi na ô nyiñe nnôm éto. Ye wo kômbô bi njamane ya mame me abé môé? Yeme’e na Yéhôva nnye a dañe yi na ô bi njamane ya mame me abé môé. Susu’a jam a sili bia é ne na, bi liti na bia kañese das a nga bo bia éyoñe bia buni ntañ a bo nye mewôk. Ntañ ô ne fo’o beta ndem a liti abim avé Zambe a nye’e bia. E mfefé émo, bia ye yé’é abui mam afe a lat a nye’ane Yéhôva.—Eccl. 3:11.
MAME NTAÑE WO YE’ELE BIA A LAT A YÉSUS
10. (a) Amu jé Yésus a mbe angôndô ya éyôé a lat a awu dé? (b) Aval avé Yésus a nga fubu jôé Yéhôva? (Fombô’ô fe nka’ale ô ne nlô ajô na, “ Ñwulane ba’aba’a Yésus ô nga fubu jôé Yéhôva.”)
10 Yésus a mbe angôndô ya éyôé amu mame bôte be nga ye jô a lat a Ésa. (Jean 14:31) Yésus a mbe éyôé amu bôte be mbe ve simesane mbia be mam a lat a Ésa wé. Yésus a mbe na a zu wu ane môt a semé ki Zambe nge ane ze mimfaka. Jôme te nje a nga ye’elane na: “Ésa wom, nge nalé a ne boban, bo’o na élaé ji é ke ma ôyap.” (Matt. 26:39) Yésus a nga fubu éyôlé Ésa wé amu a nga kabetane Yéhôva akekui awu.
11. Aval avé Yésus a nga liti na a nye’e bôt angôndô ya abui? (Jean 13:1)
11 Ntañe wo ye’ele fe bia na Yésus a nyoñe bôte ngap e dañedañe beyé’é bé. (Mink. 8:31; Lañe’e Jean 13:1.) Éve’an é ne na, Yésus a mbe a yeme’e na mame méziñe ya ma a nga zu bo si va ma ye ke bo tyi’ibi, e dañedañ awu dé. Ve a nga bo mame mete mese, sa ke ve amu Yéhôva a nga jô nye na a bo me, ve a nga dañe me bo amu a mbe a nye’e bôt. Yésus a nga liti na a nye’e bôt abui amu a nga kañete be, a nga ye’ele fe be a volô be. To’o ngô’é a nga lôt a minlômane mié ôsusua na a wu, a nga nyoñ éyoñe ya sôbe mie mebo, a nga volô mie minlem a kandane ve mie melep. (Jean 13:12-15) A mvuse ya valé éyoñ a mbe a du’u a mintaé a tyelé élé, Yésus a nga ve ze mimfaka é mbe é tyele nye fefele melep éyoñ a nga jô nye na a ye nyiñe paradis. Nlem ô mbe fe ô tyele nye yôp asu nyia wé, ane a nga jô Jean na a li’i a nyoñe ngap a nye. (Luc 23:42, 43; Jean 19:26, 27) Yésus a nga liti beta nye’ane wé sa ke ve a zene ya awu dé, ve a nga liti fe wô a aval a nga nyiñ a bôte nté ôse a mbe si va.
12. Aval avé Yésus a ke ôsu a nyum émiene mam asu dangan?
12 Yésus a ke ôsu a nyum émiene mam asu dangan, akusa bo a nga wu “éyoñe jia ya biyoñe bise.” (Rom. 6:10) Aval avé? A ke ôsu a saé asu na bi bu’uban abui mbamba be mame da so a zene ya ntañ. Tame ñhe yene mam a bo. A ne Njôô wongan, Beta prêtre wongan, a ne fe nlô ya ékôane bekristen. (1 Cor. 15:25; Éphé. 5:23; Héb. 2:17) A ke ôsu a tôkane miñwo’on a beta nsamba bôt, a a ye mane bo ésaé éte ôsusua na beta étibila’a a man. a (Mat. 25:32; Mr 13:27) A ke fe ôsu a volô ôlo ô ne mewôk a fe’e na ô ve bia bidi ya nsisime bia volô bia na bi wulu ba’aba’a a Yéhôva. (Matt. 24:45) A ye ke ôsu a saé asu mfi wongane to’o Éjôé jé ya toyini mimbu. Yésus a nga ve ényiñe jé ése asu dangan. A ne fo’o édima dase da so bia be Yéhôva.
KELE’E ÔSU A YÉ’É
13. Aval avé ô ne ke ôsu a yé’é mam a lat a nye’ane Yéhôva ba Yésus be bili asu dangan?
13 Ô ne ke ôsu a yé’é mam a lat a nye’ane Yéhôva ba Yésus be bili asu dangane nge wo nyoñ éyoñe ya fase mame be nga bo asu dôé. Éko éziñe mbu wu éyoñe ya Mesimesa’ane, ô ne nyoñ éyoñe ya lañe nkañete wua nge abui minkañete da kañete ényiñe Yésus. Te jeñe na ô lañ abui bekabetôlô éyoñe jia. Lañe’e ôte’etek a jeñe na ô yene mame mefe ma liti amu jé bia yiane nye’e Yéhôva ba Yésus. Jeñe’e fe na ô kañete bôte bevo’o mame wo yé’é.
14. Avale kalate Besam 119:97 a liti, aval avé minjeñane mi ne volô bia na bi ke ôsu a yé’é mame ma fombô ntañ a miñye’elane mife ya Kalate Zambe? (Fombô’ô fe fôtô.)
14 Nge ô tabeya benya mejôô den a nga ke abui mimbu, ô ne sili womiene nge ô ne fo’o kôme beta yé’é mimfefé mi mam a lat a minlô mejô ô nga yem aval ane zôsô Zambe, nye’ane wé a ntañ. Nya ajôô a ne na, bi vo’o kui na bi mane yeme mame mese a lat a minlô mejô mite a mife. Ajô te, jé ô ne ñhe bo? Jeñe’e na ô tu’a bu’ubane mame mese ô ne yé’é bekalate bangan. Bo’o minjeñan éyoñe wo yen éfus éziñe ya Kalate Zambe ô nji tu’a wôk. Ane môse wo lôt, nyoñe’e éyoñe ya fase mame wo te yé’é a jeñe na ô yeme jame mame mete ma ye’ele wo a lat a Yéhôva, Mone wé a nye’ane ba nye’e wo.—Lañe’e Besam 119:97.
To’o bi tabeya benya mejôô den a nga ke abui mimbu, bi ne yé’é mimfefé mi mame mife a lat a ntañ, mi ne bo na bi tu’a ve Yéhôva ba Yésus akiba amu jame be nga bo (Fombô’ô abeñ 14)
15. Amu jé bia yiane ke ôsu a jeñe bidima bi mame ya Kalate Zambe?
15 Te bili ate’e nge ô nji yene mfefé jam éziñ, nge jame da nambe wo éyoñ ése wo tabe na wo lañe Kalate Zambe, nge ki éyoñe wo bo minjeñan. Bi ne jô na ô ne ane môt a jeñ or. A ôjibi ôse, bôte ba jeñ or be wô’ô lôt abui mewolo nge ke abui melu ôsusua na ba yene fo’o ve bone mefese me or. Ve ba ke ôsu a bo ésaé jap, amu ba yeme na mone fes or ase be ne yen a ne angôndô ya édima asu dap. Mfefé jam ôse bia yé’é Kalate Zambe ô ne angôndô ya édima a dañ or! (Bsa. 119:127; Mink. 8:10) Ajô te, kele’e ñhe ôsu a tôñe nta’ane mame wôé ya nlañane Kalate Zambe a ôjibi ôse.—Bsa. 1:2.
16. Aval avé bi ne vu Yéhôva ba Yésus?
16 Nté wo yé’é, jeñe’e mezene ya tôñe mame wo yé’é. Éve’an é ne na, ô ne vu zôsô Yéhôva éyoñ ô nji bo ôbangam. Jeñe’e na ô vu nye’ane Yésus a nye’e Ésa wé a bôte bevok, éyoñ ô ne nkômesane ya tôbane minjuk asu éyôlé Yéhôva a éyoñe wo ve womien asu bobenyoñe ya nsisim. Jeñe’e fe na ô vu Yésus éyoñe wo kañete bôte bevok, ndembene be fe be ne bi fane ya kañese beta édima dase Yéhôva a nga bo bia.
17. Mame mevé bia ye yen ayé’é da zu?
17 Bia ye tu’a nye’e Yéhôva ba Yésus nge bia ke ôsu a yé’é mam a lat a ntañ. A be fe ba ye tu’a nye’e bia. (Jean 14:21; Jacq. 4:8) Ajô te, nkelané ôsu a yé’é mam a lat a ntañ a zene ya mame mese Yéhôva a ve bia. Ayé’é da tôñe valé, bia ye yene mbamba be mame béziñe ntañe wo soo bia a avale bi ne ve Yéhôva akiba amu nye’ane wé.
JIA 107 Zambe a ne mbamba éve’ela mfa’a ya nye’an
a E kalate Beéphésien 1:10 Paul a kobô ajô ya étôkane ya “biôme bi ne yôp.” Mame Paul a jô ma selan a ma Yésus a jô me e Matthieu 24:31 a Marc 13:27 éyoñ a kobô ajô ya ba be ne “mintoban.” Paul a kobô ajô ya éyoñe Yéhôva a tobe bone bé ya nsisim a wo’o be mbon a mfufube nsisim. Yésus ki a kobô ajô ya éyoñe miñwo’one mia su’ulane mia ye tôkane yôp été éyoñe ya beta étibilia’a.
