SYLVIANE a ne nkpwa’a mefan, a bili mimbu 27, a jô na: “Éyoñ me mbe me wô’ô minlañe bemvôé bam be nga ke su’u ésaé vôme bekañete mbamba foé ba jemban, me mbe me kômbô’ be. Ve me mbe me buni’i na, me me vo’o bo de.”

Ye mia fe mi wô’ô wô’ôtan ane Sylviane? Ye mia fe mia kômbô ke su’u ésaé nkañete vôm éziñ, ve mia ko woñe ya bo te tôé nsôñan ôte? Te mia sulu mo si! Yéhôva a volôya bebo bisaé bé betoyini na, be dañe mam me mbe me ndeñele’ be na, be nene ésaé nkañete jap. Enkelané Madagascar, ékôte si nyini ya bi bia dañ anene si se, a yen ane Yéhôva a nga volô bebo bisaé bé béziñ.

Mimbu awôm mi lôteya mi, bekpwa’a mefan a bekañete mbamba foé a lôte 70, be so’o mesi 11 *, be nga zu su’u ésaé nkañete si ya Afrika éte, vôme bôte ba semene Kalate Zambe. Ja’a bekañete ya vôm ate fe, be nga mialan a nlam ôse na, be’e fe be su’u ésaé nkañete beta ékôte si ate. Bi tame zu vô’ôlô bevo’o béziñ ya été.

Louis ba Perrine, belu’u be bili mimbu 30 a mvuk, be nga kôlô France na ba ke Madagascar. Valé be jaéya fas avale be ne nene ésaé nkañete jap, ve Perrine a mbe a ko woñe ya ke si fe. A jô na: “Me mbe me ko woñe ya ke vôme me nji yeme môt. Me nji be me kômbô’ô li’i nda bôte jam, akônda dam, nda jam, a mam mese me mbe me maneya yembane me. Nya ajô a ne na, woñe wom ñwô me mbe me yiane dañe wosane wô.” Mbu 2012, Perrine a nga dañe woñe wé, ane ba Louis be nga ke. A wô’ôtan aya éyoñe ji? “Éyoñ ma fas, me ne jô na mbunane wom ô nga tu’a nen, amu me nga yene wo Yéhôva ényiñe jangan.” Nnôm a jô na:  “Mesimesa’ane ôsu bi nga bo Madagascar, beyé’é Kalate Zambe bangan awôm be nga so!”

Jé é nga ve be ngule ya jibi minjuk, a ke ésaé jap ôsu? Be nga ye’elane Yéhôva na a ve be ngule ya jibi. (Beph. 4:13) Louis a jô na: “Bi nga kôme yen ane Yéhôva a vô’ôlô meye’elane mangan, a ane a ve bia ‘mvo’é Zambe.’ Bi nga bo ngule ya bem ôsimesane wongan meva’a me mbe me so’o bia ésaé nkañete. Bemvôé bangan ya France fe be nga lôme bia bekalate na ba ve bia ngule nyul.”​—Beph. 4:6, 7; 2 Bec. 4:7.

Yéhôva a nga botan ôjibi Louis ba Perrine. Louis a jô na: “Ngon awômô ya mbu 2014, bi nga tabe Sikôlô Bekristene be ne minlu’an * e France. E tabe sikôlô ate a mbe beta édima das Yéhôva a nga ve bia.” Éyoñ sikôlô a maneya, be nga beta lôme be Madagascar.

Éyoñ Didier ba Nadine be nga kôlô France na ba ke Madagascar mbu 2010, be mbe be lôteya mimbu 50. Didier a jô na: “Bi nga nyoñ ésaé nkpwa’a mefan bi too bisoé, ve mvuse ya valé bi nga yale bone belal. Éyoñ bone bangan be boya benya bôtô, bi nga fas avale bi ne ke su’u ésaé nkañete si fe.” Nadine a jô na: “Me nji be me kômbô’ kandan a bone bam, ve be nga jô bia na: ‘Nge mia ke su’u ésaé nkanete si fe, bia ye wô’ô mia mvaé!’ Mejô mete me nga ve bia ngule ya ke. Ja’a mbôl bia nyiñ ôyap éyoñe ji, bia wô’ô meva’a ya laan a bone bangan éyoñ ése.”

E yé’é Malgache (nkobô ya Madagascar) e nji be tyi’ibi asu Didier ba Nadine. Nadine a bo éngbwañ a jô’ô na: “Bi nji beta bi mimbu 20.” Nde ñhe, jé é nga volô be? Jam ôsu, be nga taté ke akônda ba kobô Fulasi. Éyoñ be nga yene na be nto ngule ya kobô Malgache, ane be nga ke akônda ba kôbô Malgache. Nadine a jô na: “Abui bôt é mbe é nyeke’e é yé’é Bible. Be mbe be va’a bia akéva amu bia zu jome be. Atata’a, me mbe me yene’e jam ete ane biyeyem. Me mbe me nye’e abôta nkañete ete. Me mbe me kôlô’ si me jô’ô mamiene na: ‘Ma kôme wô’ô mvaé ya kui nkañete den!’”

Didier a tyô’ô éyoñ a nga taté na a yé’é Malgache a vioé biyaé. “Me mbe me tebele’ ésulan éziñ, ve me nji be me wô’ô biyalane bobejañ a besita be mbe be va’ak. Me mbe me yeme’ jô ve na, ‘Akiba.’ Éyoñ me veya sita éziñ akéva, bôte be mbe be too nye mvus, be nga taté na ba bo aval étam, na be liti ma na éyalan éte é nji be mvo’é. Ane me nga vôlô ve mojañ mfe nkobô, me ye’elane na a ve mbamba éyalan.”

Beta étôkane ya mbu 2005, Thierry ba ngal Nadia, be nga yen drame a mbe nlô ajô na, “Poursuivez des objectifs qui honorent Dieu.” Éve’ela Timothée é nga nambe be, a ve be nkômbane ya ke su’u ésaé vôme bekañete mbamba foé ba jemban. Thierry a jô na: “Éyoñ drame a maneya, nté bôte be mbe be kute’ mefas, me nga fombô minga wom a sili nye na, ‘Nde bia ke vé?’ Nde a nga jô ma na, nye’e fe a too a fase’ ajô te.” Ane be nga taté na ba jeñe mezene ya tôé nsôñane wop. Nadia a jô na, “Ôte’ete’ ôte’etek, bi nga sé’é biôme biangan, akekui bi nga yian biwolo binyin!”

Nté ane be nga suane Madagascar mbu 2006, ba wô’ô meva’a ya kañete wôé. Nadia a jô na: “Bôte bia kañete ba ve bia ava’a nlem.”

Ve be nga tôbane nju’u éziñ mvuse mimbu misaman. Marie-Madeleine, nyia Nadia, a mbe a nyiñe’e France, a nga ku, a bu’i wo, a ju’u fe nlô. Éyoñ be tatéya laan a dokita wé, be nga sili nye nge a ne zu nyiñe Madagascar. Ja’a mbôl a mbe a mbili mimbu 80, a nga kañese de a mevak. A wô’ô ényiñe ya si fe aya? A jô na: “E nji fo’o bo tyi’ibi éyoñ ése, amu me ne ntutum, ve ma wô’ô mvaé ya bo abime dam akônda. Ve jam da dañ ve ma mevak é ne na, ngo jam ba nnôm be ne ke ôsu a tôé nsôñane wop.”

Rian a bili mimbu 22. A nga yaé Alaotra Mangoro, tisone ya Madagascar vôme jôp da tôô, si ya wôé é ne atek. A mbe atyeñ, a kômbô’ô fe bo beta besikôlô. Ve a nga tyendé ôsimesane wé éyoñ a nga taté na a yé’é Kalate Zambe. A jô na: “Me nga jeñ na me ji’a bi bac, ane me nga ka’ale Yéhôva na, ‘Nge me kabe, mé bo nkpwa’a mefan.’” Éyoñ a kabeya, ane a nga tôé ngaka’a jé. Ba nkpwa’a mefan mfe be nga ke, ane a nga taté na a jeñe bone bisaé, a nyoñe fe ésaé nkpwa’a mefan. A jô na: “Ntyi’an ôte ô mbe ô dañe mintyi’ane mise me mbe me nyoñeya ényiñe jam.”

Ve nda bôte jé é nji wô’ amu jé Rian a nga bene kee sikôlô ôsu. A jô na: “Ésaa wom, ésanga wom, a émvame jam, bese be mbe be yi na, me bo beta besikôlô. Ve me nji be ve fol ésaé nkpwa’a mefane jam a jôm éfe.” Rian a nga jaé kômbô ke su’u ésaé vôm bekañete mbamba foé ba jemban. Jé é nga ve nye nkômban ôte? A jô na: “Miñwuwup mi nga so vôm bi mbe bi too, a mane wube biôm biam bise. Jam ete e nga bo na me fas jôme Yésus a nga jô, a lat a nkôan ‘akum nlame ya yôp.’ Nde me nga tyi’i na, ma zu dañe tôñesane ve akume ya nsisim.” (Mt. 6:19, 20) Ane a nga ke extrême sud ya Madagascar, nkôte nlam ô mbe kiliméta 1 300 a vôm a mbe a too. Ba loone wôé na Antandroy. Amu jé a nga ke wôé?

Ôsusua na ba wube nye biôm, Rian a nga taté ayé’é a bôte ya Antandroy bebaé. A nga yé’é bifia biziñe ya nkobô wop, a mbe fe a simesa’an Beantandroy be ngenan te tame wô’ô foé ya Éjôé. A jô na, “Me nga ja’é Yéhôva ngule ya ke volô be.”

Nné ane a nga kui wôé, meve’ele ve taté. Teke bisaé. Môt éziñ a nga sili nye na: “Ô nga zu jeñe jé va? Bi bia bo bi kôlô’ô va, bi kele’e jeñe bisaé vôme wo so!” Mvus sondô ébaé, Rian a nga ke beta étôkan, teke dolé mo. Môs étôkan é nga man, mojañ éziñ a nga futi nye jôme mfe’e kôt. A mbe abime moné é mbe é yiane na, a nyoñe metua na a bulan, a na, a taté mone makit. Rian a jô na: “Yéhôva a nga volô ma mbamba éyoñ. Me mbe ngule ya ke ôsu a volô bôte na be yeme nye.” Abui ésaé é mbe fe é yiane boban akônda. Rian a jô na: “Sondô ase me mbe me yiane bo nkañete ya mengana  bôt. Ékôane Yéhôva é nga yañele ma.” Azukui den, Rian a nga’an a kañete bôte ya Antandroy ba wô’ô évé ya yeme Yéhôva.

Yéhôva, Zambe ya benya mejôô, a ka’ale na, a ye botane ba bese ba jeñ ébotane si nyô. (És. 65:16) Éyoñ bia jeñ a ngul ése na bi dañ minju’u miziñ, mfa’a ya nene ésaé nkañete jangan, Yéhôva a botane bia. Ye mi ngenan mi tyô’ô Sylviane, sita ya Madagascar bia te kobô nye atata’a? Amu jé a mbe a buni’i na a vo’o tôé nsôñane wé? A jô na: “Abo dame ya mbo nga, é ne étun adañ di ya mbo nnôm. Ma ji’a tek, amu ma feñeke.”

Mbu 2014, Sylviane, ba Sylvie Anne, nkpwa’a mefane mfe ya akônda dé, be nga ke su’u ésaé nkañete mone nlam a mbe kiliméta 85 a vôm be nga too. Akusa bo minjuk, Sylviane a nga tôé nsôñane wé; ngo’o abim abui bibotan a nga bi! A jô na: “Me nga bo ve mbu wua, ane Doratine, minga éziñe bia nye bi mbe bi yé’é Bible, a nga duban étôkane ya alu da.”

Avale minkañete mi mia liti, éyoñ bia ve ngule ya nene ésaé nkañete jangan, akusa bo minju’u bia tôbane mie, ngaka’a Yéhôva nyi ja tôébane be bia: “M’aye ve wo ngu; ya, m’aye volô wo.” (És. 41:10) Asu’ulane y’été é ne na, élate jangan a Yéhôva ja tu’a bo ngul. Nde fe, éyoñ bia su’u ésaé nkañete a nlem ôse, vôm bi too, nge ke si fe, bia kômesan asu bisaé ya nsisim bia yange bia mfefé émo. Didier a jô na: “E su’u ésaé vôme bekañete mbamba foé ba jemban, a yañele bia asu melu ma zu.” Ngo’o nge abui bobejañ da nyoñe ntyi’ane ya ke su’u ésaé vôm bekañete mbamba foé ba jemban!