1. Jam avé Yéhôva a nga jô na da ye boban melu mangane ma?

YÉHÔVA a nga ve nkulan ajô wu a lat a melu bia nyiñe ma: “Bôt awôm ba ye bi, be so’o minkobô mise ya meyoñ, b’aye bi mfa’ éwomane ya si be nyô a ne mone Bejuif, a jô na, Bia ye ke nsamba [wônan, nwt-F] amu bi wô’ôya na Zambe a ne be mia.” (Zac. 8:23) “Mone Bejuif” ba jôô nye va a ne Bekristen be ne miñwo’an. Kalate Zambe a loone fe be na “Israël ya Zambe.” (Beg. 6:16) “Bôt awôme” ba ki be ne bizu’u bi bôte bia ye nyiñe nnôm éto si va. Bekristen bete ba yeme na Yéhôva a nga botane miñwo’an mite, a be ne meva’a ya kañe Zambe fufulu a mie.

2. Aval avé “bôt awôm” ba “ke nsamba” miñwo’an?

² To’o be vo’o mane yem biyôlé miñwo’an mise mia nyiñe si va den, * Bekristen be bili ndi nleme ya nyiñe nnôm éto si va be ne ngule ya “ke nsamba” wop. Aval avé? Bible a jô na: “Bôt awôm” ba ye “bi mfa’ éwomane ya si be nyô a ne mone Bejuif a jô na, bia ye ke nsamba [wônan, nwt-F], amu bi wô’ôya na Zambe a ne be mia.” Éfuse ji ja kobô ajô mone Bejuif wua. Ve bifia “wônan” a “mia” bia liti na be nji kobô ve ajô môte wua. Mone Bejuif a ne nsamba miñwo’an. Bekristene be nji bo  miñwo’an ba zu kañe Yéhôva a miñwo’an mite. Ve be nji tôñe mie tu-nlôô, amu ba kôme yeme na Yésus étam nnye a ne Nliti zene wop.​—Mt. 23:10.

3. Bia zu bi biyalane ya minsili mivé ayé’é di?

³ Mbôle miñwo’an mia bômane bebo bisaé be Yéhôva den, bôte béziñ be ne sili na: (1) Aval avé Bekristen be ne miñwo’an ba yiane yene bebien? (2) Aval avé Bekristene bevo’o ba yiane yene môt a nyoñe fembé a won môse Mesimesa’ane? (3) Ye bia yiane tyelé nleme yôp nge tañe miñwo’an é ne ve nenenen? Bia zu bi biyalane ya minsili mite ayé’é di.

4. Abendé avé bia koone de kalate 1 Becorinthien 11:27-29 Bekristen be ne miñwo’an ba yiane ba’ale, a amu jé?

⁴ Bekristen be ne miñwo’an ba yiane tu’a baa alo abendé bia koone de kalate 1 Becorinthien 11:27-29, Mfefé Nkôñelan. (Lañek.) Aval avé Kristen é ne ñwo’an é ne di fembé nge nyu wone ya Mesimesa’ane “aval é ne te yian”? Nalé a ne kui nge a bo de a too ke na a tyame metiñe me Yéhôva ényiñe jé. (Beh. 6:4-6; 10:26-29) Miñwo’an mia kôme yeme na, asu na be bi ‘ma’ane  Zambe a ka’ale be a zene ya be Krist Yésus,’ ba yiane ba’ale élate jaba a Yéhôva.​—Beph 3:13-16.

5. Bekristen be ne miñwo’an ba yiane yene bebien aya?

⁵ Mbamba nsisime Yéhôva a volô bebo bisaé bé na be bo éjote nyul, sa ke mebun. (Beép. 4:1-3; Beco. 3:10, 12) Ajô te Bekristen be ne miñwo’an be nji yiane buni na ba dañe bôte bevok. Ba yeme na Yéhôva a nji ve be mbamba nsisim a dañe bebo bisaé bé bevok. Be nji yiane ve’e fe’e na mbe ba dañe wô’ô miñye’elane ya Kalate Zambe. Be nji yiane ve’ele kate Kristene fe na é ne ñwo’an a na é ne ngule ya di fembé a nyu wone Mesimesa’ane. Ba tu’a yeme na susu’a Môt a ne tobe bôte ba ke nyiñe yôp a ne ve Yéhôva.

6. Kalate 1 Becorinthien 4:7, 8 a liti na miñwo’an mi nji yiane bo jé?

⁶ Akusa bo miñwo’an mia yene ndi nleme jaba ya ke nyiñe yôp ane beta mvom, be nji yange na bôte bevo’o be yene be ane bezambe. (Beph. 2:2, 3) Ba yeme fe na môte mfe a nji be valé éyoñe Yéhôva a nga tobe be. Ajô te be nji vembe éyoñ bôte béziñ ba sôane na be ne miñwo’an. Amu ba yeme na Kalate Zambe émien a jô bia na bi bo teke ji’a buni môt a kate bia na Zambe a te ve nye ngum avale mbe’e. (Nli. 2:2) Mbôle be nji bo miñyené, Bekristene be ne miñwo’an ba kate ki môt ase ba tôbane nye na be bili ndi nleme ya ke nyiñe yôp. Asu dap, ndi nlem éte é nji bo jame ya bo de éngelezek.​—Lañe’e 1 Becorinthien 4:7, 8.

7. Mam mevé miñwo’an mia yiane sa’ale, a amu jé?

⁷ Bekristene be ne miñwo’an be nji yiane lôt éyoñe jab ése ve a miñwo’an mivok, a nto ve ane be bili ngum ékoane ve asu dap. Be nji yiane ke ba jeñe miñwo’an mife asu na be laan ajô ya ndi nleme jap, nge ke bôndé bone bikôane mfa’a ya yé’é Bible ve be be. (Beg. 1:15-17) Avale mboan ete e ne viane soo mengam akônda Yéhôva. Mboan ôte wo wosane fe ésaé mbamba nsisim a bo mfa’a ya volô bebo bisaé be Yéhôva na be nyiñe mvo’é été be too nlatane jôme jia.​—Bero. 16:17, 18.

8. Amu jé bia yiane tabe ntyel a aval bia nyoñe bobejañe a besita be ne miñwo’an?

⁸ Aval avé bia yiane yene bobejañ a besita be ne miñwo’an? E nji bo mvo’é  na bi kañe môta binam, to’o môt ate a ne monyañe Krist. (Mt. 23:8-12) Éyoñe Bible a kobô ajô bemvendé, a jô bia na bi “vu mbunane wop,” ve a nji jô bia na bi tôñe môt éziñ. (Beh. 13:7) É ne été na Kalate Zambe a jô na bôte béziñ “ba yiane nyoñ ésemen mebim mebaé.” Ve a jô na bi bo de amu ba wulu bia mvo’é, a amu ba “tu’u nyul ésaé ya kañete mbamba foé a ñye’elan,” sa ke amu be ne miñwo’an. (1 Tim. 5:17; Mfefé Nkôñelan) Nge bi dañe wumulu be a bete be yôp, jam ete e ne ndeñele be. * Bi ne fe viane tindi be na be bo mebun. (Bero. 12:3) Bi too ndi na, teke môt éziñe ya be bia a ne kômbô tindi monyañe Krist na a bo avale mbia nsem ete!​—Luc 17:2.

9. Aval avé bi ne liti na bia semé Bekristene be ne miñwo’an?

⁹ Aval avé bi ne liti na bia semé miñwo’ane mi Yéhôva? Bi ne bo de éyoñ bia bo te sili be avale minsili éziñ, ane aval avé be nga bo miñwo’an? Jam ete da fombô ki bia, a bi nji bi na bi yeme de. (1 Bet. 4:11; 2 Bet. 3:11) Bi nji fe yiane simesane na nge Kristen éziñ é ne ñwo’an, nalé a tinane na môte ba nye be ne nlu’an a bibu’a bife ya nda bôte jé, ane bebiaé bé, be’e fe be ne miñwo’an. Ndi nleme ya ke nyiñe yôp é nji bo éli’i ya nda bôt. Yéhôva émien nnye a tobe môt a ve je. (1 Bet. 2:12) Bia yiane fe sa’ale minsili mi ne kolé ôbak. Bi nji yiane sili minga Kristen é ne ñwo’an aval a wô’ôtan éyoñ a simesane na a ye nyiñe nnôm éto si va teke yene nnôm. Bia yeme na mfefé émo, Yéhôva a ye “jalé nkômbane ya jôm ése é vee.”​—Bs. 145:16.

10. Amu jé é ne mfi asu dôé womiene na ô bo te bi fulu ya wumulu mingum mi bôt?

¹⁰ E ne mvo’é asu biabebiene na bi bo teke semé miñwo’an a lôte nné. Aval avé? Kalate Zambe a kate bia na miñwo’ane miziñ mi ne feñelan. (Mt. 25:10-12; 2 P. 2:20, 21) Ajô te nge bia sa’ale fulu ya wumulu mingume mi bôt, bia ye ke tôñe môta binam, to’o môt ate a ne ñwo’an, meyoñ me yeme, nge ke na a jaéya zu a bo Yéhôva ésaé. (Jude 16.) Nalé a ye volô na, nge akiti ôjan a lume Yéhôva mvus, bia ye ke bili atek, nge telé ésaé bia bo Zambe wongan.

11. Jam avé bia yen a lat a tañe miñwo’an?

¹¹ Mimbu ya mvus, tañe bôt é mbe é ja’a fembé a nyu won Mesimesa’ane é mbe é sisi’i. Ve Mimbu mi ndeme lôte mi, tañe jap ja viane bete mbu ôse. Ye jam ete da yiane wo tyelé nleme yôp? Momo. Bi tame zu yen amu jé.

12. Amu jé bi nji yiane ko woñ nge tañe bôte ja di fembé a nyu won môse Mesimesa’ane é ne ve bet?

¹² “[Yéhôva] a yeme ba be ne émbé.” (2 Tim. 2:19) Mbôle bobejañe ba lañe bôte ba di fembé a nyu won môse Mesimesa’ane be nji bo Yéhôva, be vo’o tu’a yem za a ne nya ñwo’ane nge momo. Ajô te, sa ke ba bese ba lañeban tañ éte mbe be ne fo’o miñwo’an, amu bôte béziñe be ne di a nyu be buni’i na be ne miñwo’an nde momo. Jôm ete nje bi wô’ô yene bôte béziñe be mbe be taté’ di fembé a nyu won be su’ulane telé. Bôte bevo’o ki be ne nyoñe ngab a fembé a wone ya Tawôla Tate amu be ne minkôkone mi  nlô, ôkon ôte ki ô nga viane bo na be buni na ba ye ke jôé a Yésus yôp. Nya ajôô a ne na bi nji tu’a yem abim miñwo’an é li’iya si va.

13. Ye Kalate Zambe a kate bia abime miñwo’an da ye bo é ngenane si va éyoñ beta étibela’a a ye taté?

¹³ Miñwo’an mia ye bo mmialane mimfa’a minyine ya si éyoñe Yésus a ye zu nyoñe mie na mi ke yôp. (Mt. 24:31) Bible a jô fo’o na melu ya asu’ulan, abime minwo’an éziñ da ye bo e ngenane si va. (Nli. 12:17) Ve a nji kate bia tañe mia ye bo éyoñe beta étibela’a a ye taté.

14. Kalate Beromain 9:11, 16 a liti na jam avé bia yiane kôme wôk a lat a ntobane miñwo’an?

¹⁴ Yéhôva émiene nnye a tyi’i éyoñ a tobe miñwo’an. (Bero. 8:28-30) Yéhôva a nga taté na a tobe miñwo’an mvuse ñwômane miñwuane Yésus. A ne ve ane Bekristene bese ya ntete mimbu ôsu be mbe miñwo’an. Ve mintete mimbu mi nga tôé valé, abui bôt e mbe e jô’ô ve anyu anyu na e ne Bekristen a too ke na be nji be be tôñe’e Krist. Akusa bo nalé, Yéhôva a nga tobe mone doé benya Bekristene ya éyoñ éte na be bo miñwo’an. Bekristene bete be mbe ane “nya fese” Yesus a nga jôô nye na a nga yaé zañe mbia élok. (Mt. 13:24-30) Ataté melu ya asu’ulan, Yéhôva a nga ke ôsu a tobe bôte na be bo ngabe ya nsamba bôte 144 000. * Ajô te, nge Yéhôva a tyi’i na a tobe môte na a bo ñwo’an mon éyoñ ôsusua asu’ulan, bi nji bi na bia kat a fe’e  jé. (Lañe’e Beromain 9:11, 16.) * Bi nji yiane vu bebo bisaé Yésus a nga jôô be bive’an a nga nyoñ. Be nga kobô menyiñ a wô’ ôlun amu masa wob a nga vu ve bôte be nji taté ésaé mame tyé ane be abeñe ma’an.​—Mt. 20:8-15.

15. Avale kalate Matthieu 24:45-47 a liti, ye miñwo’an mise mmie mi ne ngabe ya ‘ôlo ô ne mewôk a fek’? Timi’in.

¹⁵ Sa ke miñwo’ane mise mmie mi ne ngabe ya ‘ôlo ô ne mewôk a fek.’ (Lañe’e Matthieu 24:45-47.) Aval ane e mbe e boba’an ntete mimbu ôsu, Yéhôva ba Yésus ba belane mone doé bôte na a ve abui bôte bidi a ye’ele be. Fo’o ve bone miñwo’an tyôtyoé mmie mi nga tili éfase Kalate Zambe e ne nkobô Grek. Aval ete fe, fo’o ve mone nsamba miñwo’an nnye a bili mbe’e ya “ve bôte bidi éyoñ ja yian.”

16. Jé bia te yen ayé’é di?

¹⁶ Jé ayé’é di da te ye’ele bia? Da te ye’ele bia na Yéhôva a nga tyi’i na a ve bizu’u bi bôt ényiñe ya nnôm éto si va, wônaa a ve ke mone nsamba bôte ndi nleme ya ke jôé a Krist e yôp. Yéhôva a ve bebo bisaé bé bese ma’an, be kusa bo ngabe ya “mone Bejuif” nge ke nyi ya “bôt awôm.” A sili bôte bete bese jôme jia ve na be bo nye mewôk a ba’ale élat a nye. Bese ba yiane bi fulu éjote nyul. Ba yiane fe kañe nye fufulu a nleme wua. Ba yiane saé a ngul ése asu na mvo’é é bo akônda. Nté asu’ulane ya mbia émo nyi da ke da subu, enkelané ôsu a bibane na bi kañ Ésaa wongan a tôñe bibô’a mebo bi Yésus ane bôte ya “mbame wua.”​—Jean 10:16.