1. Beta étôkane ya mbu 1935 a nga volô ésoé éziñ na é bo jé?

ÉSOÉ éziñ é nga duban mbu 1926, e zu koon é bili mimbu 18. Bebiaé bé be mbe Beyé’é Bible, aval be mbe be lo’ene Bengaa be Yéhôva éyoñ éte. Be mbe be bili bone betan, befam belal a binga bebaé. Be nga yale bese benya mejôô été. Mone ndômane nyi a mbe a ja’a fembé a nyu wone ya Mesimesa’ane, avale bôte bese be mbe be bo’o éyoñ éte. Ve ñyenane mame wé ô nga tyendé éyoñ a nga wô’ô nkañete ô mbe nlô ajô na, “Bizu’u bi bôt.” Mojañ Rutherford nnye a nga bo nkañete ôte beta étôkane ya mbu 1935, e Washington, D.C., U.S.A. Ñye’elan ôvé ô nga vebane beta étôkan ate?

2. Mfefé ñye’elan ôvé Mojañ Rutherford a nga timine nkañete wé?

² Mojañ Rutherford a nga timine nsamba Bible a loene kalate Nlitan 7:9 na “bizu’u bi bôt.” Azukui éyoñ éte, be mbe be buni’i na nsamba ôte ô ne ngabe baa ya ba bé ke nyiñe yôp. Mojañ Rutherford a nga belane Bible na a liti na nsamba bôt ôte wo ye ke ke nyiñe yôp. A nga jô na a ne mintômba mife * mii dañe beta étibela’a a nyiñe nnôm éto si va. (Nli. 7:14) Yésus a nga jô na: “Me ne fe mintômba mife,  mi ne te tabe abemba di: ma yiane zuu fe mie, mia ye wô’ô tyiñe jam; mia ye fulane mbame wua a mba’ale wua.” (Jean 10:16) Mintômba mife mi ne Bengaa be Yéhôva be bili ndi nleme ya nyiñe nnôm éto si va. (Mt. 25:31-33, 46) Bi tame ñhe zu yen aval avé mfefé ñye’elan ôte ô nga tyendé ényiñe mone ndômane bia te jôô nye atata’a, a ji bebo bisaé be Yéhôva ya éyoñ éte.​—Bs. 97:11; Min. 4:18.

3-4. Jé abui bobejañ e nga yemelan mbu 1935, a amu jé?

³ Éyoñ éte a zu bo na, nkañete zañ, Mojañ Rutherford nye’ bôte bese na: “Ye ba bese be bili ndi nleme ya nyiñe nnôm éto si va be ne tebe tetele?” Mojañ éziñ a nga tabe étôkan éte a nga jô na, ba be nga tebe be mbe abui adañe ba be nga li’i be too si. Ane Mojañ Rutherford a nga jô na: “Ye mi lôô! Bizu’u bi bôte ñhe bi!” Aba ve jaé a mevak. Ba be nga tebe be nga yemelane na, be bili ki ndi nleme ya ke nyiñe yôp. Be mbe be yeme’e na be nji bo miñwo’an. Tyé kpwaa, bôte 840 be nga duban, abui y’été e too ngabe ya mintômba mife.

⁴ Nné ane nkañete ôte ô nga man, mone ndômane bia te jôô nye atata’a a bobejañe befe be nga tyi’i na ba ye ke beta di fembé a nyu wone ya Mesimesa’ane. Mojañ éziñ a nga jô na: “Me nga kandane di fembé a nyu wone Mesimesa’ane ya mbu 1935, amu me nga yemelane na me nji bo ñwo’an, ve na me bili ndi nleme ya nyiñe nnôm éto si va, a saé a bôte befe na é beta bo Paradis.” Bobejañ be nga tabe étôkan éte be ne tyiñe jia a nye. (Bero. 8:16, 17; 2 Bec. 1:21, 22) Ataté éyoñ éte, tañe mintômba mife é ne ve nenenen, a mia ke ôsu a su’u miñwo’ane mi li’iya si va.

5. Aval avé Yéhôva a yene ba ba telé ndiane fembé a nyuane wone ya Mesimesa’ane?

⁵ Aval avé Yéhôva a yene bobejañ be nga telé ndiane fembé a nyuane wone ya Mesimesa’ane mvus mbu 1935? Nge ke Ngaa Yéhôva ya den a telé ndiane fembé a nyuane wone ya Mesimesa’ane, amu a su’ulane yemelane na a nji bo ñwo’an? (1 Bec. 11:28) Bobejañe béziñ be jaéya zu ba di fembé a nyu won ete amu be nji be be tu’a yeme ndi nleme jap. Ve nge be su’ulane yemelane na be nji bo miñwo’an a mem ékobe jap, be telé ke ndiane fembé a nyuane wone ya Mesimesa’ane, be kele fe ôsu a bo Yéhôva ésaé a nlem ôse, teke vaa nge beté, Yéhôva é ve be ndi nleme ya nyiñe nnôm éto si va. To’o ba di ki fe fembé a nyu wone ya Mesimesa’ane, ba ke ôsu a tabe Tawôla Tate mbu ôse amu ba kômbô ve Yéhôva ba Yésus akiba.

6. Yésus a nga jô beéngele na be bo jé?

⁶ Nté beta étibila’a a zu a subu, e ne mfi na bi beta yene jame kalate Nlitan 7 a jô a lat a miñwo’an a mintômba mife. Yésus a jô beéngele na be ke ôsu a bi bivuñulu binyine ya  éndaman. Be nji yiane suu bivuñulu bite nté miñwo’ane mise mi nga’ane teke bi sitame ja su’ulan. (Nli. 7:1-4) Yéhôva é ve miñwo’ane mvome ya bo bejôô a beprêtre yôp. (Nli. 20:6) Yéhôva, Yésus a beéngele be ne ôjeja’a ya yen ane miñwo’ane mia bi ma’ane map.

7. Jean a nga yene za e kalate Nlitan 7:9, 10, a bôte bete be mbe be bo’o jé? (Fombô’ô fôtô ya ékô’ôla.)

⁷ Éyoñ a maneya kobô ajô bôte 144 000 bé bo beprêtre a bejôô yôp, Jean a ne fe’e ne vema. Amu jé? Amu a yene “bizu’u bi bôt” bia ke tulane Harmaguédon. Bôt bete be ne abui a be vo’o lañe be. (Lañe’e Nlitan 7:9, 10.) Bible a jô na be be’e “bifumulu melô’ô” amu be nga ba’ale bebiene “mfuban” mbia émo Satan nyi, a be nga ke ôsu a wulu ba’aba’a a Yéhôva ba Yésus. (Jc. 1:27) Ba yôtane na be nga nyiiban amu jame Yéhôva ba Yésus be nga bo asu dap. Bible a liti fe na be bili mebui melene mo. Nalé a liti na ba semé Njôô Yéhôva a nga top, Yésus Krist.​—Fombô’ô fe Jean 12:12, 13.

8. Jé kalate Nlitan 7:11, 12 a jô a lat a Yéhôva, Yésus, a beéngele?

⁸ Lañe’e Nlitan 7:11, 12. Bôte be nga bo aya yôp éyoñe be nga yene bizu’u bi bôt? Jean a jô na nlem ô nga jaé be a mevak éyoñe be nga yene bizu’u bi bôt bi lu’u Zambe. Nalé a liti na Yéhôva, Yésus, a beéngele bé vak éyoñe bé yene bizu’u bi bôt bi tula’ane beta étibila’a a bi ényiñe ya melu mese.

9. Kalate Nlitan 7:13-15 a liti na ésaé évé bizu’u bi bôte bia bo éyoñe ji?

⁹ Lañe’e Nlitan 7:13-15. Jean a nga jô na bizu’u bi bôt bi “nga sôbe melô’ô map a bo me mfubane metyi me Mone ntômba été.” Nalé a tinane na be bili mbamba mone môte ya nlem, a na Yéhôva a wô’ô ésaé ba bo nye mvaé. (És. 1:18) Ba buni ntañ a be bili ngul élat a Yéhôva. (Jean 3:36; 1 P. 3:21) Ba bo fe Yéhôva ésaé “môse ba alu” e temple wé ya nsisim a ne si va. Mbe fe ba dañe nyoñe ngab ésaé nkañete, be liti’ a zen éte na ba telé Éjôé Zambe ôsu ényiñe jap.​—Mt. 6:33; 24:14; 28:19, 20.

10. Ndi nleme fé bizu’u bi bôt bi bili, a ngaka’a Yéhôva fé bé yen ane ja tôéban?

¹⁰ Bizu’u bi bôte bii tulane beta étibila’a bi bili ndi nleme na Zambe é ke ôsu a nyoñe ngab a be. Amu jé? Amu ‘Nyô a too éto njôan a ye buti be a tabernacle wé.’ Éyoñ éte nje mintômba mife mii yen ane ngaka’a Yéhôva nyi ja su’ulane tôéban: “[Zambe] a ye fimi mili’i mese mise map; a awu da ye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”​—Nli. 21:3, 4.

11-12. (a) Bela’ane Nlitan 7:16, 17 na ô liti bibotan bia yange bizu’u bi bôt. (b) Jé mintômba mife mi bili fane ya bo môse Mesimesa’ane, a jé ja tindi be na be bo de?

¹¹ Lañe’e Nlitan 7:16, 17. Melu ma, bebo bisaé be Yéhôva béziñ ba wu zaé amu be ne azoé, nge ke amu ba nyiñe mesi bita bi né. Bevo’o be ne mimbôk amu mbunane wop. Ve be ne mevak amu ba yeme na éyoñ bé tulane  Harmaguédon, ba ye ke beta jembane jôme ya di môs éziñ, to’o mfa’a ya minsôn, to’o mfa’a ya nsisim. Éyoñ é tyam mbia émo Satan nyi, Yéhôva é bo na bizu’u bi bôt bi bo teke wô’ôtan ényane ya ayaa dé. Mvuse beta étibela’a, Yésus é kee bie vôme “menjeñe ya mendime ya ényiñe [ya nnôm éto]” me né. Ye wo yene fo’o beta mvome bizu’u bi bôte bi bili le nga? Bi ne kôme bo te wu môs éziñ!​—Jean 11:26.

¹² Mintômba mife mia yiane fo’o kôme ve Yéhôva ba Yésus akiba amu étua ndi nlem be bili. To’o Yéhôva a nji tobe be na be ke nyiñe yôp, a nye’e ba be miñwo’ane bese avale da. Bese be bili fane ya lu’u Yéhôva ba Yésus. Be wô’ô bo be bo’o de éyoñe ba tabe Mesimesa’ane mbu ôse.

13-14. Amu jé bia bese bia yiane tabe Mesimesa’ane ya awu Yésus?

¹³ Den, nge bôte 1 000 ba tabe Mesimesa’ane, éko éziñ môte wua étame nnye a ne di fembé a nyu won. E lañe lañe mekônda bia koone môt a di fembé a nyu wone ya Mesimesa’ane. Nalé a tinane na abui bobejañ e bili ndi nleme ya nyiñe si va nnôm éto. Nde amu jé ba tabe Mesimesa’ane? Ke a ne ve ane éyoñe wo tabe abô’ alu’u nyo mvo’é; wo ke amu wo nye’e beluk a amu wo kômbô su’u be. Aval ete da da, mintômba mife mia tabe Mesimesa’ane amu mia nye’e Yésus a miñwo’an, a amu mia kômbô su’u be. A zen éte, ba ve fe Yésus akiba asu ntañ, amu ñwô wo ve be fane ya nyiñ nnôm éto si va.

¹⁴ Mintômba mife mia tabe fe Mesimesa’ane amu mia kômbô tôñ atiñe Yésus a nga ve minlômane mié éyoñ a bondé’ Tawôla Tate. A nga jô mie na: “Boka mi bo’ane jame di mi simesa’ane ma.” (1 Bec. 11:23-26) Ajô te, nté miñwo’ane mi nga’ane si va, mintômba mife mii ke ôsu a tabe Mesimesa’ane. Ve ba bo ke de étam, ba bañete fe bôte befe na be zu simesan awu Yésus a be.

15. Aval avé ô ne ve Yéhôva ba Yésus duma môse Mesimesa’ane?

 ¹⁵ Bia ve Yéhôva ba Yésus duma a zene ya bia bia yia a meye’elane bia bo môse Mesimesa’ane. Mbu wu, nkañete ya Mesimesa’ane wé bo nlô ajô na: “Va’a Krist ba Zambe akéva amu mba jam be nga bo asu dôé!” Nkañete ôte wé tu’a ve wo nkômbane ya bo ô va’a Yéhôva ba Yésus akéva. Nté fembé a wone bii lôt, abui ya be bia dé tabe ne mieññ, a fas atinane y’été. Bii simesane na Yéhôva a nga lôme Mone wé si va na a zu wu a butane bia. (Mt. 20:28) Teke bisô na môt ase a nye’e Zambe ba Mone wé a ne ôjeja’a ya tabe Mesimesa’ane mbu ôse.

16. Ye miñwo’an a mintômba mife mia selan mise me Yéhôva? Timi’in.

¹⁶ Bi kusa bo miñwo’an nge ke mintômba mife, Yéhôva a nye’e bia bese avale da. Bia bese bi ne édima mise mé. A nji ve ntañ ve asu miñwo’an, ve Mone wé a nga wu asu bia bese. Nsela’ane a ne ve na bevo’o bé ke nyiñe yôp, ba bevo’o ki bé li’i be bu’uban ényiñe si va. Minsamba mite mibaé mia yiane ke ôsu a wulu ba’aba’a a Yéhôva ba Yésus. (Bs. 31:23) Yéhôva a ve fe môt ase ya be bia nsisime wé avale da. A fombô ke na nyina a ne ñwo’an nge momo. Éyoñ ése da sili na a ve mbo ésaé wé mbamba nsisim, a bo de.

17. Jé miñwô’an mia yange a ôjeja’a?

¹⁷ Miñwo’an mia bialé ki a ndi nleme ya ke nyiñe yôp. Yéhôva nnye a ve be ndi nlem éte. Ba ye’elan a simesane ndi nleme jap môs ôse, amu be ne ôjeja’a ya ke nyiñe yôp. To’o ba bôé nlô aya, be vo’o yeme jôm ba ye funane je yôbe wôé. (Beph. 3:20, 21; 1 Jean 3:2) To’o nalé, ba feb ôkaé na be ke koone Yéhôva, Yésus, beéngele, a miñwo’ane ba be be bé jôé.

18. Mintômba mife mia yange jé a ôjeja’a?

¹⁸ Mintômba mife mi ne ôjeja’a ya nyiñe nnôm éto si va. Môta binam ase a bialé a ndi nlem éte. (Ec. 3:11) Be ne ôjeja’a ya bo na si é beta bo Paradis. Ba vebe ze ve na môs ôte ô kui, amu be ne ôjeja’a ya lôñe menda map, a bé mefube map, a yale bone bap, a nyiñ ba be be nnôm éto, teke  fe beta wô’ô na môt a kon. (És. 65:21-23) Ba simesan avale bé ke ba wulu Paradis, be yene’e minkôl, bilé, asôé, be yé’é fe abui mam a lat a bitétéa bi Yéhôva. Éyoñ ke ba simesane na élat ba be Yéhôva jé bo ve nenenen, mevak ma fuluku be minlem.

19. Mesimesa’ane ya awu Yésus a ve môt ase ya be bia fane ya bo jé, a nyi ya mbu wu é boban éyoñ évé?

¹⁹ Yéhôva a nga ve mbo ésaé wé ase angôndô ya mbamba ndi nlem asu melu ma zu. (Jr. 29:11) Môse Mesimesa’ane wo ve bia bese fane ya ve Yéhôva ba Yésus akiba amu be nga bo na bi bo ngule ya nyiñ nnôm éto. Teke nsulane mfe a ne mfi ényiñe Bekristen ane Mesimesa’ane ya awu Yésus. Mbu wu, bii bo ésulan éte mame ngô’é ya môs Éwônga, Ngone lale é too melu 27. Bobejañe béziñ bé bo je tyi’ibi amu ba nyiñe mesi bijôé bia tyili ki ésaé jangan. Ve mesi bia tôban étibila’a, bobejañ bé yene nju’u ya bo Mesimesa’ane ya awu Yésus. Wônaa bobejañe bevok bé lôte lôte Mesimesa’ane menda mimbôk. Bia tame mekônda mese, mengôs bekañete mese, a bobejañ bese bé bo Tawôla Tate étam, mbamba Mesimesa’ane ya awu Yésus! Te mia vuane na éyoñ ése mia tabe Mesimesa’ane, Yéhôva, Yésus, beéngele, a miñwo’ane mi nto yôp, ba fombô mia be muñu’u.