1-2. (a) Môs ôvé bi wô’ô dañe simesane bôte bangane be nga wu? (b) Jé Yésus a nga bôndé alu a nga kandane lôte si va a beyé’é bé?

 TO’O môt bia nye’e a wuya den a ntoo abui mimbu, bi ngenane bi simesa’ane nye. Bi wô’ô dañe simesane nye éyoñe môs a nga wu wo kui.

² Mbu ôse, bemillion be bôte ya si se meku’u menyin ba tôkan asu na be simesan awu môte bia nye’e abui: Yésus Krist. (1 P. 1:8) Bia sulan asu na bi simesane môt a nga ve ényiñe jé ane ntañ asu na a kôté bia abé a awu. (Mt. 20:28) Yésus nnye a nga jô beyé’é bé na be li’i be simesa’ane awu dé. Alu a nga kandane lôt a beyé’é bé, a nga bôndé ngume nta’ane mam éyoñ a nga jô be na: “Boka’an mi boane jame di, mi simesa’ane ma.”​—Luc 22:19

3. Jé bia zu yen ayé’é di?

³ Éyoñe bia tabe Mesimesa’ane, bi wô’ô yene na fo’o ve mone doé bôt étam nnye a bili ndi nleme ya ke nyiñe yôp. Ve bemillion be bôte bevo’o ki be wô’ô tabe Mesimesa’ane môs ôte be bili ndi nleme ya nyiñe si va. Ayé’é di, bii yen amu jé minsamba mi bôte mite mibaé mi bili éva’a ya tabe Mesimesa’ane mbu ôse. Bii yene fe bibotane bia bi éyoñe bia tabe Mesimesa’ane. Bia zu taté yen amu jé miñwo’ane mia tabe Mesimesa’ane.

4. Amu jé miñwo’ane mia di belet a nyu wone ya Mesimesa’ane?

⁴ Mbu ôse, Bekristene be ne miñwo’ane ba di belet a nyu won môse Mesimesa’ane. Amu jé ba bo de? Asu na bi yalane nsili ôte, bia yiane simesane mame Yésus a nga bo alu a nga kandane lôte si va. Mvus abô’ô Paska, a nga bôndé ésulan bia loone dene na Tawôlô Tate. A nga ve minlômane mié 11 mi nga ke ôsu a wulu ba’aba’a a nye belet a wone na be di a nyu. A nga kobô be ajô bilate bibaé: Mfefé élat a Élat asu Éjôé. * (Luc 22:19, 20, 28-30) Bilate bite bia ve minlôman a mone doé bôte mfe fane ya bo bejôô a beprêtre yôp été. (Nli. 5:10; 14:1) Fo’o ve miñwo’ane mi li’iya si va mmie mia di belet a nyu wone ya Mesimesa’ane, amu be fe be ne benyoñe ngabe ya bilate bite bibaé.

5. Jé Bekristen be ne miñwo’ane ba yem a lat a ndi nleme be bili?

⁵ Jam afe da bo na miñwo’ane mi bi éva’a ya tabe Mesimesa’ane e ne amu môs ôte ba simesane ndi nleme jap. Yéhôva a nga ve be mbamba ndi nlem, nyi ya ke nyiñe yôp nnôm éto, be bili menyule me vo’o wu nge ke tyamban. Bé ke jôé yôp ba be Yésus a miñwo’ane mivok. A jame da dañ e ne na, bé bi beta mvome ya yene Yéhôva émien! (1 Bec. 15:51-53; 1 Jean 3:2) Miñwo’ane mia yeme na Yéhôva a nga tobe be na be ke nyiñe yôp, ve asu na be bi ma’ane map, ba yiane wulu ba’aba’a a Yéhôva akekui awu. (2 Tim. 4:7, 8) Éyoñe miñwo’ane mia simesane ndi nleme jab, mevak ma jaé be nlem. (Tt. 2:13) Jé ke bi ne jô a lat a “mintômba mife”? (Jean 10:16) Amu jé be fe ba tabe Mesimesa’ane?

6. Amu jé mintômba mife mia tabe Mesimesa’ane?

⁶ Mintômba mife mia di ki belet nge nyu wone ya Mesimesa’ane, ve mi ne meva’a ya tabe ésulan éte. Mbu 1938 ñwô be nga bi mbañete éyoñ ôsu na be zu tabe Mesimesa’ane. Nkume mmombô a bete ya Ngone lale é too alu da ya mbu 1938, a mbe a jô’ô na: “E ne mvo’é na mintômba mife mi tabe ésulan éte, a yene mam ma boban. . . . Jam ete e ne mfi a dé soo fe be abui mevak.” Aval ane bôte be wô’ô bo meva’a ya zu tabe abô’ô aluk, mintômba mife mi ne meva’a ya tabe môse Mesimesa’ane.

7. Amu jé mintômba mife mi ne ôjeja’a ya vô’ôlô nkañete ya Mesimesa’ane?

⁷ Mintômba mife mi’i fe mia tabe Mesimesa’ane amu mia simesane ndi nleme jap. Be ne ôjeja’a ya vô’ôlô nkañete bé bo môs ôte, amu wé kobô ajô mame Krist a miñwo’ane bé bo asu bôte ba ye nyiñe si va éjôé ya toyini mimbu si. Yésus Krist ba be miñwo’ane bé bo na si é veñesane paradis, a na abé e ne bia metyi e vas. Ngo’o abime meva’a mintômba mife mia wô’ô éyoñe mia simesan aval ényiñe jé bo éyoñe  bengaka’a be Yéhôva bese bé mane tôéban, aval ane ba bia koone be Ésaïe 35:5, 6; 65:21-23; a Nlitan 21:3, 4. Éyoñe ba simesan avale bé bu’uban ényiñe mfefé émo a bôte ba nye’e, jam ete da yemete ndi nleme jap a lat a melu ma zu, a ve be nkômbane ya bo Yéhôva ésaé nnôm éto.​—Mt. 24:13; Beg. 6:9.

8. Jam avé afe da bo na mintômba mife mi tabe Mesimesa’ane?

⁸ Jam afe da bo na mintômba mife mi tabe Mesimesa’ane e ne na, mia nye’e miñwo’an a mia kômbô su’u mie. Kalate Zambe a nga jô na ngul élate ja ye bo zañe miñwo’an a bobenyañe bap bevok be bili ndi nleme ya nyiñe si va. Aval avé? Bia zu yene mam ma bo’olô de.

9. Zacharie 8:23 a liti na mintômba mife mia yen miñwo’an aya?

⁹ Lañe’e Zacharie 8:23. Nkulan ajô ôte wo kôme liti aval avé mintômba mife mia yene bobejañ a besita be ne miñwo’an. Miñwo’an mmie Kalate Zambe a loone na “mone Bejuif” a “nsamba wôé.” (Bero. 2:28, 29) Wônaa mintômba mife ki mmie mi ne ‘bôte awôm ba so minkobô mise ya meyoñ.’ Ba “ye bi” miñwo’an a kañe Yéhôva nsamba a mie. Jôme te nje ñhe môse Mesimesa’ane, mintômba mife mia sulan a miñwo’an mfa’a ya liti na be ne mbame wua.

10. Aval avé Yéhôva a nga tôé nkulan ajô bia koone wô Ézékiel 37:15-19, 24, 25?

¹⁰ Lañe’e Ézékiel 37:15-19, 24, 25. Yéhôva a nga tôé ngaka’a éte éyoñ a nga bo na miñwo’an a mintômba mife mi saé fufulu nleme wua. Nkulan ajô ôte wo kobô ajô alé abaé. Ba be bili ndi nleme ya ke nyiñe yôp be ne ane ôlé “Juda” (bejôô bôte ya Israël be mbe be so’o mvoñe bôte Juda). Ba be bili ndi nleme ya nyiñe si va nnôm éto be ne ane ôlé “Éphraïm.” * Yéhôva a mbe na a lat minsamba mite mibaé asu na mi bo ‘ôlé wua.’ Nalé a tinane na bese bé bo Njôô wua ésaé, Krist Yésus. Mbu ôse, miñwo’an a mintômba mife mia tabe Mesimesa’ane, sa aval ane mimbame mibaé, ve ane “mbame wua” ô bili “mba’ale wua.”​—Jean 10:16.

11. Aval avé “mintômba” Matthieu 25:31-36, 40 a jôô mie mia liti na mia su’u bobenyañe be Krist?

¹¹ Lañe’e Matthieu 25:31-36, 40. “Mintômba” Yésus a jôô mie bifuse bite mi ne bezôsôô be bôte ba nyiñe melu ma su’ulan a be bili ndi nleme ya nyiñe nnôm éto si va. Be ne ngabe ya “mintômba mife,” a ba su’u bobenyañe be Krist be li’iya si va a nleme wop ôse. Ba dañe liti de éyoñe ba nyoñe ngap beta ésaé nkañete a bobane si ése.​—Mt. 24:14; 28:19, 20.

12-13. Aval avé mintômba mife mia su’u bobenyañe be Krist?

¹² Mbu ôse mintômba mife mia liti fe na mia su’u bobenyañe be Krist éyoñe mia nyoñe ngap ôbane nkañete ô wô’ô boban bone besondô ôsusua na môse Mesimesa’ane wo kui, asu na be bañete bôte ya si se na be zu tabe Mesimesa’ane a be. (Fombô’ô nka’ale ô ne nlô ajô na “ Ye ô boya fo’o nta’ane mam asu Mesimesa’ane?”)  Ba bo fe ngômôtô asu na ésulane ya Mesimesa’ane é bobane mekônda ya si se, to’o mekônda me nji bi bôte ba di fembé a nyu wone ya Mesimesa’ane. Mintômba mife mi ne meva’a ya su’u bobenyañe be Krist avale te. Mintômba mife mia yeme fe na éyoñe mia su’u be nalé, Yésus a yene ve ane nnye mia suk.​—Mt. 25:37-40.

¹³ Mame mevé mefe ma tindi miñwo’an a mintômba mife na mi tabe Mesimesa’ane?

14. Aval avé Yéhôva ba Yésus be nga liti na ba nye’e bia abui?

¹⁴ Bia ve Yéhôva ba Yésus akéva amu be nga nye’e bia. Yéhôva a nga bo abui mam asu na a liti na a nye’e bia, ve a nga bo jam éziñe da dañe ma mevo’o mese. A nga liti bia beta nye’ane wé éyoñ a nga lôme édima Mone jé na é zu tôbane minju’u a wu asu dangan. (Jean 3:16) Yésus fe a nga liti na a nye’e bia abui amu a nga kañese ve ényiñe jé asu dangan. (Jean 15:13) Bi vo’o bulane Yéhôva ba Yésus jôm éziñ asu beta nye’ane be nga liti bia. Ve mam bia bo môs ane môse me ne liti na bia ve be akéva. (Beco. 3:15) Bia tabe fe Mesimesa’ane asu na bi bo teke vuan abim avé ba nye’e bia, a asu na bi liti fe be na bia nye’e be.

15. Amu jé miñwo’an a mintômba mife mia nyane ntañ?

¹⁵ Bia nyane ntañ. (Mt. 20:28) Miñwo’ane mia nyane ntañ amu ñwô ô nga bo na be bi ndi nleme ya ke nyiñe yôp. Mbôle ba buni ntañ, Yéhôva a yene be zôsôô, a nga nyoñe fe be ane bone bé. (Bero. 5:1; 8:15-17, 23) Mintômba mife fe mia nyane ntañ. Mbôle ba buni ntañ, ba yené mfubane mise me Zambe, be ne ngule ya ve nye ékaña’a ja yian, a be bili ndi nleme ya bo nsamba bôte wo ye “so beta [étibila’a].” (Nli. 7:13-15) Miñwo’an a mintômba mife mia liti na mia nyane ntañ éyoñe ba tabe Mesimesa’ane mbu ôse.

16. Amu jé bia bese bia kômbô tabe Mesimesa’ane?

¹⁶ Jam afe da bo na bi tabe Mesimesa’ane e ne amu bia kômbô bo Yésus mewôk. Bi kusa bi ndi nleme fé, bia bese bia kômbô tôñe abendé Yésus a nga ve éyoñ a nga bôndé Tawôlô Tate a jô’ô na: “Boka mi bo’ane jame di, mi simesa’ane me été.”​—1 Bec. 11:23, 24.

17. Aval avé Mesimesa’ane ma volô bia na bi subu Yéhôva bebé?

¹⁷ Bia tu’a subu Yéhôva bebé. (Jc. 4:8) Avale bia te mane yen, Mesimesa’ane ma ve bia fane ya simesane mbamba ndi nleme Yéhôva a nga ve bia, a mia volô fe bia na bi bindi beta nye’an a nga liti bia. (Jr. 29:11; 1 Jean. 4:8-10) Éyoñe bia bo nalé, nye’ane bia nye’e Yéhôva wo tu’a nen, a élat é ne zañe jangan ja tu’a yem.​—Bero. 8:38, 39.

18. Éyoñe bia bindi éve’ela Yésus, nalé a ve bia nkômbane ya bo jé?

¹⁸ Bia kômbô vu Yésus. (1 P. 2:21) Bone melu ôsusua na ésulane ya  Mesimesa’ane ja boban, bi wô’ô nyoñ éyoñe ya bindi minkañete mia liti mame Yésus a nga bo sondô jia ôsusua na a wu, môs awu dé, a ñwômane miñwuane wé. Wônaa, nkañete ki ô wô’ô bobane môse Mesimesa’ane wo ngôné nye’ane Yésus a nga liti bia. (Beép. 5:2; 1 Jean. 3:16) Éyoñe bia yen aval avé Yésus a nga nyum émiene mam, a éyoñe bia bindi mbamba éve’ela wé, bia bi nkômbane ya “wulu aval ane a nga wulu.”​—1 Jean 2:6.

19. Aval avé bi ne ba’ale amvôé dangan a Yéhôva?

¹⁹ Bia tu’a yi na bi ba’ale amvôé dangan a Yéhôva. (Jude 20, 21) Bia ba’ale amvôé dangan a Yéhôva éyoñe bia ve ngul ése na bi bo nye mewôk, éyoñe bia fubu jôé dé, a éyoñe bia ve nye nlem avak. (Min. 27:11; Mt. 6:9; 1 Jean 5:3) Mesimesa’ane ma tu’a ve bia nkômbane ya nyiñe môs ane môs avale dé liti Yéhôva na, bia kômbô ba’ale amvôé dangan a Nye nnôm éto.

20. Amu jé bia tabe Mesimesa’ane?

²⁰ To’o bi bili ndi nleme ya ke nyiñe yôp nge ke si va nnôm éto, bi bili abui beamu ya tabe Mesimesa’ane mbu ôse. Éyoñe bia sulane môse Mesimesa’ane, bia simesan awu môte bia nye’e abui, Yésus Krist. Jame da dañ e ne na, bia simesane beta nye’ane Yéhôva a nga nye’e bia éyoñ a nga ve Mone wé ane ntañ. Mbu 2022, Mesimesa’ane mé bobane môse Nkul éwônga, Ngone nyini é too melu 15. Bia nye’e Yéhôva ba Mone wé, ajô te, môse Mesimesa’ane ya awu Yésus, teke jam éziñ afe da ye bo mfi mise mangan a lôte na bi tabe ésulan éte.