1. Éyoñ évé nje miñwo’one mise mia ye ke yôp été?

 DEN a ntoo abui mimbu, bebo bisaé be Yéhôva ba sili bebiene na: ‘Éyoñ évé nje miñwo’one mia su’ulan mia ye ke yôp?’ Bi mbe bi taté simesane na, mvuse bita ya Armaguédon, miñwo’one miziñe mia ye li’i mi nyiñi’i Paradis si va abim éyoñ éziñ. Ve bi nga yé’é Nkume mmombô a bete ya Ngone zangbwale é too melu 15, mbu 2013 na, miñwo’one mise mia ye bo mi ntoo yôp été ôsusua na bita ya Armaguédon bia taté.—Matt. 24:31.

2. Nsili ôvé môt éziñ a ne sili, a jé bia zu yen ayé’é di?

² Ve môt éziñ a ne sili émiene na: Jé ja ye kui “mintômba [mi Krist] mife” mia ye ke ôsu a kañe Zambe si va éyoñe ya “beta étibila’a?” (Jean 10:16; Matt. 24:21) Den, bobejañ a besita be ne ngabe ya “mintômba mife” be ne ko woñ amu be nji yeme môt a ye volô be, nge tebele be éyoñe bobejañ a besita be ne miñwo’one ba ye mane ke yôp. Bi tame zu yene minkañete ya Kalate Zambe mibaé mi ne bo na be simesane nalé. Mvuse ya valé, bia ye yen amu jé be nji yiane ko woñ.

JAM AVÉ DA YE KE KUI MINTÔMBA MIFE?

3-4. Bôte béziñe be ne bôône nsili ôvé, a amu jé?

³ Bôte beziñe be ne simesane na mintômba mife mia ye kôlô benya mejôô éyoñe bobejañe be ne miñwo’one ba tebele Tin ékôane ba ye beta bo valé asu na be tebele bia. Éko éziñe minkañete miziñe ya Kalate Zambe mi ne bo na be ko woñ. Bi tame zu kobô ajô minkañete mibaé. Nkañete ôsu ô ne wu beta prêtre Jehojada. A mbe éwôlô mbo ésaé Zambe. Ba minga wé, Joschabeath be nga ba’ale Joas éyoñ a mbe mongô a volô nye na a bo avale njô bôte da ko Zambe woñ. Éyoñe Jehojada a mbe a vee, Joas a mbe a kañe’e Yéhôva a  bo’o fe mbamba be mam. Ve nne ane Jehojada a nga wu, Joas a nga ji’a kôñelan a bo mbia môt. A nga vô’ôlô melebe mbia bivete bi nga ve nye, a lume Yéhôva mvus.—2 Minl. 24:​2, 15-19.

⁴ Nkañete baa wo kobô ajô bekristene ya ntete mimbu baa. Nlômane Jean ñwô ô mbe nlôman ô nga su’ulane wu, ve éyoñe Jean a mbe a vee, a nga volô abui bekristene na é jibi minjuk a ke ôsu a bo Yéhôva ésaé. (3 Jean 4) Avale minlômane mi Yésus mivok mi nga bo, Jean a nga saé ngul asu na mbia mboon a bifuse miñye’elane bi bo te nyiin ékôane bekristen. (1 Jean 2:18; 2 Thes. 2:7.) Ve mvus awu nlômane Jean, abui bekristen é nga bo beapostat. Mimbu mi nga tôé valé, beapostat bete be nga taté na ba ye’ele bifuse miñye’elan, a nalé a nga bo na bôte béziñe be bo mbia be mame bikôane bekristene bise.

5. Jé bi nji yiane jô a lat a minkañete mibaé mi?

⁵ Nde ye minkañete ya Kalate Zambe mite mia liti na éyoñe miñwo’one mia ye mane ke yôp, mintômba mi Krist mia ye li’i si va mia ye taté na mia bo mbia be mam avale Joas a nga bo, nge ki na mia ye bo beapostat aval abui bekristene ya ntete mimbu baa be nga bo mvus awu minlôman? Éyalan é ne na momo! Bi ne tabe ndi na éyoñe miñwo’one mia ye mane ke yôp, mintômba mife mia ye ke ôsu a kañe Yéhôva, a na Yéhôva fe a ye ke ôsu a nyoñe ngap a be. Amu jé bi ne tabe jam éte ndi?

NYA ÉKAÑA’A A YE KI NDAMAN

6. Ayé’é di da zu kobô ajô biyoñe bilal, biyoñe bite bi ne bivé?

⁶ Amu jé bi ne tabe ndi na jôm éziñe ja ye ki ndamane nya ékaña’a, to’o éyoñe biyoñe ya minjuk bia yange bia ôsu bia ye kui? Amu Kalate Zambe a liti na éyoñe ji ja kôme selane a ji bone be Israël, a na ja kôme fe selan a éyoñ é nga lôte mvus awu minlôman. Ajô te, bi tame zu kôme yene mame me nga bobane biyoñe bite bilal: (1) éyoñe bone be Israël, (2) mvus awu minlôman, a (3) éyoñe jangan, “éyoñe biôme bise bia ye taté na bia kômban.”—Mame mi. 3:21.

7. Amu jé bone be Israël be mbe be wulu ba’aba’a a Yéhôva be nji bili atek éyoñ ayoñ Israël a bejô bôte be nga tyik na ba bo mame me ne abé?

⁷ Éyoñe bone be Israël. Ôsusua na Moïse a wu, a nga jô bone be Israël na: “Ma yeme na, éyoñe me wuya, mia ye ndamane miabebiene nya ndamane, a yale fé a li’i zene me nga mane tiñeti mia.” (Deut. 31:29) Moïse a nga jô fe be na, nge be bo éngana’a ba ye ke minkôm. (Deut. 28:​35, 36) Ye mejô mete me nga tôébane fo’o? Ôwé. Mvuse mintete mimbu, abui bejô bôt é nga bo mame me mbe abé mise me Yéhôva, a bone be Israël be nga tôñe be mbia boon ate. Jôme te nje Yéhôva a nga lum ayoñe bôte dé mvus, nde fe a ndi beta kañese na bejô bôte be beta tebe Israël éyoñ éziñ. (Ézé. 21:​25-27) Ve bone be Israël be mbe be wulu ba’aba’a a Yéhôva be nga bi ngule nyul éyoñe be nga yen ane jame Zambe a nga jô da tôéban.—Ésa. 55:​10, 11.

8. Ye bia yiane vembe nge ékôane bekristene ya ntete mimbu baa é mbe é bili bôte be mbe be wosane benya mejôô? Timi’in.

⁸ Mvus awu minlôman. Ye bia yiane vembe nge évus ékaña’a é nga nyiin ékôane bekristene ya ntete mimbu baa? Momo. Amu Yésus a nga jô na abui bôte da ye wosane benya mejôô. (Matt. 7:​21-23; 13:​24-30, 36-43) Paul, Pierre, a Jean bese be nga jô na nkulan ajô Yésus ôte ô nga taté na wo tôéban ntete mimbu ôsu É.J. (2 Thes. 2:​3, 7; 2 P. 2:1; 1 Jean 2:18) Ntete mimbu baa É.J., ékôane bekristen é nga jaé a bôte ba wosane benya mejôô. Mvus awu nlôman  ô mbe ô su’ulan, bekristene be mbe be wosane benya mejôô be nga su’ulane bo ngabe jia ya Beta babylone, safulu bivuse miñyebe. Ane nkulan ajô Yésus a nga bo ô nga tôéban éyoñe baa.

9. Aval avé ba loon éyoñe bia nyiñe ji, a mame mevé me nga boban éyoñ éte?

⁹ “Éyoñe biôme bise bia ye taté na bia kômban.” Éyoñe jangane ja kôme selan a éyoñe bone be Israël, ja selane fe a éyoñe bôte ba wosane benya mejôô be nga nyiin ékôane bekristen été ntete mimbu baa É.J. Aval avé ba loon éyoñe jangan? Bi ne taté loon éyoñe bia nyiñe ji na, “melu ma su’ulane” ya mbia nta’ane mame nyi. (2 Tim. 3:1) Ve Kalate Zambe a liti na éyoñe ja dañe mfi a lôte biyoñe bite bise, a éyoñe ja dañ ayap é nga taté fe éyoñ éte ébien. A ja ye ke ôsu akekui Éjôé Yésus ja ye bo na môta binam a beta bo zôsô, a bo na si ése é bo Paradis. Ba loon éyoñ éte na, éyoñe “biôme bise bia ye taté na bia kômban.” (Mame mi. 3:21) Éyoñ éte é nga taté mbu 1914. Nde jé é nga kômban? Yésus a nga tebe Njô yôp été éyoñ éte. Nalé a nga bo na Yéhôva a bi môt a ne éjiane Jé, môte ya mvoñe bôte Njô bôte David. Ve sake jam éte étame nde Yéhôva a nga kôm. Yéhôva a nga volô fe bebo bisaé bé ya si va na be beta taté na ba kañe nye aval a nye’e. (Ésa. 2:​2-4; Ézé. 11:​17-20) Ve ye nya ékaña’a a ye beta tôbane mewosan?

10. (a) Jé Kalate Zambe a jô a lat a nya ékaña’a ya melu mangane ma? (Ésaïe 54:17) (b) Amu jé minkulane mejô mite mia bôône bia minleme si?

¹⁰ Lañe’e Ésaïe 54:17. Tame fase nkulan ajô wu: “Te ke étyé mewosan ba kôme na be wosane wo ja ye bo jôm!” Mejô mete ma tôébane den. Mbamba mejô bia zu beta lañe valé ma tôébane fe melu mangane ma: “Bone bôé bese, Yéhôva nnye a ye ye’ele be, a mvo’é ya bone bôé ja ye bo anen. Wo ye telébane zôsô été. . . . Wo ye bo te ko woñ; a tabe angôndô ôyap, amu a ye bo te zu wo bebé.” (Ésa. 54:​13, 14) To’o Satan émien, “zambe ya émo ji,” a nji bi ngule ya telé ésaé bebo bisaé be Yéhôva ba bo asu na be volô bôte bevok na be yeme Yéhôva. (2 Cor. 4:4) Nya ékaña’a a maneya tebe, teke jôm éziñ é ne beta ndamane nye. Nya ékaña’a a tebeya nnôm éto a nnôm éto. Teke étyé mewosan éziñe ba kôme na be wosane bia ja ye bo jôm!

JÉ JA YE BOBAN?

11. Jé ja bo na bi tabe ndi na beta nsamba bôt a ye ke li’i étam éyoñe miñwo’one mia ye mane ke yôp?

¹¹ Jé ja ye boban éyoñe miñwo’one mia  ye ke yôp été? Te vuane na Yésus nnye a ne Mba’ale wongan. Nnye fe a ne nlô ya ékôane bekristen. Yésus a nga kôme jô na: “Môte wua étame nnye a ne Ntebe ôsu wônan, Krist.” (Matt. 23:10) Yésus a jôé yôp été, ve a ye ke ôsu a nyoñe ngap a benya beyé’é bé. Éyoñe Krist émien a bili mame mo, beyé’é bé ba nyiñe si va ba ye bo teke ko jôm éziñe woñ. É ne été na bi nji yeme bone be mame bese be tii a avale Krist a ye tebele ayoñe bôte dé éyoñ éte. Ve bia zu tame yene minkañete miziñe ya Kalate Zambe mi ne bôône bia minleme si.

12. Aval avé Yéhôva a nga nyoñe ngap a bebo bisaé bé (a) mvus awu Moïse? (b) a éyoñ a nga jô Élie na a ke bo nye ésaé éfe? (Fombô’ô fe fôtô.)

¹² Moïse a nga wu ôsusua na ayoñ Israël da nyiine si ya ntiñetan. Nde jé é nga kui ayoñe Zambe? Ye Yéhôva a nga bo teke beta volô ayoñe bôte dé mvus awu Moïse? Momo. Nté ôse be mbe be kele’e ôsu a wulu ba’aba’a a Yéhôva, Yéhôva a mbe a jalé miñyiane miap. Ôsusua na Moïse a wu, Yéhôva a nga jô nye na a ve Josué mbe’e ya tebele ayoñ Israël. Ve Moïse a nga taté yañele Josué abui mimbu. (Nkôl. 33:11; Deut. 34:9) Nde fe abui bôt afe é mbe ngule ya bo bivete—ya betoyini, bivete ya mintet, bivete ya bewômetan, to’o bivete ya mewôm. (Deut. 1:15) Ayoñe Zambe é nji be é jembane jôm éziñ. Bi tame fe zu yen éve’ela Élie. A nga saé ngul abui mimbu asu na a volô ayoñ Israël na é kañe Yéhôva. Ve mvuse ya valé, Yéhôva a nga jô nye na a ke bo nye ésaé sud ya Juda. (2 Bb. 2:1; 2 Minl. 21:12) Nde ye bôte be mbe be wulu ba’aba’a a Yéhôva meyoñ awôme ya Israël be nga wô’ôtane na be ne étam éyoñ éziñ? Momo. Élie a nga yañele Élisée abui mimbu. Be nga yañele fe “bone bekulu mejô.” (2 Bb. 2:7) Ajô te, abui befam é mbe é wulu ba’aba’a a Yéhôva é mbe nkômesane ya tebele ayoñe Zambe. Yéhôva a nga ke ôsu a nyoñe ngap a bitôtôlô bebo bisaé bié.

13. Ndi nleme fé bi ne koone je kalate Behébreu 13:5b? (Fombô’ô fe fôtô.)

¹³ Nge wo ba’ale minkañete mite mibaé ôsimesan, wo simesane na jé ja ye boban éyoñe miñwo’one mia su’ulane mia ye mane ke yôp? Bi nji yiane ve’ele tyelé minleme yôp. Kalate Zambe a kate bia jam é ne tyi’ibi, ve da bôône bia minleme si: Yéhôva a ye ve’ele li’i ayoñe bôte dé étame si va môs éziñ. (Lañe’e Behébreu 13:5b.) Aval ane Moïse ba Élie, mone nsamba bekristen a ne miñwo’on a tebele bia den, a kôme yene mfi ya yañele bôte bevok. Den a  ntoo abui mimbu, bobejañe ya Tin ékôane be nga yañele befame béziñe be ne ngabe ya mintômba mife na be bo betele. Éve’an é ne na, be nga telé abui besikôlô asu na be yañele bemvendé, bejome bikôane bekristen, bibu’a ya wofise wo tebele Bebéthel, bobejañe ba tebele bisaé bia bobane Béthel, bemissionnaire, a besikôlô befe. Bobejañe ya Tin ékôane bebiene be nga yañele fe bevolô ya abui bewofise ya Tin ékôan. Éyoñe ji, bevolô bete ba kôme yeme bo abui bisaé be nga ve be. Be ne nya nkômesane ya li’i be nyoñe ngap a mintômba mi Krist éyoñe miñwo’one mi bo mi maneya ke yôp.

14. Jam avé bia yiane ba’ale ôsimesan?

¹⁴ Jame bia yiane ba’ale é ne na: Éyoñe miñwo’one mia su’ulane mia ye ke yôp memane ya beta étibila’a, bebo bisaé be Yéhôva ba ye li’i si va ba ye ke ôsu a wulu ba’aba’a a nye. Éjôé Yésus Krist si, bebo bisaé be Zambe ba ye ke jembane jôm éziñ. Bia yeme na éyoñ éte nsamba meyoñe Kalate Zambe a loone na Gog, môte ya Magog, wo ye wosane bebo bisaé be Zambe. (Ézé. 38:​18-20) Ve mewosane mete ma ye bo étun éyoñ, a meyoñe mete ma ye ke kui na me tôé nsôñane wop. A sake mewosane mete mme ma ye bo na bebo bisaé be Yéhôva be telé ékaña’a ba ve nye. Teke vaa nge beté na Yéhôva a ye nyii be! Ñyenan éziñe nlômane Jean ô nga bi, ô nga yen “beta nsamba bôte” ya mintômba mi Krist mife. Be nga kate Jean na “beta nsamba bôt” ate a “so beta étibila’a.” (Nlitan 7:​9, 14) Ajô te, bia kôme yeme na Yéhôva a ye nyii be!

15-16. Avale kalate Nlitan 17:14 a jô, Jé bekristene be ne miñwo’one ba ye bo éyoñe bita ya Armaguédon bia ye boban, a amu jé jam éte da ve bia ngule nyul?

¹⁵ Ve bôte béziñe be ne sili bebiene na: ‘Éyoñe miñwo’one mia ye bo mi ntoo yôp été, ésaé évé mia ye bo?’ Kalate Zambe a yalane nsili ôte tyi’ibi. A jô na bijôé bi pôlitik ya émo ji bia ye “wosane Mone ntômba.” Ve nya ajôô a ne na bia ye ke dañe mewosane mete, amu Kalate Zambe a jô na: “Mone ntômba a ye dañe be.” A beza ba ye volô nye? Éfuse ja yalane na, ba be “nga  loon,” ba be nga “top,” a ba ba “wulu ba’aba’a a nye.” (Lañe’e Nlitan 17:14.) Bôte bete be ne beza? Miñwo’one mia ye wômô! Ajô te, éyoñe miñwo’one mia su’ulane mia ye kôlô si va a ke yôp memane ya beta étibila’a, beta ésaé wua ya bisaé ba ye taté bo a ye bo mewosan. Ngo’o abime beta ésaé éte! Bekristene béziñe be ne miñwo’one be mbe be bo’o bita ôsusua na ba bo Bengaa be Yéhôva. Bevo’o ya été be mbe bezimbi ya minkane bita ya émo ji. Ve mvuse ya valé, be nga bo benya bekristen a yé’é avale be ne nyiñe mvo’é été a bôte bevok. (Gal. 5:22; 2 Thes. 3:16) A be nga bo teke beta su’u bita. Ve éyoñe ba ye bo be maneya ke yôp, ba ye saé ba be Krist a mimfufube beéngele asu na be zu wosane beziñe be Zambe bita bia su’ulan.

¹⁶ Tame ve’ele fase jame di. Miñwo’one miziñe mi li’iya si va mi ntoo benya bôtô, mivok mi te’eya. Ve éyoñe mia ye wômô a ke nyiñe yôp été, mia ye bo bitétéa ya nsisime bi ne ngul, bi bi ne teke wu, mia ye wosane ba be Njô bita wop, Yésus Krist. Mvuse bita ya Armaguédon, miñwo’one mia ye saé nsamba a Yésus asu na mi volô bôte na be bi nyul é ne ne seleñe teke ayeñ. Teke vaa nge beté na éyoñe ba ye bo be ntoo yôp nje ba ye dañe bo bobenyañ a bekale bap mvaé, a lôt abime be mbe ve bo éyoñe be mbe bôte be be’e metyi ya abé si va!

17. Amu jé bi ne jô na bebo bisaé be Zambe bese ba ye bo te ko jôm éziñe woñ éyoñe bita ya Armaguédon bia ye boban?

¹⁷ Ye ô ne ngabe ya mintômba mife? Nge é ne nalé, jé wo yiane bo éyoñe bita ya Armaguédon bia ye taté? Fo’o ve na: Ô tabe Yéhôva mebun a tôñe mebendé mé. Nalé a tinan aya? Kalate Zambe a jô na: “Nyi’i menda môé, a dibe mimbé miôé mia bômane wo: solé’é womien mon étun, akekui ayaa da ye mane lôt.” (Ésa. 26:20) Éyoñ éte bebo bisaé be Yéhôva bese, ba ba ye ke nyiñe yôp, a ba ba ye nyiñe si va, ba ye tabe ne mieññ teke tyelé minleme yôp. Aval ane nlômane Paul, bi too ndi na, “sa ke bijôé bi ne menen, sa ke mame ya éyoñe ji, sa ke mame ma ye boban . . . [mme ma] ye bo ngule ya kandé bia a nye’ane Zambe.” (Rom. 8:​38, 39) Te ve’ele vuane na: Yéhôva a nye’e wo, a na a ye ve’ele li’i wo étame môs éziñ!