Kele ôsu a kañe Yéhôva a mevak
MÔS ôvé ô nga dañe wô’ô meva’a ényiñe jôé? Ye môs ô nga luk? Ye môse ya ntôle mone wôé ô nga bialé? Ye môs ô nga duban? E môs ô nga duban, ñwô ñhe ô nga dañe mfi, a ñwô ô nga dañe ve wo meva’a nlem. Môs ôte bobenyoñ a bekale bôé, be nga wô’ô meva’a ya yen avale wo liti na, wo nye’e Yéhôva a nleme wôé ôse, nsisime wôé ôse, ôsimesane wôé ôse, a ngule jôé ése!—Marc 12:30.
Teke vaa nge beté, wo fe ô biya abui meva’a ésaé Yéhôva, nté ane ô nga duban. Ve abui Bengaa be Yéhôva, é nji beta bi meva’a be mbe be bili ôsusua. Amu jé? Beamu bevé bi bili na, bi ke ôsu a bo Yéhôva ésaé a mevak?
JÉ JA BO NA, BÔTE BÉZIÑE BE JAÑELE AVA’A DAP?
Mbamba foé ya Éjôé Zambe a ve bia mevak. Amu jé? Amu Yéhôva a ve bia ngaka’a na, ana’ana Éjôé te ja ye zu tyame mbia émo nyi, a telé mfefé émo. Kalate Sophonie 1:14 a jô bia na: “Beta môse ya Yéhôva a nto bebé, a nto bebé a zu avô.” Ve nge bia simesane na, bi ju’uya yange môs ôte, bi ne jañele ava’a ya ôsusua. Jame te é ne bo na, bi bili ate’e ésaé bia yiane ke ôsu a bo Zambe.—Minkana 13:12.
Éyoñe bia be bobejañ a bekale bangan bia tabe nsamba, bi bili ngule ya ke ôsu a bo Yéhôva ésaé a mevak. Éko éziñe na, mbamba ntabane bebo bisaé be Yéhôva, nnye a nga tindi wo na, ô nyiine nya ñyebe; a na, ô taté na wo kañe Zambe a mevak. (1 Pierre 2:12) Ve jé é ne kui, nge ba ve mojañe nge kale jangan melep, amu a nga tyame metiñe me Zambe? Jame te é ne te’e bôte béziñe ya akônda nyôl, a bo na, be jañele ava’a dap.
Ôzañ akum ô ne fe bo na, bi jañele ava’a dangan. Aval avé? Émo Satan ja jeñe na, é tindi bia na bi kuse biôm bi nji bo bia mfi. Nde, bia yiane simesane mejô me Yésus ma: ‘Teke môt a ne saane bemasa bebaé, a ye vini wua a nye’e nyô mbôk, nge na a ye kabetane wua a biasé nyô mbok. Mi se ngule ya saane Zambe ba akum.’ (Matthieu 6:24, Mfefé Nkôñelan) Bi se ngule ya bo Yéhôva ésaé a mevak, bi bela’ane fe ngule jangan ése na, bi bi akum ya émo ji.
E BO YÉHÔVA ÉSAÉ A MEVAK
Bôte ba nye’e Yéhôva be nji yen ayaé, ya bo nye ésaé. (1 Jean 5:3) Simesa’ane na, Yésus a mbe a jô’ô na: “Za’ane be ma, mia bese mi awô’ô njuk, a kate mimbe’e, ma me aye ve mia awo’an. Beka’an mbe’e wom, a yé’é be ma; amu me ne évôvoé, a nlem ne mieññ! Wôna minlem mienan mi aye wo’an. Amu ésaé jam é ne tyi’ibi, a mbe’e wom ô ne éveves.” (Matthieu 11:28-30) E bo nya Kristen a ne jam da ve bia ngule nyôl, a mevak. Bi bili beamu ya bo Yéhôva ésaé a mevak. Bi tame zu yene beamu belale bete.—Habakuk 3:18.
Mam Minlôman 17:28; 1 Timothée 1:11) Bia yeme na bia ve Nté wongan ényiñe jangan. Nde nkelane ñhe ôsu a kañe nye a mevak, to’o bi dubaneya abui mimbu.
Bia kañe Nté wongan, Zambe ya mevak. (Héctor a nga ba’ale ava’a dé a amu a mbe a simesa’ane ndi nlem a bili mfa’a ya Éjôé Zambe, jame te nde é nga bo nye na, a ke ôsu a kañete mbamba fôé ya Éjôé
Bi tame yen éve’ela Hector, a nga jôme mekônda mimbu 40. To’o a ‘nto nnôm,’ a ke ôsu a kañe Yéhôva. (Besam 92:12-14) Ôkone minga wé ô nga bo na, Hector a sé’é ésaé a bo Yéhôva, ve a nji jañele ava’a dé. A jô na: “Akusa bo na, éyoñe ma yen ôkone minga wom jame te da bo fo’o ma nleme mintaé, é ne fe nju’u na me nyoñe nye ngap, ve me nji jô’é na jame te é vaa meva’a me bili na ma kañe nya Zambe. Ma yeme na me nga ve Yéhôva ényiñe jam, amu a nga té môt a bili ngumba nsôñan éziñ. Jame te nde ma ke ôsu a nye’e nye, a kañe fe nye a nleme wom ôse. Ma jeñe na me bo ayôñ ésaé nkañete, a ma jeñe fe na me ba’ale ndi nleme ya Éjôé Zambe nleme wom été, ndemben me ne ba’ale ava’a dam.”
Yéhôva a nga ve ntañ, asu na môt a binam a nyiñe meva’a été. É ne fo’o été na, “Amu beta nye’an, Zambe a nga nye’e bôte ya si nyô, a nga lôm atyi’i Mone dé, ajô te bôte bese môt a buni nye, a ye jañ, ve tabe ényiñe ya melu mese.” (Jean 3:16) Yaa, bi ne bi njamane ya bikobe biangan, bi ne fe bi ényiñe ya nnôm éto, éyoñe bia liti na bia buni ntañ. Beta amu ya ve Zambe akéva nnye fo’o le! Mveane bia ve Yéhôva akéva amu ntañ, wo ye bo na, bi kañe nye a mevak.
Jesús a nga sé’é nté nkôñ ényiñe wé, a kañe Yéhôva meva’a été abui mimbu
Mojañe Jesús, a mbe a nyiñi Mexique a nga jô na: “Me mbe ôlo ya ésaé jam, a me mbe me saé ja’a éyoñ awolo ésaé é maneya, a too ke na, me nji be ntindane ya bo de. Me mbe me bo’o de fo’o ve asu na, me bi abui moné. Nde me nga yé’é na ma yeme Yéhôva, a yé’é aval a nga ve Mone wé a nye’e amu nye’an a bili mfa’a môt a binam. Me nga bi beta nkômbane ya kañe nye. Nde me nga ve Yéhôva ényiñe jam, a éyoñe me saéya nda bisaé jam mimbu 28, ane me nga tyi’i na ma jô’é ésaé te, a bo nkpwa’a mefan.” Avale dina nde ñhe Jesús a nga taté na, a bo Yéhôva ésaé a mevak.
E nyiñ ane Zambe a kômbô, a so bia mevak. Ye wo simesan aval ényiñe jôé é mbe, ôsusua na wo yeme Yéhôva? Nlômane Paul ô nga ba’alane bekristene ya Rome na, be “nga to bebo bisaé ya abé” ve be ntoo, “bebo bisaé ya mame ya zôsô.” Amu be nga nyiñ ane Zambe a kômbô, be mbe ve bi ndi nleme ya nyiñe nnôm éto. (Beromain 6:17-22) Bia fe ntôñané miñye’elane mi Yéhôva, ndembene mam ma kui bôte ba wulu mbia dulu ma ye bo te kui be bia. A jame te, da ye ve bia meva’a nlem.
“Me nga lot mbamba mimbu ya ényiñe jam ésaé Yéhôva.”—Jaime
Tame yen éve’ela Jaime, nnye a nji be a yebe’e na, Zambe a ne. A mbe a yeme na biôme bi nga so atemetem, a bo’o fe bivôé bikuta. Jaime a nga taté na a tabe bisulan. Nye’an a nga yen akônda été, ô nga nambe nye nlem. Asu na a jô’é fatan ényiñ a mbe a nyiñi ôsusua, Jaime a nga ye’elane Yéhôva na a volô nye na, a yebe na Zambe a ne. Jaime a jô na: “Ôte’ete’e ôte’etek, me nga yé’é na, ma yebe na Zambe a ne, a na, a ne Ésa a nye’e bone bé, a to fe Zambe ya mvam. Nkeane me nga ke ôsu a tôñe bezôsô miñye’elane mi Yéhôva, ñwô ñhe ô nga ba’ale ma. Nge me nji ye tyendé, nge ve ma fe me wuya, aval ane abui bôt bia bebe bi mbe bi bo’o bivôé bikuta. Me nga lot mbamba mimbu ya ényiñe jam ésaé Yéhôva.”
TE BILI ATEK!
Jé bia yiane simesan, nge bia yange asu’ulane ya émo ji den a nto ayap éyoñ? Yeme na, bia bo nkômbane Zambe, a bi bili ndi nleme ya nyiñe nnôm éto. “A mbo’an te bo atek mfa’a ya mboane mvaé: amu na, éyoñe melu me ayiane ma aye kpwaane, bi aye kôane nge bi abo te tek.” (Begalate 6:8, 9) Yéhôva a ye volô bia na bi ke ôsu a jibi, a bi mefulu ma yian asu na, bi dañe “beta njuk,” a na bi ke ôsu a kañe Yéhôva a mevak.—Nlitan 7:9, 13, 14; Jacques 1:2-4.
Bi ne tabe ndi na Yéhôva a ye botane ôjibi wongan, amu a yem ésaé bia bo, a nye’ane bia liti nye a éyôlé jé. Nge bia ke ôsu a kañe Yéhôva a mevak, bi aye bo ane David, ntili besam a nga jô na: “Me téléya Yéhôva mise mam melu mese: amu a ne me mbo nnôm, m’aye bo te fô’ôsan. Ajô te nleme w’ayen mvaé, a duma dam d’avak: minsône miame fe mi aye tabe mvo’é.”—Besam 16:8, 9.