Nya ajôô a ne na, môt éziñ ya melu ma, a nji tu’a yem jôme Paul a mbe a funa’ane je. Befôtô be Paul ya bekalate bangan be ne ve bive’ela.

Ve, mam méziñ ma volô bia na bi yem aval éyeka’a Paul a mbe ve bi. Phare de la Tour de Sion ya Ngone lale é too alu 1, mbu 1902, a nga kobô ajô ya éyeka’a Paul a jô’ô na: “Kalate ‘Actes de Paul’ . . . a nga tiliban bebé mbu 150, a bili mam bi ne tabe me ndi a lat a éyeka’a Paul. Ba jô été na a mbe étune môt, a be’e ayane nlô, a too mekpwet, a too abeñ éyeka’a, a bili abui bivula, a ayabe jôé.”

Dictionnaire éziñe ya mbu 1997 (The Oxford Dictionary of the Christian Church) a kobô ajô bekalate be nga tiliban melu mvus a jô’ô na: “Mam méziñ kalate Actes de Paul a jô a lat a éyeka’a Paul ma lu’an a nkañete ya melu mvus.” Kalate ate a mbe a lañeban abui mintete mimbu mi ôsu; éve’an é ne na, azukui den, minnôm mintilane 80 ya kalate ate nkobô Grek mi ngenan, ba koone fe nye minkobô mife. Ajô te, avale bia kañe Paul da lu’an a ñyemane bia koone wô bekalate ya melu mvus.

Ve, mam mefe me ne mfi adañ éyeka’a Paul. Éyoñ a mbe a bo’o ésaé nkañete jé, besiñe bé be nga jô na “éyoñ a too ézezañe jangan a ne atek, a nkobô wé momo jam.” (2 Bec. 10:10, Mfefé Nkôñelan) Ve te bia vuane na Paul a nga bo ñyé’é amu Yésus a nga bo étua asimba mise mé. Bi ne fe simesan mam mese a nga bo éyoñ Yésus a nga tobe nye na a kate “bôte be ne te yeme Zambe” jôé dé. (Mam. 9:3-5, 15; 22:6-8) Tame fe beta simesane beta mfi bia nyoñ, éyoñ bia lañ bekalate Paul a nga tili a ngule ya mbamba nsisim.

Paul a nji bete émiene yôp amu mam mese a nga bo ôsusua na a bo Kristen, nge ke kobô ajô ya éyeka’a jé. (Mam. 26:4, 5; Beph. 3:4-6) Émien a nga jô na: “Me ne nlômane wo dañe tyôtyoé, . . . me nji yiane lobane na nlôman.” (1 Bec. 15:9, Mfefé Nkôñelan) Mvuse ya valé a nga jô na: “Be ma, ma me adañe bôte bese ya Zambe be adañe tyôtyoé, tyôtyoé, mvame nyô é nga veban, na, me kate Begentil abui mame ya be Krist e ne te jame ya fas.” (Beép. 3:8) Yaa, mam mete mme ñhe ma dañe mfi, sa ke éyeka’a Paul a mbe a bili.