1, 2. (a) Abui bebiaé e wô’ô bo aya éyoñ mone wop a kômbô duban? (b) Amu jé be wô’ô sili bôte ba zu duban nge be veya bebiene ngumba be Yéhôva? (Fombô’ô fôtô ya atata’a.)

BEBIAÉ ba yen ane ngo jap é bili mimbu ébul (bia zu je loone na Marie), é tele tetele a bôte befe. Ja zu duban. Ve e zu koon é tatéya mane yalane beta minsili mibaé be wô’ô sili bôte ba zu duban.

² Bebiaé be Marie ba wô’ô mvaé, amu mone wop a nga nyoñe ntyi’ane ya ve émiene ngumba be Yéhôva, a duban. To’o nalé, nyia a nga taté tyelé nleme yôp abui. A mbe a sili’ émiene na: ‘Abime mongô a ngenane di! Ye a kôme fo’o yeme jôm a bo nga? Ye é nji be mvo’é na a beta yange mone jôm?’ Minsili bebiaé be wô’ô sili bebiene le, éyoñ mone wop a kômbô duban a ngenane mongô. (Ec. 5:5) Jam ete da so amu mbaptizô ô ne ntyi’an wo dañe mfi ényiñe Kristen.​—Fombô’ô nka’ale ô ne nlô ajô na: “ Ye ô veya fo’o womien ngumba be Yéhôva?”

3, 4. (a) Aval avé nlômane Pierre ô nga liti mfi ya mbaptizô? (b) Nja ôvé ô ne zañe mbaptizô a nlôñan arche?

 ³ Pierre a nga liti nja ô ne zañe mbaptizô a ésaé nlôñan arche Noé a nga bo, a jô’ô na: “Jam ete e mbe ndeme nduan wo nyii mia éyoñe ji.” (Lañe’e 1 Pierre 3:20, 21, Mfefé Nkôñelan.) Ésaé éte é mbe é kôme’ liti na, Noé a nga ve émiene ngumba na a bo nkômbane Zambe. Noé a nga bo ésaé ése Yéhôva a nga ve nye a nlem ôse. Teke vaa nge beté, mimboone mi mame ya mbunane mi nga nyii Noé a nda bôte jé éyoñe ndône mendim é nga kui. Jé évé’an éte ja ye’ele bia?

⁴ Fo’o ve avale arche a mbe ndeme ya mbunane Noé, aval ete fe, e dubane mengana bôt été, a ne ndeme ja yené a mis. Ndeme fé? Ndeme ya na Kristen é veya ébiene ngumba be Yéhôva, amu ja buni na Yésus a nga wômô miñwuan. Aval ane Noé, Bekristen be nga ve bebiene ngumba be Yéhôva, ba bo fe nkômbane Wé. Avale Noé a nga nyiñe ndône mendim, nne fe Bekristen ba duban ba ye nyiñ éyoñ mbia nta’ane mame nyi a ye man, nge ba ke ôsu a wulu ba’aba’a a Yéhôva. (Marc 13:10; Nli. 7:9, 10) Jôm éte nje mveane môt a ve émiene ngumba, a mbaptizô bi ne nya mfii. Môt a vañe jañele éyoñe ya duban a ne sub ényiñe ya nnôm éto.

5. Mam mevé bia zu yen ayé’é di?

⁵ Mbôle mbaptizô ô ne nya mfii, bi tame zu yalane beta minsili mila mi: Jé Bible a jô a lat a mbaptizô? Mam mevé môt a yiane bo ôsusua na a  duban? Amu jé é ne mfi na ñye’ele Bible a kôme wô’ô mfi ya mbaptizô, nté a ye’ele mone wé, nge ke môte mfe?

6, 7. (a) Timi’in atinane ya nduane Jean. (b) Nduane Jean ôvé ô mbe ngum aval?

⁶ Jean Baptiste a ne môt ôsu Bible a jô na, a nga baptizô bôt. (Mt. 3:1-6) Bôte be mbe be jôba’an abé be nga bo Atiñe Môze si, mbe be mbe be za’a dubane be Jean. Ve ngum avale môt ô nga zu fe dubane be Jean, a too ke na, a nji bo abé éziñ. Jean a nga bi beta ma’a ya du Yésus, Mone Zambe émien. (Mt. 3:13-17) Yésus a mbe tee nsem, jôm éte nje é nji be é sili’i na a jôban abé dé. (1 P. 2:22) Mbaptizô wé ô mbe ndeme ya na, a ntoo nkômesane ya bo nkômbane Zambe.​—Beh. 10:7.

⁷ Nté Yésus a mbe a bo’o ésaé nkañete jé, beyé’é bé fe be nga du bôt. (Jean 3:22; 4:1, 2) Nduane beyé’é be Yésus ô mbe fe ndeme ya na, bôte ba jôban abé be nga bo Atiñe Môze si. Ve, atinane ya mbaptizô e nga tyendé éyoñe Yésus a nga wômô miñwuan.

8. (a) Atiñ avé Yésus a nga ve beyé’é bé éyoñ a wômôya? (b) Nduane wo tinan aya asu Bekristen?

⁸ Éyoñ a wômôya miñwuan mbu 33 É.J., Yésus a nga yené be beyé’é bé a lôte bôte 500, befam a binga, éko éziñe na bongô fe be mbe nsamba ôte. Éyoñ éte nje fe Yésus a nga yiane jô mejô ma: “Ajô te kelan, mi bo meyoñe mese beyé’é, a baptizô be jôé Ésa, a Mon a mbamba nsisim: a ye’ele be be ba’ale mejô mese me nga jô mia.” (Mt. 28:19, 20; 1 Bec. 15:6) Yaa, da yené fo’o ane nge mintete mi bôt, mi nga wô’ô Yésus émien a jô’ô na, bi bo bôte beyé’é! Mejô me Yésus mete ma liti na, môt ase a kômbô bo Kristen a yiane duban. (Mt. 11:29, 30) Môt a yi na Zambe a yebe ésaé a bo nye, a yiane meme Yésus ane zene Yéhôva a belane je na a tôé nsôñane Wé. Mvuse ya valé nje a ne dubane mendim été. Susu’a nduane Zambe a yebe ñwô le. Abui minkañete ya Bible da liti na mimfefé beyé’é ya ntete mimbu ôsu mi mbe mi yeme’e atinane ya mbaptizô. Ajô te mi nga duban teke jañele éyoñ.​—Mam. 2:41; 9:18; 16:14, 15, 32, 33.

9, 10. Mbaptizô mon Éthiopien, a wu Paul mia ye’ele bia jé?

⁹ Lañe’e Mam Minlôman 8:35, 36. Bi tame taté kobô ajô mon Éthiopien a nga ke kañe Zambe Jérusalem. Éyoñ a bula’an, ange Yéhôva a nga lôme Philippe na a ji’a ke “kañete [nye] mejô me Yésus.” Nde a nga bo aya éyoñe Philippe a maneya kañete nye? Jam a nga bo valé da liti na, mam a nga yé’é me nga nambe nye nlem. Mbôl a mbe a kômbô’ô bo nkômbane Yéhôva, a nga duban teke jañele éyoñ.

¹⁰ Éve’ela baa é ne ji mone Bejuif éziñ a nga tibili Bekristen. A nga bialé Israël, ayoñ é nga vebane be Zambe. Ve Bejuif be nga ndaman élate jap a Yéhôva. Môte bia jôô nye nyi a  mbe a su’u Judaïsme a ngule jé ése, ve a nga su’ulane yeme nya zene. Yésus émiene nnye a nga kañete nye, valé a nto yôb. Nde môt ate a nga bo aya? A nga kañese na Ananias a volô nye. Mvuse ya valé, a nga “kôlô si a baptizôban.” (Mam. 9:17, 18; Beg. 1:14) Mi yianeya yeme na môt bia jôô nye, a ne nyô be nga su’ulane loone Bible na Paul. Ve jam bia kômbô dañe ba’ale é ne na, nné ane a nga kôme wô’ô na Yéhôva a belane Yésus na a tôé nsôñane Wé, a nga duban été été. A nji jañele éyoñ.​—Lañe’e Mam Minlôman 22:12-16.

11. (a) Jé ja tindi beyé’é Bible na be duban? (b) Bi wô’ô wô’ô aya éyoñ bia yene môt a duba’an?

¹¹ Bongô a benya bôtô ba yé’é Bible den ba vu Paul. Mbuni a nye’e mam a yé’é, a wô’ô mvaé ya ve émiene ngumba be Yéhôva, a duban. Nkañete ya mbaptizô ô ne beta ngabe ya bitôkane biangan. Bengaa be Yéhôva ba wô’ô mvaé éyoñ ñyé’é Bible a yaé nsisim akekui a baptizôbane mendim. A bebiaé, nga mia fe mia wô’ô mvaé éyoñ mia yene bone benan be tele nsamba bôte wo ke duban? Mbu 2017, bôt a lôte 284 000 be nga ve bebiene ngumba be Yéhôva a baptizôbane mendim, amu be mbe be bili nkômbane ya nyiñe nnôm éto. (Mam. 13:48) Teke bisô, mimfefé Bekristen mite mi nga wô’ô mfi ya mbaptizô. Ve mam mevé be nga yiane taté bo ôsusua na ba duban?

12. Mam mevé môt a yiane bo ôsusua na a duban?

¹² Ôsusua na môt a duban, a yiane buni mam mese a yé’é a lat a Yéhôva, nsôñane Wé, a ntañ. (1 Tim. 2:3-6) Mbunan ôte wo tindi nye na a jô’é mame Yéhôva a vini, a na, a tôñe metiñe Mé. (Mam. 3:19) Jôm éte nje, môt a vo’o tu’a ve émiene ngumba be Yéhôva, nge a ngenan a bo’o mam me ne kamane nye na a nyiñ Éjôé Zambe si. (1 Bec. 6:9, 10) Ve môt a kômbô duban a yiane fe bo mam mefe. A yiane tabe bisulan, a yiane fe kañete a akônda. Yésus a nga jô na benya beyé’é ba yiane bo ésaé éte. (Mam. 1:8) Éyoñe môt a bo mam mete mese, a nto ngule ya ye’elane Yéhôva na, a ve émiene ngumba be Nye, mvuse ya valé a ne fe dubane mengana bôt été.

13. Amu jé beye’ele Bible ba yiane tu’a wô’ô mfi ya mbaptizô?

¹³ Nté bia ye’ele bone bangan a bôte befe mam ba yiane bo asu na be yemete élate jap a Yéhôva, bi nji yiane vuane na Yéhôva a yi na mbo ésaé Wé ase a duban. Nge biabebien bia tu’a wô’ô jam ete, bia ye bo ngule ya yeme volô be. Bi nji yiane yange na abui éyoñ é lôt, ôsusua na bi liti be mfi ya ve bebien ngumba a duban. Ôwé, bia yi na bone bangan a bôte bia be be bia yé’é Bible be yaé nsisim akekui ba baptizôban.

14. Amu jé bi nji yiane yemete môte na a duban?

¹⁴ Ve bi nji yiane yemete mone wongan nge ke môte mfe na a duban. Yéhôva a nji yi na bi bo nalé. (1 Jean 4:8) Ve, nté bia ye’ele be, bia yiane liti be mfi ya bi ngul élat a Yéhôva.  Môt a bi nkômbane ya duban éyoñ benya mejôô ba nambe nye nlem, a éyoñ ba tindi nye na, nye’e fe a kômbô be’e mbe’e Krist.​—2 Bec. 5:14, 15.

15, 16. (a) Ye ngum ôkala ô ne asu nduan? Timi’in. (b) Amu jé môt a kômbô bo Ngaa Yéhôva a yiane duban, to’o a nga taté dubane ñyebe ôfe?

¹⁵ Teke ngum ôkala asu nduan. Ñyé’é Bible ase a yaé nsisim avale dé. Abui bôt é nga duban é to bongô, a da ke ôsu a bo Yéhôva ésaé azukui den. Bevo’o ke be nga yé’é benya mejôô be nto benya bôtô, to’o nalé be nga wô’ô mfi ya duban; bôte béziñ ba duduban éyoñ be lôteya mimbu 100!

¹⁶ Nya minga éziñ a nga sili ñye’ele Bible wé nge e ne mfi na a beta duban, amu valé a tatéya dubane miñyebe mife. Nde ñye’ele wé a nga liti nye bifuse ya Bible bia yemete mfi ya mbaptizô. Ane nnôme minga wu ô nga wôk, a duban. Akusa bo valé a mbeme kui mimbu 80, a nji simesane na mbaptizô ô nji beta bo mfi asu dé. Yaa, mbôka’a ya nya mbaptizô ô tii a nya ñyemane môt a yem nkômbane Yéhôva. Jôm éte nje beyé’é Bible ba yiane duban, to’o be tatéya dubane ñyebe ôfe.​—Lañe’e Mam Minlôman 19:3-5.

17. Amu jé môse nduan ô ne ngum aval?

¹⁷ Môse môt a duban ô ne môse ya mevak. Ô ne fe môse môt a yiane kôme fas. E tôé ngaka’a bi nga bo Yéhôva éyoñ bi nga ve biabebien ngumba a nji bo mone jam. Jôm éte nje Yésus a nga jô na ésaé bia bo Yéhôva é ne ane mbe’e. Kalate Zambe a jô na beyé’é be Yésus “be aye bo te beta nyiñ mfa’a wop bebien, ve mfa’a ya nyô a nga wu a beta wômô amu ajô dap.”​—2 Bec. 5:15; Mt. 16:24.

18. Mam mevé bia ye yene sondô a zu?

¹⁸ Nyia Marie a mbe a bili mam mete ôsimesan éyoñ a nga sili émiene minsili bia te yen atata’a. Nge ô ne mbiaé, éko éziñ wo fe wo sili womiene na: ‘Ye mone wom a nto fo’o ôkala ya duban? Ye ñyeman a bili ô nto ve volô nye na a ve émiene ngumba be Yéhôva? Ye a yiane taté kee sikôlô ôsu mone jôm a bi asu ésaé? Nge a tyam atiñe Yéhôva éyoñ a dubaneya ma ye bo aya?’ Bia ye yene mam mete ayé’é ya sondô a zu, bia ye fe yen mam me ne volô bebiaé na be bi mbamba ñyenane mam a lat a mbaptizô.