1. Nta’ane mam ôvé bebo bisaé be Yéhôva be mbe be bili ntete mimbu ôsu?

 ÉYOÑ ése Yéhôva a ve bebo bisaé bé ésaé, a yi na be bo je a mbamba nta’ane mam. (1 Cor. 14:33) Éve’an é ne na, nkômbane Yéhôva ô ne na mbamba foé a katebane si ése. (Matt. 24:14) Yéhôva a nga ve Yésus mbe’e ya wulu a ésaé éte. Yésus a nga véé mise na bôte ba bo ésaé éte be tôñe ngume nta’ane mam. Ntete mimbu ôsu, éyoñe be nga telé bikôane bekristen abui bevôm, be nga telé bemvendé asu na be tebele bikôane bekristene bite. (Mame mi. 14:23) Tin ékôane ya Jérusalem é mbe é bili minlôman a bemvendé, mbe be mbe be nyoñe mintyi’ane bikôane bekristene bise bi mbe bi yiane tôñ. (Mame mi. 15:2; 16:4) Mbôle bobejañ a besita be mbe be tôñe’e mebendé bemvendé be mbe be va’a be, nalé a nga bo na “bikôane bekristen bi ke ôsu a yeme mbunan été, a tañe bebuni é nga ke ôsu a nene môs ane môs.”—Mame mi. 16:5.

2. Ataté mbu 1919, aval avé Yéhôva a nga ve bia bidi ya nsisim a zene ya ékôane jé?

² Yéhôva a ke fe ôsu a bo na bebo bisaé bé be bi mbamba nta’ane mame melu ma. Ataté mbu 1919, Yésus a nga belane mone nsamba miñwo’on asu na a bo nta’ane mam asu ésaé nkañete, a na a ve beyé’é bé bidi ya nsisime mbamba éyoñ. a (Luc 12:42) Da kôme yené na Yéhôva a botan ésaé mone nsamba bôt ate a bo.—Ésa. 60:22; 65:​13, 14.

3-4. (a) Liti’i aval avé bia bu’uban ékôane Yéhôva. (b) Jé bia zu yen ayé’é di?

 ³ Teke na bi mbe ve bo ésaé Yésus a nga ve bia nge bi nji be bi bili mbamba nta’ane mam. (Matt. 28:​19, 20) Éve’an é ne na, nge bi nji be bi bili mebeñe me nkañete, môt ase a nga ye ke kañete vôm ase a yi. Nalé a nga ye bo na bôte be dañe kañete mebeñe me nkañete méziñ, mevo’o ki teke môt a kañete wôé. Ye ô ne simesane bibotane bife bia bi amu bi bili mbamba nta’ane mam?

⁴ Avale Yésus a nga bo mbamba nta’ane mam a beyé’é bé éyoñ a mbe si va, a ke ôsu a bo de asu bebo bisaé be Zambe ya melu ma. Ayé’é di, bia zu yen éve’ela Yésus a nga li’i bia a aval avé ékôane Yéhôva ja tôñ éve’ela éte. Bia ye fe yen aval avé bi ne liti na bi too ndi a ékôane Yéhôva.

ÉKÔANE JANGANE JA TÔÑ ÉVE’ELA YÉSUS

5. Aval avé ékôane Yéhôva ja tôñ éve’ela Yésus? (Jean 8:28)

⁵ Éyoñe Yésus a mbe yôp été, Ésa wé a nga ye’ele nye jam a mbe a yiane bo a mam a mbe a yiane jô. Ékôane Yéhôva fe ja tôñ éve’ela Yésus éyoñe ja belane Kalate Zambe asu na é volô bia na bi yeme mame me ne zôsô a ma me ne abé, a éyoñe ja ve bia mbamba melebe me ne volô bia binyiñe biangan. (Lañe’e Jean 8:28; 2 Tim. 3:​16, 17) Ékôane Yéhôva é wô’ô jô bia éyoñ ése na bi lañe Kalate Zambe a tôñe mame bia lañe binyiñe biangan. Mfi ôvé bi ne bi éyoñe bia tôñe melebe mete?

6. Mfi ôvé bia bi éyoñe bia yé’é Kalate Zambe bi belane bikpwelé Tin ékôan ja kuli?

⁶ Bia bi abui bibotan éyoñe bia yé’é Kalate Zambe a zene ya bikpwelé ékôane Yéhôva ja ve bia. Éve’an é ne na, bi ne ve’e miñye’elane ya Kalate Zambe a melebe ékôane Yéhôva ja ve bia. Éyoñe bia bo de, nalé a volô na bi kôme yene na melebe ékôane Yéhôva ja ve bia ma so Kalate Zambe, a jam éte da bo na bi tu’a tabe je ndi.—Rom. 12:2.

7. Foé fé Yésus a mbe a kañete, a aval avé ékôane Yéhôva ja tôñ éve’ela jé?

⁷ Yésus a nga kañete “mbamba foé ya Éjôé Zambe.” (Luc 4:​43, 44) Nde fe Yésus a nga jô beyé’é bé na be kañete bôte mbamba foé ya Éjôé Zambe. (Luc 9:​1, 2; 10:​8, 9) Den, bôte bese be ne ékôane Yéhôva ba kañete foé ya Éjôé Zambe vôm ase be ne, to’o be be’e avale mimbe’e avé.

8. Mvome fé bi bili?

⁸ Ésaé ya kañete bôte bevo’o benya mejôô ya Éjôé Zambe é ne beta mvom asu dangan. Sa ke fianga môte nje é bili mvom éte. Éve’an é ne na, éyoñe Yésus a mbe si va, a nji kañese na mimbia minsisime mi kobô ajô dé. (Luc 4:41) Dene fe, ôsusua na môt a taté na a kañete a bebo bisaé be Yéhôva, a yiane ka taté tôñe memvinda me Yéhôva ényiñe jé. Bia liti abim avé bia nyane mvome ya kañete éyoñe bia kañete bôte bevok foé ya Éjôé Zambe vôm ase bi ne a éyoñ ése bi ne ngule ya bo de. Aval ane Yésus, bia kômbô ve ngule jangan ése na bi kañete bôte bevok a ye’ele be benya mejôô.—Matt. 13:​3, 23; 1 Cor. 3:6.

9. Aval avé ékôane Yéhôva ja bo na bôte be yem éyôlé Zambe?

⁹ Yésus a nga volô bôte na be yem éyôlé Zambe. Éyoñ a nga ye’elan Ésa wé ya yôp été, Yésus a nga jô na: “Me nga bo na be yem éyôlé jôé.” (Jean 17:26) Aval ane Yésus, ékôane Yéhôva fe ja ve ngul ése na é volô bôte bevok na be yem éyôlé Zambe. Kalate Zambe Nkôñelane ya mfefé émo a nga bo beta ésaé mfa’a ôte. Nkôñelane Kalate Zambe ôte, be nga beta  futi éyôlé Zambe bevôme be nga vaa je Bekalate Zambe bevok. Bi bili nkôñelane Kalate Zambe ôte dene ngumba nge ke éfas e lôte minkobô 270. Appendix A4 a A5 ya nkôñelane Kalate Zambe ya mfefé émo a ye tu’a liti wo amu jé be nga vaa éyôlé Zambe Bekalate Zambe béziñ, a aval avé be nga beta je futi bevôme bese é mbe. Appendix C a ne Bible d’étude, a liti bia mame ma bo’olô na bia yiane koon éyôlé Zambe biyoñe 237 mimfufube mintilane ya nkobô Grec.

10. Mame minga ya Myanmar a nga jô ma ye’ele wo jé?

¹⁰ Aval ane Yésus, bia kômbô volô abui bôte na é yem éyôlé Zambe. Éyoñe minga éziñe ya Myanmar, a bili mimbu 67 a nga yeme na Zambe a bili éyôlé, a nga bôé ñyôn a jô ñye’ele Kalate Zambe wé na: “Ane me nga bialé, e taté wô’ô na éyôlé Zambe é ne Yéhôva ve den. . . . Mia te ye’ele ma jame da dañe mfi.” Nkañete ôte wo liti na, éyoñe bia volô bôte be bili mbamba été nsisime na be yem éyôlé Zambe, jam éte é ne nambe be nya abuii.

KELE ÔSU A LITI NA Ô TOO ÉKÔANE YÉHÔVA NDI

11. Aval avé bemvendé be ne liti na be too ndi a ékôane Yéhôva? (Fombô’ô fe fôtô.)

¹¹ Aval avé bemvendé be ne liti na be too ndi a ékôane Zambe? Éyoñe ba ve be mebendé, bemvendé ba yiane kôme nyoñ éyoñe ya lañe me a ve ngule jap ése na be tôñe me. Éve’an é ne na, ane ô vaa na ba ve be mebendé a lat a avale ba yiane wulu a mengabe bisulan, avale ba yiane ye’elan ékôane bekristen été, ba kate fe be avale ba yiane nyoñe ngap a bone mintômba mi Krist. Éyoñe bemvendé ba tôñe mebendé mese ékôane Yehôva ja ve be, bobejañ a besita ba kôme wô’ôtane na Yéhôva a nye’e be a na a nyoñe ngap a be.

12. (a) Amu jé bia yiane bo ba be tele bia ôsu mewôk? (Behébreu 13:​7, 17) (b) Amu jé bia yiane dañe fombô mbamba mefulu bobejañe ba tebele bia be bili?

¹² Éyoñe bemvendé ba ve bia mebendé, bia yiane tôñe me a nleme wongan ôse. Éyoñe bia bo de, nalé a ve be ésaé ôveves. Kalate Zambe a lebe bia na bi sili biabebiene si be ba ba tebele bia a bo be mewôk. (Lañe’e Behébreu 13:​7, 17.) Ve jam éte é nji bo tyi’ibi éyoñ ése. Amu jé? Amu befame bete be be’e metyi ya abé. Nge bia dañe bem ôsimesane wongane ve mbia mefulu map a dañe mbamba mefulu be bili, da ye bo ve ane bia volô besiñe bangan. Aval avé? Besiñe bangane ba yi na bi sôô na Zambe a tebele bia a zene ya ékôane jé. Nge bi taté na bia yene bemvendé aval étam, bi ne fe taté na bia yen ékôane Yéhôva aval afe a bo te beta tabe ndi a je. Jé bi ne bo asu na bi yeme minsose besiñe bangane ba mias a lat a ékôane Yéhôva a sa’ale mie?

TE KAÑESE NA BÔTE BÉZIÑE BE BO NA Ô BO TE BETA TABE NDI A ÉKÔANE YÉHÔVA

13. Aval avé besiñe be Zambe be nga jeñe na be ve ékôane Yéhôva mvit?

¹³ Besiñe be Zambe ba jeñe na be ve mbamba be mam ékôane Yéhôva ja bo ve abé abé. Éve’an é ne na, bi nga yé’é Kalate Zambe na Yéhôva a yi na bebo bisaé bé be bo mfubane mfa’a ya minsôn, mfa’a ya ntabane a nsisim. Kalate Zambe a jô fe na, môt ase a bene tyendé abo dulu dé a ke ôsu a bo mvite mam, ba yiane vaa nye ékôane bekristen été. (1 Cor. 5:​11-13; 6:​9, 10) Ve mbôle bia tôñ atiñe ya Kalate Zambe éte, besiñe bangane ba jô na  bia nye’e ki bôte bevok, na bia tyi’i bôte mejô, a na bia vini môt ase a yene ki mam ane bia.

14. Za a ne tine ya minkañete mi ne minsose bôte ba laan a lat a ékôane Yéhôva?

¹⁴ Jeñe’e na ô kôme yeme môt a wosane bia. Satan Diable nnye a solô mvuse minsose mite mise. A ne “ésa minsos.” (Jean 8:44; Mett. 3:​1-5) Ajô te, bi nji yiane vembe nge Satan a belane bôte bé asu na be miase minsos a lat a ékôane Yéhôva. Yésus a bekristene ya ntete mimbu ôsu fe be nga tôban avale jame te.

15. Jé betebe ôsu ya miñyebe be nga bo Yésus a beyé’é bé?

¹⁵ Ntete mimbu ôsu, akusa bo na Yésus, Mone Zambe a mbe teke ayeñ a na a nga bo abui mesimba, Satan a nga belane bôte béziñe na be ve Yésus éyôlé mvit. Éve’an é ne na, betebe ôsu ya miñyebe be nga kate bôte na ngule Yésus a mbe a vaa je mimbia minsisim é mbe é so’o be ‘njôô mimbia minsisim.’ (Marc 3:22) Éyoñe be nga tyi’i Yésus ajô, betebe ôsu ya miñyebe be nga bôte nye ajô na a nga kobô Zambe ébiasé, a be nga tindi nsamba bôte na ô jô na be wôé nye. (Matt. 27:20) Mvuse ya valé, éyoñe beyé’é be Yésus be mbe be kañete mbamba foé, besiñe bap “be nga tindi bôte ya meyoñe” na be tibili be. (Mame mi. 14:​2, 19) Nkume mmombô a bete ya Ngone awôm a baa é too alu 1, ya mbu 1998 a nga kobô ajô ya éfuse ya Mame minlôman 14:2 a jô’ô na: “Ane ô vaa na bejuif be mbe be wosane bekristene be nga bene vô’ôlô mbamba foé, be nga miase fe minsos asu na be ve be éyôlé mvit. Be nga jeñe fe na be tindi behédene na be wosane bekristen.”

16. Jé bi nji yiane vuan éyoñe bia wô’ô bôte be kobô ékôane Yéhôva abé?

 ¹⁶ Satan a nji jô’é nlaane minsose ntete mimbu ôsu. Den, a ke ôsu a “du’u bôte ya si ése.” (Nlitan 12:9) Nge wo wô’ô bôte be kobô ékôane Yéhôva a bobejañe ba tebele je abé, simesa’an aval avé besiñe be Zambe be nga wosane Yésus a beyé’é bé ntete mimbu ôsu. Melu mangane ma, Bôte ba tibili bebo bisaé be Yéhôva a bôte be mejô fo’o ve avale Kalate Zambe a nga jô. (Matt. 5:​11, 12) Minsose ba laane mia ye ke wone bia nge bia bo te vuane za a ne tine ya minsose mite a bo mame ma sili été été. Mame mevé bia yiane bo?

17. Jé bi ne bo asu na minkañete mi ne minsose mi bo te wone bia? (2 Timothée 1:13) (Fombô’ô fe nka’ale ô ne nlô ajô na, “ Aval ô ne bo éyoñe wo wô’ô minkañete mi ne minsos.”)

¹⁷ Sa’ale minkañete mi ne minsos. Nlômane Paul ô nga kôme kate bia jame bia yiane bo éyoñe bia wô’ô minkañete mi ne minsos. Ô nga jô Timothée na a “ve bôte béziñe metiñe na be bo te . . . vô’ôlô zezé minlañ a bindan” a na, be “bene bivuse minkañete bia biasé Zambe.” (1 Tim. 1:​3, 4; 4:7) Mongô a ne to’é jôm é ne mvite tyia a futi je anyu, ve nya môtô a vo’o bo avale jame te amu a kôme yeme na mboon ôte ô ne telé nye mbia été. Bia sa’ale minkañete mi ne minsos amu bia kôme yeme vôme mia so. Bia tôñesane fo’o ve “mbamba mejô” ya Kalate Zambe.—Lañe’e 2 Timothée 1:13.

18. Aval avé bi ne liti na bi too ndi a ékôane Yéhôva?

¹⁸ Ayé’é di, bia te yene fo’o ve mevale melal ékôane Yéhôva ja vu Yésus. Nté wo yé’é Kalate Zambe, jene’e na ô yeme mevale mefe ékôane Yéhôva ja tôñ éve’ela Yésus. Volô’ô bobejañ a besita ya ékôane bekristene jôé na be tu’a tabe ndi a ékôane Yéhôva. A kele’e ôsu a liti na ô too ndi a ékôan éte éyoñe wo kañe Yéhôva a nleme wôé ôse, a éyoñe wo wulu ba’aba’a a ékôan a belane je asu na a tôé nsôñane wé. (Bsa. 37:28) Nkelané ôsu a nyane beta mvome ya bo ébu’a jia ya nda bôte Yéhôva é ne njalan a bôte ba yeme nye’e bôte bevok a kabetane nye.