1. Bebo bisaé be Yéhôva béziñe be ne sili bebiene nsili ôvé?

 NLEM ô bôô bia si ne mieññ éyoñe bia yeme na Yéhôva a wô’ô bebo bisaé bé mvaé. Kalate Zambe a jô na: “Yéhôva a yen mvaé be bôte bé.” (Bsa. 149:4) Ve é wô’ô kui biyoñe biziñe na, bôte béziñe be bili atek aval é ne na be nga sili bebiene na: ‘Ye Yéhôva a wô’ô fo’o ma mvaé?’ É nga kui biyoñe biziñe na abui biwôlô bebo bisaé be Yéhôva ya melu mvus é bili atek amu avale biyebe éte, a sili bebiene nge Yéhôva a wô’ô fo’o be mvaé.—1 Sam. 1:​6-10; Job 29:​2, 4; Bsa. 51:11.

2. Avale bôt avé Yéhôva a wô’ô mvaé?

² Kalate Zambe a kôme liti na bôte be be’e metyi ya abé be ne ngule ya yené mvaé mise me Yéhôva. Aval avé? Éyoñe ba buni Yésus Krist a éyoñe ba duban. (Jean 3:16) Éyoñe bia bo de, bia kôme liti mengana bôt été na, bi jôbaneya abé dangan a na bi ka’aleya Zambe na bia zu bo fo’o ve nkômbane wé. (Mame mi. 2:38; 3:19) Yéhôva a wô’ô mvaé éyoñe bia bo mame mete asu na bi yemete élate jangan a nye. Nté bia ke ôsu a bo mame mese bi ne ngule ya bo asu na bi tôé ngaka’a jangan, Yéhôva a wô’ô bia mvaé, a nyoñe fe bia ane bemvôé bé.—Bsa. 25:14.

3. Jé bia zu yen ayé’é di?

³ Amu jé bôte béziñe ba simesane biyoñe biziñe na Yéhôva a wô’ô ki be mvaé? Aval avé Yéhôva a liti na a wô’ô bia mvaé? Jé é ne volô kristene na é tu’a tabe ndi na Yéhôva a wô’ô je mvaé?

AMU JÉ BÔTE BÉZIÑE BA SIMESANE NA YÉHÔVA A WÔ’Ô KI BE MVAÉ?

4-5. Akusa bo bi ne yene biabebiene zezé jôm, ve jé bi ne tabe je ndi?

⁴ Aso bongô, abui ya be bia da simesane na é ne zezé. (Bsa. 88:15) Mojañ éziñ a ne jôé na Adrián a jô na: “Me mbe me simesan éyoñ ése na me ne zezé jôm. Me ngenane me simesane  meye’elane me mbe me bo’ok me too mongô. Me mbe me ye’elane Yéhôva asu na nda bôte jam é nyiñe Paradis, amu me mbe me simesane na me nji bo avale môt é ne ke nyiñe Paradis.” Tony a nji yaé benya mejôô été a jô na: “Bebiaé bame be ngenane teke jô ma môs éziñe na ba nye’e ma, nge ki na ba wô’ô ma mvaé. Nalé a nga bo na me simesane na, me vo’o bo jôm éziñe ja ve be nlem avak.”

⁵ Nge da kui biyoñe biziñe na bi yene biabebiene zezé, bia yiane simesane na Yéhôva émiene nnye a nga dutu bia be nye. (Jean 6:44) A yene mbamba mefulu bi bili to’o ma biabebiene bia yene ki, a kôme fe yem avale môte bi ne. (1 Sam. 16:7; 2 Minl. 6:30) Ajô te, bi nji yiane sôô éyoñ a jô bia na bi ne édima.—1 Jean 3:​19, 20.

6. Bikobe nlômane Paul ô nga bo melu mvuse bi nga bo na ô yen ôbien aya?

⁶ Ôsusua na bia yeme benya mejôô, abui ya be bia é nga bo mame me ne bo na bi ke ôsu a ve biabebiene bijô. (1 P. 4:3) To’o bôte be boya Yéhôva ésaé den a ntoo abui mimbu ba ke ôsu a juan a mbia mefulu. Ye wo fe ô wô’ô simesane biyoñe biziñe na Yéhôva a vo’o jamé wo? Nge é ne nalé, ô ne bi ngule nyul éyoñe wo simesane na biwôlô bebo bisaé bi Yéhôva fe, bi nga juan a aval asimesan éte. Éve’an é ne na Paul a mbe a wô’ô émien éngôngol éyoñ a mbe a simesane bikobe bié. (Rom. 7:24) É ne été na, Paul a mbe a maneya jôban abé dé, a mbe fe a maneya duban. Ve a nga ke ôsu loon émiene na, “nlômane wo dañe tyôtyoé,” a jô fe na nnye a “dañ” bebo minseme bese.—1 Cor. 15:9; 1 Tim. 1:15.

7. Jé bia yiane ba’ale ôsimesan a lat a bikobe bi nga bo melu mvus?

⁷ Ésa wongane ya yôp été a ka’ale bia na, a ye jamé bia nge bia jôban abé dangan. (Bsa. 86:5) Ajô te, nge bia kôme jôban abé dangane nya njôbane, bi ne tabe ndi a mame Yéhôva a jô,—bi ne fe tabe ndi na a ye jamé bia.—Col. 2:13.

8-9. Jé é ne volô bia na, bi bo teke beta simesane na bi vo’o bo mame ma sili asu na Yéhôva a nye’e bia?

⁸ Bia bese bia kômbô bo Yéhôva ésaé a ngule jangan ése. Ve bôte béziñe ba simesane na be vo’o bo mame ma sili asu na be yené mvaé mise me Yéhôva. Sita a ne éyôlé na Amanda a jô na: “Me wô’ô simesane na, éyoñe ma bo abui mam asu Yéhôva nje ma ve nye biôme bi ne édima. Nalé a wô’ô tindi ma na me viane jeñe na me bo mame ma lôte ma nkôñ. Éyoñe ki ma kate kui na me bo jam éziñ, me wô’ô simesane na ma te’e Yéhôva nyul, a jam éte da bo na nyul é te’e ma ne botok.”

⁹ Jé é ne volô bia na bi bo te beta simesane na bia bo ki abime da yian asu na bi ve Yéhôva nlem avak? Te vuane na Yéhôva a vo’o sili bia mame bi nji bo ngule ya bo. A nye’e mame mese bia bo asu na bi ve nye nlem avak. Ve a yi na bi bo me a nleme wongan ôse. Tame simesane bôte be nga bo Yéhôva ésaé melu mvus a nleme wop ôse. Bi ne nyoñ éve’ane Paul. A nga bo Yéhôva ésaé abui mimbu a ayôñ ése. A nga wulu abui bekilimeta a kele’e a kañete, a bôndé fe abui bikôane bekristen. Ve éyoñe mame me nga tyendé ényiñe jé, Paul a nji be ngule ya beta kañete aval a mbe a bo’ok. Nde ye nalé a tinane na Yéhôva a nji be a beta wô’ô Paul mvaé? Momo. A nga ke ôsu a bo abim a mbe ngule ya bo, a Yéhôva a nga botane nye. (Mame mi. 28:​30, 31) Avale te fe, été jangan é ne bo na mame bi ne bo’ok asu Yéhôva me tyendé. Ve jame da dañe mfi mise me Yéhôva é ne beamu ba tindi bia na bi bo nye ésaé. Éyoñe ji, bi tame zu yene mame méziñe ma liti na Yéhôva a wô’ô bia mvaé.

 AVAL AVÉ YÉHÔVA A LITI NA A WÔ’Ô BIA MVAÉ?

10. Aval avé bi ne “wô’ô” tyiñe Yéhôva é jô’ô bia na a wô’ô bia mvaé? (Jean 16:27)

¹⁰ A ve bia Kalate Zambe. Yéhôva a nye’e a kate’e bebo bisaé bé abim avé a wô’ô be mvaé. Mimfufube mintilane mia liti na, a nga jô Yésus biyoñe bibaé na a ne mone wé a nye’e, a wô’ô nye mvaé. (Matt. 3:17; 17:5) Ye wo fe wo kômbô wô’ô ane Yéhôva a jô wo na, ma wô’ô wo mvaé? Yéhôva a jô ki bia de a too yôp été, ve a bo de a zene ya Kalate wé. Éyoñe bia lañe mbamba mejô Yésus a nga jô beyé’é bé, a ne ve ane bia “wô’ô” tyiñe Yéhôva é jô’ô bia mejô mete. (Lañe’e Jean 16:27.) Yésus a nga kôme tune mefulu me Ésa. Ajô te, éyoñe bia lañe na Yésus a nga jô beyé’é bé be be’e metyi ya abé na a wô’ô be mvaé, a ne ve ane Yéhôva nnye a jô bia mejô mete.—Jean 15:​9, 15.

11. Amu jé minju’u bia tôbane mie mia tinane ki na Yéhôva a nye’e ke fe bia? (Jacques 1:12)

¹¹ A jalé miñyiane miangan. Yéhôva a kômbô bia volô. Éve’an é ne na a jalé miñyiane ya minsône miangan. Ve biyoñe biziñe Yéhôva a ne kañese na bi tôbane minju’u miziñ, aval é nga kui mbo ésaé wé Job. (Job 1:​8-11) Éyoñe bia tôbane minjuk, nalé a tinane ki na Zambe a wô’ô bia abé. Ve mia ve bia fane ya liti Yéhôva abim avé bia nye’e nye, a abim avé bi too nye ndi. (Lañe’e Jacques 1:12.) Éyoñe bi tele minju’u été, bia ye yen abim avé Yéhôva a nye’e bia, a aval avé a volô bia na bi jibi minju’u mite.

12. Jé nkañete Dmitrii ô ne ye’ele bia?

¹² Bi tame yen jam é nga kui mojañe ya Asie a ne éyôlé na Dmitrii. Éyoñ a nga jañele ésaé jé, a nga bo abui bengone teke yen ésaé éfe. Ane a nga tyi’i na a zu tu’a nyoñe ngap ésaé nkañete asu na a liti Yéhôva na a too nye ndi. Abui bengon é nga lôt a teke yen ésaé éfe. A nga kone fe aval é ne na a nji be ngule ya beta kôlô énoñ. Ane a nga taté na a simesane na a nji bo mbamba nnôm a mbamba ésa. A nga taté fe na a sili émiene nge Yéhôva a wô’ô nye abé. Mame ngô’é me éziñ, ngo jé é nga tili mejô bia koone me kalate Ésaie 30:15 mon afep. Éfus éte ja jô na: “Ngule jenan ja ye bo nge mia tabe ne mieññ a buni.” Mvuse ya valé, ngo jé é nga ke bôôn afep éte nlô énoñe wé a jô nye na: “A pa, éyoñe wo ye beta wô’ô nlem abé ô ne simesane mejô ma.” Dmitrii  a nga kôme yene na a mvolane Yéhôva, nda bôte jé é mbe é ngenan é bili jôme ya di, jôme ya jaé a vôme ya tabe. A jô na: “Jame me mbe me yiane bo é mbe na me tabe ne mieññ a ke ôsu a tabe ndi a Yéhôva.” Nge wo tôbane avale nju’u te ô ne tabe ndi na Yéhôva a nyoñe ngap a wo, a na a ye volô wo na ô jibi.

13. Beza Yéhôva a ne belane be asu na a liti bia na a wô’ô bia mvaé, a aval avé?

¹³ A ve bia bobejañ a besita bangan. Yéhôva a belane bobejañ a besita bangan asu na a liti bia na a wô’ô bia mvaé. Éve’an é ne na, a ne belane be na be jô bia bifia bia ve bia ngule nyul mbamba éyoñ. Sita éziñe ya Asie a nga kôme yene de éyoñ a mbe a tele minju’u été. A nga jañele ésaé jé, a kone fe angôndô ya abui. Nde fe nnôm a nga bo mbia nsem, ane be nga vaa nye mvendé. A jô na: “Me mbe me katé kui na me wô’ô amu jé mame mete mese me nga kui ma. Me mbe me simesane na me nga yiane bo mbia jam éziñ, a na Yéhôva a wô’ô ma abé.” Kale jangan é nga ye’elane Yéhôva na a volô nye na a beta wô’ôtane nye’ane wé. Nde jé Yéhôva a nga bo? Sita a jô na: “Bemvendé ya ékôane bekristene jame be nga zu laan a ma a bôône ma nleme si, nalé a nga bo na me wô’ôtane na Yéhôva a ngenan a nye’e ma.” Mvuse ya valé, a nga beta sili Yéhôva mvolan. A jô na: “Môs ôte ôbien, bobejañ a besita be nga tili ma kalate. Éyoñe me nga lañe mbamba bifia be nga tili ma kalate ate, me nga wô’ôtane na Yéhôva a nga vô’ôlô meye’elane mam.” Ôwé, Yéhôva a wô’ô liti na a wô’ô bia mvaé a zene ya mbamba bifia bôte bevok ba jô bia.—Bsa. 10:17.

14. Zene fé éfe Yéhôva a belane je asu na a liti bia na a wô’ô bia mvaé?

¹⁴ Yéhôva a wô’ô fe belane bekristene bevok na be ve bia melebe mbamba  éyoñ. Éve’an é ne na, ntete mimbu ôsu, Yéhôva a nga belane Nlômane Paul na ô tili bekristene bevo’o bekalate 14 a ngule ya mfufube nsisim. E bekalate bete, Paul a nga ve bobenyañ a bekale bé ngule melep, ve a nga bo de nye’an été. Amu jé Yéhôva a nga bo na Paul a ve be avale melebe te? Amu Yéhôva a ne mbamba Ésa a lebe bone bé “a yen mvaé.” (Mink. 3:​11, 12) Ajô te, éyoñe môt a ve bia melebe ma so Kalate Zambe, nalé a nji tinane na Yéhôva a wô’ô bia abé, ve bia yiane yene melebe mete ane ndeme ja liti na Yéhôva a wô’ô bia mvaé. (Héb. 12:6) Mame mevé mefe ma liti na Yéhôva a wô’ô bia mvaé?

MAME MEFE MA LITI NA YÉHÔVA A WÔ’Ô BIA MVAÉ

15. Za Yéhôva a ve mfufube nsisime wé, a jé bi ne tabe nje ndi?

¹⁵ Yéhôva a ve bôt a wô’ô mvaé mfufube nsisime wé. (Matt. 12:18) Bi ne sili biabebiene na, ‘Ye me bili mefulu méziñe ma liti na me bili mfufube nsisime Zambe?’ Ye ma tu’a jibi bôte bevok éyoñe ji a lôt avale me mbe me jibi’i be ôsusua na ma yeme Yéhôva? Éyoñe wo ye ve ngule ya liti mbamba mefulu ya ébuma ya nsisime Zambe, wo ye tu’a tabe ndi na Yéhôva a wô’ô wo mvaé!—Fombô’ô nka’ale ô ne na, “ Mefulu ya ébuma ya nsisime me ne . . . ”

16. Za Yéhôva a ve ésaé ya kañete mbamba foé, a nalé a bo na ô wô’ôtan aya? (1 Bethessalonicien 2:4)

¹⁶ Yéhôva a ve bôt a wô’ô mvaé ésaé ya kañete mbamba foé. (Lañe’e 1 Bethessalonicien 2:4.) Tame yene bibotane sita a ne jôé na Jocelyn a nga bi éyoñ a nga kañete bôte bevo’o mbamba foé. Môs éziñ, Jocelin a nga kôlô si nlem ô too nye abé. A jô na: “Nyul é mbe ma nte’ane ne botok, a me mbe me yene’e mamiene zezé jôm. Ve me mbe nkpwa’a mefan, a môs ôte ô mbe môse ma yiane kui nkañete. Ane me nga ye’elan a ke nkañete.” Mame tyé mete, Jocelin a nga kañete Mary. Minga ate a mbe angôndô ya mbamba nlem, ane a nga kañese ayé’é Kalate Zambe. Bone bengone mvuse ya valé, Mary a nga kate Jocelyn na éyoñ a nga zu kute mbé wé, a mbe a ndôme mane ye’elane Yéhôva na a volô nye. Éyoñe Jocelyn a simesane jam éte a jô na: “Me nga wô’ôtane ve ane Yéhôva a jô ma na, ‘Ma wô’ô wo mvaé.’” É ne été na, môt ase a ye ke nyoñe bia mvo’é ésaé nkañete jangan, ve  bi ne tabe ndi na Yéhôva a ne mevak éyoñe bia ve ngule jangan ése na bi kañete bôte bevo’o mbamba foé.

17. Mejô me Vicky ma ye’ele wo jé a lat a ntañ? (Besam 5:12)

¹⁷ Yéhôva a ve bôt a wô’ô mvaé fane ya bu’ubane ntañ. (1 Tim. 2:​5, 6) Ve jé bi ne bo nge nleme wongane wo ke ôsu a jô bia na Yéhôva a wô’ô ki bia mvaé, a too ke na bi maneya liti na bia buni ntañ a duban? Bi nji yiane vuane na bi vo’o ki tabe ndi a nleme wongan éyoñ ése, ve bi ne tabe ndi a Yéhôva. Yéhôva a yene na bôte ba buni ntañ be ne zôsô mise mé, a ka’ale fe na a ye botane be. (Lañe’e Besam 5:12; Rom. 3:26) Sita Vicky a nga yene mfi ya nyoñ éyoñe ya bindi ntañ. Môs éziñ éyoñ a nga mane bindi ntañ, Vicky a nga jô na: “Yéhôva a jaéya zu a liti ma na a nye’e ma. . . . Ve, a mbe ane ma jô nye na: ‘Ô vo’o nye’e avale môte dam. Nde fe to’o awu Mone Wé é vo’o buti mam abé mam.’” Éyoñe Vicky a nga mane bindi beta das a ne ntañ, a nga taté na a wô’ôtane na Yéhôva a nye’e nye. Bia fe, bia ye wô’ôtane na Yéhôva a nye’e bia a na a wô’ô bia mvaé, éyoñe bia ye nyoñ éyoñe ya kôme bindi ntañ.

18. Jé bi ne tabe je ndi nge bia ke ôsu a nye’e Ésa wongane ya yôp été?

¹⁸ To’o bia ve ngule ya tôñe mame bia te yen ayé’é di, é ne kui biyoñe biziñe na bi bili atek, a na bi sili biabebiene nge Yéhôva a wô’ô fo’o bia mvaé. Nge da kui na ô tebe aval été éte, te vuane na Yéhôva a yene “ba ba ke ôsu a nye’e Nye” mvaé. (Jacq. 1:12) Ajô te, kele’e ôsu a subu Yéhôva bebé a jeñe’e na ô yene mezene mese ma liti na a wô’ô wo mvaé. Te ve’ele vuane môs éziñe na Yéhôva “a nji bo ôyap a môt ase ya be bia.”—Mame mi. 17:27.