A bisoé—Aval avé mi ne kômesan asu mbatizô?
“M’ayen mvaé ya bo mam w’anye’e, a Zambe wom.”—BESAM 40:8.
BIA: 51, 58
1, 2. (a) Kate amu jé mbatizô ô ne beta jam. (b) Ôsusua na a duban, jé môt a yiane bo, a amu jé?
YE Ô ne ésoé ja kômbô duban? Nge nalé, a ne fo’o beta jam ô ne bo. Avale bi nga yen ayé’é ya mvus, mbatizô ô ne beta ntyi’an. Mbatizô wo liti bôt bevo’o na, ô veya womiene ngumba be Yéhôva. Mbatizô wo liti fe na, ô ka’aya Yéhôva na wo ye kañe nye nnôm éto a liti na, nkômbane wé ô ne jam da dañe mfi ényiñe jôé. Mbôle ntyi’an ôte ô ne beta jam, wo yiane duban fo’o ve éyoñ ô nto étôtôlô. Éyoñ ô mbili nkômbane ya bo de, a éyoñ ô wô’ôya atinane ya e ve womiene ngumba be Yéhôva.
2 Ô ne simesan na, ô ngenan teke bo nkômesan ya duban. Nge ke na, wo kômbô duban, ve bebiaé bôé ki ba simesane na, wo yiane yange asu na ô wôn, a bi abui fek. Jé wo yiane bo? Te bili atek. Ve bela’an éyoñe te asu na ô yaé nsisim été, ndemben ô ne bo ngule ya duban. A ôsimesane te nlô, ô ne bi minsôñane bevôme belal: (1) mam wo yé’é, (2) mimboane miôé, a (3) e yeme mvaé Yéhôva a bo wo.
MAM WO YÉ’É
3, 4. Jé bisoé bi ne yé’é éve’ela Timothée?
3 Tame fas avale wo ye yalane minsili mi: Amu jé ma buni na, Zambe a ne? Jé ja liti ma na, Kalate Zambe a ne nsoane be Zambe? Amu jé ma tôñe metiñe me Zambe a lôté na, me vu abo dulu ya émo? Minsili mite mi ne volô wo na, ô tôñe melebe me nlômane Paul ma: “Ve’ele mve’elan ya bo mam me ne nkômbane ya Zambe, mam me ne mvaé, me anyoñeban, a me ne mvo’é ésese’e.” (Beromain 12:2) Amu jé wo yiane bo aval éfuse ji ja jô?
4 Éve’ela Timothée é ne volô wo. Timothée a mbe a kôme yeme mejô me Zambe amu nyia wé ba émvame jé, be nga ye’ele nye me. Nde fe, Paul a nga jô Timothée na: “Tebe’e ne bip e mam ô nga yé’é a kañese ane benya mejôô.” (2 Timothée 3:14, 15; Mfefé Nkôñelan) E vôme nyi, éfia “kañese” ja tinane na, “e yebe, e tabe ndi na jôm éziñ é ne fo’o été.” Nde ñhe, Timothée a mbe a yeme na, mam a mbe a yé’é me mbe me so’o e Kalate Zambe été. A nga yebe benya mejô, sa ke amu na nyia wé ba émvame jé, be nga tindi nye na a bo de, ve amu a nga nyoñ éyoñe ya fase mam a nga yé’é, a kañese me.—Lañe Beromain 12:1.
5, 6. Amu jé é ne mfi na, ô yé’é na wo belane fe’e ya yemelan éyoñ ô ngenan ésoé?
5 Mfa’a wôé ki? Éko éziñe na, ô yemeya benya mejô, den a nto ayap éyoñ. Nge nalé, tame nyoñ éyoñe ya kôme fase beamu ba bo na, ô yebe mam wo yé’é. Mfasan ôte wo ye volô wo na, ô yemete mbunane wôé. Ô ne fe volô wo na, ô bo teke nyoñe mbia mintyi’an amu na, benyo bemvôé ba tindi wo na ô bo de, ôsimesane ya émo, nge ke asimesane dôé womien.
6 Nge wo yé’é na wo belane fe’e ya yemelan éyoñ ô ngenan ésoé, wo ye bo ngule ya yalane minsili bôt ba sili wo mi: ‘Aval avé wo yeme na, Zambe a ne? Nge Zambe a nye’e bia, amu jé a jô’é na, mbia be mam be kui? Nne be ne yeme jô na, Zambe a zuya a nyiñe kom ése, aya?’ Éyoñ ô ne nkômesan, avale minsili te da ye ke bo na, bisô bi bialé wo nlem été. Bia ye viane tindi wo na, ô tu’a yé’é mejô me Zambe.
7-9. Kate bia avale “Qu’enseigne réellement la Bible? (Fiches d’étude)” a ne anjeñe mefoé, a ne volô wo na ô yemete ñyemane wôé ya mam wo yé’é.
7 Éyoñe wo kôme nyoñ éyoñe ya bo ayé’é étam dôé, wo ye bi biyalane ya minsili miôé. Wo ye vaa bisô bi ne wo nlem été, a wo ye yemete ñyeman wôé. (Mam Minlôman 17:11) Bi bili abui bekalate é ne volô wo na, ô bo jame te. Abui bisoé é nga yene mfi ya yé’é nsoé kalate ba loone fulasi na, Cinq questions à se poser sur l’origine de la vie a kalate ba loone fulasi na, Y a-t-il un Créateur qui se soucie de vous? Nde fe, abui bisoé é nga yene mvolan anjeñe mefôé jw.org éyoñe be nga lañe mam me ne vôm ba loone na, “Qu’enseigne reéllement la Bible (Fiches d’étude).” Kele vôm a ne ntilane na, LA BIBLE ET VOUS. Nge ô nyoñe nlô ajô wua ya Kalate Zambe, wo ye koone miñye’elane mi aye volô wo na, ô yemete ñyemane wôé ya mam wo yé’é.
8 Mbôle wo yé’é Kalate Zambe, ô nga yiane yeme biyalane biziñe ya minsili mi ne e fiche d’étude. Ve ye ô to ndi na a ne benya biyalan? Fiche d’étude aye volô wo na, ô yeme fas bifuse ya Kalate Zambe. Éyoñ ô maneya fas, fiche d’étude ate a bili fe bevôm ô ne ngule ya tili amu jé wo buni jame si nge jame ka. Mboan ôte ô ne volô wo na, ô yeme kate bôte bevo’o mame wo buni. Nge ô bili fane ya ke anjeñe mefoé, bela’ane befiche bete ayé’é étame dôé asu na ô yemete mam wo buni.
9 Wo yiane yeme nleme wôé été na, mam wo buni me ne benya mejô. Mboan ôte wo ye kômesane wo asu mbatizô. Kale jangan é ne ésoé é nga jô na: “Ôsusua na ma nyoñe ntyi’ane ya duban, me nga yé’é Kalate Zambe a yeme nya ñyebe. A nté ôse ma nyiñ, ñyemane te wo bo ngul.”
MIMBOANE MIÔÉ
10. Amu jé da yiane na, môt a dubaneya a liti mbunane wé a mimboan?
10 Kalate Zambe a jô na: “Mbunan, nge ô ne te bi mimboane mi mam, ô ne ñwuan mfa’a ya ôbien.” (Jacques 2:17) Nge mbunane wôé ô ne ngul, wo ye liti wô a mimboane miôé. Wo ye bi jôme Kalate Zambe a loone na, ‘zôsôa ntaban ase a mboane mam ane Zambe a nye’e.’—Lañe 2 Pierre 3:11.
11. Kate bia atinane ya “zôsôa ntaban.”
11 Jé é ne “zôsôa ntaban?” Nge mimboane miôé mi ne zôsô, ô bili mbamba ntaban. Tame ve’ele fombô mvus, den ngon ésaman. Éyoñ ô nga tebe meve’ele été, ye ô nga kôme fo’o yemelan jôm é mbe abé, a ji é mbe mvo’é? (Behébreu 5:14) Ye wo simesane môs ô mbe ô kombô’ô bo jôm éziñ, nge ke na bongô be sikôlô be nga tindi wo na ô bo jôm éziñ, ve ô nga bene je bo? Ye wo liti bôt bevo’o mbamba éve’ela e sikôlô? Ye wo ke ôsu a wulu ba’aba’a a Yéhôva nge ke na, wo bo avale bongô besikôlô bese bevo’o ba bo, asu na ô sa’ale épkwe’ele? (1 Pierre 4:3, 4) É ne été na, bôte bese be ne bebo mam abé. To’o bôt be kañeya Yéhôva ayap éyoñ, be ne wô’ô ôson, nge yen ayaé ya kañete bôt bevo’o mejô me Zambe. Ve môt a veya émiene ngumba be Yéhôva, a ye wô’ô meva’a ya bo Ngaa Yéhôva. A ye liti de a mbamba ntaban.
12. Mimboane mivé miziñ mi ne ‘mboane mam ane Zambe a nye’e,’ a wo yiane yene mie aya?
12 Jé é ne ‘mboane mam ane Zambe a nye’e’? A ne mboane bisaé ya akônda, ane ntabane bisulan a nkañetane mbamba foé. A ne fe mboane mam bôt bevo’o be nji yen, aval ane meye’elane wo bo Yéhôva, a ayé’é étame dôé. Môt a veya émiene ngumba be Yéhôva, a nji yene mam mete ayaé ya bo. Môt ate a ye wô’ô aval Njôô bôt David a nga wô’ô éyoñ a nga jô na: “M’ayen mvaé ya bo mam w’anye’e, a Zambe wom; Ya, metiñe môé me ne me nlem été.”—Besam 40:8.
13, 14. Jé é ne volô wo na, ô bi ‘mboane mam ane Zambe a nye’e,’ a aval avé bisoé biziñ bi nga belane fiche de réflexion ?
13 Asu na bi volô wo na ô bi minsôñan, bi bili fiche de réflexion e kalate ba loone na, Les jeunes s’interrogent. Réponses pratiques, volume 2, mefebe 308 a 309. E fiche de réflexion, ô ne tili biyane biôé ya minsili mi: “Mam mevé wo sili Yéhôva meye’elane môé, a jé mam wo sili, ma liti mfa’a ya nye’ane wo nye’e nye?” “Ye ô ne mbane ya bo ayé’é étame dôé?” “Ye ô wô’ô ke nkañete ja’a bebiaé bôé be nji ke?” Fiche de réflexion a bili fe mone vôm asu na, ô tili nsôñan ôse ô bili a lat a meye’elane môé, ayé’é étame dôé, a nkañete.
14 Abui bisôé da kômbô duban, é nga yene na, fiche de réflexion nyi a ne be beta mvolan. Ésoé kale jangan ba loone na, Tilda é nga jô na: “Me nga belane fiche de réflexion asu na, me tôé minsôñane miam. Me nga ke ma tôé mie ôte’ete’e ôte’etek, akekui me nga bo ngule ya duban, mvuse ngumba mbu.” Patrick fe, ésoé mojañ, é nga yene mfi ya belane fiche de réflexion. A jô na, “Me mbe me nga yeme minsôñane miam, ve e tili mie vôm éziñ a nga volô ma na, me ve mengule ya tôé mie.”
Ye wo ye ke ôsu a kañe Yéhôva to’o bebiaé bôé be nji kañe nye? (Fombô’ô abeñ 15)
15. Kate amu jé ntyi’ane ya ve womiene be Yéhôva wo yiane so wo nlem été.
15 Nsili wua ya fiche de réflexion ô ne na: “Ye wo ye ke ôsu a kañe Yéhôva ja’a bebiaé bôé, a benyo bemvôé, ba telé na ba kañe nye?” Éyoñ ô veya womiene ngumba be Yéhôva a duban, mia nye mi nto amvôé. Nde ésaé wo bo Yéhôva é nji yiane ke tyebe bitul bebiaé bôé, nge môt mfe. Zôsôa ntabane wôé, a mboane mam ane Zambe a nye’e bia liti na, wo yeme na ô ne nya zene. A na, wo kômbô tôñe miñye’elane ya Kalate Zambe. Mvuse ya valé, wo ye dudan.
E YEME MVAÉ YÉHÔVA A BO WO
16, 17. (a) Jé é ne tindi môte na, a bo Kristen? (b) Éve’an évé é ne liti na bia yiane ve Yéhôva ba Yésus akéva amu ntañ?
16 Môs éziñ, beta ñyeme metiñe me Moïse a nga sili Yésus na: “Metiñe me Zambe, atiñ avé da dañ?” Yésus a nga yalane nye na: “Nyeke’e Éso Zambe wôé a nleme wôé ôse, a nsisime wôé ôse, a nlô wôé ôse.” (Matthieu 22:35-37) Yésus a nga liti na, nye’ane môt a nye’e Yéhôva, ñwô wo tindi nye na, a duban a na a bo Kristen. Mbamba zene wua ya yemete nye’an ôte a ne na, ô bindi beta dase Yéhôva a nga ve bia—ntañ. (Lañe 2 Becorinthien 5:14, 15; 1 Jean 4:9, 19.) Éyoñe wo bo de, wo ye kômbô liti na, wo yeme mvaé Yéhôva a nga bo wo.
17 Ô ne liti na wo yeme mvaé Yéhôva a nga bo wo avale di: Tame simesane na, ô yia wu ôsôé, éyoñe te môt a zu nyi wo. Ye wo ye bo ve na, nné ane wo kui nda, ô mane fimi nyôl, ô vuane ki jame môt ate a te bo wo? Teke jôm! Ke wo ye ke ôsu a simesane mvaé môt ate a nga bo wo! Avale te nde fe bia yiane yeme mvaé Yéhôva ba Yésus be nga bo bia. Nge bia nyiñe den, a ne amu be! Be nga nyii bia abé a awu. Amu beta nye’ane Zambe ba Yésus be nga nye’e bia, bi nga nyiñ éyoñe ji, a ndi nleme ya nyiñ e Paradis!
18, 19. (a) Amu jé ô nji yiane koo woñe ya bo môta Yéhôva? (b) Aval avé ényiñe jôé é ne abeñ éyoñe wo bo Yéhôva ésaé?
18 Ye wo yeme fo’o mvaé Yéhôva a nga bo wo? Nge nalé, e ve womiene ngumba be Yéhôva, a duban a ne beta jame wo yiane bo. Éyoñe wo ve womiene ngumba be Yéhôva wo ka’a nye na, wo ye bo nkômbane wé éyoñ ése. Ye wo yiane ko woñe ya bo Yéhôva ngaka’a éte? Teke fo’o! Yéhôva a yi mam me ne mvaé asu dôé, a ye fe botane bôte ba bo nkômbane wé. (Behébreu 11:6) Éyoñe wo ve womiene ngumba be Yéhôva, a duban, ényiñe jôé ja ye ke bo momo. Ja ye viane bo nya nya abeñe. Mojañe wongan a mbili mimbu 24, a nga duban a too mongô, a jô na: “Me mbe ve yeme mejô me Zambe abui me too ôkala éziñ. Ve mveane me nga ve mamiene ngumba be Yéhôva me too mongô, ô nga volô ma na, me bo teke tôñe minsôñane ya émo ji.”
19 Yéhôva a yi mam me ne mvaé asu dôé. Ve Satan ki, a simesane ve émien, nde fe a nji nyoñe ngap a wo. Nge ô tôñe nye, a se ngule ya bo wo mbamba jam éziñ. Nne a ne yeme ve wo jôm a nji bi aya? A nji bi mbamba foé ya kate bôt, nge ndi nlem éziñe mfa’a ya melu ma zu. Jôme jia a ne ve wo, é ne fo’o ve éngôngol ényiñ ja yange nye melu ma zu!—Nlitan 20:10.
20. Jé nje ésoé é ne ngule ya bo asu na, é ve ébiene ngumba be Yéhôva, a duban? (Fombô’ô fe encadré “Asu na bi volô wo na ô yaé nsisim.”)
20 E ve womiene ngumba be Yéhôva a ne ntyi’ane wo dañe mintyi’ane mise ô nyoñeya. Ye ô ntoo nkômesane ya bo jame te? Nge nalé, te ko woñe ya bo ngaka’a éte. Ve nge wo buni na, ô ngenane teke bo nkômesan, tôñe melebe wo te bi ayé’é di asu na, ô ke ôsu a yaé nsisim. Paul a nga jô bobejañe ya Philippe na, be ke ôsu a yaé nsisim. (Bephilippien 3:16) Nge ô tôñe melebe mete, ana’ana, wo ye ve womiene ngumba be Yéhôva, a duban.
