MÔT ase ya be bia a nye’e éyoñ ba jô na a ne mbamba môt. Ve é nji bo tyi’ibi ya bo mvam * melu ya asu’ulane ma. Amu den abui bôt e ne “te nye’e mam me ne mvaé.” (2 Tim. 3:3) Môt ase a bo aval a kômbô; bi wô’ô wôk abui bôt e jô’ô na ‘abé e ne mvaé’ a na ‘mvaé é ne abé.’ (És. 5:20) E ne fe bo ayaé ya bo mam me ne mvaé nge bi nga yaé mbia bevôm, a amu bi nga bialé abé été. Jôm ete bi ne wô’ôtan ane Anne, * nnye ate a bo Yéhôva ésaé den a nto mimbu mewôm, a jô na: “Me nji be me simesa’ane na me ne bo mbamba môte môs éziñ.”

Mbamba foé a ne na, môt ase a ne bo mvam. Amu na mvam é ne ngabe jia ya ébuma ya nsisim, a na teke jam éziñ é ne bo na mbamba nsisim a kate bo ésaé jé. Bi tame zu kobô ajô mvam a yen aval avé bi ne tu’a jô’é na fulu éte é jôé bia.

Bi ne jô tyi’ibi na, môt a ne mvam éyoñ a bo mvaé. Môt a ne mvam a bo mam me ne zôsôô, a sa’ale mam me ne abé. Éyoñ môt a ne mvam, bôte befe ba yene mfi ya fulu éte. Amu mvam é nji bo fulu ja sobô, ja kôme yené a mimboane mi ne mfi asu bôte bevok.

Bôte béziñe be ne simesane na, be ne mvam amu ba nyoñe ngab a menda me bôte map, nge ke amu ba volô bemvôé bap; ve ye nne fulu mvam ja su’u valé nga? E ne été na, teke môt éziñe ya be bia a ne liti fulu éte ntene nten, amu Bible a jô na “zôsôa môt a nji bo si va, a bo mvaé [kom ése], te bo abé.” (Ec. 7:20) Paul émien a nga meme na: “Ma yeme na, be ma, minsône miam été, teke jam e ne mvaé e too été.” (Bero. 7:18) Amu nalé, da sili na bi ke labe fulu éte Ajeñ ébien, be Yéhôva.

Yéhôva nnye a tyi’i na jame si jame ka é ne mvaé nge abé. Ntili Besam éziñ a nga ye’elane Yéhôva a jô’ô na: “Ô ne mvaé a w’abo mvaé; Ye’ele ma memvinda môé.” (Bs. 119:68) Bi tame ñhe zu yen aval avé Yéhôva a ne mvaé, a aval avé a bo mvaé.

Yéhôva a ne mvaé. Yéhôva a ne étyi teke kandan a fulu mvam. Tame yene jam é nga boban môs a nga kobô a Moïse; a nga jô nye na: “M’aye lôte zôsôô wom, nge ke mvame jam mise môé.” Éyoñe Yéhôva a nga belan étôto’o jé na a liti Moïse abim avé a ne mvam, tyiñ é nga so étôto’o Yéhôva é jô’ô na: “Yéhôva, Yéhôva, Zambe ya éngôngo a mvam, ôte’ete’e ya yaa, a bili abui mvam a benya mejôô; a ba’ale mvame jé mfa’a ya betoyini be bôt, a jamé mbia be mam, a minkoban, a abé; a ye bo te kale bôte be ne mekua.” (Nk. 33:19; 34:6, 7) Jôm ete nje bi ne fo’o jô na mvam é ne Yéhôva nyulu nyulu, a na ja yené mam mese a bo. Yésus émien a nga yemete jam ete, to’o na émien a mbe susu’a mbamba  môt é nga nyiñe si va, a nga jô na: “Teke môt a ne mbamba môt, ve Zambe étam.”​—Luc 18:19.

Mimboane mi mam mi Yéhôva mi ne mvaé. Mvame ja yené mam mese Yéhôva a bo. Bible a jô na: “Yéhôva a bo bôte bese mvaé; a abui mvame dé [da yené] mimboane mié mise.” (Bs. 145:9) Mvame Yéhôva ja fiale ki mingum mi bôt, a ve bôte bese ényiñ a mam mese ma bo na be nyiñ. (Mam. 14:17) Mvame jé ja yené fe éyoñ a jamé bia. Ntili Besam éziñ a nga jô na: “Wo, a [Yéhôva], ô ne mvaé a avôle ya jamé.” (Bs. 86:5) Bi ne tabe ndi na, “Yéhôva . . . a ye bo te nyume bôt b’awulu zôsôô jôm é ne mvaé.”​—Bs. 84:11.

Yéhôva a nga té bia éve’ela jé, jôm ete bi ne ngule ya bo mvaé a mvamane bôte bevok. (Met. 1:27) Kalate Zambe a jô bia na: “Yeka’an mboan mvaé.” (És. 1:17) Nde jé é ne volô bia na bi bi mbamba fulu ate? Bi tame zu yen mam melal.

Jam ôsu, bia yiane ja’é Yéhôva mbamba nsisim, nnye ate a ne volô Bekristene na be bi fulu mvam. (Beg. 5:22) Ôwé mbamba nsisim a ne ngule ya volô bia na bi nye’e mam me ne mvaé a na bi lume mam me ne abé mvus. (Bero. 12:9) Kalate Zambe a jô ne sañe sañ na Yéhôva a ne “yemete [bia] mfa’a ya mba mboan a mba ajô ase.”​—2 Bet. 2:16, 17.

Jame baa, bia yiane lañe Kalate Zambe. Nté bia bo de, nté ôte ôse fe Yéhôva a liti bia “mbamba zen,” a volô fe bia na bi bo nkômesan “mfa’a ya mbamba mboan ase.” (Min. 2:9; 2 Tim. 3:17) E lañ a bindi mam bia lañ a volô na, nlem ô jaé bia a mbamba be mam a lat a Yéhôva a nkômbane wé. Ndemben bia jaé fe a akume ya nsisim da ye volô bia melu ma zu.​—Luc 6:45; Beép. 5:9

Jame lale, bia yiane ve ngul ése na bi “vu mam me ne . . . mvaé.” (3 Jean 11) Bi bili mbamba bive’ela Kalate Zambe. Teke bisô na éve’ela ôsu é ne ji Yéhôva a ji Yésus. Ve bi bili fe bive’ela bi bôte befe Kalate Zambe été, ane Tabitha ba Barnabas. (Mam. 9:36; 11:22-24) Kôme’e nyoñ éyoñ ya yé’é minkañete miap, a yen aval avé be nga volô bôte bevok. Fase’e mam méziñ wo fe ô ne bo asu na ô mvamane bibu’a ya nda bôte jôé nge ke bobejañe ya akônda. Simesa’ane fe bibotane môt ase ya be be a nga bi amu a nga mvamane bôte bevok. Wo fe ô ne bu’uban a avale bibotan ete.

 Bi bili fe mbamba bive’ela bebo bisaé be Yéhôva den. Bi ne lañe bemvendé, mbe bete ba ve ngul ése na be “nye’e mam me ne mvaé.” Bia simesane fe biwôlô besita biangan, mbe bete ba jô ke ve anyu na ba nye’e mvaé, ve ba liti fe a ntabane wobe na be ne “beye’ele ya mam me ne mvaé.” (Tite 1:8; 2:3) Roslyn a jô na: “Mvôé jam ja ve ngul ése na é volô Bekristene ya akônda a ve be ngule nyôl. A nyoñ éyoñ ya fas été jap, a ve be bone be biôm, a bo fe mam mefe asu na a volô be. Mfa’a wom a ne fo’o nya mvame sita.”

Yéhôva a lebe bebo bisaé bé na be ‘jeñ mam me ne mvaé.’ (Amos 5:14) Nge bia bo de, bia ye kui na bi nye’e mam me ne mvaé mise me Yéhôva, bia ye fe bi nkômbane ya bo me.

Bi nji yiane buni na, asu na bi bo mvam bia yiane bo beta be mam, nge ve bôt biôm bi ne dia. Bi tame nyoñ éve’an: Asu na élé bia te bé é yaé a ve bibuma, bia sôé ki je abui mendim éyoñ jia. Ve bia sôé je mendim mone jôm mone jôm môs ôse akekui ja yaé. Aval ete fe, nge bia bo bone be mam môs ôse asu na bi volô bôte bevok, nalé a ye liti na bi ne mvam.

Bible a jô na bia yiane bo “nkômane ya bo jam ese e ne mvaé.” (2 Tim. 2:21; Tite 3:1) Nge bia jeñe na bi yemelane mam ma jembane bôte bevok, bia ye fe yene fane ya bo be “mam me ne mvaé, mfa’a ya” volô be. (Bero. 15:2) E ne sili na bi ve be jôm bi bili. (Min. 3:27) Bi ne bañete môte na a zu di, nge ke na a zu fo’o lôte mbamba éyoñ a bia. Nge bia wô’ô na môt éziñ a kon, bi ne tili nye mone kalate, bi ne ke jome nye, nge ke loone nye téléfôn. Ôwé, mezene ya jô môt “mbamba éfia” ma jembane ki; ajô te bia yiane jeñe fane ya jô môt ‘avale éfia ja vôlô a ji ja zuu mvam be ba ba wô’ô je.’​—Beép. 4:29.

Aval ane Yéhôva, bia jeñe mezene ya mvamane bôte bese teke sesale. Beta jam bi ne bo asu na bi mvamane bôt a ne na bi kañete be mbamba foé ya Éjôé Zambe. Amu bia tôñ atiñe Yésus, bia bo môt ase mvaé, to’o ba ba vini bia. (Luc 6:27) Mvam é ne étyi te kat ayem, amu avale Bible a jô, “atiñ da vini [mvaé a mvam] e ne momo.” (Beg. 5:22, 23) Éyoñ bia ke ôsu a bo mvaé to’o na bia tôban étibela’a, bia ve Yéhôva duma, a bi ne dutu bôte bevo’o nya ékaña’a.​—1 P. 3:16, 17.

Kalate Zambe a jô na: ‘Mbamba môt a ye jaé a mbamba mimboane mié.’ (Min. 14:14) Bibotane bivé bôte be ne mvam ba bi? Éyoñ bia mvamane bôt, be’e fe ba ye mvamane bia. (Min. 14:22) To’o bôte béziñ ba bo te bo de, bi bia yiane ke ôsu a mvamane be. Za a yem? Mvam éte é ne su’ulane nambe be nlem, a bo na be tyendé.​—Bero. 12:20.

Abui bôt da bo’olô na be nga bi abui bibotan amu be nga bo mvaé, a lum abé mvus. Nancy a ne wua ya été. A jô na: “Éyoñ me mbe mongô, me mbe me bo’o mame mam teke bisi môt, me mbe fe me bo’o mvite mam, me too fe jôm é n’ébiasé. Ve nté me nga ke ôsu a yé’é a tôñe melebe ya Bible, me nga bi abui mevak. Den, me ntoo avale môte ba semé amu me ne éjijin.”

Jam da yiane bia dañe tindi na bi bo mvaé, é ne nkômbane ya ve Yéhôva nlem avak. To’o bôte befe ba yene ki fo’o mbamba be mam bia bo, Yéhôva nye a yene me. A yem éyoñ ése bia bo mvaé, a éyoñ ése bi bili mbamba b’asimesan. (Beép. 6:7, 8) Nde a ye ya’ane bia aya? Kalate Zambe a ka’ale bia na: “Mbamba môt a ye nyoñ mvam be Yéhôva.” (Min. 12:2) Ajô te, enkelané ôsu a bo mvaé. Yéhôva a ka’ale môt ase a bo mvaé “étôto’ a duma a mvo’é.”​—Bero. 2:10.