1-2. Za a ne volô ñyé’é Bible na a yaé nsisim a baptizôban?

AMY, sita éziñe ya Fidji a jô na: “Me mbe me nye’e mam me mbe me yé’é Bible. Me mbe me yeme’e na me ne benya mejôô. Ve a ne éyoñ me nga taté na ma yeñ a bobejañ, nne me nga kui na me bo mintyendan ényiñe jam a baptizôban.” Jam Amy a jô le da ve bia beta ñye’elan: Ñyé’é Bible a ne ji’a yaé nsisim a baptizôban nge a bi mvolane bobejañe ya akônda.

² Nkañete mbamba foé ase a ne volô beyé’é Bible na be bo bibu’a ya akônda. (Beép. 4:16) Leilani, nkpwa’a mefan éziñe ya Vanuatu, a jô na: “Ébu’u éziñe ja jô na, mon a ne mone ya nlam. Nne fe é ne nalé asu beyé’é Bible bangan. Akônda ese nde da saé asu na môt a nyiin ékôane Yéhôva.” Bibu’a ya nda bôt, bemvôé, beye’ele, bese ba saé asu na mongô a bo nya môtô. Ba bo de éyoñe ba ve nye ngule nyul, a éyoñe ba ve nye miñye’elane mii bo nye mfi ényiñ. Aval ete da da, asu na beyé’é Bible be yaé nsisim, da sili na bekañete mbamba foé bese ya akônda be ve be ngule nyul, be ve be mbamba melep, a liti be mbamba éve’ela.​—Min. 15:22.

3. Mame Ana, Dorin, a Leilani ba jô ma ye’ele bia jé?

³ Amu jé nkañete mbamba foé ase a yiane vak éyoñe bobejañe ya akônda ba volô môte ba nye ba yé’é? Ana, nkpwa’a mefan a ne ngum aval ya Moldavie, a jô na: “E ne angôndô ya ayaé na nkañete mbamba foé wua a jalé miñyiane mi ñyé’é Bible mise.” Dorin, nkpwa’a mefan a ne ngum aval mfe ya Moldavie, a jô na: “E wô’ô kui  biyoñe biziñe na bobejañ be kate ñyé’é Bible jam éziñe da nambe nye nlem, jame mamien me nji be ve simesane môs éziñ.” Leilani a jô fe na: “Nye’an a ôsesa môt ase ya be bia a liti ñyé’é Bible, bi ne volô nye na a yene na bia bi ne benya bebo bisaé be Yéhôva.”​—Jean 13:35.

4. Jé bia zu yen ayé’é di?

⁴ Ve ô ne sili womiene na, ‘Nne me ne yeme volô ñyé’é Bible na a yaé nsisim aya nge sa ke ma ma bo ayé’é dé?’ Bi tame zu yene jam bi ne bo éyoñe mojañ a bañete bia na bi ke bo ayé’é éziñ a nye, a avale bi ne volô beyé’é Bible be tatéya na ba tabe bisulan. Bii yene fe avale bemvendé be ne volô beyé’é Bible na be yaé nsisim a baptizôban.

5. Jé wo yiane bo éyoñe wo ke volô bo mojañ ayé’é?

⁵ Môt a bo ayé’é nnye a ne môt ôsu a bili mbe’e ya volô ñyé’é Bible na a tu’a wô’ô Mejô me Zambe. Ajô te, nge nkañete mbamba foé éziñ a loene wo na ô ke bo ayé’é éziñ a nye, te vuane na ô ne ve mvolô. Ésaé jôé é ne na ô ke su’u nye. (Ec. 4:9, 10) Nde, jé ô ne ñhe kôme bo asu na ô su’u nye?

6. Aval avé ô ne tôñe ñye’elane ya kalate Minkana 20:18 éyoñe wo ke volô bo mojañ ayé’é éziñ?

⁶ Kômesa’an ayé’é. Taté’é sili môte mia nye mia ke bo ayé’é na a kate wo bone be mam béziñ a lat ñyé’é Bible. (Lañe’e Minkana 20:18.) Ô ne sili nye na: “Môte mia nye mia yé’é a ne ôkala ôvé? Ye a bili nda bôt? A ne ke ñyebe ôvé? Bia zu ke kobô ajô jé a nye? Miñye’elane mivé wo yi na a ba’ale memane ya ayé’é? Jé me ne jô nge bo, nge ke sa’ale? Aval avé me ne nye volô na a yaé nsisim?” E ne été na môt a bo ayé’é a nji yiane kulane mam méziñ ñyé’é Bible a nga kate nye a lat a ényiñe jé, ve mam é kate wo mé volô wo na ô yem aval ô ne su’u nye. Missionnaire éziñ a to jôé na Joy a wô’ô bi avale minlañ ete a bobejañ ba ke bo meyé’é a nye. A jô na: “Minlañe mite mi wô’ô bo na môt bia nye bia ke bo ayé’é a bi nkômbane ya volô ñyé’é Bible, a na a yeme jam é jô.”

7. Amu jé é ne mfi na ô taté kôme kômesan ôsusua na wo ke volô bo mojañ ayé’é?

⁷ Nge mojañ a loene wo na ô ke nye volô bo ayé’é éziñ, é ne mfi na womien ô taté kômesan nlô ajô mii yen ayé’é éte. (Esdras 7:10) Dorin a jô na: “Ma nye’e éyoñe mojañ a ke ma volô bo ayé’é a taté kômesan. Nalé a bo na mam a jô me  kôme volô ñyé’é Bible.” Nde fe na, éyoñ ñyé’é Bible é yene na mia bebaé mia te taté kôme kômesan, é bi nkômbane ya tôñ éve’ela jenan. Ve nge ô nji kui na ô kôme kômesan ayé’é, jeñe’e na ô yem mintene miñye’elan ya nlô ajô mii tôñesane wô.

8. Jé ô ne bo asu na meye’elane môé me lu’an a miñyiane mi ñyé’é Bible?

⁸ Meye’elan me ne angôndô ya mfi éyoñe bia bo meyé’é. Ajô te, taté’é fase mame wé jô, nge be jô wo na ô ye’elan. Nalé é volô na meye’elane môé me lu’an a miñyiane mi ñyé’é Bible. (Bs. 141:2) Hanae, sita éziñe ya Japon, a nga’an a simesa’an meye’elane me nkañete mbamba foé a nga zu litane sita a mbe a bo’o nye ayé’é. A jô na: “Me nga yene na a bili fo’o ngul élat a Yéhôva, a me mbe me kômbô’ô vu nye. Me nga wô’ôtane fe na a nye’e ma éyoñ a nga tot éyôlé jam meye’elane mé.”

9. Bela’ane Jacques 1:19 na ô liti jam nkañete mbamba foé a yiane bo.

⁹ Su’u mojañ a bo ayé’é. Omamuyovbi, nkpwa’a mefan a ne ngum aval ya Nigéria a jô na: “Mbamba nkañete mbamba foé a kôme baa alo nté ayé’é da boban. A ne jô jôm éziñ éyoñe nalé a sili, ve a nji yiane beté ôdo’é, amu sa ke nnye a nee ayé’é.” Nde, éyoñ évé ô ne kobô, a jé ô ne jô? (Min. 25:11) Kôme’e baa alo nté mojañ a bo ayé’é a laan a ñyé’é Bible. (Lañe’e Jacques 1:19.) Nalé é volô na ô yem afôla ô ne kô’ôlane jôm éziñ. Ve taté’é kôme fase jam wé jô. Ô nji yiane kobô abui, nge tyi’i mojañ nkobô, nge ke taté na wo kobô mam mefe. Ve ô ne ba’a jôm éziñ, nge belan éve’an nge ke nsili wé volô ñyé’é Bible na a kôme wô’ô ñye’elan mia kômbô ngôné. Ve biyoñe biziñ ô ne yene na, ô bili ki fo’o jam afe ô ne kô’ôlan. Ve mese’esa môé a nye’an wé liti ñyé’é Bible, bii volô nye na a yaé nsisim.

10. Mam me nga kui wo ényiñ me ne bo ñyé’é Bible mfi ôvé?

¹⁰ Kate’e ñyé’é Bible mam me nga kui wo ényiñ. Nge nalé a yian, ô ne kate ñyé’é Bible aval ô nga yem benya mejôô, aval ô nga dañ nju’u éziñ, nge ke avale Yéhôva a nga su’u wo ényiñe jôé. (Bs. 78:4, 7) Mam mete me ne nambe ñyé’é Bible angôndô, me ne yemete mbunane wé, a ve nye nkômbane ya ke ôsu a yaé nsisim akekui mbaptizô. Me ne fe nye volô na a dañ nju’u éziñ a tôbane wô. (1 P. 5:9) Gabriel, nkpwa’a mefan éziñe ya Brésil a nga’an a simesa’ane jam é nga volô nye éyoñ a mbe a yé’é Bible. A jô na: “Éyoñe bobejañ be nga kañete ma mam me nga kui be ényiñ, me nga yeme  na Yéhôva a yene minju’u bia tôbane mie. Ane me nga jô mamiene na, ‘Nge be nga kui na be dañe minju’u miap, ma fe me ne de bo.’”

11-12. Amu jé bia yiane nyoñe beyé’é Bible ba tabe bisulan a ôsesa?

¹¹ Asu na ñyé’é Bible a yaé nsisim akekui mbaptizô, da sili na a bo mbane bisulan. (Beh. 10:24, 25) Ajô te, bia yiane ji’a bañete beyé’é Bible bisulan. Nde, nge ñyé’é Bible éziñ a tatéya na a tabe bisulan, bia bese bia yiane nye nyoñ a ôsesa asu na a ke ôsu a bo de. Bi ne ñhe de bo aval avé?

¹² Nyoñe’e be a mevak. (Bero. 15:7) Nge wo nyoñ ñyé’é Bible a mevak éyoñ a suan Aba Éjôé, é bi nkômbane ya ke ôsu a tabe bisulan. Kele’e batane nye, a bo’o na a yeme bobejañe befe. Te jô womiene na, môt a bo nye ayé’é nnye a yiane nyoñe ngab a nye, amu a ne bo te bo valé éyoñ ñyé’é Bible a suan Aba Éjôé, nge ke na a bili abui mam afe ya bo akônda. Kôme’e nye vô’ôlô nté a kobô, a liti’i nye na wo nyoñe ngab a nye. Mam mete me ne volô ñyé’é Bible aval avé? Tame yene jam e nga kui Dmitrii. A nga duban mimbu mi ndeme lôte mi, a éyoñe ji a nto diakon. A simesane môs ôsu a nga tabe ésulan, a jô’ô na: “Mojañ éziñ a nga yene ma me tele nseñ ya Aba Éjôé, me ko woñe ya nyiin. Ane a nga zu ma nyoñ. Me mbe fe’e ne vema éyoñe me nga yen ane abui bôt da zu batane ma. Jam ete e nga nambe ma aval e ne na, me mbe me yii na ésulan é bo môs ôse. Me nji tame yen avale jam ete vôme mfe.”

13. Aval avé mbamba éve’ela wôé a ne volô ñyé’é Bible?

¹³ Liti’i mbamba éve’ela. Ntabane wôé ô ne liti ñyé’é Bible na bia bi ne benya Bekristen. (Mt. 5:16) Vitalii, nkpwa’a mefan éziñe ya Moldavie a jô na: “Me nga yen avale bobejañe ya akônda ba nyiñ, a mefulu be bili. Jam ete e nga ve ma njika’ane na Bengaa be Yéhôva mbe ba kañe Zambe avale da yian.”

14. Aval avé éve’ela jôé é ne volô ñyé’é Bible na a ke ôsu a yaé nsisim?

¹⁴ Ôsusua na a duban, ñyé’é Bible a yiane tôñe mam a yé’é. Jam ete e nji bo tyi’ibi. Ve éyoñ ñyé’é Bible é yene bibotane wo bu’ubane bie amu wo tôñe miñye’elane ya Kalate Zambe, émien é bi nkômbane ya bo de. (1 Bec. 11:1) Hanae bia te jôô nye yôp a jô na: “Bobejañ a besita ya akônda be mbe be nga tôñe mam me mbe me yé’é. Be nga liti ma avale me  ne ve bôte bevo’o ngule nyul, avale me ne yeme jamé, a avale me ne liti bôte bevo’o nye’an. Be mbe kom ése ve kobô ajô mbamba mefulu bobejañe bevo’o be bili. Me mbe me kômbô’ô vu be.”

15. Bela’ane Minkana 27:17 na ô liti amu jé é ne mfi na bi bo bemvôé beyé’é Bible be ne mbane bisulan.

¹⁵ Jeñe’e na ô bo mvôé jap. Kele’ ôsu a nyoñe ngab a ñyé’é Bible nté ôse a ve ngule ya bo mbane bisulan. (Beph. 2:4) Jeñe’e na ô kôme nye yem. Ô ne se’e nye asu bone mintyendan a bo ényiñe jé, ô ne fe nye sili minsili a lat a ayé’é dé, nda bôte jé, a asu ésaé dé. Ve tabe’e ntyele ya ke wo fa’a bone be mam bese ya ényiñe jé. Minlañ mite mi ne volô na mia nye mi bo bemvôé. A nalé a ne bo na a yaé nsisim. (Lañe’e Minkana 27:17.) Hanae a ne nkpwa’a mefan éyoñe ji. A simesan éyoñ ôsu a nga tabe ésulan a jô’ô na: “Me nga kaa na ma nye’e bisulan éyoñ me nga taté na ma bi bemvôé akônda. To’o éyoñe me mbe nte’an, me nji be me bu’i bisulan. Me mbe me nye’e me laan a mimfefé bemvôé bam, a nalé a nga volô ma na me kandan a bemvôé bam bevo’o be nji be be kañe’e Yéhôva. Me mbe me kômbô’ô kabetane Yéhôva a bobejañe ya akônda. Nde me nga tyi’i na ma duban.”

16. Jé éfe ô ne bo asu na ô volô ñyé’é Bible na a yen akônda ane nda bôte jé?

¹⁶ Nté ñyé’é Bible a ke ôsu a bo mintyendan ényiñe jé, volô’ô nye na a wô’ôtane na a ne ébu’a jia ya akônda. Ô ne de bo éyoñe wo liti fulu anyep. (Beh. 13:2) Denis, mojañe ya Moldavie, a simesan éyoñ a mbe ñyé’é Bible a jô’ô na: “Bobejañe ya akônda be nga bañete bia minga wom abui biyoñ asu na bi ke lôt éyoñ a be. Be mbe be kate’e bia avale Yéhôva a nga su’u be. Jam ete e nga ve bia ngule nyul a yemete nkômbane wongane ya bo Yéhôva ésaé, bi yeme’e na bibotane bia yange bia ôsu.” Nné ane ñyé’é Bible éziñ a bo nkañete mbamba foé a ngenan te duban, jeñe’e na ô kui nkañete a nye. Diego, mojañ éziñe ya Brésil a jô na: “Abui bobejañ e mbe e yii na me kui nkañete a be. Nalé a mbe a va’a ma fane ya kôme yeme be. Be nga ye’ele ma abui mam, a nalé a nga volô ma na me tu’a subu Yéhôva ba Yésus bebé.”

17. Aval avé bemvendé be ne volô beyé’é Bible?

¹⁷ Lôte’ éyoñ a beyé’é Bible. A mvendé, nge wo liti beyé’é Bible na wo nye’e be a na wo nyoñe be ngap, nalé a ne volô be na be yaé nsisim. Nyoñe’ éyoñe ya laan a  be éyoñ ése ba so ésulan. Bé wô’ôtane fe na wo nye’e be nge wo ba’ale biyôlé biap, e dañedañ éyoñe be tatéya na ba ve biyalane bisulan. Jeñe’e fe na ô kui nkañete a bobejañ be bili meyé’é. Mvolane wé soo ñyé’é Bible ô ne nambe nye aval ô nji be ô buni’i. Jackie, nkpwa’a mefan éziñe ya Nigéria a jô na: “Abui beyé’é Bible e nga kam éyoñ be nga yene me za’a be bo ayé’é a mvendé. Wua ya été a nga jô ma na: ‘Pasteur wom a vo’o bo avale jam ete môs éziñ. A jome ve minkukum, a ne ke de bo fo’o ve nge ba ya’ane nye.’” Ñyé’é Bible ate a nto mbane bisulan.

18. Aval avé bemvendé be ne tôñ abendé bia koene de kalate Mam minlôman 20:28?

¹⁸ Yañele’e bekañete mbamba foé a va’a be ngule nyul. A mvendé, ô bili beta mbe’e ya yañele bekañete mbamba foé na be bo atyeñ ésaé nkañete, a na be bo mbamba beye’ele. (Lañe’e Mam minlôman 20:28.) Nge mojañ a ko woñe ya bo ayé’é éyoñ ô ne valé, kate’e nye na ô ne nye volô bo ayé’é ete môs ôte. Jackie a jô na: “Bemvendé be wô’ô ma sili éyoñ ése nge meyé’é mam ma wulu mvo’é. Nge ma yen ayaé ya bo ayé’é éziñ, ba ve ma mbamba melep.” Bemvendé be ne ve bekañete mbamba foé ngule nyul angôndô, a volô be na be bo ôjibi. (1 Bet. 5:11) Jackie a jô na: “Ma nye’e éyoñe bemvendé ba ve ma ngule nyul, a éyoñe ba se’e ma amu mbamba ésaé ma bo. Mejô map me ne ane éyoñe ma te nyu bivôvoé mendim éyoñe me te’eya a dulu viane si. Ma ve ma ndi nleme na ma bo mbamba ésaé, a ma ve ma ngule ya ke ôsu a bo ésaé éte a mevak.”​—Min. 25:25.

19. Meva’a mevé môt ase ya be bia a ne bi?

¹⁹ To’o womien ô bili ki ayé’é Bible éyoñe ji, ô ne volô beyé’é Bible na be yaé nsisim. Nge bi taté kôme kômesan, bii yeme volô bobejañe be bili meyé’é, to’o bia kobô ki abui. Bi ne fe jeñe na bi nyoñe beyé’é Bible a ôsesa éyoñ ba zu tabe bisulan, a liti be mbamba éve’ela. Bemvendé be ne fe ve beyé’é Bible ngule nyul éyoñe ba lôt éyoñ a be. Ba yiane fe yañele bekañete mbamba foé, a se’e be. Nga meva’a ma jaé bia nlem éyoñe bia yeme na, bia fe bia te bo mone jam éziñ asu na ñyé’é Bible éziñ a yaé nsisim a bo Yéhôva ésaé?