1. Amu jé Yésus a nga ye’elan Ésa wé na a ba’ale beyé’é bé?

ALU Yésus a nga kandane lôte si va, a mbe a tyelé’ nleme yôp ajô ya minju’u mi mbe mi yange’e beyé’é bé. Mbôl a mbe a nye’e bemvôé bé, Yésus a nga jô Ésa wé na a “ba’ale be, mbia môt a za nyoñe be.” (Jean 17:14, 15) A mbe a yeme na éyoñ a ye bulane yôp, Satan é ke ôsu a wosane ba bese ba kômbô bo Yéhôva ésaé. Jôm ete nje da sili na Yéhôva a kamane bebo bisaé bé.

2. Amu jé bi ne tabe ndi na Yéhôva é vô’ôlô meye’elane mangan?

² Yéhôva a nga vô’ôlô meye’elane me Yésus amu A nye’e nye. Nge bia jeñ a ngul ése na bi ve Yéhôva nlem mvaé, nye fe é nye’e bia, é vô’ôlô meye’elane mangan éyoñ ése bii sili nye mvolan, é fe kamane bia. Aval ane ésa a nye’e bone bé, é ke ôsu a nyoñe ngap a bia. Amu nge a teke bo de, jôé dé ébien nde dé ke mvit!

3. Amu jé da dañe sili na Yéhôva a kamane bia den?

³ Éyoñ ji nje bia dañe yi na Yéhôva a kamane bia. Amu Satan a nga wuabane si “a bili beta ayaa.” (Nli. 12:12) A bo na bôte be simesane na, éyoñ ba tibili bia, “ba bo Zambe ésaé.” (Jean 16:2) Ba ki be nji buni Zambe, ba tibili bia amu bi nji bo mam ane be. Be kusa bo bia aya, bi bi nji ko woñ. Amu jé? Amu Bible a jô na: “Tate a ne [zôsôô], nnye ate a ye yemete mia, a ba’ale mia mfa’a ya mbia môt ate.” (2 Bet. 3:3) Aval avé Yéhôva a kamane bia? Bi tame zu yene mezene mebaé.

4. Beéphésien 6:13-17 a liti na Yéhôva a nga ve bia jé asu na a kamane bia?

⁴ Yéhôva a nga ve bia biôm mewosan bia kamane bia asu na Satan a bo te dañe bia. (Lañe’e Beéphésien 6:13-17.) Biôm mewosan bite bi ne ngul, a bia volô nya abuii. Ve biôm mewosan bite bii bo bia mfi fo’o ve nge bi be’e bie kom ése. Biôm mewosan bite bi ne ne jé? Bi tame kobô ajô te .

5. Jé é ne ases ya benya mejôô, a amu jé bia yiane de jaé?

⁵ Benya mejôô be ne ntiñetan angeteñ (nge ke ases ya benya mejôô) be ne benya mejôô bia koone be Bible été. Amu jé bia yiane jaé ases ete? Amu Satan a ne “ésa minsos.” (Jean 8:44) Den a nto betoyini mimbu a laa bôte minsos, a kuiya fe na a du’u “si se”! (Nli. 12:9) Ve benya mejôô ya Bible ba volô bia na bi bo te du’uban. Aval avé bi ne jaé benya mejôô ane ases? Bia bo de éyoñe bia yé’é benya mejôô a lat Yéhôva, éyoñ bia kañe nye “a nsisim a benya mejôô,” a éyoñ bia ve ngule na bi bo zôsôô mfa’a ya mam mese.​—Jean 4:24; Beép. 4:25; Beh. 13:18.

6. Jé é ne ébene ya zôsôô, a amu jé bia yiane je jaé?

⁶ Ébene ya zôsôô é ne ndeme ya memvinda me Yéhôva. Amu jé bia yiane je jaé? Fo’o ve ane ében ja kamane mekoñe na me jii mone bezimbi nlem, aval ete fe ébene ya zôsôô ja kamane mbunane wongan, asu na émo é bo te wone bia. (Min. 4:23) Yéhôva a yi na bi nye’e nye a na bi bo nye ésaé a nlem wongan ôse. (Mt. 22:36, 37) Ve Satan nye a jeñe na a tindi bia na bi nye’e mam Yéhôva a vini, ndemben bi bo teke beta bo Yéhôva ésaé a nlem ô ne ngumba. (Jc. 4:4; 1 Jean 2:15, 16) Nge a yene na bia ke ôsu a kabetane Yéhôva, é taté na a tibili bia asu na bi lume Yéhôva mvus.

7. Aval avé bi ne liti na bi be’e ébene ya zôsôô?

⁷ Bia liti na bi be’e ébene ya zôsôô éyoñ bia tôñe memvinda me Yéhôva môs ane môs. (Bs. 97:10) Bôte béziñ ba simesane na memvinda me Yéhôva ma kamane be na be kôme bu’uban ényiñ. Ve nge bi lume memvinda me Yéhôva mvus, bii funane mone bezimbi a vaa ébene jé nseñe bita, amu a jô na é ne adit. Ye bi ne jô na mone bezimbi ate a ne fek? Nya ajôô a ne na, metiñe me Yéhôva “me nji bo adit” asu ba ba nye’e nye, ve ma ba’ale binyiñe biap.​—1 Jean 5:3.

8. Jé ja tinane na e jaé nkômesane mbamba foé ya mvo’é mebo si?

⁸ Paul a jô fe bia na bi jaé nkômesane mbamba foé ya mvo’é mebo mangane si. Nalé a tinane na bia yiane tabe nkômesane ya kañete mbamba foé éyoñ ése. Éyoñ bia kañete bôte bevok, nalé a bo na mbunane wongan biabebien ô tu’a bo ngul. Bia bi ngule nyul éyoñ bia yen aval avé bobejañ ya si se meku’u menyin ba jeñe mezene ya kañete vôm ase be né: menda bisaé, sikôlô, bevôm ba bo makit, menda menda, bifatyele, éyoñ ba jom bivuvumane biap, a éyoñe ba laan a bôte bevo’o bese ba yem. Ba kañete fe to’o éyoñ be vo’o kui nseñ. Nge woñe wo bo na bi telé ésaé  nkañete, bii funane mone bezimbi a vaa bikôndé bié zañe bita. Nalé ke é bo na a baé mebo. Da ye bo nye ayaé na a kaman émien, a na a tôñ mebendé me njôô wé.

9. Amu jé é ne mfi na bi bi ébene ya mbunan?

⁹ Ébene ya mbunan é ne ndeme ya mbunane wongan. Bi too ndi na Yéhôva é tôé bengaka’a bé bese. Mbunane wongan ñwô wo volô bia na bi ‘dim mekoñ me nduan me mbia môt mese.’ Amu jé é ne mfi na bi bi ében éte? Amu ja kamane bia éyoñ b’apostat ba kômbô wone bia, ja volô fe bia na bi tebe ne bip éyoñ bôte ba kpwe’ele bia. Nge bi nji bi mbunan, bii jembane ngule ya ke ôsu a tôñe memvinda me Yéhôva éyoñ bôte bé tindi bia na bi tyame me. Ve éyoñ ése bia bene bo jame Yéhôva a tyili sikôlô nge ke nda bisaé, bia liti na bi bili ébene jangan. (1 P. 3:15) Bia liti fe na bi bili je éyoñ bia ben asu ésaé ése é ne bo na bi kate telé mame ya nsisim ôsu. (Beh. 13:5, 6) Ében éte fe nje ja volô bia na bi ke ôsu a kañe Yéhôva, akusa bo étibela’a.​—1 Bet. 2:2.

10. Jé é ne afô’ôlô ya nyian, a amu jé bia yiane de jaé?

 ¹⁰ Afô’ôlô ya nyian é ne ndi nlem Yéhôva a ve bia. Bi bili ndi nleme na é vaa awu, é fe ve bebo bisaé bé ma’an. (1 Bet. 5:8; 1 Tim. 4:10; Tite 1:1, 2) Aval ane afô’ôlô da kamane nlô mone bezimbi, aval ete da da, ndi nlem jangan ja kaman asimesane dangan. Amu jé bia jô nalé? Amu ndi nlem éte ja bo na bi bem ôsimesane wongan bengaka’a be Yéhôva, a na bi jibi minjuk a mevak. Aval avé bi ne jaé afô’ôlô ete? Bia jaé afô’ôlô ete éyoñ bia ve ngule na asimesane dangan e lu’an a di Yéhôva. Ajô te, bi nji futi ndi nleme jangan akum ya émo ji, ve be Yéhôva.​—Bs. 26:2; 104:34; 1 Tim. 6:17.

11. Jé é ne nkpwaté mekône ya nsisim, a amu jé bia yiane belane wô?

¹¹ Nkpwaté mekône ya nsisim ô ne Kalate Zambe. Ô ne ngule ya tyam mbia b’asimesan ese, a vaa bôt éto belo ya bivuse miñye’elan, a mbia mimboon. (2 Bec. 10:4, 5; 2 Tim. 3:16, 17; Beh. 4:12) Bia yé’é avale bi ne kôme belane nkpwaté mekôn ôte éyoñ bia bo ayé’é étam, a éyoñ bia tôñe melebe ékôane Yéhôva ja ve bia. (2 Tim. 2:15) Ane ô vaa biôm mewosane ya nsisim, Yéhôva a ve fe bia beta ékpwelé mfe. Bi tame zu kobô ajô beta ékpwelé ate.

12. Jé éfe é ne volô bia, a amu jé?

¹² Éwôlô mone bezimbi ja yeme na é vo’o kui na é wosane beta nkane bita étam; ja yiane saé fufulu a bezimbi bevok. Aval ete da da, bi vo’o kui na bi wosane Satan ba be bôte bé étam; da sili na bobejañ be volô bia. Yéhôva a nga dasé bia ékôane bobejañ a besita ya si se asu na be volô bia.​—1 P. 2:17.

13. Kalate Behébreu 10:24, 25 a liti na bisulan bi ne bia mfi ôvé?

¹³ Jam ôsu bia yiane bo asu na bobejañ be su’u bia é ne na bi tabe bisulan. (Lañe’e Behébreu 10:24, 25.) E ne kui biyoñ biziñe na bi bili atek, ve bisulan bi ne ve bia ngule nyul, amu bobejañ a besita be wô’ô ve mbamba biyalan. Minkañete a besisia bobejañ ba bo mia ve bia éva’a ya ke ôsu a kañe Yéhôva. Éyoñ bia laane mbamba minlañ a bobejañ ôsusua na ésulan ja taté a memane m’ésulan, bia bi fe ngule nyul abui. (1 Bet. 5:14) Bisulan bia ve fe bia fane ya bu’ubane meva’a ya volô bôte bevok. (Mam. 20:35; Bero. 1:11, 12) Bisulan bia volô bia na bi yeme kañete a ye’ele bôt. Bia yé’é fe avale bi ne kôme belane Bikpwelé bia ye’ele bie bôt. Ajô te, kôme’e kômesane bisulan. Kôme’e baa alo nté ésulan ja lôt. Mvuse ya valé, tôñe’e mam wo te mane yé’é. Nge ô bo mam mete mese, wé fo’o bo “mbamba mone bezimbi ya Krist Yésus.”​—2 Tim. 2:3.

14. Mvolan ôvé ôfe bi bili?

¹⁴ Bi bili fe mvolan bizu’u beéngele. Ye ô ngenan ô simesa’ane jam éngele wua wua a nga bo nkane bita ya Assyrie? (És. 37:36) Tame ke ve’ele simesane jame nkunda beéngele ô ne ngule ya bo. Teke môt nge mbia nsisim éziñ a ne ngule ya sengan nkane bita Yéhôva. Yéhôva a ne Zambe ya ngul ése. Ajô te, nge a ne ngame jangan, bii dañe besiñe bangan to’o be ne tañ aya.  (Bm. 6:16) Bia yiane ba’ale mejô mete ôsimesan éyoñ ése môte bia be nye bia saé, mongô sikôlô mbok, nge ke évuvumane jañ é nji bo Ngaa Yéhôva, ba jô nge bo mam me ne te’elane mbunane wongan. Te ve’ele buni a ô ne étam. Nge ô kele ôsu a tôñe zene Yéhôva a liti wo, é su’u wo teke vaa nge beté.

15. Bela’ane Ésaïe 54:15, 17 asu na ô liti amu jé besiñe bangan be vo’o telé ésaé nkañete jangan.

¹⁵ Émo Satan é bili abui b’amu ya vini bia. Bia bo ke pôlitik, a bi nji nyoñe ngap bita. Bia kañete bôt Mejô me Zambe, a bia kate be na Éjôé Zambe étam nje jé soo mvo’é si va. A bia ve ngule ya tôñe memvinda me Yéhôva. Bia liti bôte na Satan nnye a ne njôô ya émo ji, na a ne nlaa minsos, a na a ne ñwôé bôt. (Jean 8:44) Bia kate fe be na émo Satan ja zu tyamban ana’ana. Ve bia yeme na teke môs éziñ Satan ba be bôte bé be ne telé ésaé nkañete bia bo. Bii ke ôsu a ve Yéhôva duma a mezene mese. Akusa bo Satan a ne ngul, a nji kui na a telé ésaé nkañetane mbamba foé ja bobane si se. Ésaé éte ja ke ôsu amu Yéhôva émien nnye a su’u je.​—Lañe’e Ésaïe 54:15, 17.

16. Aval avé Yéhôva é nyii bebo bisaé bé éyoñ ya beta étibela’a?

¹⁶ Mam mevé ma yange bia melu ma zu? Éyoñe ya beta étibela’a, Yéhôva é bo beta be mam bebaé asu na a nyii bia. Jam ôsu, é tindi bejôô bôte ya si nyi na be tyame Beta Babylone, safulu bifuse miñyebe. (Nli. 17:16-18; 18:2, 4) Jame baa, Yéhôva é mane wôé ba bese ba su’u mbia nta’ane mam nyi beta bita ya Harmaguédon.​—Nli. 7:9, 10; 16:14, 16.

17. Bibotan bivé bii bi nge bia ke ôsu a kabetane Yéhôva?

¹⁷ Nge bia ke ôsu a ba’ale élate jangan a Yéhôva, to’o Satan a bo bia mbia jam mbé, Yéhôva é su’ulane kôme nye. Ve mfa’a Satan ki, éyoñe Yéhôva é wôé nye, a maneya fo’o asu dé. (Bero. 16:20) Ajô te, jaé’ biôm mewosane biôé bise, a te ve’ele vaa bie môs éziñ. Kañese’e mvolane bôte bevok. Wo fe su’u be. Tôñe’e fe zene Yéhôva a liti wo. Nge ô bo de, ô ne tabe ndi na Ésa wôé ya yôp é yemete wo, é fe kamane wo.​—És. 41:10.