Bengaa béziñ ba belane beminsini asu na be laan a bibu’a ya menda me bôte map, a Bengaa bevok. Ve Kristen é ne fek ja ba’ale melebe ma ôsimesan: “Môt a ne ntye a yen mbia jam, ve sobô; ve bedimi mam ba lôt ôsu, a tôban njuk.”​—Min. 27:12.

Nalé a liti na Yéhôva a yi na a kamane bia. Ajô te, bi nji yiane yeñ a bôte ba soo metyama’ane, bôte be tele feñ, a bôte ba wumulu bivuse miñye’elan. (Bero. 16:17; 1 Bec. 5:11; 2 Jean 10, 11) Nde fe, bobejañe béziñ nge ke bôte béziñ ba tabe bisulan, be ne bo valé nde ba tôñe ki miñye’elane ya Kalate Zambe. (2 Tim. 2:20, 21) Bia yiane kôme futi jam ete ôsimesan, éyoñe bia tobe bemvôé bangan. Jam ete e ne bo ayaé éyoñe bia laan a bôt a zene ya bemessage.

Da dañe sili na bi tabe ntyel éyoñe bi ne groupe a bili abui bôt. Bobejañe béziñ be nga tebe mbia bité, amu be nga ke nyiin avale begroupe ete. Aval avé mojañ nge ke sita a ne kui na a sa’ale mbia mewoso, nge a kiya nyiine groupe a bili bôte ntet nge ke toyini? Nya ajôô a ne na, a vo’o kui na a yem été nsisim bôte bese ya groupe ate. Besam 26:4 a jô na: “Me nga bo te tabe si a bôt be ne minsos; nalé fe ma ye bo te nyiin a bôt be ne medu’an.” Éfus éte ja liti na bia yiane laane ve a bôte bia kôme yem éyoñe bia belane beapplication de messagerie.

To’o éyoñe Kristen é ne groupe a nji bi abui bôt, a yiane kôme yeme bôte be ne groupe ate, a a nji yiane jañele abui éyoñe na a laane minlañ. A nji yiane simesane na a mba’a mba’a ve fet mam mese bôte ba tili, to’o jam ete da nyoñe nye abui éyoñ. Paul a nga jô Timothée na a tabe ntyel a bôte be ne “ékobôkobô a mfuk.” (1 Tim. 5:13) Den, bôte be ne bo ékobôkobô a mfuk a zene ya bemessage.

Kristen é ne étôtôlô ja bo ki ékobôkobô, a ja kulane ki mam bôt be nji yiane yem. (Bs. 15:3; Min. 20:19) A vô’ôlô ki nge kañete minlañ mia bo na bôte be kui avem, nge mefoé a vo’o bo’olô na me ne betotyii. (Beép. 4:25) Bi ne koone mefoé bi ne tabe me ndi anjeñe mefoé dangan, a Télé wongan.

Bengaa béziñ ba belane beapplication de messagerie na be kuane nge kuse biôm, a na be jeñe bebo bisaé. Mam mete ma fombô ajô makit, me nji bi nja éziñ a ékaña’a bia ve Yéhôva. Kristen é ne “nti mfa’a ya nye’an akum” é nji belane bobenyañe bé asu na a fulu akum.​—Beh. 13:5.

Jé ke bi ne jô a lat a ba ba belane beapplication de messagerie asu na be sili mimvolan asu bobejañ be tele minju’ été, nge ba ba te tôban bibubua? Bi wô’ô nyoñ ngab a bobejañ be ne minju’u été, a ve be ngule nyul. (Jc. 2:15, 16) Ve nge bia belane begroupe be bili abui bôt asu na bi volô avale bôt ete, e ne bo ayaé asu wofise ya Béthel nge ke akônda na é volô be. (1 Tim. 5:3, 4, 9, 10, 16) Nde fe, teke môt éziñ ya be bia a yi na bôt be simesane na nnye ékôane Yéhôva ja te tobe asu na a nyoñe ngab a bobejañ.

Bia yi na mam mese bia bo me ve Yéhôva duma. (1 Bec. 10:31) Ajô ete, ôsusua na wo belane beapplication de messagerie, taté’é fas nge jam éziñe ya été dé tyam atiñe Yéhôva.