1. Bela’ane Matthieu 24:9 na ô liti amu jé bi nji yiane kam éyoñe bôte ba vini bia.

YÉHÔVA a nga té bia a ngule ya nye’e bôte bevok. A nga té fe bia a nkômbane ya wô’ôtane na bôte bevo’o ba nye’e bia. Jôm ete nje éyoñe môt a vini bia, jam ete da bo bia nlem mintaé angôndô, nge ke bo na bi ko woñ. Georgina, sita éziñe ya Europe a jô na: “Éyoñe me mbe me bili mimbu 14, nyia wom a mbe a feme’e ma amu me mbe me bo’o Yéhôva ésaé. Me nga wô’ô mamien éngôngol aval e ne na, me nga taté na ma simesane na ma me ne mbia môt.” * Wônaa mojañ Danylo ke a jô na: “Bezimbi be nga yite ma, be lamesane ma a meta, amu me mbe Ngaa Yéhôva. Me mbe me ko mbia woñ, me wô’ô fe ôson.” Aval évini ete da bo nlem mintaé, ve da bo ki na bi kam, amu Yésus a nga jô na bôte bé vini bia.​—Lañe’e Matthieu 24:9.

2-3. Amu jé bôte ba feme bia?

² Émo ja vini beyé’é be Yésus évini awu. Amu jé? Amu ane Yésus, bi “nji bo bôte ya si nyô.” (Jean 15:17-19) Ajô te, akusa bo bia semé bijôé ya émo ji, bi nji kañe bie. Yéhôva étame nnye bia ve ékaña’a. To’o Satan a “mvoñe jé” ba ngan njôane Zambe, bi bia su’u wô a ngule jangan ése. (Met. 3:1-5, 15) Bia kañete bôte na Éjôé Zambe étam nje jé soo mvo’é si va, a na ana’ana é mbeme zu jiane ba bese ba wosane je. (Dn. 2:44; Nli. 19:19-21) Foé éte é ne mbamba foé asu bôt be ne éjote nyul, ve mbia foé asu mbia be bôt.​—Bs. 37:10, 11.

 ³ Bôte ba vini fe bia amu bia tôñe memvinda me Yéhôva. Be nji bi ôsimesane Yéhôva a lat a mam me ne zôsô nge abé. Éve’an é ne na, abui bôt da bo mvine mame ya bisô’ô den ne fômelé, avale mvine mam e nga bo na Zambe a tyame Sodome ba Gomorrhe. (Jude 7) Mbôle bi bia tôñe memvinda me Yéhôva a lat a mame bisôk, abui bôt da kpwe’ele bia a jô na bia beté ôdo’é, amu asu dap, bia yiane kañese bôte bese avale be né.

4. Mefulu mevé me ne volô bia na bi ke ôsu a bo Yéhôva ésaé to’o bôte ba feme bia?

⁴ Jé é ne volô bia na bi ke ôsu a bo Yéhôva ésaé to’o émo ja feme bia? Bia yiane tabe ndi na Yéhôva é volô bia. Mbunane wongan ô ne ane ében, ô ne ngule ya ‘dime mekoñe me nduan me mbia môt mese.’ (Beép. 6:16) Ve mbunan étam ô nji yian. Bia yiane fe bi fulu nye’an. Amu jé bia jô nalé? Amu nye’an “ô ne te yaa.” Wo jibi mam mese. (1 Bec. 13:4-7, 13) Bi tame ñhe zu yen aval avé nye’ane bia nye’e Yéhôva, bobejañ, to’o besiñe bangan, wo volô bia na bi jibi étibela’a.

5. Nye’ane Yésus a mbe a nye’e Ésaa wé ô nga volô nye na a bo jé?

⁵ Alu a nga kandane lôt a beyé’é bé, Yésus a nga jô be na: “Ma nye’e Tate, [ajô te] ane Tate a nga tiñeti ma, aval ete me abo.” (Jean 14:31) Nye’ane Yésus a mbe a nye’e Yéhôva ô nga volô nye na a jibi minju’u mi mbe mi yange’e nye ôsu. Bia fe bii kui na bi dañe minju’u mi tele bia ôsu nge bia nye’e Yéhôva.

6. Kalate Beromain 5:3-5 a liti na bebo bisaé be Yéhôva ba wô’ôtan aya éyoñ émo ja tibili be?

⁶ Bebo bisaé be Yéhôva be nga kui na be jibi étibela’a amu be mbe be nye’e Yéhôva. Éve’an é ne na, éyoñe bôte ya Sanhédrin be nga ve minlôman abendé na mi telé ésaé nkañete, nye’an be mbe be nye’e Yéhôva ô nga tindi be na be bo nye mewôk a lôte na be ko bone be bôte woñ. (Mam. 5:29; 1 Jean 5:3) Aval nye’an ete fe nde da volô bobejañe ya dene na be tebe ne bip éyoñe bijôé bia tibili be. Éyoñ émo ja tibili bia, bi nji ve’ele bili atek, ve bi ne mevak.​—Mam. 5:41; lañe’e Beromain 5:3-5.

7. Jé bia yiane bo éyoñe bibu’a ya menda me bôte mangan bia tibili bia?

⁷ Éyoñe bibu’a ya menda me bôte mangan mbie bia tibili bia, jam ete e ne taé bia nlem angôndô. Nge be yene na bi tatéya na bia nye’e benya mejôô, be ne simesane na Bengaa ba te du’u bia. Bevo’o be ne simesane na bi jañeleya fek. (Fombô’ô fe Marc 3:21.) Be ne fe taté na ba tibili bia. Ve bi nji yiane kam, amu Yésus émien a nga jô na: “Bôt ba siñe môt ba ye bo bôte ya nda jé.” (Mt. 10:36) To’o bibu’a ya menda me bôte mangan bia tibili bia, bi bi nji yiane feme bie. Amu nté nye’ane bia nye’e Yéhôva wo ke ôsu a nen, nde fe bia nye’e bôte bevo’o nalé. (Mt. 22:37-39) Ve nye’ane bia nye’e bibu’a ya menda me bôte mangan ô nji yiane bo na bi tyam atiñe Yéhôva môs éziñ.

8-9. Jé é nga volô sita éziñe na a tebe ne bip éyoñ a nga tôban étibela’a?

⁸ Georgina a nga kui na a tebe ne bip akusa bo nyia wé a mbe a tibili’i nye mbia jam. A jô na: “Bia nyia wom bi nga kôme taté na bia yé’é Bible a Bengaa be Yéhôva. Ve mvuse ngon ésaman, éyoñe me nga kômbô taté na ma tabe bisulan, nyia wom ve zu taté na a wosane ma. Me nga su’ulane yeme na beapostat mbe be mbe  be futi’i nye mbia b’asimesane nlô asu na a te’elane ma. A mbe a taa ma, a limiti’i ma bisil, a bôme’e ma, a wua’ fe ma bekalate fé. Me nga duban éyoñ me mbe me bili mimbu 15. Asu na a tindi ma na te ma beta bo Yéhôva ésaé, mema a nga bo na me ke tabe nda be mbe be volô’ô bobebinga be ne mbia nlô. Bobebinga béziñe ya été be nga taté be benyu banga, be bo’o fe mbia be mam befe. Étibela’a é ne angôndô ya ayaé ya jibi éyoñe ja so be môt a yiane wo nye’e, a nyoñe ngab a wo.”

⁹ Jé é nga volô Georgina na a jibi nju’u ôte? A jô na: “Môse mema a nga taté na a wosane ma, me mbe me maneya lañe Bible ase. Me mbe me too ndi na me yeneya benya mejôô, a me mbe me wô’ôtane na me bili ngul élat a Yéhôva. Me mbe me ye’ela’ane nye éyoñ ése, a mbe fe a yalane ma. Éyoñe me mbe me nyiñi’i nda mema a nga ke li’i ma, sita éziñ a nga bañete ma nda jé na bi yé’é Bible nsamba. Bobejañ be mbe be va’a fe ma ngule nyul éyoñ me mbe me kele’e bisulan. Be nga nyoñe ma ane ébu’a ya nda bôte jap. E nga kôme yené na Yéhôva a dañe besiñe bangane bese, be kusa bo za.”

10. Jé bi ne tabe je ndi?

¹⁰ Nlômane Paul ô nga tili na teke jam éziñ é ne ngule ya “va bia mfa’a ya nye’ane Zambe, ñwô ô ne be Krist Yésus Tate wongan.” (Bero. 8:38, 39) To’o étibela’a ja tabe ôbe nté, Yéhôva é ke ôsu a volô bia minlem, a ve bia ngule jé. A aval éve’ela Georgina ja liti, Yéhôva a ne fe belane nda bôte jangane ya nsisim asu na a su’u bia.

11. Aval avé nye’ane Yésus a jô wô Jean 15:12, 13 ô nga volô beyé’é bé? Nyoñe’ éve’an.

¹¹ Ôsusua na a wu, Yésus a nga kate beyé’é bé na be nye’esan. (Lañe’e Jean 15:12, 13.) A mbe a yeme’e na nye’an ôte wé volô be na be ke ôsu a bo nlatan, a na be jibi étibela’a. Bi tame kobô ajô Bekristene ya Thessalonique. Be nga taté na ba tôban étibela’a éyoñ akônda dap e nga téban. Ve be nga ke ôsu a liti ngule mbunan, a nye’esan. (1 Bet. 1:3, 6, 7) Ane Paul a nga jô be na be ke ôsu a nye’esan, a na be “dañe bulubulu bo”  de. (1 Bet. 4:9, 10) Nye’an ô nga ye tindi be na be volô bobejañ be mbe minlem ntya’an. (1 Bet. 5:14) Be nga tôñe fo’o melebe me Paul mete, amu éyoñ a nga tili be kalate baa wé mvuse bebé mbu wua, Paul a nga jô be na: “Nye’ane môt ase ya be mia a nye’e ba bevok [wo] bulu bo.” (2 Bet. 1:3-5) Mbôle be mbe be nye’esan, be nga kui na be jibi minjuk, a étibela’a.

12. Aval avé bobejañ be nga liti na ba nye’esan éyoñe bita bi nga bôlé nlame wop?

¹² Bi tame beta kobô ajô Danylo ba ngal. Éyoñe bita bi nga bôlé tisone be mbe be too, be nga bibane na be ke ôsu a tabe bisulan. Be mbe be kañete’ éyoñ ése be mbe be bili fane ya bo de, a kab bone bidi be mbe be bili a bobejañe befe. Nde môs éziñ, bezimbi be nga suane be nda. Danylo a jô na: “Be nga jô ma na me kat a mbunane wom. Éyoñe me nga ben, nde be nga taté na ba bôme ma, be beté ke ma ngale nlô na nge me bo fianga, bé wôé ma. Éyoñe be kele’e, be nga jô ma na bé beta so na be zu jô’ôbô minga wom a ngul. Ane bobejañ be nga ji’a daa bia minsini minkoñ na bi ke tisone fe. Me vo’o vuane jame bobejañ be nga bo asu dangane môs ôte. Éyoñe bi nga ke kui tison éte, bobejañ be nga ve bia jôme ya di, be volô fe ma yen asu ésaé a mbamba étaba’a. Nalé a nga bo na, bia fe bi bo ngule ya volô bobejañ befe be mbe be tubu’u bita.” Avale minkañete ete da liti na nye’an ô ne zañe jangan ô ne volô bia na bi jibi étibela’a.

13. Aval avé mbamba nsisim a volô bia na bi ke ôsu a bo Yéhôva ésaé, to’o bôte ba feme bia?

¹³ Yésus a nga jô beyé’é bé na be nye’e besiñe bap. (Mt. 5:44, 45) Ye jam ete e ne ñhe tyi’ibi? Momo. Ve mbamba nsisime Yéhôva a ne bia volô mfa’a ôte. Mbamba nsisim ate a volô bia na bi bi mbamba mefulu ane nye’an, ôjibi, mvam, évôvoé, a njôane nlem. (Beg. 5:22, 23) Mefulu mete ki ma volô bia na jibi étibela’a. Abui bôt e mbe e taté’é wosane bia e nga su’ulane tyendé, amu Bengaa be nga liti be mefulu mete. Abui ya be be e nga su’ulane bo bo Bengaa be Yéhôva. Ajô te, nge wo yen ayaé ya nye’e bôte ba vini wo amu ô ne Ngaa Yéhôva, ye’ela’ane Yéhôva na a  ve wo mbamba nsisime wé. (Luc 11:13) Nde fe, tabe’e ndi na melebe me Yéhôva me ne zôsôô kom ése.​—Min. 3:5-7.

14-15. Aval avé Beromain 12:17-21 a nga volô Yasmeen na a ke ôsu a nye’e nnôme wé akusa bo a mbe a tibili’i nye?

¹⁴ Bi tame zu kobô ajô Yasmeen, sita éziñe ya Moyen-Orient. Éyoñ a nga bo Ngaa Yéhôva, nnôme wé a nga simesane na be ndumekaneya minga wé nlô, nde a nga jeñe na a telé ésaé a mbe a bo’o Yéhôva. A mbe a ta nye, a nga jô fe bivuvumane bié, ntebe ôsu ya nda Zambe jé, a ngengañ éziñ na be si’ili nye a bôte nye ajô na a kômbô bôé nda bôt. A nga bele fe ke ta bobejañ éyoñ be mbe ésulan! Mam mete mese me mbe me bo’o na Yasmeen a yôn abui.

¹⁵ Éyoñe Yasmeen a mbe a kele’ Aba Éjôé, bobejañ be mbe be fôlô’ô nye a ve nye ngule nyul. Bemvendé be nga jô nye na a tôñe melebe bia koene me Beromain 12:17-21. (Lañek.) Yasmeen a jô na: “Jam ete e nji be tyi’ibi, ve me nga sili Yéhôva mvolan, a me nga ve ngule na me tôñe melebe mete. Éyoñ ése nnôme wom a mbe a vañe’e ke ve kisine mvit, me mbe me fimin. Éyoñ ése a mbe a ta ma, me mbe me yalane nye évôvoé été. Éyoñe ki a mbe a konô’ô, me mbe me nyoñe ngap a nye.”

16-17. Jé éve’ela Yasmeen ja ye’ele wo?

¹⁶ Yéhôva a nga botane Yasmeen amu a nga ke ôsu a nye’e nnôme wé. Yasmeen a jô na: “Nnôme wom a nga tu’a tabe ma ndi amu a mbe a yeme’e na me nji bo môte minsos. A nga taté na a vô’ôlô ma éyoñ ése bi mbe bi kobô’ ajô Kalate Zambe. A nga ve fe ngule na a tyendé asu na bia nye bi tabe mvo’é. Nnye a jô jô ma éyoñe ji na me ke bisulan! Bia nnôme wom bi nga wô’an, me nga bu’ubane fe nda alu’u jam. Jôme ma yi éyoñe ji é ne na, nnôme wom a kañese benya mejôô a na bia nye bi bo Yéhôva ésaé.”

¹⁷ Éve’ela Yasmeen ja ye’ele bia na nye’an “wo buti mam mese, . . . wo tabe mam mese ndi nlem, wo jibi mam mese.” (1 Bec. 13:4, 7) Nye’an ô ne ngul a dañe ziñ. Éyoñe bia liti bôte bevo’o na bia nye’e be, nalé a ne bo na be bo teke beta wosane bia, bia ve fe Yéhôva nlem avak. Nde fe, bi ne ba’ale ava’a dangan, akusa bo besiñe bangan ba feme bia. Amu jé bia jô nalé?

18. Amu jé bi ne mevak éyoñ bôte ba tibili bia?

¹⁸ Yésus a nga jô na: “Ébotan [nge ke mevak] a mia, éyoñ bôt ba vini mia.” (Luc 6:22) Bi nji yi na bôte be feme bia. Nlem wo taé fe bia éyoñe bôte ba tibili bia. Nde amu jé bi ne mevak? Bi tame yene ve beamu belal. Amu ôsu a ne na, éyoñe bia jibi, Yéhôva a wô’ô bia mvaé. (1 P. 4:13, 14) Amu baa a ne na, mbunane wongan wo tu’a bo ngu. (1 P. 1:7) Amu lale ki a ne na, nge bi jibi akekui asu’ulan, bii bi ényiñe ya melu mese.​—Bero. 2:6, 7.

19. Amu jé minlôman mi mbe mevak éyoñe be nga mane mie bôm?

¹⁹ Minlôman mi nga wô’ôtan ava’a Yésus a nga jôô de, valé a ndeme wômô miñwuan. Éyoñe be maneya be latane minkasa a ve be abendé na te ba beta kañete, be nga vak. Amu jé? “Amu Zambe a nga lô be ane aka’a bôt da yiane jibi ékpwe’ele amu jôé [Yésus].” (Mam. 5:40-42) Be nji be be ko besiñe bap woñ, amu be mbe be nye’e Tate abui. Nye’an ôte ô nga bo na be ke ôsu a kañete mbamba foé. Den, abui bobejañ da ke ôsu a bo Yéhôva ésaé akusa bo minjuk. Ba yeme na Yéhôva a ye ke vuan ésaé ése be nga bo nye, a nye’ane be nga liti asu jôé dé.​—Beh. 6:10.

20. Jé bii yen ayé’é da zu?

²⁰ Bôte bé ke ôsu a feme bia akekui môse Yéhôva é tyame mbia émo nyi. (Jean 15:19) Ve bi nji yiane kute kam. Avale bii yen ayé’é da zu, Yéhôva é ke ôsu a ‘yemete bia, a ba’ale bia’ nge bia ke ôsu a bo nye ésaé. (2 Bet. 3:3) Ajô te, enkelan ôsu a nye’e Yéhôva, bobejañ, to’o besiñe bangan. Nge bi bo nalé, bii tu’a bo nlatan, bii bi ngule mbunan, bii ve Yéhôva duma, a bii liti na nye’an ô ne ngul a dañe ziñ.