Bôte ba lañe nkañete ôte be ne bôône bebiene nsili ôte. Ve nkañete ôte wo kobô ajô bôte bebaé be be’e éyôlé Mephiboscheth. Bi tame zu yene jam e nga boban, a yene ñye’elane nkañete ôte wo ve bia.

Saül, njô bôte ya Israël, a mbe a bili bobefam zañbwa, a bobebinga bebaé. Ntôle mone wé ô mbe jôé na Jonathan. Saül a nga beta bi mona fam mfe, a too jôé na Mephiboscheth, a nga biaé nye ba ébone jé, Rizpah. Ve jame da, Jonathan fe a mbe a bili mon a too jôé na Mephiboscheth. Ajô te, Njô bôte Saül a mbe a bili mon a ndaé be be’e éyôlé Mephiboscheth.

Môs éziñ, Njô bôte Saül a nga taté na a vini Begabaonite, ane a nga jeñe na a mane wôé ayoñ ete ese. A ne ve ane a nga kui fe na a wôé abui ya be be. Jam ete e mbe angôndô ya abé. Amu jé? Amu melu me Josué, betebe ôsu ya Israël be nga bo élat a Begabaonite asu na ba be be nyiñe mvo’é été.​—Jos. 9:3-27.

Be mbe be ngenan be semé’é élat éte melu me Njô bôte Saül. Ve Saül a nga tyam élat éte amu a nga jeñe na a mane wôé Begabaonite bese. Jam ete e nga bo na Saül a nda bôte jé be bo bekuli metyi. (2 Sa. 21:1) Mvuse ya valé, éyoñe David a nga nyoñ éto njô, Begabaonite be nga nyiñe be nga zu nye kate mbia jame Saül a nga bo ayoñe dap. David a nga sili be jam a yiane bo asu na a kune be, ndembene Yéhôva é botane si jap. Begabaonite be nji sili David moné, ve be nga jô nye na a ve be bobefam zañbwa be môt a nga “bôndé [be] mbia mefek na ba ye jaaban,” asu na be wôé be. (Nb. 35:30, 31) Ane David a nga kañese.​—2 Sa. 21:2-6.

Melu mete, Saül ba Jonathan be mbe be wuya, ve mone Jonathan a mbe jôé na Mephiboscheth a mbe a nga’an a vee. Mephiboscheth a mbe ñyeyem amu a nga juk éyoñ a mbe mongô, ajô te a nji ke nsamba bôt ô nga ke wosane Begabaonite. Nde fe, David a nga bo élat a Jonathan, a élat éte é nga yiane fe volô mone wé, Mephiboscheth. (1 Sa. 18:1; 20:42) Kalate Zambe a jô na: “Njô bôt [David] a nga nyii Mephiboscheth, mone Jonathan, mone Saül, amu atiñ be nga tiñeti zañe jap be Yéhôva.”​—2 Sa. 21:7.

David a nga ve Begabaonite jôme be mbe be yi’ik. A nga ve be bobefam be Saül bebaé, wua ya été a too jôé na Mephiboscheth. A nga ve fe be bendaé be Saül betan. (2 Sa. 21:8, 9) Jame David a nga bo e nga kôté nlam ôse.

Nkañete wu ô nji bo ve zezé nlañ. Atiñe Zambe da jô ne sañesañe na: “Ba ye bo te wôé bon étom beésaa.” (Dt. 24:16) Yéhôva a nji ye kañese na be wôé bobefam be Saül bebaé a bendaé bé betan, nge be fe be nji be be bili mekua ajô ete. Atiñ ete da ke ôsu a jô na: “Môt ase a ye wôéban étom abé dé émien.” A ne ve ane nge mvoñe bôte Saül be nga wôé é nga nyoñe ngab ñwôéane Saül a nga wôé Begabaonite. Nge e ne nalé, wônaa bôte zañbwa bete be nga wu amu mbia mboone wop.

Nkañete ôte wo kôme liti bia na, môt a vo’o bo mbia jam éyoñe te nje a jô na, a te ke fo’o ve nlôman. Kalate Zambe a jô na: “Tyee’ zene ya mebo môé, a mezene môé mese me bo’o nkôman.”​—Min. 4:24-27; Beép. 5:15.