ASU AYÉ’É 10
Amu jé wo yiane duban?
“Môt ase a duban.”—MAME MI. 2:38.
JIA 34 Ma ye wulu zôsôô été
ÔBALEBAS a
1-2. Jé é wô’ô boban éyoñe bôte ba duban, a jé bia zu yen ayé’é di?
YE Ô tameya fombô nsamba bôte wo zu duban? Wo wô’ô ane metiñe map ma liti éva’a be bili éyoñe ba yalane minsili mibaé be wô’ô sili ôsusua na ba duban. Wo yen ane menda me bôte map a bemvôé bap be ne meva’a été. Éyoñe ba kui mendim, bia wô’ô ane bôte ba kute mefas a yen ane mesu map me ne njalan a mevak. Sondô ase betoyini be bôte ba ve bebiene ngumba be Yéhôva a duban a bo bebo bisaé bé.
2 Wo ki? Nge wo kômbô duban, yeme na ô ne môt a ne ngum avale mbia émo Satan nyi amu wo “jeñ Yéhôva.” (Bsa. 14:1, 2) To’o ô ne ésoé nge nya môtô, ayé’é di da fombô wo. Ve bia bôte bi maneya dubane bia yiane ke ôsu a yemete ntyi’ane bi nga nyoñe na bii bo Yéhôva ésaé nnôm éto. Ayé’é di, bia zu yene beamu belale be ne volô beyé’é Bible na be nyoñe ntyi’ane ya bo Yéhôva ésaé.
WO NYE’E BENYA MEJÔÔ A ZÔSÔ
Satan a nga ve éyolé Yéhôva mvite den a too betoyini mimbu, a ngenan a kele ôsu a bo’o de (Fombô’ô abeñ 3-4)
3. Amu jé bebo bisaé be Yéhôva ba nye’e benya mejôô a zôsô? (Besam 119:128, 163)
3 Yéhôva a nga jô bebo bisaé bé na be ‘nye’e benya mejôô.’ (Zach. 8:19) Yésus fe a nga jô beyé’é bé na be tôñesane zôsô. (Matt. 5:6) Nalé a tinane na bia yiane bi nkômbane ya bo mame me ne zôsô, mvaé a mfubane mise me Yéhôva. Ye wo nye’e benya mejôô a zôsô? Bi too ndi na wo nye’e be. Wo vini minsos a mame mese me ne abé. (Lañe’e Besam 119:128, 163.) Môt a laane minsos a vu Satan, njôô ya émo di. (Jean 8:44; 12:31) Nsôñane wé ô ne na a ve éyôlé Yéhôva Zambe é ne étyi mvit. Satan a nga taté na a ve éyôlé Yéhôva mvit afube ya Éden. A yi na bôte be simesane na Yéhôva a bisi ki be, na a ne mbia njôô bôt, a na a kamane mone môte mbamba be mam. (Mett. 3:1, 4, 5) Satan a yi na bôte be yene Yéhôva ane mbia môt. Éyoñe bôte ba tyi’i na ba ‘nye’e ki benya mejôô,’ Satan a ne tindi be na be bo mbia be mame mevale mese.—Rom. 1:25-31.
4. Aval avé Yéhôva a nga liti na a ne “Zambe ya benya mejôô”? (Fombô’ô fe fôtô.)
4 Yéhôva a ne “Zambe ya benya mejôô,” a volô bôte ba nye’e nye na be kôme yeme benya mejôô. (Bsa. 31:5) Nalé a bo na be bo teke du’uban. Yéhôva a ye’ele fe bebo bisaé bé na be bo zôsô. Nalé a volô be na be bo éjijin, a na mone môte ya nleme wop a tabe ne mieññ. (Mink. 13:5, 6) Éko éziñe Yéhôva a nga ve wo mame mete mese éyoñ ô nga taté na wo yé’é Bible. Ô nga yé’é na memvinda me Yéhôva mme ma dañe mfi asu bôte bese a asu dôé womien. (Bsa. 77:13) Ajô te wo yi na wo bo mame wo yeme na me ne zôsô mise me Yéhôva. (Matt. 6:33) Wo kômbô kamane benya mejôô a volô bôte bevok na be yeme na mame Satan a jô a lat Yéhôva me ne minsos. Aval avé ô ne bo de?
5. Aval avé ô ne liti na wo su’u benya mejôô a zôsô?
5 Fatan ényiñe jôé é ne liti na wo jô na: “Ma bene minsose mi Satan, ma tôñe benya mejôô. Ma yi na Yéhôva nnye a bo Njôô ya ényiñe jam, a ma yi na me tôñe mame me ne zôsô mise mé.” Aval avé ô ne bo de? Va’a womiene ngumba be Yéhôva meye’elan été, a liti de mengana bôt été a zene ya nduban. Nye’ane wo nye’e benya mejôô a zôsô ñwô wo yiane dañe tindi wo na ô nyoñe ntyi’ane ya duban.
WO NYE’E YÉSUS KRIST
6. Kalate Besam 45:4 a liti na bia yiane nye’e Yésus Krist amu jé?
6 Amu jé wo nye’e Yésus Krist? Tame yene beamu béziñe bia koone be kalate Besam 45:4. (Lañek.) Yésus a nga volô bôte bevok na be bo éjote nyul, be nye’e benya mejôô a zôsô. Nge wo nye’e benya mejôô a zôsô, teke bisô na wo nye’e fe Yésus Krist. Tame ve’ele simesan avale Yésus a nga kamane benya mejôô a zôsô a ayo’o ése. (Jean 18:37) Nde ñhe, aval avé Yésus a nga liti na a nye’e éjote nyul?
7. Amu jé éjote nyule Yésus ja nambe wo?
7 Mame Yésus a nga bo me nga liti na a nye’e fulu éjote nyul. Éve’an é ne na, a nga ve Ésa wé duma ése, sake émien. (Marc 10:17, 18; Jean 5:19) Wo wô’ôtan aya éyoñe wo yene fulu éjote nyule Yésus éte? Ye nalé a tindi ki wo na ô nye’e Mone Zambe a vu nye? Teke bisô na nde wo kômbô bo nalé. Amu jé Yésus a ne éjote nyul? Amu a nye’e Ésa wé, a kômbô fe vu nye, amu Ésa wé a ne éjote nyul. (Bsa. 18:35; Héb. 1:3) Ye wo kômbô ki subu Yésus bebé, nnye ate a kôme tune mefulu me Yéhôva?
8. Amu jé bi ne mevak ya bi Yésus ane Njôô wongan?
8 Bia yi na Yésus a bo Njôô wongan amu a ne mbamba Njôô. Yéhôva émien a nga yañele Mone wé a telé nye Njôô. (Ésa. 50:4, 5) Tame fe simesane mame Yésus a nga nyum émien amu a nye’e bia. (Jean 13:1) Mbôle Yésus a ne Njôô wongan, bia yiane kôme nye’e nye. Yésus a loone bôte ba nye’e nye na bemvôé bé, a bôte bete ba liti na ba nye’e nye éyoñe ba tôñe metiñe mé. (Jean 14:15; 15:14, 15) Ngo’o abime beta mvome te na wo bo mvôé Mone Yéhôva!
9. Mfa’a ôvé nduban bekristene wo funane wu Yésus?
9 Beta atiñe wua ya metiñe Yésus a nga ve beyé’é bé a ne na be duban. (Matt. 28:19, 20) Émien a nga liti mbamba éve’ela mfa’a ôte. Ndubane Yésus wo selan a ndubane beyé’é bé mimfa’a miziñ. (Fombô’ô nka’ale ô ne na: “ Nsela’ane mbé a ne zañe ndubane Yésus a ndubane beyé’é bé.”) Ve ndubane Yésus wo funane fe wu beyé’é bé mimfa’a miziñ. Éyoñe Yésus a nga duban, a nga ve émiene ngumba asu na a bo nkômban Ésa wé. (Héb. 10:7) Avale te fe, beyé’é be Yésus ba duban mengana bôt été asu na be liti na be veya bebiene ngumba be Yéhôva Zambe. Ataté éyoñ éte, jame da dañe mfi ényiñe jap é ne na be bo nkômbane Zambe, sake nkômbane wop. Éyoñe ba bo de, ba liti na ba tôñ éve’ela masa wop.
10. Amu jé wo nye’e Yésus, a nye’an ôte wo yiane tindi wo na ô bo jé?
10 Wo kañese na Yésus a ne atyi’i Mone Yéhôva, a na a ne Njô Yéhôva a nga telé asu na a jôé bia. Wo yeme na Yésus a ne éjote nyul, a na a nga tune fulu éte be Ésa wé. Ô nga yé’é na Yésus a nga ve bôte bidi, a nga volô bôte minlem a ve be ngule nyul, a nga saé fe minkôkon. (Matt. 14:14-21) Ô nga yé’é fe aval a wulu akônda dé melu ma. (Matt. 23:10) Nde fe ô nga yé’é na Njôô ya Éjôé Zambe ate a ye bo abui mame melu ma zu asu dangan. Aval avé ô ne liti na wo nye’e nye? Éyoñe wo tôñ éve’ela jé. (Jean 14:21) Jam ôsu ô ne bo asu na ô liti na wo tôñ éve’ela jé é ne na ô ve womiene ngumba be Yéhôva a duban.
WO NYE’E YÉHÔVA ZAMBE
11. Jam avé da yiane wo dañe tindi na ô duban, a amu jé wo bo de?
11 Jam avé da yiane wo dañe tindi na ô duban? Yésus a nga liti atiñe da dañe metiñe mese éyoñ a nga jô na: “Wo yiane nye’e Yéhôva Zambe wôé a nleme wôé ôse a ényiñe jôé ése a ôsimesane wôé ôse a ngule jôé ése.” (Marc 12:30) Ye nde wo nye’e Zambe avale te?
Yéhôva nnye a ne anjeñe ya mbamba be mame bese bia bu’ubane be éyoñe ji, a ma bia ye bu’ubane me melu ma zu (Fombô’ô abeñ 12-13)
12. Amu jé wo nye’e Yéhôva? (Fombô’ô fe fôtô.)
12 Bi bili abui beamu ya nye’e Yéhôva. Bi nga yé’é na nnye a ne “anjeñe ya ényiñ” a na “mbamba mvean ase a das ése” a so be Nye. (Bsa. 36:9; Jacq. 1:17) Mbamba jam ase wo bu’ubane nye a so be Zambe wongane ya nye’an.
13. Amu jé ntañ ô ne beta das?
13 Ntañ ô ne beta dase Yéhôva a nga ve bia. Amu jé bi ne jô nalé? Bia zu tame yen élat é ne zañe Yéhôva ba Mone wé. Yésus a nga jô na: “Ésa wom a nye’e ma” a “Ma nye’e Ésa wom.” (Jean 10:17; 14:31) Élate jap é nga tu’a bo ngul éyoñe be nga tabe bemilliard mimbu vôma wua. (Mink. 8:22, 23, 30) Tame ñhe ve’ele simesan abime mintaé Yéhôva a nga wôk éyoñ a nga kañese na Mone wé a tôbane minjuk a wu. Yéhôva a nye’e bôt angôndô ya abui a nye’e fe wo, ajô te a nga ve Mone wé metuna’a asu na wo, a bôte bevok bese mi nyiñe nnôm éto. (Jean 3:16; Gal. 2:20) Beta amu a bo na bi nye’e Zambe nnye ñhe le.
14. Nsôñan ôvé wo dañe minsôñane mise ô ne bi ényiñe jôé?
14 Nye’ane wo nye’e Yéhôva ô nga yaé éyoñ ô nga tu’a yeme nye. Teke bisô na wo kômbô subu nye bebé ataté éyoñe ji akekui nnôm éto. A bi ne de bo. Yéhôva a jô bia a mbamba nleme na bi ve nye nlem avak. (Mink. 23:15, 16) Ô ne de bo a zene ya minkobô a mimboane miôé. Mame wo bo ényiñe jôé mé kôme liti na wo nye’e Yéhôva. (1 Jean 5:3) Nsôñane wo dañe minsôñane mise ô ne bi ñwô ñhe le.
15. Aval avé ô ne liti Yéhôva na wo nye’e nye?
15 Aval avé ô ne liti Yéhôva na wo nye’e nye? Jam ôsu, éyoñe wo bo meye’elane me ne ngum aval, a ve womiene ngumba be nya Zambee. (Bsa. 40:8) Mvuse ya valé, wo liti jame te mengana bôt été éyoñe wo duban. Avale bia te yen ayé’é di, nduban ô ne éyoñe mevak a môse wo dañe mfi ényiñe jôé. Wo taté mfefé ényiñ, sake asu dôé womiene ve asu Yéhôva. (Rom. 14:8; 1 P. 4:1, 2) Wé yene wô ane beta ntyi’ane wo yiane nyoñ, a teke bisô na a ne fo’o beta ntyi’an. Ve wo yoone wo mimbé ya nya ényiñi’i. Aval avé?
16. Besam 41:12 a liti na ma’ane mevé Yéhôva é ve bôte ba belan ényiñe jap na ba bo nye ésaé?
16 Yéhôva a ne Môt a dañ akab. Jôm ése wo ve nye, a ye wo je bulan éyoñ ése a lôt abim ô nga ve Nye. (Marc 10:29, 30) É ve wo angôndô ya mbamba ényiñe to’o ane mbia émo nyi a nga zu jañ. A bi ne jô na a ne fo’o ve atata’a ya mbamba ényiñ. Nduban ô ne atata’a ya dulu é ne teke man. Ô ne ke ôsu a bo Ésa wongane ya nye’an ésaé nnôm éto. Nye’an ô ne zañe mia Ésa wôé wo ye ke ôsu a yaé, a wé bo ngule ya nyiñe nnôm éto ane Nye.—Lañe’e Besam 41:12.
17. Jé Yéhôva a nji bi ô ne ve nye?
17 Éyoñe wo ve womiene ngumba be Yéhôva a duban, ô bili mvome ya ve Ésa wôé jôm é ne nya édimaa. Nnye a nga ve wo mbamba be mame bese a mbamba biyoñe bise ô nga bu’ubane bie. Ô ne liti na wo ve Nté ya yôp a si akiba éyoñe wo ve nye jôm a nji bi, ékaña’a jôé. (Job 1:8; 41:11; Mink. 27:11) Aval avé ô ne yeme belan ényiñe jôé? Teke bisô na nye’ane wo nye’e Yéhôva ñwô wo tindi wo na ô duban.
WO BETA YANGE JÉ?
18. Minsili mivé bi ne sili biabebien?
18 Nde, aval avé ô ne yalane nsili ô ne na, ye wé fo’o duban? Wo étam ô ne yalane nsili ôte. Ve nsili wu ô ne ngule ya volô wo, ‘Amu jé ma beta yange?’ (Mame mi. 8:36) Te vuane beamu belale bia te yen. Amu ôsu, wo nye’e benya mejôô a zôsô. Sili’i womiene na: ‘Ye ma yange a ôjeja’a ôse môse môt ase é kobô benya mejôô a bo mame me ne zôsô?’ Amu baa, wo nye’e Yésus Krist. Sili’i womiene na: ‘Ye ma kañese na Mone Zambe a bo Njôô wom, a kañese tôñ éve’ela jé?’ Amu lale a nyi a dañ a ne na wo nye’e Yéhôva. Sili’i womiene na: ‘Ye ma kômbô ve Yéhôva nlem avak a bo nye ésaé ane Zambe wom?’ Nge éyalane ya minsili mite mise é ne na ôwé, amu jé wo kate duban? Jé wo beta yange?—Mame mi. 16:33.
19. Amu jé ô nji yiane ko woñe ya duban? Va’a éve’an. (Jean 4:34)
19 Nge wo ko woñe ya duban, simesa’an éve’ane Yésus a nga belane je. (Lañe’e Jean 4:34.) Yene na Yésus a ve’e nkômban Ésa wé a bidi. Amu jé? Bidi bi ne nya mfii asu dangan. Yésus a yeme na jam ése Ésa wé a jô bia na bi bo é ne asu mfi wongan. Yéhôva a nji yi na bi bo jôm éziñ é ne soo bia minjuk. Ye nkômbane Yéhôva ô ne fe na bi duban? Ôwé. (Mame mi. 2:38) Ajô te bi ne tabe ndi na bii bi abui bibotane nge bia tôñ atiñe Yésus a nga ve bia na bi duban. Nge wo ko ki woñe ya di bidi bia dañe mvaé, amu jé wo ko woñe ya duban?
20. Jé bii yen ayé’é da zu?
20 Jé wo beta yange? Abui bôt é ne yalane na: “Me ngenane teke bo nkômesane ya duban.” Ve nya ajô a ne na, ntyi’ane ya ve womiene ngumba be Yéhôva a duban ñwô wo dañe mintyi’ane mise ô ne nyoñ ényiñe jôé. Ajô te, éngôngol kôme nyoñ éyoñe ya fase jam éte, a nalé a sili na ô ve abui ngul. Ve nge wo kômbô fo’o duban, mame mevé ô ne taté na wo bo éyoñe ji? Bii yen éyalane ya nsili ôte ayé’é da zu.
JIA 28 Asu na bi bo bemvôé be Yéhôva
a Nduban ô ne beta jame ñyé’é Bible ase a yiane bo. Jé é ne tindi ñyé’é Bible na a duban? Nge bia tyi’i étune bi ne jô na nye’an. Ve nye’ane a nye’e jé, a za? Ayé’é di, bia zu bi biyalane ya minsili mite, bii yene fe aval ényiñe jangan é ne bo nge bia nyoñe ntyi’ane ya duban.
