Amu jé môte Boaz a loone na “Mô” a nga jô na é “ndaman” éli’i jé nge a lu’u Ruth? (Ruth 4:1, 6)

Melu mvus a mbe na, éyoñe môt a mbe nlu’an a wu teke mone, minsili miziñe mia yiane bômbô: Za é li’i akume dé? Ye éyôlé jé Ja ye jañe nnôm éto? Atiñe Moïse é mbe é yala’ane minsili mite.

Aval avé be mbe be bela’ane si môt a nga wu, nge ke si môt a nga kuan évos amu a mbe a nto azoé? Monyañe wé nge ki évuvumane jé nje é mbe é yiane kuse si éte. Nalé a mbe a volô na si éte é li’i nda bôt été.​—Lév. 25:23-28; Nlañan. 27:8-11.

Jé ki be mbe be bo’o asu na éyôlé môt a ke wu é bo teke jañ? Atiñe Moïse é mbe é jô’ô na, éyoñe môt a te luk minga, éyoñe te a wu teke mone, monyañe wé nge ki évuvumane jé ja yiane luk nkuse wo te li’i. Nde é nga bobane nalé éyoñe nnôme Ruth a nga wu. Môt a mbe a lu’u nkuse monyañ a mbe a volô na môt a nga wu a bi éji’ane jé ke ôsu a nyoñe ngab a akume dé, a na éyôlé jé é bo teke jañ. Nalé a mbe a volô fe na nkuse wo li’i ô bi môt é ke ôsu a nyoñe ngab a nye.​—Deut. 25:5-7; Matt. 22:23-28.

Bi tame zu yene jam é nga kui Naomi. A mbe minga Élimélek. Éyoñe nnôm a bobefame bé bebaé be nga wu, a nga li’i a tele étame teke môt a nyoñe ngab a nye. (Ruth 1:1-5) Éyoñe Naomi a bulaneya Juda, a nga jô mbome wé Ruth na ô ke sili Boaz nge a ne kuse si jap. Boaz a mbe évuvuman Élimélek. (Ruth 2:1, 19, 20; 3:1-4) Ve Boaz a mbe a yeme’e na môte Kalate Zambe a loone na “Mô” nnye a mbe évuvuman é mbe é dañ Élimélek bebé. Ajô te a mbe a yi’i na nnye a kus akum Élimélek a nga lik.​—Ruth 3:9, 12, 13.

Atata’a, “Mô” a mbe a kômbô’ô be volô. (Ruth 4:1-4) A mbe a yeme’e na é mbe é sili’i na a jañele abime moné éziñ asu na a kuse si éte, ve a mbe a yeme’e fe na Naomi a vo’o ki fe beta biaé mone a ne li’i a akum Élimélek. Nalé a tinane na Mô nnye a mbe a yiane fe nyoñe si Élimélek a nga lik. A nalé a nga ye bo na a tu’a bi abui akum.

Ve Mô a nga su’ulane tyendé ôsimesan éyoñ a nga yene na da sili na a lu’u Ruth. Ane a nga jô na: “Me se ngule ya kôté je mfa’a wom, me za ndamane biôm biam.” (Ruth 4:5, 6) Jé é nga bo na Mô a tyendé ôsimesan?

Nge Mô nge ke môt mfe a nga ye lu’u Ruth, éyoñe te ba biaé mona fam, mon ate nnye a nga ye nyoñ élik Élimelek. Aval avé jam éte é nga ye “ndaman éli’i” Mô? Kalate Zambe a kate ki bia de, ve a volô bia na bi yeme bone be mame béziñe be ne volô bia na bi tu’a wôk jam éte.

• Jam ôsu, moné a nga ye belane nye asu na a kuse si éte a nga ye bo ane a ndamane nye, amu si éte é nga ye bo nyi mone ba Ruth be nga ye biaé.

• Jame baa, nnye a mbe na a nyoñe ngab a Naomi ba Ruth.

• Jame lale, nge Ruth a nga ye biaé bone befe a Mô, bone bete bese be nga ye kaban éli’i jé.

• Jame nyini, Nge Mô a nji be a bili bone befe, mone Ruth a nga ye biaé nnye a nga ye nyoñe mesi mé mese a ma me Élimélek. Nalé a nga ye bo na a mane jañele mesi mé, a to ke na mon a nga ye nyoñe mesi mete a mbe a be’e éyôlé môte mfe. Môt ate a nji be a kômbô’ô jañele akume dé asu na a volô Naomi. A nga jô’é na Boaz, évuvuman éfe nje é be’e mbe’e ôte. Boaz a nga bo de amu a mbe a kômbô “bete jôé ya môt a nga wu mfa’a ya biôm a nga lik.”​—Ruth 4:10.

Da yené na môt ba loone na Mô nyi a mbe a dañe kômbô ba’ale éyôlé jé a biôme bi mo bié. Nsisim afom ñwô ô mbe ô jôé asimesane dé. Môt ate a nga ve ngul ése asu na be bo teke vuane nye, ve melu ma teke môt éziñ a yem éyôlé jé. A nga jañele fe beta mvome Boaz a nga bi, mvome ya bo môte wua ya mvoñe bôte Messie, Yésus Krist. Da kôme fo’o yené na ntyi’ane Mô a nga nyoñe na a bene volô môt a mbe a yi mvolan ô nga telé nye mbia été!​—Matt. 1:5; Luc 3:23, 32.