1. Amu jé Yéhôva a nga té émo minlañ?

YÉHÔVA a nga jaé tabe étam, ve jam ete e nji be e ndeñele’e nye. Jôm éziñ é nji be é jemba’ane nye. Ve Yéhôva a mbe a yi na bôte befe be bu’uban ényiñ. Nye’an ñwô ô nga tindi nye na a té émo minlañ.​—Bs. 36:9; 1 Jean 4:19.

2. Yésus ba beéngele be nga bo aya éyoñe Yéhôva a nga té biôm?

² Yéhôva a nga taté té Mone wé, Yésus. Ane a nga belane nye asu na A té “biôm bise” bivok, to’o bemillion beéngele. (Beco. 1:16) Yésus a nga wô’ô mvaé ya saé a Ésaa wé. (Min. 8:30) Beéngele fe be nga va’ abui. Be nga yen a mise map ane Yéhôva ba Mie mbo ésaé wé, ba mane kôme yôp a si. Nde beéngele bete be nga bo aya? “Be nga bete metyiñ amu mevak,” a be nga ke ôsu a kute kôp éyoñ ése Yéhôva a mbe a mane’e té jôm, e dañe dañ éyoñ a nga mane té môta binam. (Job 38:7; Min. 8:31) Bitétéa bise bia ngôné nye’ane Yéhôva a fe’e jé.​—Bs. 104:24; Bero. 1:20.

3. Kalate 1 Becorinthien 15:21, 22 a liti na ntañ ô ne bia mfi ôvé?

³ Yéhôva a mbe a yi na bone be bôte be nyiñe nnôm éto Paradis si va. Ve éyoñ Adam ba Ève be nga biasé Ésaa wop ya nye’an, abé a awu bi nga nyiin émo. (Bero. 5:12) Nde Yéhôva a nga bo aya? Été été, a nga liti aval avé a ye kôté môta binam. (Met. 3:15) A nga tyi’i na a ye lôme Mone wé na a zu wu a butane bone b’Adam. Ndemben môt  ase ya be be a ne tobe na a kañe Yéhôva a bi ényiñe ya melu mese.​—Jean 3:16; Bero. 6:23; lañe’e 1 Becorinthien 15:21, 22.

4. Bia zu bi biyalane ya minsili mivé ayé’é di?

⁴ Ngaka’a Yéhôva a nga bo a lat a ñwômane miñwuan ja bo na bi sili biabebiene minsili mi: Ñwômane miñwuan ôte ô ne bobane bebé aval avé? Ye bia ye fo’o bo ngule ya yeme bôte bangan be nga mane wu? A jé bia yé’é a lat a nye’ane Yéhôva, fe’e jé, a ôjibi wé éyoñ bia bindi ngaka’a ya ñwômane miñwuan? Bi tame zu yalane minsili mite.

5. Amu jé bi ne jô na Yéhôva a ye ke mane wômôlô bôte bese éyoñe jia?

⁵ Bi vo’o tu’a tabe ndi na bôte bese Yéhôva a ye wômôlô ba ye wômô miñwuan éyoñe jia. Amu jé bia jô nalé? Nge bizu’u bi bôte bite bise bia mane wômô éyoñe jia, jo’ojo’o a ne kui. Bia yeme ke na Yéhôva a ne Zambe ya nta’ane mam. A yeme na, asu na mvo’é é bo, mam ma yiane bo mbamba nta’an. (1 Bec. 14:33) Yéhôva a nga liti na a ne fek a ôjibi nté a mbe a saé’ a Yésus na be taté mane kôme si ôsusua na a zu té môta binam a toé nye été. Yésus fe a ye liti mefulu mete Éjôé ya toyini mimbu, éyoñe ba be bôte ba ye tulan Harmaguédon ba ye taté mane kôme si asu bôte ba ye wômô miñwuan.

6. Kalate Mam Minlôman 24:15 a liti na beza ba ye bo nsamba bôte ba ye wômô?

⁶ Bôte ba ye tulan Harmaguédon ba ye dañe volô ba ba ye wômô mesoñ mfa’a ya nsisim; ba ye ye’ele be mam a lat a Éjôé Zambe a memvinda mé. Amu jé bia jô nalé? Amu abui ya ba ba ye wômô da  ye bo ba Bible a loone na “bikotekot.” (Lañe’e Mam Minlôman 24:15.) Da ye sili na be bo abui mintyendan asu na be bu’ubane ntañ. Ngo’o abim ésaé éte na, bia ye’ele bemillion be bôt be nji yem atañe jôm a lat a Yéhôva! Ye bia ye bo môt ase ayé’é dé avale bia zu bia bo den? Ye mingum mekônda mia ye tébane mfa’a ya yañele bôte be maneya yé’é, ndemben be’efe be bo ngule ya ye’ele ba ba ye wômô mvuse jap? Bia ye yeme de wôé. Ve jam bia yem é ne na, mvus Éjôé ya toyini mimbu, “si ja ye jaé ne lut a ñyemane Yéhôva.” (És. 11:9) Ésaé ja ye fo’o bo abui éyoñ éte, ve ja ye soo bia mevak.

7. Amu jé bebo bisaé be Yéhôva ba ye yeme tebe été bôte ba ye wômô miñwuan?

⁷ Éjôé ya toyini mimbu si, da ye sili na bone be Yéhôva bese be bo mintyendan mfa’a ya ve nye nlem avak. Jôm ete nje ba ye kui na be yeme tebe été bôte ba ye wômô, nté ba ye volô be na be wosan abé é ne be metyi, a na be tôñe memvinda me Yéhôva. (1 P. 3:8) Éyoñ bôte ba ye wômô ba ye yen ane bebo bisaé be Yéhôva ba biban asu na be bo nkômbane wé, ba ye semé fulu éjote nyule jap, a be’efe ba ye kômbô biban asu ‘nyiane wop.’​—Beph. 2:12.

8. Amu jé bi ne jô na bia ye bo ngule ya yeme bôte bangan be nga wu éyoñ ba ye wômô mesoñ?

⁸ Abui mam da bo na bi simesane na bia ye bo ngule ya yeme bôte bangan ba ye wômô. Éyoñ bia yen avale miñwômane miñwuan mi nga bobane melu mvus, nalé a bo na bi simesane na, bôte ba ye wômô ba ye bo avale be mbe mon éyoñ ôsusua na ba wu. Ba ye kobô a fas avale da, ba ye funane ve bebien, sa ke môte mfe. Yésus a nga jô na awu é ne ane ôyo, a na éyoñe môt a wômô a ne ve ane a vee ôyo. (Mt. 9:18, 24; Jean 11:11-13) Éyoñ môt a vee ôyo, ye a wô’ô vee a be’e asu afe, a kobô’ a tyiñe fe, nge ke na, ye a wô’ô mane vuane mam mese me mbe nye ôsimesan ôsusua na a ke ôyo? Momo. Nkañete Lazare wo bo’olô de. Mbôl a mbe a boya melu menyine soñ, nyule jé é mbe é nga boé. Ve éyoñe Yésus a nga wômôlô nye, bekale bé be nga yeme nye été été, a nye’e fe a nji dimine be mesu.​—Jean 11:38-44; 12:1, 2.

9. Amu jé bi ne jô na bôte ba ye ke wômô be too zôsôô ne tiññ, teke atañ ayeñ?

⁹ Yéhôva a nga ka’ale na, éjôé Yésus si, teke môt a ye beta jô na: “M’akon.” (És. 33:24; Bero. 6:7) Nalé a tinane na Yéhôva a ye wômôlô bôt be be’e menyôle me too mvo’é. Ve nalé a nji tinane na abé da ye kôlô be menyôl été été. Amu nge be wômô be too zôsôô ne tiññ, teke atañ ayeñ, bôte be ne kate yeme be. A ne ve ane metyi ya abé ma ye ke ma kôlô bia menyul ôte’ete’ ôte’etek. Éyoñ toyini mimbu é lôteya, Yésus a ye bulan Ésaa wé Éjôé. Éyoñ éte, Yésus a ye bo a maneya jalé nkômbane Yéhôva, to’o wu ya bo na môta binam a bo zôsôô ne tiññ.​—1 Bec. 15:24-28; Nli. 20:1-3.

10. Ñwômane miñwuan wo ye bo na ô wô’ôtan aya?

¹⁰ Ye ô tameya simesan abime mvaé wo ye wôk éyoñe wo ye beta yene bôte bôé be nga wu? Wo ye bo aya môs ôte: ye yôn, ye woé? Ye meva’a mé kui wo  vôme mfe aval é ne na wé taté na wo yia Yéhôva bia? Jam bia yem é ne na, ñwômane miñwuane wo ye bo na nye’ane bi bili asu Ésaa wongan a édiñe Mone jé ô fuluku.

11. Bela’ane Jean 5:28, 29 na ô liti bibotane bia yange bôte ba ye bo Yéhôva mewôk.

¹¹ Tame ve’ele simesan abime mvaé bôte ba ye wômô mesoñ ba ye wôk, éyoñ ba ye kôme yen ane ba bo mintyendan ényiñe jap mfa’a ya bo Yéhôva mewôk. Fo’o ve bôte ba ye bo avale mintyendan ete mbe ba ye bi mvome ya nyiñe Paradis si va nnôm éto. Yéhôva a ye ke kañese na môt a beta nye bo melo éyoñ éte, a soo jo’ojo’o Paradis.​—És. 65:20; lañe’e Jean 5:28, 29.

12. Aval avé Yéhôva a ye botane bôte ba ye nyiñe Paradis?

¹² Éjôé Zambe si, bebo bisaé be Yéhôva ba ye yen ane mejô ya kalate Minkana 10:22 ma tôéban: “Ébotane Yéhôva nje j’ave akum; nalé fe a ne te kô’ôlan ôlun été.” Mbamba nsisime Yéhôva a ye volô bebo bisaé bé na be yaé nsisim asu ya na be tu’a vu Krist akekui abé da ye mane vase be menyôl. (Jean 13:15-17; Beép. 4:23, 24) Ane melu ma ye lôt, ba ye tu’a bo mvo’é minsôn a bi mbamba mefulu. Ényiñe ja ye fo’o bo mvaé éyoñ éte! (Job 33:25) Éyoñe ji bi tame ñhe zu yene mfi ya bindi ndi nleme ya ñwômane miñwuan.

13. Bela’ane Besam 139:1-4 na ô liti aval avé ñwômane miñwuan wo bo’olô na Yéhôva a yeme bia édo’o ñyeman.

¹³ Avale bia te yene mvus, éyoñe Yéhôva a ye wômôlô bewu, a ye bulane ve be mam ma ye bo na bôte bap be yeme be tyi’ibi. Tame ve’ele simesane jôme nalé a tinan. Ye wo yene fo’o nye’ane Yéhôva mvuse mboan ôte? Yéhôva a nye’e wo aval é ne na a ba’ale mon ényiñe wôé ase ôsimesane wé: mame wo fas, mame wo wô’ôtan, mame wo jô, a mame wo bo. Ajô te, nge da sili na a wômôlô wo, da ye bo tyi’ibi na a beta té wo aval ô mbe ôsusua na wo wu. Njôô bôte David a mbe a kôme’e yem abim avé Yéhôva a yem môt ase ya be bia. (Lañe’e Besam 139:1-4.) E yeme na Yéhôva a yeme wo édo’o ñyeman a bo na ô wô’ôtan aya?

14. Éyoñ wo simesan abim avé Yéhôva a yeme wo, nalé a yiane bo na ô wô’ôtan aya?

¹⁴ Bi nji yiane ko woñ amu Yéhôva a yeme bia édo’o ñyeman. Amu jé? Te vuane na Yéhôva a wô’ô bia benya mintaé. Môt ase ya be bia a ne édima mise mé. A kôme yeme bone be mam bese ya ényiñe jangan ba bo na bi bo avale môte bi ne den. Nga jam ete da bôé wo nleme si? Te ve’ele buni na ô ne étam môs éziñ! Yéhôva a tele wo bebé nnutan ôse ya ényiñe jôé, a jeñe’e ve fane ya volô wo.​—2 Mka. 16:9.

15. Aval avé ndi nleme ya ñwômane miñwuan ja ngôné fe’e Yéhôva?

¹⁵ Satan a belan awu asu na a bo na bôte be ko woñ. Ba be ne éjôé jé si be wô’ô bo be si’ili bôte na ba ye wôé be nge be bo teke koñe bemvôé bap, nge ke kat a mbunane wop. Ve bi bi nji ko awu woñ. To’o besiñe bangan ba wôé bia, bia yeme na Yéhôva a ye wômôlô bia. (Nli. 2:10) Bia yeme na be se ngule ya bo na bi lume Yéhôva mvus. (Bero. 8:35-39) Yéhôva a ne fo’o fek amu a nga ve bia  ndi nleme ya ñwômane miñwuan! Ndi nlem éte ja te’e Satan, a ja ve bebo bisaé be Yéhôva ngule nyul.

16. Minsili mivé wo yiane sili womien, a aval avé biyalane ya minsili mite bi ne volô wo na ô yeme nge ô too Yéhôva mebun?

¹⁶ Nge besiñe be Yéhôva ba jô fo’o éyoñe ji na ba wôé wo, ye wo ye tabe ndi na Yéhôva a ye beta wômôlô wo? Jé é ne volô wo na ô yalane nsili ôte? Sili’i womiene na: ‘Ye bone mintyi’ane ma nyoñe môs ane môs mia liti na me too Yéhôva benya mebunu?’ (Luc 16:10) Ô ne fe sili womiene nsili wu: ‘Ye fatan ényiñe jam ja liti na me too ndi na Yéhôva a ye jalé miñyiane miam mise nge ma telé Éjôé jé ôsu ényiñe jam?’ (Mt. 6:31-33) Nge nne wo bo nalé, wônaa ô too fo’o ndi a Yéhôva, a na ô nto nkômesane ya dañe meve’ele ma yange wo ôsu.​—Min. 3:5, 6.

17. (a) Aval avé ñwômane miñwuan wo ngôné ôjibi Yéhôva? (b) Aval avé bi ne liti na bia nye’e fulu ôjibi Yéhôva?

¹⁷ Yéhôva a teléya ngume môs a ye zu jiane mbia émo nyi. (Mt. 24:36) Akusa bo a vebe ze ya wômôlô bewu, fulu ôjibi Yéhôva ja volô nye na a ke ôsu a yange. (Job 14:14, 15) A ye ke ôsu a yange nalé akekui awolo ya wômôlô bewu da ye kpwaan. (Jean 5:28) Bia yiane kôme ve Yéhôva akiba amu a ne ôjibi. Nga wo yene na ôjibi Yéhôva wo ve womien a abui bôt afe éyoñe ya “kôñelane minlem”? (2 P. 3:9) Yéhôva a yi na abui bôt e bi fane ya nyiñe nnôm éto. Ajô te bia yiane kôme belan éyoñe Yéhôva a ngenan a va’a bia ji. Aval avé bi ne bo de? Bia yiane jeñ a ngul ése na bi volô bôte be bili mbamba été nsisime na be nye’e Yéhôva a bo nye ésaé. (Mam. 13:48) Nalé a ye bo na be’efe be yene mfi ya fulu ôjibi Yéhôva ane bia.

18. Amu jé bia yiane jibi bôte bevok?

¹⁸ Yéhôva a ye yange akekui toyini mimbu ja ye man asu na bôte be bo zôsôô ne tiññ. E zañe va, Yéhôva a jamé bikobe biangan. Ajô te, bia fe bia yiane bo ntindane ya fombô ve mbamba mefulu me bôte bevok, a jibi be. Tame yene jam e nga kui sita éziñ. Nnôm a nga taté na a kone nlem éyoñ ése, ane a nga telé ntabane bisulan. A jô na: “Jam ete e  nga ndeñele ma angôndô. Mam mese bi nga mane tak me nga ke abo si.” Ve sita wongan a nga ke ôsu a jibi nnôm. A nji sulu mo si amu a nga kee Yéhôva nju’u wé. A nga beme mise ve mbamba mefulu me nnôme wé, a liti’ a mboan ôte na a vu Yéhôva. A jô na: “Nnôme wom a bili angôndô ya abeñe mefulu, a bibane fe ôte’ete’ ôte’ete’e na a beta bo mvo’é.” Nga mi lôô na e ne nya mfii na bi jibi bibu’a ya menda me bôte mangan, a bobejañe ya akônda ba jeñe na be dañe minju’u mia kui be ényiñ?

19. Ntyi’an ôvé bia bese bia yiane nyoñ?

¹⁹ Yésus a beéngele be nga vak éyoñe si é nga téban. Tame ñhe ve’ele simesan abime mvaé ba ye wôk éyoñe si ja ye jaé a bezôsôô be bôt ba nye’e Yéhôva a kañe nye. Simesa’ane fe mvaé bôte ba ye jôé a Yésus ba ye wôk éyoñe ba ye yen aval avé ésaé jap ja volô bôte ya si. (Nli. 4:4, 9-11; 5:9, 10) Tame ke simesan môse Zambe a ye kôme fimi bia mili’i mis, teke fe beta wô’ô na môt a kon, nge wô’ô ôlun, nge ke wô’ô wô’ô na awu é ne vôme si vôme ka. (Nli. 21:4) Nté bia yange mam mete, enjeñané na bi vu Ésaa wongan a ne nye’an, fek, a ôjibi. Nge bi bo de, bia ye ba’ale ava’a dangan, to’o bi tele été évé. (Jc. 1:2-4) Nga bia yiane kôme ve Yéhôva akiba amu a ka’ale bia na “bôte ba ye wômô mesoñ”?​—Mam. 24:15.