1. Beta mvome mbé bi bili?

BI BILI beta mvome ya bo bibu’a ya akônda Yéhôva. Bia nyiñe paradis ya nsisim, vôme bia bu’ubane mvo’é a mevak. Nde, wô wo simesane na ô ne mfi ôvé akônda?

2. Éve’an évé Paul a belane je bekalate béziñ a nga tili?

² Éve’an éziñ Paul a nga nyoñ bekalate a nga tili é ne volô bia na bi kôme la’ase ajô ya ésaé môt ase ya be bia a bo akônda. Bekalate bé bete, Paul a ve’e akônda a nyule môt. A jô na môt ase ya akônda a ne ane ébu’a jia ya nyul.​—Bero. 12:4-8; 1 Bec. 12:12-27; Beép. 4:16.

3. Mam melal mevé bia zu yen ayé’é di?

³ Ayé’é di, bia zu yene mam mela éve’ane Paul éte é ne ye’ele bia. Bia zu taté yene na, môt ase ya be bia a bili ngum asu ésaé * akônda Yéhôva été. Éyoñ éte nje bia zu fe yene jam bi ne bo nge bia kate kui na bi yen éto jangan akônda été. Wônaa, bia ye su’ulane yen amu jé bia yiane bo ésaé Yéhôva a ve bia akônda a ngule jangan ése.

4. Jé kalate Beromain 12:4, 5 a ye’ele bia?

⁴ Jam ôsu éve’ane Paul ja ye’ele bia é ne na, bia bese bi ne nya mfii nda bôte Yéhôva. Paul a taté a jô’ô na: “Amu na, aval ane bi bili bibu’a abui nyôle jia été, a bibu’a bise bi nji bi aval ésaé da: nalé ate fe bia, bi ne abui, bi ne nyôle jia be Krist, a nyô ase ya été a ne ébu’a ya ba bevok.” (Bero. 12:4, 5) Jé Paul a kômbô jô? A kômbô jô na, akusa fo’o bo na bisaé bia selan akônda, ésaé môt ase ya be bia a bo é ne mfi.

5. Mimveane mivé Yéhôva a nga dasé akônda?

⁵ Éyoñ ba kobô ajô asu ésaé bôt be bili akônda été, bi ne taté ji’a tyô’ô ve bobejañ ba wulu bia. (1 Bet. 5:12; Beh. 13:17) E ne fo’o été na Yéhôva, a zene ya Mone wé, a nga ve bia mimvean miziñ akônda. (Beép. 4:8) Mimvean mite mi ne bo bibu’a ya Tin ékôan, bevolô ya Tin ékôan, bobejañ ba wulu ésaé ya Béthel, bejome mekônda, beye’ele ya besikôlô ya Éjôé, bemvendé ya mekônda, a bediakon. A zene ya mbamba nsisim, Yéhôva a nga telé bôt bete na be nyoñ ngap a bone mintômba mié, a na be saane mie.​—1 P. 5:2, 3.

6. Bela’ane 1 Bethessalonicien 2:6-8 asu na ô liti aval avé bobejañ ba tebele bia ba bo ésaé jap.

⁶ Yéhôva a nga telé bobejañ bete asu na be bo bisaé meval meva. Fo’o ve aval ane ésaé mo a mebo bia bo é ne mfi asu nyul ése, aval ete fe bobejañ bete ba saé a ngul ése asu mfi ya akônda ese. Be nji jeñe na be wumulu bebien a zen éziñ. Ve ba bibane na be ve bobejañ a besita ya akônda ngule nyul. (Lañe’e 1 Bethessalonicien 2:6-8) Bia ve Yéhôva akéva amu a nga bo bia aval édima das ete! Bôt a nga telé na be wulu bia be ne bitôtôlô Bekristen, a ba telé miñyiane miangan ôsu, émiap ke mvus.

7. Bibotan bivé bekpwa’a mefane ya éyoñ ése a bobejañ ba saé ngum aval be bili?

⁷ Bobejañe béziñe ya akônda be ne bemissionnaire, bekpwa’a mefan be ne ngum aval, nge ke bekpwa’a mefane ya éyoñ ése. Nya ajôô a ne na, si se meku’u menyin, abui bobejañ é nga tyi’i na da belan éyoñ jap ése asu ésaé nkañete. A zen éte, be nga volô abui bôte na e bo beyé’é be Yésus. To’o be nji fo’o bi abui akum, ébotane Yéhôva ja bo na be kôme bu’uban meva’ ényiñ. (Marc 10:29, 30) Bia nye’e bobejañe bete angôndô, a bia ve Yéhôva akéva amu a bo na bi bi avale Bekristen ete mekônda mangan.

8. Amu jé bia jô na nkañete mbamba foé ase a ne édima mise me Yéhôva?

⁸ Nde ye bi ne ñhe jô na bobejañ ba tebele bia, bekpwa’a mefane ya éyoñ ése, a bobejañ ba bo ésaé ngum aval, mbe étam be ne mfi akônda Yéhôva nga? Momo! Nkañete mbamba foé ase a ne mfi asu Yéhôva a asu akônda. (Bero. 10:15; 1 Bec. 3:6-9) Amu jé bia jô nalé? Amu ésaé ja dañe mfi akônda é ne na bi bo bôte beyé’é. (Mt. 28:19, 20; 1 Tim. 2:4) Ésaé éte ki é ne ji bekañete mbamba foé bese ba jeñe na be telé ôsu ényiñe jap, to’o be dubaneya nge momo.​—Mt. 24:14.

9. Amu jé bia nyane besita ya mekônda mangan?

 ⁹ Yéhôva a liti besita beta ésemé amu a ve be angôndô ya mbamba ésaé akônda. A bidiñe besita, Yéhôva a nye’e mia bese angôndô: beyal, benyia, minkus, teke ke vuane minkoé, amu mia ke ôsu a wulu a nye ba’aba’a. Kalate Zambe a kobô ajô abui biwôlô bi binga bi nga yené mvaé mise me Yéhôva. Yéhôva a se’e be amu be nga liti na be ne fek, ayôñe nsisim, ayo’o nlem, akap, amu be nga bili ngule mbunan, a amu abui ésaé be nga bo. (Luc 8:2, 3; Mam. 16:14, 15; Bero. 16:3, 6; Beph. 4:3; Beh. 11:11, 31, 35) Nga bia yiane kôme ve Yéhôva akéva amu bi bili avale besita ete mekônda mangan?

10. Amu jé bia nye’e benya bôtô ya mekônda mangan?

¹⁰ Bi ne fe mevak amu bi bili bidima benya bôtô mekônda mangan. Minnôm mi bobejañ a besita béziñe be nga lôt ényiñe jap ése be bo’o Yéhôva ésaé. Ba bevo’o ki be ndeme ke ba yeme benya mejôô. Ve benya bôtô bete bese ba tôbane minju’u ya ôkala, éko éziñ bevo’o ya été be ne ne mintutuñ. Jam ete da bo na be kate kui nkañete nge ke bo Yéhôva ésaé akônda avale ba yi. Ve to’o nalé, ba ke ôsu a bo abim ese be ne ngule ya bo ésaé nkañete, a ba bibane fe na be ve bobejañ ngule nyul a yañele be. Nga bobejañ bete ba volô bia nya abuii? Teke vaa nge beté, be ne tene abeñ mise me Yéhôva, a mise mañ!​—Min. 16:31.

11-12. Aval avé bisoé ya akônda dôé bia ve wo ngule nyul?

¹¹ Bisoé biangane ki? Bia tôban abui minju’u amu bia yaé mbia émo Satan; bia kôme ke yeme mbia miñye’elan émo ja ngôné. (1 Jean 5:19) Ve bia bi ngule nyul éyoñ ése bia wô’ô ane bone be bone bangan ba yalane minsili bisulan, a éyoñ bia yen ane ba kamane mbunane wop nkañete a ayôñ ese.  Ôwé, a bisoé, mi ne nya mfii akônda Yéhôva!​—Bs. 8:2.

¹² Ve da viane bo é kui na bobejañ a besita béziñ be yene bebiene zezé. Jé é ne volô be na be sôan ôsimesane wop? Bi tame zu yene jam ete.

13-14. Jé é ne bo na bôte béziñ be simesane na be ne zezé akônda?

¹³ Bi tame zu yene jame baa éve’ane Paul ja ye’ele bia. Paul a kobô ajô jam da ndeñele abui bôte den: bobejañ béziñ ya akônda ba kôme buni na be nji volô jôm. Nde Paul a jô na: “Nge abo e nga ye jô na: ‘Amu me nji bo akule wo, me nji bo ébu’a ya nyôl,’ ye e nga ye bo te bo jôme ya nyôl amu nalé? Nge alo e nga ye jô na: ‘Amu me nji bo dis, me nji bo ébu’a ya nyôl,’ ye e nga ye bo te bo jôme ya nyôl amu nalé?” (1 Bec. 12:15, 16, Mfefé Nkôñelan) Jé Paul a kômbô ye’ele bia bifuse bite?

¹⁴ Nge wo ve’e ésaé jôé a ji bôte befe akônda, ô ne viane buni na wo ô boya fo’o momo. Bobejañ béziñ be ne atyeñ beye’ele, bevok be yeme’e ta’a mam, ba bevo’o ki be too avale bemvendé da yeme ve bôte ngule nyul. Éko éziñ wo simesane na ô vo’o bo atyeñ ane be. Nalé a liti fo’o na ô ne éjote nyul a na wo yeme minné miôé. (Beph. 2:3) Ve tabe’e ntyel. Nge ô ne kom ése ve ve’e womien a bobejañ ba bo mbamba ésaé akônda, wo ye su’ulane bili atek. Jam ete e ne bo bo na ô buni na ô nji volô jôm éziñ. Aval avé ô ne sôan ôsimesan ôte?

15. Avale 1 Becorinthien 12:4-11 a jô, jé bia yiane yem a lat a mimveane Yéhôva a nga bo bia?

¹⁵ Yéhôva a nga ve fo’o Bekristene ya ntete mimbu ôsu mimveane miziñe ya nsisim, ve bese be nji be be bili avale mimveane da. (Lañe’e 1 Becorinthien 12:4-11.) To’o mimveane miap mi mbe mi sela’an, Kristen ése é mbe  mfi mise me Yéhôva. Den Yéhôva a beta ki fe bia bo avale mimvean ete. Ve to’o nalé, azukui den, bôt bese be bili ki ngule ya bo mam avale da, ve Yéhôva a yene bia bese mfi.

16. Melebe me Paul mevé bia yiane tôñ?

¹⁶ A lôte na bi ve’e ésaé bia bo a ji Bekristene bevok, bia yiane jibi tôñe melebe me Paul ma: “Môt ase a fombô’ô mboane wé émien, wônaa a ye bi ava’a dé da so ve be émien, te so be môt mfe.”​—Begalate 6:4.

17. Mfi ôvé bia ye bi nge bia tôñe melebe me Paul?

¹⁷ Nge bia tôñe melebe me Paul a tu’a fombô mam bia kui na bi bo, bia ye yene na bi nji yiane kômbô bôte bevok, amu bia fe bi bili mam bi ne ye’ele be. Éve’an é ne na, mvendé éziñ é ne kate kôme bo minkañete pôspôden, ve da é too akap ésaé nkañete. A ne fe bo na a nji yeme ta’a mam ane bemvendé befe, ve bekañete mbamba foé bese ba nye’e nye amu a ne mbamba nlem a amu be ne nye sili melebe tyi’ibi. Nge ke na, a ne anyep angôndô. (Beh. 13:2, 16) Éyoñ bia tu’a yemelane mam bia kui na bi bo, nalé a ye bo na bi vak amu bia yene na ésaé jangan fe ja volô akônda. Nalé a ye fe bo na bi sa’ale mbia fulu ya kômbô bôt ba bo mam ma kate bia.

18. Jé é ne volô bia na bi bo mintyetyeñe beye’ele?

¹⁸ Môt ase ya be bia a yiane ke ôsu a jeñe na a tu’a bo atyeñ ésaé nkañete a bisaé bivo’o bi ne mfi asu akônda. Yéhôva a volô bia mfa’a ôte amu a nga bo ngume nta’ane mam mfa’a ya yañele bia a zene ya ékôane jé. Éve’an é ne na, bisulane ya zañe sondô, bia bi melebe me ne volô bia na bi tu’a bo atyeñ ésaé nkañete. Ye wo kôme fo’o tôñe melebe bia nyoñe bisulane bite nga?

19. Jé é ne volô wo na ô tôé nsôñane ya tabe Sikolô bekañete mbamba foé ya Éjôé?

¹⁹ Bi bili fe Sikôlô bekañete mbamba foé ya Éjôé. Za a ne tabe sikôlô ate? Bekpwa’a mefane ya éyoñ ése a Bekristen ba saé ngum aval be ne zañe mimbu 23 a 65. Ô ne buni na sikôlô ate a nji bo asu dôé. Ve a lôte na ô simesane mam mese me ne kamane wo na ô tabe sikôlô ate, sili’i womiene na: ‘Amu jé ma kômbô tabe sikôlô ate?’ Mvuse ya valé, fase’e mam wo yiane bo asu na ô bo ngule ya tabe sikôlô ate. Nge womien wo taté ve ngul, Yéhôva fe a ye botane wo, a wo ye yene na jam ete e nji be di e vo’o boban aval ô mbe ô taté’é buni.

20. Jé kalate Beromain 12:6-8 a ye’ele bia?

²⁰ Kalate Beromain 12:6-8 a liti bia jame lale éve’ane Paul é ne ye’ele bia. (Lañek.) Paul a beta liti na bôte be bili mimveane mevale meval akônda. Ve bifuse bi, a ngôné mfi ya yeme belan mimveane miangan mfa’a ye ve bobejañe ya akônda ngule nyul.

21-22. Jé éve’ela Robert ba Felice é ne ye’ele bia?

²¹ Tame yene jam e nga kui mojañ éziñ, bia zu loene nye na Robert. Éyoñ a jaéya bo ésaé si fe, be nga su’ulane bañete nye na a zu saé Béthel ya nlame wé. Akusa bo bobejañ be nga kôme kate nye na a nji bo jam e ne abé, Robert a jô na: “Me nga bo bengon me wô’ô ôlun amu me mbe me buni’i na  me nga dimine bo ésaé jam. Mimôs miziñ me mbe me jô’ô jô’ô na, ma zu jiba kôlô Béthel.” Jé é nga volô nye na a beta bi mevak ésaé Yéhôva? Mvendé éziñ é nga jô nye na, éyoñ ése Yéhôva a ve bia mbe’e éziñ, a yañele fe bia a zen éte ébien asu na bi bo ngule ya be’e mimbe’e mife. Ane Robert a nga yeme na a yiane vuan nnôma ésaé wé, a na a yiane bem ôsimesane wé mfefé mbe’e Yéhôva a ve nye.

²² Mojañ Felice Episcopo fe a nga tebe aval été éte. Ba minga wé be nga kui Sikôlô ya Galaad mbu 1956, ane be nga lôme be Bolivie. Ve mbu 1964, ngal a nga be’e abum, ane be nga biaé monafam. Felice a jô na: “E nji be tyi’ibi na bi telé ésaé amu bi mbe bi nye’e je angôndô. Me nga bo jôm ane mbu wua me va’a mamien bijô. Ve Yéhôva a nga volô ma na me sôan ôsimesane wom, a na me kañese na éyoñe ji me nto ésaa.” Ye wo fe ô tebeya été Robert ba Felice môs éziñ? Ye wo bili atek amu ô ndeme jañele mbe’e éziñ ô mbe ô nye’e? Jé é ne volô wo na ô ba’ale ava’a dôé? Beme’e ôsimesane wôé ve mam ô ne bo den mfa’a ya saane Yéhôva a bobenyoñ. Yeme’e belan éyoñe jôé, volô’ô bôte bevok, a wo ye bi abui mevak.

23. Jé bia yiane nyoñ éyoñe ya bo, a jé bia ye yen ayé’é da zu?

²³ Môt ase ya be bia a ne édima mise me Yéhôva. Zambe wongan a yi na bi bo bibu’a ya nda bôte jé. Nge bia kôme nyoñ éyoñe ya fase mam bi ne bo asu na bi volô bobejañ, a jeñ a ngul ése na bi bo mam mete, teke jôm éziñe ja ye bo na bi buni na bi ne zezé. Ve bôte bevo’o ki, bia yiane be yen aya? Aval avé bi ne liti na bia nye’e be a semé be? Bia ye yene de ayé’é da zu.