1. Jé bia bese bia yi asu bivuvumane biangan?

PAULINE * a jô na: “Nté ane me nga yé’é benya mejôô, ma yi jôme jia ve na bia nda bôte jam ése bi kañe Yéhôva asu na bi nyiñe Paradis nsamba. E dañe dañe nnôme wome Jean-Claude, a mone ndômane wongan.” Ye bivuvumane biôé biziñ bi nji bo Bengaa be Yéhôva? Nge é ne nalé, yeme na wo kôme wô’ô été sita Pauline.

2. Bia zu bi biyalane ya minsili mivé ayé’é di?

² Bi vo’o bi bivuvumane biangan a ngule na bi mba’a mba’a ve kañese benya mejôô, ve bi ne volô bie na bi tu’a fas été jap, a vô’ôlô mbamba foé a ne Bible été. (2 Tim. 3:14, 15) Amu jé bia yiane kañete bie? Amu jé da sili na bi tebe été jap? Aval avé bi ne volô bie na bi nye’e Yéhôva ane bia? A aval avé bobejañe ya akônda dangan be ne volô bia?

3. Kalate 2 Pierre 3:9 a liti na bia yiane kañete bivuvumane biangan amu jé?

³ Yéhôva a mbeme zu tyame mbia émo nyi. Fo’o ve bôte be bili mbamba été nsisim mbe étam ba ye nyiñ. (Mam. 13:48) Bia lôt abui éyoñ na bia kañete bôte ya nseñ, da yiane ñhe fe na bi volô bivuvumane biangan na bi bo bebo bisaé be Yéhôva ane bia. Yéhôva, Ésaa  wongane ya nye’an ‘a nji kômbô na môt éziñ a jañ, ve a yi na bôte bese be kôñelane minlem.’​—Lañe’e 2 Pierre 3:9.

4. Ékob évé môt a ne bo éyoñ a kañete bivuvumane bié?

⁴ Bia yiane tu’a yeme na fatane nkañete éziñ é ne bo mvo’é nyi fo’ ki abé. Éyoñ bia kañete bôte ya nseñ, bi wô’ô yeme tobe mbamba bifia, ve da viane bo é kui na, éyoñe bia kañete bôte ya nda été, bi nga bôé be bekpwam.

5. Jé bi nji yiane vuan éyoñ bia kañete bivuvumane biangan?

⁵ Éyoñ abui ya be bia da simesan aval e nga kañete bivuvumane biab éyoñ ôsu, e wô’ô jôban e jô’ô na: ‘Nge me nga yem, ve me nga bo aval afe.’ Nlômane Paul ô nga lebe Bekristene na: “Nkobô wônan ô bo’o mvaé biyoñ bise, mveane nku, nde mia ye yem ane mia ye yalane môt ase.” (Beco. 4:5, 6) Bia yiane tôñe melebe mete éyoñ bia laan a bibu’a ya nda bôte jangan. Nge sa nalé, bi ne balé bie, a too ke na bia yiane volô bie na bi vô’ôlô bia.

6-7. Éve’an évé ja liti na bia yiane tebe été bivuvumane biangan bi nji bo Bengaa be Yéhôva?

⁶ Tebe’e été jap. Pauline bia te jôô nye yôp a jô na: “Ôsusua, me nji be me laane nnôme wom minlañ mife ve ajô Zambe.” Mam mete me mbe Jean-Claude melo ane mvu ja wô’ô mvet, amu a nji be a yeme’e mfañe jame Bible. A mbe a yene’e na ngal a bili ki ajô afe anyu, ve ajô Bengaa di. A nga viane ko ko woñe na Pauline a kiya nyiine jama ñyebe.

 ⁷ Pauline émien a meme na a mbe a dañe lôt éyoñe ve nkañete a bisulan, nge ke a vôma’an a bobejañe ya akônda. A kate na “Jean-Claude a mbe a za’a koone nda ékôkoé, a ntoo valé étam étam ane nyu a nji bi môt.” Minga wé ba mon be mbe be jemba’ane nye angôndô. A nji be a yeme’e bôte ngal a yeñ a be, a yene’e ve ane a nye’e mimfefé bemvôé bé a dañe nye. Ane a nga wô’ô émien éngôngo a tyi’i na a zu jibi tyam alu’u dé. Mia simesane na Pauline a mbe ngule ya bo jé asu na a tebe été nnôm?

8. Kalate 1 Pierre 3:1, 2 a liti na jé ja dañe nambe bivuvumane biangan?

⁸ Jeñe na ô bi mbamba ntaban. Mam bia bo mme me wô’ô dañe nambe bivuvumane biangan, sa ke mam bia jô. (Lañe’e 1 Pierre 3:1, 2.) Pauline a nga su’ulane wô’ô de. A jô na: “Me mbe me yeme’e na Jean-Claude a nye’e bia a na a nji kômbô tyam aluk. Ve éyoñ me nga wô’ô a kobô’ô ajô ntyaman aluk, me nga yemelane na ma yiane jeñe na me bo mam avale Yéhôva a yi. Me mbe me kobô’ô abui zezé, jam é mbe é sili’i é mbe na me bi mbamba ntaban.” Pauline ve tame taté jô’é Jean-Claude ajô Bible, a nga jibi bo a laane nye zezé minlañ. Jean-Claude ve teme na ngal a nga tu’a jeñe mvo’é, a na mone ndômane wop a ntoo mewôk. (Min. 31:18, 27, 28) Éyoñ Jean-Claude a nga yene mbamba ésaé Mejô me Zambe ma bo nda bôte jé, émiene ve taté na a fas avale nye fe a ne tôñe me ényiñe jé.​—1 Bec. 7:12-14, 16.

9. Amu jé bia ke ôsu a jeñe mezene ya volô bivuvumane biangan?

 ⁹ Kele’e ôsu a jeñe mezene ya volô bivuvumane biôé. Yéhôva émien a liti bia mbamba éve’ela mfa’a ôte. “Môs ôse” a ve bôte fane ya wô’ô benya mejôô a bi ényiñe ya melu mese. (Jr 7:25) Paul fe a nga lebe Timothée na a ke ôsu a volô bôte bevok. Amu jé? Amu mbamba zene ya nyii émien a ba ba wô’ô nye le. (1 Tim. 4:16) Bia nye’e bivuvumane biangan, a bia yi na bi yeme benya mejôô ya Kalate Zambe. Ntabane Pauline ô nga su’ulane bo mfi asu nda bôte jé. Den, nnôme fe a nga kañe Yéhôva. Bebaane be ne bekpwa’a mefan, a Jean-Claude a ne fe mvendé. Sa ke jame ya va’a de le nga?

10. Amu jé bia yiane bo ôjibi?

¹⁰ Bo’o ôjibi. Éyoñ bia tyi’i na bia bo nkômbane Yéhôva, bôte bangan be ne yene bia aval étam. Be wô’ô taté vembe na bi nji beta bi ajô a mebô’ô ya ba miñyebe, nge a mam me pôlitik. Bevo’o be ne taté taté na ba wô’ô bia ôlun. (Mt. 10:35, 36) Ve te bia buni na be vo’o tyendé. Nge bia sase mo a tyi’i na bia beta ki fe kobô be ajô ya mbunane wongan, a ne ve ane bia jô na ba yian awu. Yéhôva a nji ve bia ngule ya tyi’i môt éziñ ajô, Yésus étam nnye A nga ve mbe’e ôte. (Jean 5:22) Nge bi bo ôjibi, bi ne ve bivuvumane biangan fane ya vô’ôlô foé bia kañete.​—Fombô’ô nka’ale ô ne nlô ajô na “ Bela’an anjeñ mefoé dangan asu na ô ye’ele be.”

11-13. Nkañete Alice ba bebiaé bé wo ye’ele wo jé?

¹¹ Te nyeñeban, ve bela’ane mbamba bifia. (Min. 15:2) Tame yene jam e nga kui Alice. A nga yem Mejô me Zambe si fe, bebiaé bé be mbe bôte be pôlitik, be teke ki buni Zambe. A nga yene na a yiane ji’a kate be mbamba be mam a yé’é Bible. A jô na: “Nge ô teke ji’a bo de, jam ete e ne tu’a ndeñele nda bôte jôé.” A nga tili bebiaé bé bekalate, a liti’i be asimesane ya Bible a lat a mam méziñ ba dañe nye’e, ane fulu nye’an. (1 Bec. 13:1-13) A nga ve fe be akiba amu be nga yeme yale nye, a nyoñe ngab a nye; a mbe fe a lôme’e be metôm. Éyoñ a mbe a kele’e jome be, a mbe a va’a ngul ése na a volô nyia bisaé ya nda. Ve akusa bo nalé, bebiaé bé be nji wô’ô mvaé éyoñ a nga kobô be ajô ya mbunane wé.

¹² Éyoñ ése a mbe a kele’e yene be, a mbe a va’a ngule ya lañe Bible môs ôse. A jô na: “Nalé a nga volô na nyia wom a tu’a wô’ô na Bible a ne nya mfii ényiñe jam.” Nde ésaa a nga jô na nye fe a tame zu yene yene jôme ja bo na ngo jé é nye’e Bible abime di, a mbe a yi na a yene ve mon évuse Kalate Zambe été. Alice a jô na: “Me nga ve nye Bible, me tili fe nye mone kalate, me some nye Bible été.” Nde a nga bo aya? Ésaa a nji yen atañ évuse Kalate Zambe été, ve mam a nga lañe Bible me nga nambe nye nlem angôndô.

¹³ Éyoñ bia tôban étibela’a, bi nji yiane nyeñeban, ve bia yiane belane mbamba minkobô. (1 Bec. 4:12b) Nyia Alice a nga tibili nye. Alice a jô na: “Môse me nga duban, Mema a nga jô me na me ne mbia nlô.” Alice a nga bo aya? A jô na: “Me nji ko woñe ya kobô nye ajô mbunane wom, me nga kate nye a ésemé ése na ma te tyi’i na ma bo Ngaa Yéhôva, a jôm éziñ é vo’o bo na  me tyendé ntyi’an ôte. Me nga bo na a tu’a yem abim avé ma nye’e nye. Bia nye ve bôé ñyôn, ane me nga yame nye mbamba mone jôme ya di. Ataté môs ôte, nyia wom a nga yemelane na Mejô me Zambe ma volô ma na me tu’a bo mbamba môt.”

14. Amu jé bi nji yiane feñelan éyoñ bia kômbô bo jam éziñ asu Yéhôva?

¹⁴ Abui éyoñ é ne taté lôt ôsusua na bivuvumane biangan bi tu’a wô’ô ntyi’ane wongane ya bo Yéhôva ésaé. Éyoñ Alice a nga tyi’i na a bo nkpwa’a mefan, nyia ve beta bôé ñyôn, amu ba ésaa be mbe be yii na ngo jap é kee sikôlô ôsu a bi mfañ asu ésaé. Ve Alice a nga tebe ne bip. A jô na: “Nge ô ve’ele feñelan, nda bôte jôé jé ke ôsu a tindi wo na ô bo teke bo mam avale Yéhôva a yi. Ve nge wo kôme kate be amu jé wo nyoñe ntyi’ane si ntyi’ane ka, bôte béziñ be ne wô’ô wo.” Alice a bele, amu den, ésaa ba nyia be ne bekpwa’a mefan, ésaa a ne ne fe mvendé ya akônda.

15. Kalate Matthieu 5:14-16 a 1 Pierre 2:12, a liti na “mba be mam” be ne volô bivuvumane biangan aval avé?

¹⁵ Yéhôva a dutu bôte be nye a zene ya “mba be mam” ma boban akônda Bekristen. (Lañe’e Matthieu 5:14-16; 1 Pierre 2:12.) Nge môte mia nye mi ne nlu’an a nji bo Ngaa Yéhôva, ye ô boya fo’o na a yene bobejañe béziñe ya akônda? Nne Pauline a nga bo nalé, a nga taté na a bañete bobejañ a besita nda jé asu na nnôm a yeme be. Jean-Claude a  jô na, mojañ éziñ a nga volô nye na a yemelane na Bengaa be Yéhôva be nji bo bitua bi bôt. Mojañ ate a nga bo aya? Jean-Claude a jô na: “A nga nyoñe mewo’an na a zu yen ébuma a ma. Nde me nga jô mamiene na: ‘Nde Bengaa ba bo bo fe mam mefe!’”

16. Amu jé bia yiane bañete bivuvumane biangane bisulan?

¹⁶ Bi ne fe volô bivuvumane biangan éyoñ bia bañete bie bisulan. (1 Bec. 14:24, 25) Jean-Claude a nga tabe ésulan éyoñ ôsu Mesimesa’ane ya awu Yésus, a nga kañese tabe ésulan éte amu é mbe é boba’an éyoñ a bulaneya ésaé, é too fe étun. “Me nji wô’ô mfañe jôm môs ôte, ve me vo’o vuan avale bôte be nga nyoñe ma. Be nga subu ma bebé a tame ma mbamba nsoan, a batane ma a ayôñ ése. Me nga yene na be ne mbamba be bôt.” Mojañ éziñ ba ngal be mbe fe be nyoñe’e ngab a Pauline angôndô, be volô’ô ba mon ésaé nkañete a bisulan. Ajô te, éyoñ Jean-claude a nga tyi’i na nye’e fe a zu yé’é Bible, a nga sili mojañ ate nge a ne wulu ayé’é dé.

17. Jam avé é nji yiane bo na bi ve biabebiene bijô, ve amu jé bi nji yiane sili mo si?

¹⁷ Bia yi fo’o na bivuvumane biangan bi zu kañe Yéhôva a bia. Ve bi ne ve ngule jangan ése asu na bi volô bie na bi nyiine benya mejôô, jam ete teke be jô jôm. Nge da kui nalé, te ve womiene bijô. To’o bia bo aya, bi nji bo ngule ya yemete môt na a nyiine benya mejôô. Éyoñe bivuvumane biôé bia ye yen ane ényiñe jôé é ne mevak amu wo kañe Yéhôva, jam ete da ye nambe be abui. Ye’elane fe Yéhôva asu dap. Bela’ane mbamba bifia éyoñe wo laan a be. To’o wo yen aya, te sili mo si! (Mam. 20:20). Tabe’e ndi na Yéhôva a ye botane ngule wo ve. Nge bivuvumane biôé bi vô’ôlô wo, bia ye nyiñ.