1. Beza Yéhôva a nga belane be na be bôndé akônda ya Philippes?

ÉYOÑ Paul, Silas, Luc a Timothée be nga kui tisone ya Philippes, be nga koone na abui bôte da kômbô vô’ôlô Mejô me Zambe. Ane Yéhôva a nga volô be na be bôndé akônda wôé, mimfefé beyé’é ve taté na ba sulane vôme wua asu bisulan, éko éziñe be mbe be bo’o bisulane bite nda Lydie.​—Mam. 16:40.

2. Meve’ele mevé mfefé akônda ôte ô nga tôbane me?

² Ve mon akônda ate a nga taté na a tôban abui minjuk. Satan a nga tindi besiñe be Yéhôva na be wosan ésaé nkañete Paul a bobejañe bevok be mbe be bo’ok. Be nga bi Paul ba Silas a yite be a minkasa, a su’ulane wua be mimbôk. Ve nné ane be nga kuli be, be nga ji’a ke jome mimfefé Bekristen a ve be ngule nyul. Mvuse ya valé, Paul, Silas, a Timothée be nga ke vôme mfe, éko éziñe Luc nye a nga li’i Philippes. Nsili ô ne ñhe na, mimfefé Bekristene mi mia zu bo aya éyoñe ji? Yéhôva a nga volô be a zene ya mbamba nsisime wé na be ke ôsu a kañe nye a ayôñ ése. (Beph. 2:12) Bia tu’a wô’ô amu jé Paul a nga se’e be.

3. Kalate Bephilippien 1:9-11 a liti na Paul a mbe a ye’elan asu jé?

³ Mvuse jôm ane mimbu awôm, Paul a nga tili akônda ya Philippes kalate. Éyoñ bia lañe kalate ate, bia kôme yen abim avé Paul a mbe nye’e bobenyañe bé bete. A nga jô be na: “Ma nye’e mia bese, nye’an ô tii be Yésus Krist.” (Beph. 1:8, Mfefé Nkôñelan) A nga  jô fe be na a mbe a ye’elan asu dap. A mbe a ye’elane Yéhôva na a volô be na be bulu nye’esan a na be tu’a yemelane mam ma dañe mfi, na be bo te bijô a na be bo teke kolé bôte bevo’ ôbak, a nga ye’elane fe na be ke ôsu a wume bibuma ya zôsôô. Teke bisô na melebe me Paul mete me ne fe volô bia den. Enyoñané ñhe Bebible bangane kalate Bephilippien. (Lañe’e Bephilippien 1:9-11.) Mvuse ya valé bia zu samese mone jam ase Paul a nga jô, a yen avale bi ne tôñe melebe mete ényiñe jangane ya môs ôse.

4. (a) E kalate 1 Jean 4:9, 10, aval avé Yéhôva a nga liti bia nye’an? (b) Abim avé bia yiane nye’e Yéhôva?

⁴ Yéhôva a nga liti bia beta nye’an éyoñ a nga lôme Mone wé si na a zu wu a butane bia. (Lañe’e 1 Jean 4:9, 10.) Nye’an ôte wo tindi bia na bia fe bi nye’e Yéhôva. (Bero. 5:8) Yésus a nga liti bia abim avé bia yiane nye’e Yéhôva éyoñ a nga yalane mone Pharisien na: “Nyeke’e éso Zambe wôé a nleme wôé ôse, a nsisime wôé ôse, a nlô wôé ôse.” (Mt. 22:36, 37) Bia yiane nye’e Yéhôva a nlem ô ne ngumba. Bia yi fe na nye’an ôte ô yaé môs ane môs. Paul a nga jô Bephilippien na nye’ane woba wo yiane “bulu bo a kô’ôlan.” Aval avé bi ne yemete nye’ane wongan asu Yéhôva?

5. Jé é ne yemete nye’ane wongan?

⁵ Asu na bi tu’a nye’e Zambe, bia yiane kôme yeme nye. Bible a jô na: “Nyô a ne te nye’e, nnye a ne te yeme Zambe; amu Zambe a ne nye’an.” (1 Jean 4:8) Nlômane Paul ô nga jô na nye’ane wongane wo ye yaé nté bia ye ke ôsu a bi “ñyeman a fe’e ése” ja so be Zambe. (Beph. 1:9) Éyoñ bi nga kaa ayé’é Bible, bi nga taté na bia nye’e Yéhôva a too ke na bi mbe bi ngenane te tu’a yeme nye. Ve ane bi nga kee ayé’é ôsu, nye’an ôte ô nga tu’a bo ngul. Jôm ete nje e ne mfi na bi bo mbane ya yé’é Bible, bi bindi’i fe mam bia yé’é.​—Beph. 2:16.

6. Kalate 1 Jean 4:11, 20, 21 a liti na amu jé bia yiane bulu nye’e bobejañ?

⁶ Nye’ane Yéhôva wo yiane tindi bia na bi nye’e bobejañ. (Lañe’e 1 Jean 4:11, 20, 21.) Bi ne simesane na e nji bo ayaé ya liti bobejañe nye’an. Amu jé? Amu bia bo Yéhôva ésaé a bibane na bi bi mefulu mé. Bia tôñe fe éve’ela Yésus a nga li’i bia, nnye ate a nga wu asu dangan. Ve biyoñ biziñ e ne bo ayaé ya tôñ atiñe da jô na bi nye’e bôte bevok. Bi tame beta bulan akônda ya Philippes.

7. Melebe Paul a nga ve Évodie ba Syntiche ma ye’ele bia jé?

⁷ Évodie ba Syntyche be mbe bitôtôlô besita; ba be Paul be “nga bo ésaé” nsamba. Ve be nga bi ajô éziñ, ane be nga taté na ba siñan. Éyoñ Paul a nga tili akônda dabe kalate, a nga kôme tote biyôlé biap a lebe be na “be bo ôsimesane wua.” (Beph. 4:2, 3) Paul a nga yene fe na a yiane ve akônda ése melebe mfa’a ôte, nde a nga kô’ôlane na: “Bo’ane mam mese te menyiñ a bisô.” (Beph. 2:14) Teke bisô na melebe me Paul me nga volô mbamba besita bete na be beta late ngbwa, me nga volô fe bobejañ bese ya akônda na be tu’a yemete élat é mbe zañe jap.

8. Jé é ne bo na bi kate nye’e bobejañ, a aval avé bi ne sa’ale jam ete?

 ⁸ E ne fe kui na bi kate nye’e bobejañe béziñ éko éziñ amu ane Syntiche a Évodie, bia dañe fombô ve bikobe biap. Ve bia bese bia bo bikobe môs ôse. Nge bi dañe bem ôsimesane ve bikobe bi bôte bevok, bia ye kate nye’e be. Bi tame jô na mojañ a te vuane na angôse nkañete dé nde da yiane bo mfuban Aba Éjôé, ye bia yiane wô’ô ôlun? Bi ne fo’o wô’ô ôlun a taté na bia lañe bikobe bise a boya nté ane bia yeme nye. Ve nge bi bo nalé jé ja ye viane kui? Ôlune bia wô’ô nye wé bo abui, nye’ane ki bia yiane nye’e nye ô viane bo tyôtyoé. Nge ô tele aval été éte, te vuane na Yéhôva a yeme bikobe mia bese bebaane, émbiôé a bi bi monyoñ. Ve akusa bo nalé, a nye’e mia nye bese. Nde nga womien ô lôô na wo yiane vu Yéhôva a ke ôsu a fombô ve mbamba mefulu me bobejañ? Éyoñ bia jeñ a ngul ése na bi nye’e bobejañ, élate jangan ja tu’a bo ngul.​—Beph. 2:1, 2.

9. Mam me ne mfi Paul a jôô me me ne mevé?

⁹ Nsisime Yéhôva ô nga tindi nlômane Paul na ô ve Bekristene ya Philippes melebe ma: ‘Yemela’ané mam ma dañe mfi.’ (Beph. 1:10) Mam me ne mfi mete me ne mevé? Me tii a jôé Yéhôva da yiane vebane mfuban, bengaka’a bé ba yiane tôéban, a mvo’é a mbamba élate ya akônda. (Mt. 6:9, 10; Jean 13:35) Éyoñ bia telé mam mete ôsu ényiñe jangan, nalé a liti na bia nye’e Yéhôva.

10. Nge bia yi na Yéhôva a bo te ve bida bijô, jé bia yiane bo?

¹⁰ Paul a nga jô fe na bia yiane tabe ‘te bijô.’ Nalé a nji tinane na bia ye ke bo bikop. Bi vo’o bo teke bijô ane Yéhôva ntet a ntet, amu bi be’e metyi ya abé. Ve éyoñe Yéhôva a yene na bia ve ngul ése na bi nye’e nye a nlem ôse, a na bi yemelane mam ma dañe mfi, mfa’a wé, bi ne te bijô. Zene jia ya liti Yéhôva nye’an é ne na bi bo teke vañe kolé bôte bevo’ ôbak.

11. Amu jé bia yiane jeñ a ngul ése na bi bo te kolé bôte bevo’ ôbak?

¹¹ E kolé bôte bevo’ ôbak a nji bo mone nseme mis me Yéhôva. Aval avé bi ne kolé môt ôbak? Mimvômane miangan, mbote wongan, nge ke asu ésaé bia top, mam mete me ne kolé bôte bevo’o ôbak. Éko éziñ mam mete me nji bo bo abé éyoñ bia tu’a fas, ve nge ma ndeñele mojañ éziñ a kolé nye ôbak, Yéhôva a yene na bia te sem. Yésus a nga jô na da dañe mvo’é na be tiñeti bia adit ako’o tyiñ a wua bia mañ été, a lôte na bi kolé mone ntômba wé ôbak; angôndô ajô fo’o!

12. Jé éve’ela bekpwa’a mefan béziñ ja ye’ele bia?

¹² Tame yen ane mojañ éziñ ba ngal be nga tôñ abendé Yésus éte. Be ne bekpwa’a mefan, a be nga be akônda da a mojañ mfe ba ngal be mbe be ndeme duban. Mimfefé Bekristen mite mi mbe mi yene’ abé na, Ngaa Yéhôva é ke cinéma, to’o film ba liti a nji bi jôm ja ndeñele. Be nga ye jô jam afe éyoñ be nga wô’ô na, bekpwa’a mefane ba bebaé be nga yene film. Mojañ a mbe nkpwa’a mefane nyi ba ngal be nga bo jam ete aya? Be nga tyi’i na ba ye ke beta ke cinéma akekui mimfefé Bekristene mi mia ye wôn, a tu’a yañele  mone môte ya nleme wop. (Beh. 5:14) Ntyi’an ôte wo liti na bekpwa’a mefane bangane ba, be nji kobô ve anyu na ba nye’e mojañ ate ba ngal, mimboane miap mi nga bo’olô fe de.​—Bero. 14:19-21; 1 Jean 3:18.

13. Aval avé bi ne tindi môte na a sem?

¹³ Bi ne fe kolé môt ôbak éyoñ bia tindi nye na a sem. Aval avé jam ete e ne boban? Bi tame jô na ñyé’é Bible éziñ a nga ja juane na a telé ñyuane bilam amu a mbe angônda nso’o meyok. Nde éyoñ a nga tu’a fas, a nga yene na a yiane jibi tyi tyi meyok. A taté ñhe na a yaé nsisim, a su’ulane fe duban. Éyoñ éte mojañ éziñ a bañete ba be bobejañe befe nda jé, a same nye élaé meyok a jô’ô nye na: “Ô ntoo Kristen, ô mbili nsisime Yéhôva. Nsisim ôte ô ne volô wo na ô yeme jôé womien. Nge wo yeme jôé womien, ô ne nyu bone meyok jôm é teke bo wo.” Nge mfefé Kristene wu ô vô’ôlô mbia melebe ma, mia simesane na jé é ne kui nye? Mbia ajô fo’o, amu a ne beta ku ôlame ya nso’one bilam!

14. Aval avé bisulan bia volô bia na bi tôñe melebe bia koone me Bephilippien 1:10?

¹⁴ Éyoñ bia tabe bisulan, bia yen abui mevale ya tôñe melebe bia koone me Bephilippien 1:10. Jam ôsu, mam bia yé’é wôé ma volô bia na bi yeme jé ja dañe mfi mise me Yéhôva. Jame baa, bia yé’é avale bi ne tôñe melebe ya  Kalate Zambe asu na bi bo teke bijô. Jam lale, bisulan bia tindi bia “nye’an a mbamba mimboan mi mam.” (Beh. 10:24, 25) Nye’ane wongan asu Yéhôva a bobejañ wo tu’a bo ngul éyoñe bia kôme wô’ôtane na bobejañ ba ve bia ngule nyul. Avale nye’an ete da bo na bi ve ngule jangan ése asu na bi sa’ale jam ese e ne kolé bobejañ ôbak.

15. E “jaé ne lut a bibuma ya zôsôô” a tinan aya?

¹⁵ Paul a mbe a ye’elane na Bephilippien be “jaé ne lut a bibuma ya zôsôô.” (Beph. 1:11) Bibuma bite bi ne bivé? Nye’ane bia nye’e Yéhôva a bobejañ ô ne été. Be mbe fe be yiane kobô bôte bevo’o ajô ya mbunane wop, a ndi nleme jap. Ve Bephilippien 2:15 a liti na Bekristene ba yiane fe “yené ane bifufube ya si nyô.” Mejô mete ma lu’an a ma me Yésus éyoñ a nga jô beyé’é bé na be ne “éfufube ya si nyô.” (Mt. 5:14-16) A nga jô fe be na be ‘bo bôte beyé’é,’ a na ba yiane bo “bekañete . . . akekui mfa’a si nyô ja dañ ôyap.” (Mt. 28:18-20; Mam. 1:8) Ajô te, bia wume fe “bibuma ya zôsôô” éyoñ bia kañete a ayôñ ése.

16. Aval avé Bephilippien 1:12-14 a liti na éfufube jangan é ne ke ôsu a faé to’o bi tele mbia bité? (Fombô’ô fôtô ya ékô’ôla.)

¹⁶ To’o bi tele été évé, bi ne faé ane éfufup. Biyoñ biziñe da kui kui na mbia bité bi ve bia fane ya kañete. Éve’an é ne na Paul a nga tili Bephilippien kalate a too nda mimbô’ô Rome. Mengata’a me nji kamane nye na a kañete bezimbi be mbe be ba’ale nye a bôte be mbe be za’a jome nye. Mbôle Paul a nga ke ôsu a kañete to’o a mbe a tele minju’ été,  bobejañe fe be nga bi ngule ya “kobô Mejô me Zambe teke ko woñ.”​—Lañe’e Bephilippien 1:12-14; 4:22.

17. Aval avé bobejañ béziñ be nga kui na ba kañete mbia biyoñ?

¹⁷ Abui bobejañ e ne ngule ya vu fulu ayo’o nleme Paul. Ba nyiñe bevôme be nji bo fili ya kañete mimbé mimbé, ve ba jeñe mezene ya kate bôte mbamba foé. (Mt. 10:16-20) Njome mekônda éziñ a nga lebe bobejañe ba nyiñ avale bevôm ete na, be kañete bivuvumane biap, bôte ba be be be too afôla da, bôte ba be be be ne nda bisaé jia nge aba sikôlô da, nge ke bôte befe ba yem. Bobejañe be nga tôñe melebe mete, a mvuse mimbu mibaé, tañe bekañete é nga bet nya abuii. Éko éziñ bi bi nji tebe aval été éte. Ve éve’ela bobejañe bete ja ye’ele bia na, nge bia jeñe fane ya kañete mbamba foé éyoñ ése, Yéhôva a ye ve bia ngule ya dañe mam me ne kômbô kamane bia na bi kobô ajô dé.​—Beph. 2:13.

18. Jé bia bese bia yiane ve ngule ya bo?

¹⁸ Dene nnye bia bese bia yiane dañe ve ngule ya tôñe melebe bia koone me kalate Paul a nga tili Bephilippien. Bia bese bia yiane jeñe na bi yemelane mam ma dañe mfi, na bi bo te bijô, na bi bo teke kolé bôte bevo’ ôbak, a na bi wume bibuma ya zôsôô. Nge bi bo nalé, nye’ane wongane wo ye fuluku, a bia ye ve Ésaa wongane Yéhôva duma.