1. Éyoñe bia yene bitua bi biôme Yéhôva a nga té, bi ne sili biabebiene minsili mivé?

ÉYOÑE bia yene biôme bise Yéhôva a nga té, bi ne wô’ôtan ane ntili Besam David, nnye ate a nga jô Yéhôva na: “Éyoñ ma fombô yôpe dôé, ésaé mo môé me nga bo, ngon a atété, mbie ô nga telé; môt a ne za jômô ane wo simesane nye? A mone môt, ane wo mvamane nye?” (Bs. 8:3, 4) Ane David, éyoñe bia fombô bitua bi biôme Yéhôva a nga té, a yene biabebien, bi ne vembe na Yéhôva a nyoñe ngab a bia. Yéhôva a nji su’u ve na a nyoñe ngab a Adam ba Ève, a nga bo fe na be bo bibu’a ya nda bôte jé.

2. Jé Zambe a nga jô Adam ba Ève na be bo?

² Adam ba Ève mbe be mbe bôte b’ôsu be nga bo bibu’a ya nda bôte Yéhôva. Nsôñañe Yéhôva ô mbe na be bôndé beta nda bôt, jôme te a nga jô be na: “Biaéané bon, a fôé, a yiane si nyô, a jôô je.” (Met. 1:28) Be mbe be yiane’e biaé bon a nyoñe ngab a si Zambe a nga ve be. Nge be nga ye bo Yéhôva mewôk, Adam ba Ève a mvoñe bôte jap be nga ye bo bibu’a ya nda bôte Yéhôva nnôm éto.

3. Amu jé bi ne jô na Yéhôva a nga té Adam ba Ève étua abeñ ntéan?

³ Yéhôva a nga ve Adam ba Ève édima das. Avale kalate Besam 8:5 a liti, éyoñe David a nga yen aval avé Yéhôva a nga té môt a binam, a nga jô na: “Ô téya nye a li’i ve tyôtyoé ya bo ane [beéngele], ane ô nga jalé nye couronne ya étôtok a duma.” E ne été na môt a binam a nji bi abime fek, ngul, a atyeñe mboone  mame beéngele be bili. (Bs. 103:20) Ve Kalate Zambe a jô na beéngele ba dañe bon be bôte fo’o ve “tyôtyoé.” Étua jame fo’o! Yéhôva a nga ve Adam ba Ève angôndô ya mbamba ényiñ.

4. Jé é nga kui Adam ba Ève éyoñe be nga bo Yéhôva melo, a jé bia zu yen ayé’é di?

 ⁴ Éngôngole jam é ne na, mbôle Adam ba Ève be nga bo Yéhôva melo, be nga tabe bibu’a ya nda bôte Yéhôva ve mone nté. Jam ete e nga soo mvoñe bôte jap bidim avale bii yen ayé’é di. Ve nsôñane Yéhôva ô nji tyendé. A ngenan a kômbô’ô na bôte be ne mewôk be bo bibu’a ya nda bôte jé nnôm éto. Bi tame taté zu yen aval avé Yéhôva a jaéya zu a liti bia na a nyane bia. Mvuse ya valé, bii yen mame bi ne bo éyoñe ji asu na bi liti Zambe na bia kômbô bo bibu’a ya nda bôte jé. Éyoñe te bii su’ulane yene bibotane bone be Yéhôva bé bu’ubane bie nnôm éto.

5. Aval avé bi ne ve Zambe akéva amu a nga té bia éve’ela jé?

⁵ Yéhôva a nga kôme bia éve’ela jé. (Met. 1:26, 27) Mbôle Yéhôva a nga kôme bia éve’ela jé, bi ne ngule ya vu mbamba mefulu mé aval ane nye’an, nkoon éngôngol, zôsôô, bia yeme fe kabetane bôte bevok. (Bs. 86:15; 145:17) Éyoñe bia ve ngule na bi bi mbamba mefulu mete, bia liti na bia semé Yéhôva a na bia ve nye akéva. (1 P. 1:14-16) Éyoñe bia bo mame Yéhôva a nye’e, nalé a soo bia mevak. Nde fe, mbôle bi ne ngule ya vu mbamba mefulu me Yéhôva, bi bili fane ya bo bibu’a ya nda bôte jé.

6. Aval avé Yéhôva a nga liti na a nyane môt a binam éyoñ a nga té si?

⁶ Yéhôva a nga ve bia mbamba étaba’a. Ôsusua na Yéhôva a té Adam ba Ève, a nga taté kôme si. (Job 38:4-6; Jr. 10:12) Mbôle Yéhôva a ne mbamba nlem a akap, a nga jalé si a mbamba be mam asu na bi bu’uban ényiñe nnôm éto. (Bs. 104:14, 15, 24) Nté Yéhôva a mbe a téé biôm, a mbe a bo a tebe’e mone jôm, a fombô bitétéa bié, a “yene na, [bi] mbe mvaé.” (Met. 1:10, 12, 31) Yéhôva a nga ve bia beta mvom éyoñ a nga telé bia “njôô” ya biôme bise a nga té si. (Bs. 8:6) Nsôñane Yéhôva ô ne na môt a binam a bi ava’a ya nyoñe ngab a biôme bise a nga té nnôm éto. Ye ô wô’ô fo’o bo ô va’a Yéhôva akéva asu ngaka’a éte?

7. Aval avé Josué 24:15 a bo’olô na môt a bili fili ya nyoñe mintyi’ane mié?

⁷ Yéhôva a nga ve bia fili ya nyoñe mintyi’an. Môt ase ya be bia a ne ngule ya tobe mam é bo ényiñe jé. (Lañe’e Josué 24:15.) Ésaa wongan a ne mevak éyoñe biabebien bia tobe na bia kañe nye. (Bs. 84:11; Min. 27:11) Bi ne fe belane fili éte asu na bi nyoñ abui mintyi’ane mife ényiñe jangan. Bi tame yene mbamba éve’ela Yésus a nga li’i bia mfa’a ôte.

8. Aval avé Yésus a nga belane fili jé ya nyoñe mintyi’an?

⁸ Aval ane Yésus, bi ne nyoñe ntyi’ane ya telé miñyiane mi bôte bevok ôsu, émiangan ke mvus. Môs éziñ, Yésus a beyé’é bé be mbe be te’eya ne botok, ane be nga tyi’i na ba ke afôla éziñ asu na be wo’one mone jôm. Ve be nji kui na be wo’on, amu bôt abui be nga ke koone be wôé, be kômbô’ô vô’ôlô  miñye’elane mi Yésus. Yésus a nji kañ a be, ve a nga wô’ô be éngôngol. Nde Yésus a nga bo aya? “A nga taté [na a] ye’ele be mejô abui.” (Mc 6:30-34) Éyoñe bia fe bia nyoñ éyoñe jangan a ve ngule na bi volô bôte bevok, bia ve Yéhôva duma. (Mt. 5:14-16) Bia liti fe Yéhôva na bia kômbô bo bibu’a ya nda bôte jé.

9. Édima das évé Yéhôva a nga ve môt a binam?

⁹ Yéhôva a nga ve bôte fane ya bi bon, a ve fe be mbe’e ya ye’ele bone bete na be nye’e nye a kañe nye. Nge ô ne mbiaé, ye wo nyane fo’o mvom éte? Yéhôva a nga ve beéngele ngule ya bo beta be mam, ve a nji kañese na be biaé bon. Ajô te, bebiaé ba yiane nyane mvome ya bi bon. Yéhôva a nga ve be beta mbe’e ya ‘yale [bone bap] melep a ñye’elan Tate été.’ (Beép. 6:4; Dt. 6:5-7; Bs. 127:3) Ékôane Yéhôva ja volô bebiaé na be yeme be’e mbe’e ôte éyoñe ja kuli abui bikpwelé aval ane bekalate, bevidéo, mezik, a mam mefe bia koone me anjeñe mefoé dangan. Teke bisô na Yéhôva ba Yésus ba nye’e bongô abui. (Luc 18:15-17) Yéhôva a wô’ô mvaé éyoñe bebiaé ba jeñe mvolane wé, a éyoñe ba ve ngul ése na be nyoñe ngab a bidima bi bone biap. Avale bebiaé ete da ve bone bap fane ya bo bibu’a ya nda bôte Yéhôva nnôm éto.

10-11. Bibotane bivé bia bi a zene ya ntañ?

¹⁰ Yéhôva a nga ve atyi’i Mone dé asu na bi beta bi fane ya bo bibu’a ya nda bôte jé. Avale bia te yen  abeñ 4, éngana’a Adam ba Ève é nga bo na, be bo teke beta bo bibu’a ya nda bôte Yéhôva. Mvoñe bôte jap fe é nga sube fan éte. (Bero. 5:12) Adam ba Ève be nga vañe bo Zambe melo, jôme te nje Zambe a nga vaa be nda bôte jé. Bone bap ki ba wu vé été? Nye’ane Yéhôva ô nga tindi nye na a ve ba be ne mewôk fane ya nyiine nda bôte jé. A nga bo de éyoñ a nga ve atyi’i Mone dé, Yésus Krist, ane ntañ. (Jean 3:16; Bero. 5:19) A zen éte, Yéhôva a nga nyoñe bôte 144 000 ane bone bé.​—Bero. 8:15-17; Nli. 14:1.

¹¹ Nde fe, bizu’u bebo bisaé be Yéhôva bé bi fane ya bo bibu’a ya nda bôte jé mvus Éjôé ya toyini mimbu. (Bs. 25:14; Bero. 8:20, 21) Mbôle be bili ndi nlem éte, bebo bisaé be Yéhôva be nto ngule ya taté na ba loone nye dene na “Tate [nge ke Ésaa] wongan”. (Mt. 6:9) Bôte bé wômô bé bi fe fane ya yé’é memvinda me Yéhôva. Éyoñe te nje, ba bese ba ye kañese njôane wé be fe ba ye bo bibu’a ya nda bôte jé.

12. Bia zu bi éyalan ya nsili ôvé?

¹² Avale bi ndôme yen, Yéhôva a nga bo abui mam ma liti na a nyane môt a binam. A nyoñeya miñwo’on ane bone bé, a ve fe “bizu’u bi bôt” ndi nlem ya bo bone bé mfefé émo. (Nli. 7:9) Jé bi ne bo asu na bi liti Yéhôva na bia kômbô bo bibu’a ya nda bôte jé nnôm éto?

13. Jé bia yiane bo asu na bi bo bibu’a ya nda bôte Yéhôva? (Marc 12:30)

¹³ Liti’i Yéhôva na wo nye’e nye, ajô te kañe’e nye a nlem wôé ôse. (Lañe’e Marc 12:30.) Yéhôva a daseya bia abui biôm, ve bi ne jô na dase da dañ é ne fane ya kañe nye. Bia liti Yéhôva na bia nye’e nye éyoñe bia ‘ba’ale  metiñe mé.’ (1 Jean 5:3) Atiñe da ya été e ne di ya bo bôte beyé’é a baptizô be. (Mt. 28:19) A nga ve fe bia atiñe na bi nye’esan. (Jean 13:35) Yéhôva é ve bôte bese ba bo nye mewôk ébotan ya bo bibu’a ya nda bôte jé.​—Bs. 15:1, 2.

14. Jé bi ne bo mfa’a ya liti na bia nye’e bôte bevok? (Matthieu 9:36-38; Beromain 12:10)

¹⁴ Nyeke’e bôte bevok. Fulu Yéhôva ja dañ é ne nye’an. (1 Jean 4:8) Yéhôva a nga nye’e bia ôsusua na bia yeme nye. (1 Jean 4:9, 10) Bia liti na bia vu nye éyoñe bia fe bia nye’e bôte bevok. (Beép. 5:1) Bia dañe liti na bia nye’e be éyoñe bia volô be na be yeme Yéhôva nté éyoñ é ngenan. (Lañe’e Matthieu 9:36-38.) Éyoñe bia bo de, bia ve be fane ya bo bibu’a ya nda bôte Yéhôva. To’o éyoñe môt a ndôme duban, bia yiane ke ôsu a nye’e nye a semé fe nye. (1 Jean 4:20, 21) Aval avé bi ne bo de? Jam ôsu e ne na bi tabe nye ndi. Nalé a tinane na nge a bo jam bi nji tu’a wôk, bia ye ke nye ji’a tyi’i ajô, ve bii ke ôsu a nye’e monyañ wongan, bi liti’i na bia semé nye adañ abim bia semé biabebien.​—Lañe’e Beromain 12:10; Beph. 2:3.

15. Beza bia yiane mvamane be?

¹⁵ Mvama’ane bôte bese. Nge bia yi na bi bo ébu’a ya nda bôte Yéhôva nnôm éto, da yiane yené môs ane môse na bia toñe memvinda mé. Éve’an é ne na, Yésus a nga jô na bia yiane mvaman avale bôt ese, to’o besiñe bangan. (Luc 6:32-36) Bi ne yen ayaé ya bo jam ete biyoñe biziñ. Nge nalé a kui, bia yiane jeñe na bi yene mam ane Yésus, a tôñ éve’ela jé. Éyoñe bia ve ngul ése na bi bo Yéhôva mewôk, a vu Yésus, bia liti Ésaa wongane na bia kômbô bo bibu’a ya nda bôte jé nnôm éto.

16. Aval avé bi ne ba’ale éjijine ya nda bôte Yéhôva?

¹⁶ Ba’ale’e éjijine ya nda bôte Yéhôva. E wô’ô kui menda me bôte méziñ na, bongô be bo mame ba yene ba be ne be mintôle be bo’ok. Ajô te, nge mintôle mia tôñe miñye’elane ya Kalate Zambe, mi ne liti ba ba zu be mvuse mbamba éve’ela. Ve nge mi taté na mia bo mbia be mam, bongô bevok be ne vu mie. E ne fe kui nalé nda bôte Yéhôva été. Nge étôtôlô Kristen ja taté na ja tôñe bivuse miñye’elan, nge bo mvine mam, Bekristene bevok be ne kômbô vu nye. Kristen ja bo nalé ja bo na bôte be kobô nda bôte Yéhôva abé. (1 Bet. 4:3-8) Bi nji yiane vu avale bôt ete, nge kañese na jam éziñ e ndaman élat bia be Ésaa wongane ya yôp.

17. Aval asimesan avé bia yiane sa’ale, a amu jé?

¹⁷ Futi’i ndi nleme jôé be Yéhôva, sake biôme bi mo. Yéhôva a ka’ale na é ve bia jôme ya di, jôme ya jaé, a vôme ya tabe, nge bia telé Éjôé jé ôsu ényiñe jangan a tôñe memvinda mé. (Bs. 55:22; Mt. 6:33) Nge bia ba’ale jam ete ôsimesan, nalé é volô bia na bi bo teke simesane na akum ya émo ji e ne kamane bia, nge soo bia benya meva’a. (Beph. 4:6, 7) Bia kôme yeme na bii bi nya mvo’é fo’o ve nge bia bo nkômbane Yéhôva. To’o bi bili moné ya kus abui biôm, bia yiane kôme fase nge bii bi éyoñe ya belane bie, a ngule ya ba’ale bie. Ajô te, môt ase a yiane sili émiene na: ‘Ye ma dañe wô’ô biôme bi mo me bili mintaé?’ Te bia vuane na  Yéhôva a yi na ébu’a ése ya nda bôte jé é bo ésaé a nga ve je. Nde, a nji yi na mame mefe me mane bia wub éyoñ. Bi nji kômbô vu môt a nga bene tôñe Yésus amu a nji kômbô kandan a akum dé. Môt ate a nga kôme sube fane ya bo ñwo’on, a bo Yéhôva ésaé nnôm éto!​—Marc 10:17-22.

18. Bibotane bivé bôte ba tôñe metiñe me Yéhôva ba ye bi nnôm éto?

¹⁸ Bôte ba bo Yéhôva mewôk bé bi ébotane ja dañe bibotane bise môt a ne bi: Mvome ya nye’e Yéhôva, a kañe nye nnôm éto. Ba be bili ndi nleme ya nyiñe si va ba ye bi ma’a ya nyoñe ngab a mbamba étaba’a Yéhôva a nga kôm asu dap. Ana’ana, Éjôé Zambe jé bo na si a biôme bise bi ne été bi beta mane bo mimfefé. Yésus é mane vaa minju’u mise Adam ba Ève be nga soo mie éyoñe be nga tyi’i na ba kôlô nda bôte Yéhôva. Yéhôva é wômôlô bemillion be bôt, a ve be fane ya nyiñe nnôm éto paradis. (Luc 23:42, 43) Nté metyi ya abé mé ke ma vase bôte menyul, bé taté na ba bi “étôtok a duma” David a nga jôô bie.​—Bs. 8:5.

19. Jé bia yiane simesane kom ése?

¹⁹ Nge ô ne môte wua ya “bizu’u bi bôt” bii nyiñe si va, yeme’e na ô bili beta mvom. Yéhôva a nye’e wo, a yi na ô bo ébu’a ya nda bôte jé. Ajô te, va’a ngul ése na ô ve nye nlem avak. Simesa’ane bengaka’a bé môs ane môs. Yene’e fane ô bili na wo kañe Yéhôva, a ndi nleme ya bo nye ésaé nnôm éto, ane beta édima das.