1-2. Jé bii yen ayé’é di?

NGE wo yange jôm éziñ é ne wo mfi, ve jôm éte é teke ji’a so, wé wô’ôtan aya? Ye wé tyelé nleme yôp? Kalate Minkana 13:12 a jô na: “Ndi nlem ba buk ja ve nlem ôkon.” Ve nge wo yem amu jé jôm éte é nji so éyoñ ô mbe ô yange’e je, ô ne bi ngule ya ke ôsu a jibi.

² Ayé’é di, bii yene miñye’elane miziñ ya Bible mi ne volô bia na bi ke ôsu a “yange.” (Mic. 7:7). Mvuse ya valé, bii yene minju’u mibaé mi ne bo na bi yen ayaé ya yange Yéhôva. Bii su’ulane yene bibotane Yéhôva a ka’ale bôte bese ba ke ôsu a yange nye.

3. Jé Minkana 13:11 a ye’ele bia?

³ Kalate Minkana 13:11 a ye’ele bia amu jé bia yiane bo ôjibi. A jô na: ‘Akum da so bemomo mezen da ye nyolan, ve nyô a kôan a mboan ésaé [nge ke ôte’ete’ ôte’etek], nnye a ye bik.’ Ñye’elan ôvé éfus éte ja ve bia? Mfefe’e môte wo kôme nyoñ éyoñe ya bo ésaé jé, nalé a bo na ésaé éte é wume mbamba bibuma.

4. Jé Minkana 4:18 a ye’ele bia?

⁴ Kalate Minkana 4:18 a jô bia na “zene ya bôt be ne zôsô é ne aval ane éfufupe ya melende me tyé, nje ja faé a ke ôsu akekui nya môsô.” Bifia bite bia liti aval avé Yéhôva a kulane bebo bisaé bé nkômbane wé. Éfus éte ja liti fe bia aval avé Bekristen ba bo mintyendan ényiñe jap a subu Yéhôva bebé. Môt a vo’o yaé nsisim ane nkabeke dis, da sili abui éyoñ. Nté bia ke ôsu a  yé’é Kalate Zambe a bekalate bangan, a tôñe mame me ne été, bii ke bia tyendé ôte’ete’ ôte’etek, a bi mefulu Yéhôva a nye’e. Bii tu’a fe yeme Zambe. Bi tame yen avale Yésus a nga timine jam ete.

5. Éve’an évé Yésus a nga belane je asu na a liti avale môt a yaé nsisim?

⁵ Yésus a nga belan éve’an asu na a liti aval avé mbamba foé a nañe minlem bezôsôô be bôt été. A nga jô na: “Fes ja faa a yaé, nye [mbé afup] te yem ane ja bo. Si ébien ja wum bibuma, a taté bo kaé, wôna abam, wôna ébuma ébien.” (Marc 4:27, 28) Jé Yésus a mbe a kômbô’ô jô? A nga liti na aval ane élok ja yaé ôte’ete’ ôte’etek, nde fe môt a yebe benya mejôô a yaé nsisim nalé. Éve’an é ne na, éyoñe ñyé’é Bible wongan a yemete élate jé a Yéhôva, bia taté na bia yen ane a bo mbamba mintyendan ényiñe jé. (Beép. 4:22-24) Ve bi nji yiane vuane na Yéhôva nnye a bo na mone fes ate a yaé.​—1 Bec. 3:7.

6-7. Jé bi ne yé’é éyoñe bia yen avale Yéhôva a nga té biôm?

⁶ Éyoñe Yéhôva a kômbô bo jam éziñ, a kôme nyoñ éyoñ asu na a bo jam ete nya mboone. A bo de asu na a wumulu jôé dé, a asu mfi bôte bevok. Tame yen aval a nga nyoñ éyoñe ya kôme si asu môt a binam.

⁷ Bible a jô na éyoñe Yéhôva a nga kôme si, a nga “tyi’i mefe’e ya ve’e je,” a bôé “mimbôka’a ya été,” a “ako’o jua ya été.” (Job 38:5, 6) A mbe fe a nyoñe’ éyoñe ya tebe a fombô ésaé jé. (Met. 1:10, 12) Tame simesan avale beéngele be mbe be wô’ôtan éyoñ ése be mbe be yene’e Yéhôva a téé mfefé jôm. Meva’a me nga yiane jaé be nlem ne lut. Jôme te nje Kalate Zambe a jô na, be nga “bete metyiñ amu mevak.” (Job 38:7) Jé jam ete da ye’ele bia? Da ye’ele bia na Yéhôva a  nga nyoñe betoyini mimbu asu na a té biôm, ve éyoñ a maneya té biôme bite, a nga jô na bia “dañ mvaé.”​—Met. 1:31.

8. Jé bia zu yen éyoñe ji?

⁸ Avale bi ndôme mane yene yôp, abui miñye’elane ya Kalate Zambe da ngôné mfi ya bo ôjibi. Bi tame ñhe zu yene minju’u mibaé mi ne bo na bi yen ayaé ya yange Yéhôva, a aval avé bi ne dañe mie.

9. E wô’ô sili na bi yange Yéhôva éyoñ évé?

⁹ Éyoñe bia yange na Yéhôva a yalane meye’elane mangan. Éyoñ bia ye’elane Zambe na a ve bia ngule ya jibi nju’u éziñ, nge ke ngule ya sôane mbia fulu éziñ, bi ne wô’ôtane ve ane a nyoñ aka’a abui éyoñ asu na a yalane bia. Amu jé Yéhôva a yalane ke meye’elane mangan mese été été?

10. Amu jé bia yiane bo ôjibi éyoñe bia ye’elane Zambe?

¹⁰ Yéhôva a kôme baa alo éyoñe bia ye’elane nye. (Bs. 65:2) A yene meye’elane mangan ane ndeme ya mbunane wongan. (Beh. 11:6) Éyoñe bia ja’é Yéhôva ngule ya bo nkômbane wé, a yi na a yene nge bi bili fo’o éva’a ya bo de. (1 Jean 3:22) Ajô te, e ne sili na bi bo ôjibi, a na bi bo mame ma liti na bia kômbô sôane mbia mefulu mangan. Yésus fe a nga bo’olô na, Yéhôva a ye ke yalane meye’elane mangan mese été été. A nga jô na: “Kelané ôsu a ja’é, wôna ba ye ve mia; kelané ôsu a jeñ, wôna mia ye yen, kelané ôsu a kute mbé, ndemben wo ye diiban.” (Mt. 7:7, 8, nwt) Nge bia tôñe melebe mete a bo “mbane meye’elan,” bi ne tabe ndi na Ésaa wongane ya yôp é vô’ôlô bia, a na é yalane meye’elane mangan.​—Beco. 4:2.

11. Aval avé kalate Behébreu 4:16 a ne volô bia nge bia wô’ôtane ve ane Zambe a ji’a ki yalane meye’elane mangan?

¹¹ To’o bia yene ve ane bi nji ji’a bi biyalane ya meye’elane mangan, Yéhôva a ka’ale bia na é yalane bia éyoñe ja yian. (Lañe’e Behébreu 4:16.) Ajô te, bi nji yiane wô’ô Yéhôva ôlun nge jam éziñ bia te sili nye ja so ki avôl avôl. Éve’an é ne na, den a ntoo abui mimbu, abui bôte da ye’elane na Éjoé Zambe é zu tyame mbia émo nyi. Yésus émien a nga jô na bi ye’elan asu jam ete. (Mt. 6:10) Ve, a ne akute jame na bi bele kôme jô’é na mbunane wongan ô tek, amu asu’ulan e nji so éyoñe bi mbe bi buna’an. (Hab. 2:3; Mt. 24:44) Môt a ne fek a ke ôsu a yange Yéhôva, a too ndi na é yalane meye’elane mé. Teke va’a nge beté, asu’ulane dé so, ve dé so mbamba éyoñ, amu Yéhôva émien a tyi’iya ‘alu a awolo’ jam ete da yiane boban. A teke bisô na môs ôte wé bo fo’o môs ôbiene wo yian.​—Mt. 24:36; 2 P. 3:15.

12. Jam avé e ne dañe sili na bi bo ôjibi?

¹² Éyoñe bia tôban ékotekot. Émo ji, bôte be wô’ô tibili ba bevok amu ba be be be nji bi nyul ékobe jia, nge ayoñe da, nge ke avale metum da. E wô’ô fe kui na môt a tôban étibila’a amu a ne éyem, nge ke amu a kone nlô. Den, abui Bengaa be Yéhôva da jibi étibila’a amu ba tôñe memvinda me Yéhôva. Nge ô tele aval été ete, te vuane mejô me Yésus ma: “Môt a ye jibi akekui asu’ulan, nnye a ye yen ényiñ.”  (Mt. 24:13) Nge e bo ke na wo wô’ô na mojañ nge sita éziñe ya akônda a te bo mbia jam? Nge bemvendé be yemeya ajô ete, ye wé fo’o bo ôjibi, a jô’é be na be kôme de avale Yéhôva a yi? Jé bemvendé ki ba yiane bo éyoñ ébu’a éziñe ya akônda ja te bo mbia nsem?

13. Jé Yéhôva a yi na bemvendé be bo éyoñe môt éziñ a te bo mbia nsem?

¹³ Éyoñe bemvendé be wô’ôya na mbia jam a te boban akônda, ba taté ye’elane Yéhôva na a ve be “fe’e ja so yôp,” ndemben bé bo ngule ya tyi’i ajô ete aval ane nkômbane wé ô ne. (Jc 3:17) Nsôñane wop ô ne na be bo mam mese be ne ngule ya bo asu na môt a te bo nsem a “li’i nkobane zene wé.” (Jc. 5:19, 20) Ba jeñe fe na be kaman akônda, a na bôte bese jam ete da te ndeñele be bi mvolane minlem. (2 Bec. 1:3, 4) Éyoñe bemvendé ba kômbô kobô ajô mojañ nge sita éziñ a te bo mbia nsem, ba taté jeñe na be yem aval avé jam ete da ke boban. E ne sili abui éyoñ asu na be bo de. Mvuse ya valé, ba ye’elane Yéhôva, a jeñe melebe ya Kalate Zambe me ne volô be na be ve mbo nsem meleb e “zôsô ntyi’ane mejô été.” (Jr. 30:11) E ne été na bemvendé ba yiane ji’a kôme mejô, ve be nji yiane nyoñe mintyi’ane tu-nlô. E ne mfi asu akônda ese na bemvendé be kôme mejô avale Yéhôva a yi. Ve to’o bemvendé ba kôm ajô éziñ avale da yian, ajô ete e ne ke ôsu a ndeñele bôte béziñ akônda. Nge ô tele aval été ete, jé ô ne bo asu na nlem ô bômbô wo si.

14. Nkañete ya Bible ôvé ô ne volô wo éyoñe mojañ nge sita éziñ a te bo wo jam e ne abé?

¹⁴ Ye ébu’a éziñe ya akônda nge ke môte mfe a boya wo mbia jam? Ô ne koone minkañete Kalate Zambe mi ne volô wo na ô yem aval avé ô ne yange na Yéhôva émien a kôm ajô ete. Bi tame kobô ajô Joseph. Bobenyañ bé bebiene mbe be nga bo nye abé. Ve a nji jô’é na minsem mi bobenyañ mi bo na a bo éyôé. A nga jiba beme mis ésaé a mbe a bo’o Yéhôva, ane Yéhôva a nga botane nye asu ôjibi wé. (Met. 39:21)  Joseph a nga su’ulane jamé bôte bese be nga bo nye abé, a yene bibotane Yéhôva a nga ve nye. (Met. 45:5) Aval ane Joseph, bia bi ngule nyul éyoñe bia yemete élat jangan a Yéhôva, a jô’é na émien a kôm ékotekot mbamba éyoñ.​—Bs. 7:17; 73:28.

15. Jé é nga volô sita éziñe na a bo teke tôñesan ékotekot?

¹⁵ E ne ayaé na bi tôban aval ékotekot Joseph a nga tôbane de. Ve bia bese bia wô’ô nleme mintaé éyoñ ése ba bo bia mbia jam. Éyoñe bi bili ajô a môt éziñ, to’o môt ate a nji bo Ngaa Yéhôva, e ne mfi na bi tôñe melebe ya Kalate Zambe. (Beph. 2:3, 4) Tame yene jam e nga kui sita éziñ. A nga wô’ô mbia ôlun amu minga ba nye be mbe be saék a nga ve nye éyôlé mvit. A lôte na a kun émien, a nga nyoñ éyoñe ya bindi éve’ela Yésus. Éyoñe bôt be mbe be taa Yésus, a nji be a yala’an. (1 P. 2:21, 23) Ane sita ate a nga tyi’i na nye fe a ye ke yalane minga ate. A nga su’ulane yeme na minga ate a mbe a bili ngul ôkon, a na abui mam e mbe e tyelé’é nye nleme yôp. Ane a nga simesane na éko éziñ jam ete nde e nga bo na minga ate a jô bijôjô. Sita ate a mbe angôndô ya mevak amu ntyi’an a nga nyoñe na a jibi nju’u ôte ô mbe mfi, a ô nga volô nye na a bôône nleme si.

16. Jé é ne volô wo nlem éyoñe wô tôban ékotekot? (1 Pierre 3:12)

¹⁶ Nge wo tôban ékotekot nge ke jam afe da taé wo nlem, te vuane na Yéhôva a ne “ba be ne minlem ntya’an” bebé. (Bs. 34:18) Éyoñe Yéhôva a yen ôjibi wôé, a avale wo kee nye mimbe’e miôé, a tu’a nye’e wo. (Bs. 55:22) Nnye a ne Ntyi’i mejô ya si se, ajô te, teke jam éziñ e solô mise mé. (Lañe’e 1 Pierre 3:12.) Nde ñhe, nge wo tôbane minju’u mia lôte wo nkôñ, ye wé fo’o bo ôjibi, a yange Yéhôva nga?

17. Ngaka’a Yéhôva fé bia koone je Ésaïe 30:18?

¹⁷ Ana’ana, Yéhôva a zu sôé bia abui bibotan a zene ya Éjôé jé. Kalate  Ésaïe 30:18 a jô na: “Yéhôva a ye yange, nde te a ye bo mia mvam; ajô te fe a ye betebane yôp, nde te a ye ko mia éngôngo. Amu Yéhôva a ne Zambe ya nya ntyi’ane mejôô; ébotan a ba bese ba yange nye.” Bôte bese ba ke ôsu a yange Yéhôva ba ye bi abui bibotan ataté den akekui mfefé émo.

18. Bibotane bivé bia yange bia?

¹⁸ Mfefé émo wo zu, bebo bisaé be Zambe ba ye ke fe beta tôbane minju’u mise mia tyelé be minleme yôp den. Ékotekot a mintaé bia ye fe bo. (Nli. 21:4) Bia ye ke fe beta biban asu na bi jalé miñyiane miangan, amu bii nyiñe mefok été. (Bs. 72:16; És. 54:13) Ngo’o avale mbamba ényiñ ete!

19. Yéhôva a yañele bia a nsôñan ôvé?

¹⁹ Dene nnye Yéhôva a yañele bia asu ényiñe ya paradis. A volô bia na bi sôane mbia mefulu mangan a na bi bi mefulu a nye’e. Te bili atek a lume Yéhôva mvus, amu ma’ane me ntele wo ôsu. Nkelan ôsu a bo ôjibi, bi yange’e na Yéhôva a sondô mane tôé bengaka’a bé.