1. Aval avé bi ne kui na bi lat amvôé a môt?

ASU na bi bo mvôé môt, e wô’ô sili na bi lôt éyoñ a môt ate. Amvôé dangan da ye ke da yem nté bia ye bo bi la’an, môt ase a yooé nyô mbo’o nleme wé. Ve mam ma selan a Yésus. Amu jé bia jô nalé?

2. Jam ôsu da bo na bi yen ayaé ya bo bemvôé be Yésus é ne avé?

² Jam ôsu, bi ngenane te yene Yésus nté ane bi nga bialé. Abui Bekristen e mbe e tele été éte ntete mi mbu ôsu. Ve to’o nalé, Pierre a nga jô be na: “Nnye ate mi nji yen, ve mia nye’e nye; akusa bo mi ne te yene nye éyoñe ji, ve mia buni nye.” (1 P. 1:8) Mejô mete ma liti na, to’o bi ngenane te yene Yésus môs éziñ, bi ne bo bemvôé bé.

3. Jam avé afe e ne ndeñele bia nté bia kômbô bo bemvôé be Yésus?

³ Jame baa é ne na bi vo’o laan a Yésus. Éyoñe bia ye’elan, bia laan a môte wua, ve Yéhôva. E ne été na bia ye’elane Yéhôva a ngala’ane ya be Yésus Krist. Yésus émien a nji yi yi na bi ye’elane nye. Amu jé? Amu meye’elan me ne ngabe jia ya ékaña’a jangan, Yéhôva étame ki nnye a yian ékaña’a. (Mt. 4:10) Ve to’o nalé, bi ne bo mam ma liti na bia nye’e Yésus.

4. Jam avé e ne beta bo na bi yen ayaé ya bo bemvôé be Yésus, a jé bia zu yen ayé’é di?

 ⁴ Jame lale e ne na Yésus a nyiñe yôp bi’i ki si va. Ve bi ne yem abui mam a lat a Yésus to’o bia be nye bi to ki vôme wua. Bia zu yene mam menyin bi ne bo asu na bi yemete amvôé dangan a Yésus. Ve bi tame taté yen amu jé da sili na bi bo bo bemvôé bé.

5. Amu jé bia yiane jeñe na bi bo bemvôé be Yésus? (Fombô’ô fe nka’ale ô ne nlô ajô na “ Môt a ne mvôé Yésus a ne fe mvôé Zambe,” a wu ô ne na “ Bia telé Yésus été ja yiane nye.”)

⁵ Nge bia kômbô bi mbamba élat a Yéhôva, bia yiane bo bemvôé be Yésus. Amu jé? Bi tame zu yene ve beamu bebaé. Jam ôsu, Yésus a nga jô beyé’é bé na: “Tate émien a nye’e mia, amu mi nga nye’e ma.” (Jean 16:27) A nga beta fe jô na: “Teke môt a zu be Tate, ve amu ma.” (Jean 14:6) Ajô te, nge môt a kômbô bo mvôé Yéhôva, ve a viane dañe Yésus e yôp, a ne ve ane a jeñe na a nyiine nda éziñ teke tyii mbé. Yésus a nga belan aval éve’an ete éyoñ a nga jô na a ne “mbé mintômba.” (Jean 10:7) Jame baa é ne na Yésus a nga kôme tune mefulu m’Ésaa wé. A nga jô beyé’é bé na: “Môt a [yeneya] ma a yeneya fe Tate.” (Jean 14:9) Nde nge bia kômbô yeme Yéhôva é ne nya mfii na bi yé’é ényiñe Yésus. Nté bia ke ôsu a yé’é yeme Yésus, nne fe bia tu’a nye’e nye nalé. Wônaa nye’ane bia nye’e Yéhôva wo ye fe tu’a bo ngu ane bia ye ke ôsu a yemete élate jangan a Yésus.

6. Jé éfe ja yiane tindi bia na bi jeñe na bi bi mbamba élat a Yésus? Timi’in.

 ⁶ Nge bia yi na Yéhôva a vô’ôlô meye’elane mangan, bia yiane bi mbamba élat a Yésus. Nalé a tinane na, bi nji yiane su’u ve na bia dibe meye’elane mangan bi jô’ô na ‘a ngala’ane ya be Yésus.’ Bia yiane fe yem aval avé Yéhôva a belane Yésus na a vô’ôlô meye’elan. Yésus a nga jô beyé’é bé na: “Mam mese mia ye ja’é a jôé dam, ma ye bo me.” (Jean 14:13) Akusa fo’o bo na Yéhôva émiene nnye a vô’ôlô bia, a na émiene nnye a ve bia mam bia sili nye meye’elan, a nga ve Yésus ngule ya tôé mintyi’ane Mié. (Mt. 28:18) Ajô te, asu na Yéhôva a vô’ôlô meye’elane mangan a ve bia jôme bia te ja’é nye, a taté fômbô nge bia tôñe melebe Yésus a ve bia. Bi tame nyoñe ve bone melebe me Yésus ma: “Nge mia jamé bôt mbia be mam ba bo mia, wônaa Éso wônan a ne yôp a ye jamé mia. Ve nge mi abo te jamé bôt mbia be mam be abo, nalé fe Éso wônan a ye bo te jamé mia mbia be mam mi abo.” (Mt. 6:14, 15) Nga bia tu’a ñhe wô’ô mfi ya nyiñ a bôte bevok avale Yéhôva ba Yésus ba nyiñ a bia?

7. Beza be ne bu’uban a ntañe Yésus?

⁷ Nge bia kômbô bu’ubane bibotane ya ntañ, bia yiane bo bemvôé be Yésus. Amu jé bia jô nalé? Amu Yésus émien a nga jô na a ye “ve ényiñe jé amu bemvôé bé.” (Jean 15:13) To’o bebo bisaé be Yéhôva be nga nyiñ ôsusua na Yésus a zu si va, ba ye taté yé’é yeme Krist a nye’e nye. Éyoñ bôt ane Abraham, Sara, Moïse a Rahab ba ye wômô mesoñ, da ye sili na be bo bemvôé be Yésus asu na be bi ényiñe ya melu mese.​—Jean 17:3; Mam. 24:15; Beh. 11:8-12, 24-26, 31.

8-9. Jean 15:4, 5 a liti bia na bemvôé be Yésus be ne ngule ya bo jé, a amu jé jam ete e ne mfi?

⁸ Bi ne mevak ya bo ésaé nkañete éjôé Yésus si. Éyoñ a mbe si va, Yésus a mbe ñye’ele. Éyoñ a bulaneya yôp, a nga ke ôsu a wulu ésaé nkañete amu Zambe a nga telé nye nlô ya akônda Bekristen. A nye’e a yene’e ngul ése wo ve asu na ô volô abui bôte na e yeme ba Ésaa wé. Nya ajôô a ne ne na, Yéhôva ba Yésus mbe ba volô bia na bi yeme bo ésaé nkañete.​—Lañe’e Jean 15:4, 5.

⁹ Mejô me Zambe ma kôme bo’olô na, nge bia yi na Yéhôva a wô’ô bia mvaé, bia yiane jeñe na bi bo bemvôé be Yésus a na bi ba’ale élate jangan a nye. Bi tame ñhe zu yene bone be mam benyin be ne volô bia.

10. Jé bia yiane taté bo asu na bi bo bemvôé be Yésus?

¹⁰ (1) Jeñe’e na ô yeme Yésus. Bi ne kui na bi bo de nge bia lañe bekalate ya Bible ane Matthieu, Marc, Luc, a Jean. Éyoñ bia kôme bindi nkañete ya ényiñe Yésus, bia tu’a nye’e nye a semé nye amu bia yen abim avé a mbe a yeme’e nyiñ a bôt. Akusa bo a mbe Ntebe ôsu woba, Yésus a nji belane beyé’é bé ane alo môs éziñ. Ve a mbe a  yooé be nleme wé, a kate’e fe be asimesane dé. (Jean 15:15) Yésus a mbe a yeme’e be wô’ô mintaé, a nga kui kui fe na a yôn a be. (Jean 11:32-36) To’o besiñe bé be nga yene na Yésus a ne mvôé bôt ba vô’ôlô foé a kañete. (Mt. 11:19) Nge bia fe bia vu Yésus, bia ye yeme nyiñ a bôte bevok a tu’a bi meva’ ényiñ, bia ye fe dañe beta semé Yésus a nye’e nye.

11. Jam avé afe bia yiane bo asu na bi bo bemvôé be Yésus, a amu jé jam ete e ne mfi?

¹¹ (2) Jeñe’e na ô bi ôsimesane Yésus a na ô bo mam ane nye. Éyoñe bia tu’a yeme Yésus a bo mam ane nye, amvôé dangan bia be nye da tu’a bo ngul. (1 Bec. 2:16) Aval avé bi ne vu Yésus? Bi tame nyoñ éve’ane jia. Yésus a nga dañe telé miñyiane mi bôte bevo’ ôsu, sake émié. (Mt. 20:28; Bero. 15:1-3) Fulu éte é nga volô nye na a yeme nyum émiene mam asu bôte bevok, a na a yeme jamé be. A nji be a ji’a wô’ô ôlun éyoñe môt a jô jôm éziñ é ne ndeñele nye. (Jean 1:46, 47) A nji be a kolé’é bôt ôbak a minsem be nga bo melu mvus. (1 Tim. 1:12-14) Yésus a nga jô na: “Bôte bese ba ye yeme na mi ne beyé’é bam, nge mia nye’esan.” (Jean 13:35) Sili’i womiene na, ‘Ye ma bo fo’o mam mese asu na me tôñesane mvô’é a bôte bevo’ ane Yésus?’

12. Jame lale bia yiane bo asu na bi liti na bi ne bemvôé be Yésus é ne avé, a aval avé bi ne bo de?

¹² (3) Su’u bobenyañe be Yésus. Éyoñ bia su’u bobenyañe bé be ne miñwo’an, Yésus a yene na nnye bia suk. (Mt. 25:34-40) Bia su’u miñwo’an éyoñ bia nyoñe ngab a ésaé Yésus a nga ve beyé’é bé na be kañete a bo bôte beyé’é. (Mt. 28:19, 20; Mam. 10:42) Miñwo’an mia kui na mi kañete si ése amu “mintômba mife” mia volô be nya abuii. (Jean 10:16) Nge ô ne ngabe ya mintômba mife, tuka’a yeme na éyoñ ése wo kui nkañete, sake miñwo’an étam mmie wo liti nye’an, ésaé éte ja liti fe na wo nye’e Yésus.

13. Aval avé bi ne tôñe melebe ya Luc 16:9?

¹³ Bi ne fe bo bemvôé be Yéhôva ba Yésus éyoñe bia su’u ésaé jap a moné wongan. (Lañe’e Luc 16:9.) Bi ne bo mimvean na bi su’u ésaé nkañete ja bobane si se, na bi su’u bisaé melôñe ya ékôane Yéhôva, a na bi volô bobejañ ba tôbane bibubua. Bi ne fe bo mimveane na bi jalé miñyiane ya akônda dangan, a volô bobejañ be tele minju’ été. (Min. 19:17) Bone be mam bi ne bo le asu na bi su’u bobenyañ be Krist.

14. Kalate Beéphésien 4:15, 16 a liti na jam avé bia yiane bo asu na bi bo bemvôé be Yésus?

¹⁴ (4) Su’u nta’ane mame ya ékôane Yéhôva. Bia yemete élate jangan a nlô ya akônda éyoñe bia semé mintyi’ane mi bôte Yéhôva a nga telé na be wulu bia. (Lañe’e Beéphésien 4:15, 16.) Ôvañe wua ya ékôane Yéhôva ô ne na bi yeme belane Meba m’Éjôé. Ajô te e wô’ô kui na be bo na mekônda méziñ me fulan a bo akônda da. Nta’ane mam ôte wo volô na ékôane Yéhôva é bo teke ndamane moné ya mimveane zezé. Nta’ane mam ôte ô wô’ô fe bo na bobejañe be bo bone miñtyendane miziñ. E wô’ô sili bobejañe  béziñe na be tyendé akônda a to ke na be maneya yembane bobejañe ya nnôma akônda wop, amu valé be tabeya été mimbu mimbu. Ngo’o abim mevak Yésus a wok éyoñ a yen biwôlô Bekristen bite bi va’a ngule ya su’u nta’ane mam ôte a nlem ôse!

15. Aval avé élate bia be Yésus ja ye tu’a yem melu ma zu?

¹⁵ Bekristen be ne miñwo’an be bili ndi nleme ya ke jôé a Yésus yôp. Ba ye bi ma’a ya tabe a nye, ba ye yene nye, ba ye laan a lôt éyoñ a nye. (Jean 14:2, 3) Ba ke be bili ndi nleme ya nyiñe si va ba ye fe wô’ôtane nye’ane Yésus. To’o be ba ye ke yene Yésus, élate ba be nye ja ye yem nté ba ye bu’ubane bibotane ba Ésaa ba ye noo be mfefé émo.​—És. 9:6, 7.

16. Bibotane bivé bia bi éyoñe bi ne bemvôé be Yésus?

¹⁶ Bia bi abui bibotan éyoñe bia kañe se bo bemvôé be Yésus. Bia wô’ôtane nye’ane wé a abim avé a su’u bia. Bi bili ndi nleme ya nyiñe nnôm éto. A jame da dañ é ne na bia bi fe ngul élat a Ésaa wé Yéhôva. Nga miabebien mia yene na e bo mvôé Yésus a nji bo mone jam?