Éfia be nga belane je nkobô Hébreu é ne bo na, bôt be wô’ô éfus éte meval mebaé. Ve mam bia zu yene ma, ma volô bia na bi kôme wô’ô bifuse bite:

1. Mam mefe kabetôlô besam ate a ye’ele. Teke vaa nge beté, bibotane ya éfus 12 akekui 14 bia fombô bezôsôô be bôt, mbe bete ba yi na Yéhôva a ‘kôté be a nyii be’ mo me mbia be bôt (éfus 11). Ôsimesan ôte wo yené fe éfus 15, éfus éte ja kobô ajô ayoñ bôt éziñ biyoñ bibaé, é jô’ô na, e ne “di Zambe a ne Yéhôva.”

2. Ôsimesan ôte wo lu’ane fe a mam bifus bife ya Kalate Zambe bia jô a lat a bibotan Zambe a ka’ale bebo bisaé bé. Kalate Besam ate a liti na David a mbe a kôme’e yeme na, Yéhôva a ye kôté ayoñ Israël mo besiñ bé, a mvuse ya valé, a ye botan ayoñ dé, ndemben da ye nyiñe meva’ été, a fôé. (Lv. 26:9, 10; Dt. 7:13; Bs. 128:1-6) Éve’an é ne na, Deutéronome 28:4 a jô na: “Ébotan j’aye kui bibuma ya nyôle jôé, a bibuma ya si jôé, a bibuma ya biyeme biôé, mfôane ya binyaka biôé, a bone ya mintômba miôé.” Nkulan ajô ôte ô nga tôébane mebôm, éyoñ Salomon, mone David, a mbe njôé Israël; melu mé, ayoñ é nga bu’uban a mvo’é, a fôé, a wum abui bibuma. Jam afe é ne na, mam méziñe ya éjôé Salomon me mbe bive’ela ya mam ma ye boban éjôé Messie.​—1 Bb. 4:20, 21; Bs. 72:1-20.

Bi ne mane bi jô’ô na, atinane ya kalate Besam 144 é tii a ndi nlem bebo bisaé be Yéhôva ba nyane je: Yéhôva a ye jiane mbia be bôt, a soo bia mvo’é a bibotane bia ye tabe nnôm éto.​—Bs. 37:10, 11.