MBU ya mvus, si ése meku’u menyin, abui bobejañ é nga tebe bediakon a bemvendé. Nge ô ne môte wua ya be be, éko éziñe wo wô’ô mfefé mbe’e wôé mvaé.

Ve é ne fe kui na, nlem ô tyebe wo yôbe mone jôm. Jason, ndôman éziñ e ndeme tebe mvendé ya akônda, a jô na: “Éyoñ be nga telé ma mvendé, me mbe me sili’i mamiene na me taté jame di aya.” Moïse ba Jérémie fe be nga wô’ôtane fo’o ve ane be nji bo ngule ya be’e mimfefé mimbe’e Yéhôva a nga ve be. (Nk. 4:10; Jr. 1:6) Nge wo fe wo wô’ôtan nalé, aval avé ô ne juan a asimesan ete, a ke ôsu a yaé nsisim? Bi tame zu yen éve’ela Timothée.​—Mam. 16:1-3.

Timothée a mbe a ndôme yiane bi mimbu 20, éyoñ Paul a nga jô nye na a bo a kele’e mulu a nye. Mbôl a mbe a ngenan ésoé, éko éziñ Timothée a nji be a too émiene mebun, nde fe a mbe a yiane ko mfefé mbe’e wé woñ. (1 Tim. 4:11, 12; 2 Tim. 1:1, 2, 7) Mvuse mimbu awôm, Paul a nga tili Bekristene ya Philippes na: “Me to ndi nleme be Tate Yésus na, me mbeme lôme Timothée be mia, amu me nji bi môte mfe a ne ane nye.”​—Bep. 2:19, 20.

Jé é nga volô Timothée na, a bo avale mbamba mvendé ete? Bi tame zu yene mam mesamane mi ne vu be Timothée.

1. Timothée a mbe a wô’ô bôte mintaé. Paul a nga jô bobejañe ya Philippes na: “[Timothée] a kôme tyelé nleme yôp ajô mam ma nambe mia.” (Bep. 2:20, Mfefé Nkôñelan) Timothée a mbe fo’o a wô’ô bôte mintaé. A nga nyôñe ngab a be mfa’a ya nsisim, a bômbô évevé asu dap.

Te bia vu ndutu metua a jeñe ve na e ke kui awolo, to’o metua wé a ne ékôkoé, teke bisi bôte ba telé nye zen. William a ne mvendé ba semé abui, a boya mimbu 20 a too mvendé, a lebe bobejañe be ndôme be’e mimbe’e akônda na: “Nyeka’ane bobejañ. Miñyiane miap mmie mia yiane telé ôsu, sa ke éto mvendé nge ke éto diakon jenan.”

2. Timothée a mbe a telé’é mame ya nsisim ôsu. Paul a nga liti nsela’ane a ne zañe éve’ane Timothée a nga ve a ji bôte bevok, a jô’ô na: “Bese be ajeñe [ve] mam map, sa mam me Yésus Krist.” (Bep. 2:21) Paul a nga tili mejô mete a too Rome. A nga yene na bobejañe béziñe ya wôé be mbe be dañe’ fase ve ajô dap, teke bisi bôte bevok. Bi ne jô na be mbe minleles mfa’a ya nsisim. Ve Timothée a nji be nalé. Éyoñ a nga bi fane ya nene ésaé nkañete jé, a nga bo ane Ésaïe, nnye ate a nga jô Yéhôva na: “Me nyô; lôme’ ma!”​—És. 6:8.

Aval avé mi ne yeme ta’a mam ényiñe jenan, asu na te mame ya nsisim ma ke abo si? Tela’ané jam ése été ja yiane de. Paul a nga lebe Bekristene na be “yemelane mam me adañe mvaé.” (Bep. 1:10) Mame Zambe a telé ôsu mme fe mia yiane telé ôsu. Jame baa, te jeñan abui mam ényiñ. Mi kanda’ane fe a jam ése da di mia éyoñ a ngule zezé. Paul a nga lebe  Timothée na: “Mate’e mbia minkômbane ya éyoñe môt a ne mongô, a tôñe mame ya zôsô, mbunan, nye’an, mvo’é.”​—2 Tim. 2:22.

3. Timothée a mbe éwolô mbo ésaé. Paul a nga jô Bephilippien na: “Mi ayem mve’elane wé na, ane mon a bo ésa ésaé, nalé ate a nga bo ésaé a ma mfa’a ya mfôlan mbamba foé.” (Bep. 2:22) Timothée a nji be nleles. Ba Paul be nga saé mbia ya abui, a nalé a nga bo na, amvôé dap é yem.

Ésaé ja jembane ki ékôane Yéhôva den. Ésaé éte e ne soo mia abui mevak, a yemete élate mia be bobejañ. Ajô te, jeñané a ngul ése na mi ‘bi abui mame ya bo ésaé Tate.’​—1 Bec. 15:58.

4. Timothée a mbe a tôñe’e miñye’elane mi Yéhôva ényiñe jé. Paul a nga tili Timothée na: “Wo ô nga tôñ ñye’ela’ane wom, dulu dam, ntyi’ane ya nleme wom, mbunane wom, abui njibane dam, nye’ane wom, mbane wom.” (2 Tim. 3:10) Timothée a nga bo ngule ya be’e abui mimbe’e akônda, amu a mbe a tôñe’e miñye’elane mi Yéhôva ényiñe jé.​—1 Bec. 4:17.

Ye ô bili fo’o mvôé é ne ane éso nge nyua ya nsisim? Nge momo, jeñe’e na ô bi avale mvôé éte. Tom a ne mvendé den a nto abui mimbu, a ngenan a simesa’ane jam é nga kui nye: “Étôtôlô mvendé éziñ é nga nyoñe ma ane mone wé, a taté na ja yañele ma. Me mbe me sili’i nye mvolan éyoñ ése, me tôñe’e fe melebe mé. Mboon ôte ô nga ve ma ngule ya ke ôsu.”

5. Timothée a mbe a yañele’ émien. Paul a nga jô Timothée na: “[Yañele’e] womien mfa’a ya mboane mame ya Zambe.” (1 Tim. 4:7) Mmate mbil a yiane fo’o bi ñye’ele, ve nalé a nji vaa na, émien a yiane fe bo a kele’e mbil étam. Paul a nga lebe Timothée na: “Ô ba’ale ajô nlañane kalate, ajô ya lepe bôt, ajô ya ye’ele. . . . Ô va’a ngu mfa’a ya mam mete, ô va’a womiene ngumba mfa’a ya mam mete; nde nkean ôsu wôé wo aye yené be bôte bese.”​—1 Tim. 4:13-15.

Mia fe mia yiane jeñ a ngul ése na mi tu’a yeme bo Zambe ésaé. Te mia tebe vôme wua mfa’a ya nsisim, nge ke mane yembe ve a minnôm mi nta’ane mi mam. Te mia dañe tabe miabebiene mebun, a buni na, mbôle mi boya mvendé nge diakon ayap, mi nji beta bo ntindane ya vune bekalate ya Tin Ékoan, éyoñ mi bili ésaé éziñ. Ane Timothée, mia yiane ke ôsu a ‘tabe ntyel a miabebien a mam mia ye’ele.’​—1 Tim. 4:16.

6. Timothée a mbe a too nsisime Zambe mebun. Paul a nga lebe Timothée aval a yiane bo Zambe ésaé a jô’ô nye na: “Ô ba’ale mbamba jôm [mbunan] ate, nnye a nga vebane be wo a ngule ya mbamba nsisim, nnye a to be bia.” (2 Tim. 1:14) Ôwé, asu na Timothée a ba’ale ésaé jé, a mbe a yiane tabe mbamba nsisime Yéhôva mebun.

Donald a ne mvendé den a nto mimbu mewôm, a jô na: “Befam be be’e mimbe’e akônda ba yiane nyane élate jap a Yéhôva. Môt ase a bo nalé, a ye ke ôsu a yaé nsisim. Nge ba ye’elane Yéhôva na a ve be mbamba nsisime wé, a nge ba jeñe na be wum ébuma ya nsisim ôte, ba ye bo ébotan asu bobejañe ya akônda.”​—Bs. 84:7; 1 P. 4:11.

Bia wô’ô angônda mvaé ya yen ane abui bobejañ e ndôme tebe diakon nge ke mvendé, da ke ôsu a yaé nsisim. Jason bia te jô nye atata’a a jô na: “Me yé’éya abui mam nté ane me nga tebe mvendé, a mbunane wom ô tu’aya yem. Den, ma bu’ubane mbe’e wom, me lôô wô ane jôm é ne angôndô ya édima.”

Ye mia ye fo’o ke ôsu a yaé nsisim? Mbamba nsôñane ya bi le, ndembene mia ye vu Timothée. Nge mi bo de, mia ye bo ébotan asu akônda Yéhôva.