Abui bôte da simesane na, mbôle bi nji kuane bekalate bangan, e nji bo abé ya kabe be menjeñe mefoé mefe a beréseaux sociaux. Ve mboon ôte wo tyam metiñe Tin Ékôan ja ve vôm a ne ntilane jw.org na, Metiñ wo yiane yem *; mboon ôte ô ne fe telé bia mbia été. Metiñe mete ma jô ne sañesañe na, môt éziñ a nji yiane “nyoñ bive’ela bi ne bekalate bangan, bekalate ba kui anjeñe mefoé dangan, belogo bangan, befôtô, bevidéo, nge nke minlô mejô ya anjeñe mefoé dangan, na a lôme bie menjeñe mefoé mefe (to’o besite internet bôte ba bo bepartage bevidéo a beza beza, nge beréseaux sociaux).” Amu jé be nga telé aval atiñ ete?

Biôm bise bia kui anjeñe mefoé dangan bi bili miene atiñe da yem (copyright). Beapostat a besiñe bangan befe ba jeñe na be belane bekalate bangan menjeñe mefoé map, mfa’a ya wone Bengaa be Yéhôva a bôte befe. Menjeñe mefoé mete me ne bo na, bisô bi bialé minlem mi bôte ba lañe mam me ne été. (Bs. 26:4; Min. 22:5) Bôte bevo’o ba belane biôme ya bekalate bangan, nge ke logo jw.org asu bepublicité bap, asu makite map, nge ke asu beandroïde a betablette bap. Copyright a mam ma ba’ale logo wongan, bia volô na atiñ é kaman anjeñe mefoé dangan. (Min. 27:12) Ve nge bia jô’é na môt ase, to’o Bengaa be Yéhôva  bebien, be nyoñe biôme bi ne anjeñe mefoé dangan a kabe bie menjeñe mefoé mefe, nge ke na be belane jw.org na ba bo makite map, a ye bo ayaé na menda mejô me kamane besiñe bangan a bebo makite na be belan anjeñe mefoé dangan.

E limiti bekalate bangan anjeñe mefoé afe a ne telé bia mbia été. “Ôlo ô ne mewôk a fek” ñwô étam ô bili mbe’e ya ve bia bidi ya nsisim. (Mt. 24:45) Besite ba étam mbe ôlo ôte wo belane be: www.pr418.com, tv.pr418.com, and wol.pr418.com. Bi bili ve beapplication bela asu betablette a beandroïde bangan: JW Language^®, JW Library^®, a JW Library Sign Language^®. Bi ne tabe ndi na bikpwelé bite bi nji bi ajô a publicité, nge ke a jam éziñe ya émo Satan. Nge bidi ya nsisime bite bia lôte mezene mefe, bi vo’o tabe ndi na bi ngenane mvo’é.​—Bs. 18:26; 19:8.

Mbia jam afe a ne na, éyoñe bia futi bekalate bangane menjeñe mefoé mefe, bôte ba jome menjeñe mefoé mete ane beapostat be ne jô mam ma ve ékôane Yéhôva mvit. Bobejañe béziñ be nga futi anyu dabe minsañetane mia bobane nko, mboon ôte ô nga ndamane Yéhôva éyôlé. Minsañetane ya internet mi nji bo mbamba vôme ya “ye’ele ba be abo melo a nje’ebane nlem.” (2 Tim. 2:23-25; 1 Tim. 6:3-5) Bi nga yene fe na, beréseaux sociaux béziñ, a menjeñe mefoé me mbia be bôt, ma belane môé me bobejañe ya Tin Ékôan, a môé bobejañe ba volô be. A too ke na, teke môt éziñe ya be be a bili anjeñe mefoé dé émien, a teke môt éziñe ya be be a belane beréseaux sociaux.

Éyoñ bia liti bôt anjeñe mefoé dangan, bia bo na “mbamba foé” a miaseban. (Mt. 24:14) Tin Ékôane ja ke ôsu a kôm bikpwelé bia belane bie asu minkañete. Bia yi na môt ase a yene mfi ya bikpwelé bite. A avale Metiñe ya anjeñe mefoé dangan ma jô, éyoñ bia tili môte kalate internet, bi ne lôme nye kalate éziñ Tin Ékôan é nga kuli, nge ke nlô ajô éziñe ya jw.org. Éyoñ bia bo na bôte be yem anjeñe mefoé dangan, bia ve be fane ya di benya bidii “Ôlo ô ne mewôk a fek” wo yam.