1-2. Jé é mbe é tyelé’é Yésus nleme yôp?

MÔSE Yésus a nga kandane nyiñe si va ane môta binam, nlem ô mbe ô tyelé nye yôp. A mbe a mbeme jibi awu mintaé mo bebiasé metiñ. Ve sa ke awu dé étam nde é mbe é tyelé’é nye nleme yôp. A mbe a nye’e Ésaa nya abui, a kômbô’ô fe ve nye nlem avak. Yésus a mbe a yeme’e na, nge a ba’ale mbunane wé meve’ele été, a ye liti na Satan a nga vañe bolé Yéhôva éyôlé, a na Ésaa a yiane duma. Yésus a mbe fe a nye’e bôt; a mbe a yeme’e na, asu na bi bi fane ya nyiñe nnôm éto, a yiane tôé jam é nga soo nye si va, teke feñelan.

² To’o na nlem ô mbe ô tyele nye yôbe mbia jam, Yésus a mbe a bili mvo’é ya nlem. A nga jô beyé’é bé na: “Ma ve mia mvo’é jam.” (Jean 14:27, Mfefé Nkôñelan) “Mvo’é Zambe” nje é mbe é bôé Yésus nleme si; bia fe bia bi mvo’é éte éyoñe bia ba’ale mbamba élat a Yéhôva. Mvo’é ya nlem é nga volô Yésus na a bo te koo woñ.​—Beph. 4:6, 7.

3. Jé bia zu yen ayé’é di?

³ Teke môt éziñe ya be bia a ye tôban avale meve’ele Yésus a nga tôbane de, ve ñyé’é Yésus ase a ye tôbane meve’ele. (Mt. 16:24, 25, nwt-F; Jean 15:20) E ne fe kui na bia fe bi tyelé minleme yôp. Jé ja ye volô bia na bi ba’ale mvo’é Zambe to’o éyoñ mam méziñ ma tyelé bia minleme yôp? Bi tame zu yene mam melale me nga volô Yésus éyoñ a mbe si va, a avale bi ne vu nye éyoñ bia tôbane minjuk.

4. Aval ane 1 Bethéssalonicien 5:17 a jô, jé ja liti na Yésus a nga yeʼelan mban alu a nga kandane nyiñe si va?

⁴ Lañe’e 1 Bethéssalonicien 5:17. Yésus a nga ye’elan angôndô ya abui môs a nga kandane nyiñe si va ane môta binam. Éyoñ a nga bôndé Tawôla Tate, a nga ye’elane biyoñ bibaé: ôsusua na a kalane beyé’é bé fembé, a ôsusua na a kalane be won. (1 Bec. 11:23-25) A nga beta fe ye’elan ba beyé’é bé ôsusua na ba kôlô nda be nga di Paska. (Jean 17:1-26) Éyoñ be nga kui Gethsémané, Yésus a nga ye’elan alu ete biyoñ biyoñ. (Mt. 26:36-39, 42, 44) To’o éyoñ a wo’o élé mintaé, Yésus a nga ye’elan ôsusua na a suu mvebe. (Luc 23:46) Yésus a nga kate Yéhôva mam mese me mbe me deñele nye môs ôte.

5. Amu jé minlôman mi nga bili atek?

⁵ Jam ôsu é nga bo na Yésus a jibi minjuk e ne na, a mbe a ye’elan Ésaa a nlem ôse. Ve beyé’é bé be nji ye’elane mban alu ete. Jôm ete nje be nga tek éyoñe ya meve’ele. (Mt. 26:40, 41, 43, 45, 56) Mbunane woñ wo ye tebe ne bip éyoñ bia tôbane meve’ele vengevenge ve bia “ye’elan, te jô’é” ane Yésus. Bi ne ye’elan asu jé?

6. Aval avé mbunan ô ne bôé bia nlem si éyoñ bia tôbane minjuk?

⁶ Bi ne sili Yéhôva na a “kô’ôlane bia mbunan.” (Luc 17:5; Jean 14:1) Da sili bia mbunan amu Satan a tyi’iya na a zu telé beyé’é be Yésus bese meve’ele été. (Luc 22:31) Aval avé mbunane ô ne volô bia na bi bi mvo’é ya nlem to’o bia tôbane minju’u fifiti? Éyoñ bi maneya bo mam mese bi ne ngule ya bo asu na  bi dañe minju’u miangan, mbunan wo ye volô bia na bi suu mbe’e wongan be Yéhôva. Mbôle bi to ndi na Yéhôva nnye a tu’a yem jam e ne mvo’é asu dangan, nlem wo ye bômbô bia si.​—1 P. 5:6, 7.

7. Nlañe Robert wo ye’ele wo jé?

⁷ Meye’elan fe ma volô bia na bi bo teke tyelé minlem yôp éyoñ bia tôbane minjuk. Bi tame nyoñ éve’ela Robert, a ne étôtôlô mvendé, a bili mimbu 80 a mvuk. A jô na: “Melebe bia koone me kalate Bephilippien 4:6, 7 me nga volô ma na me dañ abui minju’ ényiñe jam. E nga kui na ényiñ é bo ma ayaé amu me mbe teke moné, me nga jañele fe mbe’e mvendé.” Jé é nga volô Robert na a bo teke tyelé nleme yôp? A beta jô na: “Me mbe me ye’elan éyoñ ése biyebe bi mbe bi kômbô’ô me bi. Me ne jô na éyoñ me ne mban ya yoé Yéhôva nlem meye’elan été, ma wô’ôtan mvo’é jé abui.”

8. Kalate Jean 8:29 a liti na jam avé afe é nga volô Yésus na a ba’ale mvo’é jé?

⁸ Lañe’e Jean 8:29. Yésus a nga ba’ale mvo’é Zambe to’o éyoñ a mbe a tôba’an étibila’a amu a mbe a yeme’e na Ésaa a wô’ô nye mvaé. A nga ke ôsu a bo nkômbane Zambe éyoñ e mbe ayaé. Mbôl a mbe a nye’e Ésaa abui, jôm ete nje a mbe a telé’é nye ôsu ényiñe jé ése. Éyoñe Yésus a mbe yôp, a mbe “mie mbo ésaé” Zambe. (Min 8:30) Éyoñ a zuya si va, a nga kañete bôt ajô Ésaa a ayôñ ése. (Mt. 6:9; Jean 5:17) Ésaé éte é nga soo nye abui mevak.​—Jean 4:34-36.

9. Aval avé ésaé nkañete ja volô na bi ba’ale mvo’é jangan?

 ⁹ Bi ne vu Yésus éyoñ bia bo Yéhôva mewôk, a éyoñ bia “bulu bo ésaé Tate biyoñ bise.” (1 Bec. 15:58) Éyoñ bia “ve éyoñe jangan ése mfa’a ya nkañetane mbamba foé,” bia ye ke dañe simesane minju’u miangan. (Mam. 18:5, Mfefé Nkôñelan) Amu da bo é kui’i na, éyoñ bi ne nkañete, bi tôbane bôte be bili minju’u mia lôt émiangan. Ve éyoñ ba yé’é yeme Yéhôva a tôñe memvinda mé, ényiñe jabe ja tyendé, a jam ete da soo be abui mevak. Éyoñ bia yene nalé, bia tu’a bi ndi nleme na Yéhôva a ye ke ôsu a nyoñe bia ngab. Ndi nlem éte nje ja volô bia na bi ba’ale mvo’é jangan, teke tyelé nleme yôp. Sita éziñ a mbe a kone’e nlem a yene’e fe émien zezé a nga bo’olô na, bia bi fo’o abui mevak éyoñ bia kañete mban. A jô na: “Éyoñ me ne mban ésaé nkañete, nalé a volô ma na me bi mbamba b’asimesan a na me bi mevak. Ma buni na nalé a kui amu ésaé nkañete ja bo na me subu Yéhôva bebé.”

10. Nkañete Brenda wo ye’ele wo jé?

¹⁰ Bi tame kobô ajô sita mfe, Brenda. Ba ngo jé bebaane ba kone ngul ôkon ba loone nkobô Fulasi na sclérose en plaques. Brenda a ne mbôbôk, a wô’ô nyule nte’an éyoñ ése. A kui na a kañete mimbé mimbé biyoñ biziñ, ve a dañe tili bôte bekalate asu na a kañete be. A jô na: “Éyoñ me nga tu’a yemelane na, me vo’o beta bi mvo’é ya minsôn nnôm émo nyi, me nga bi ngule ya beme mis ve ésaé nkañete jam. Ésaé éte ja volô me na me bo teke dañe simesan minju’u miam. Ja ve me ngule ya tu’a fas avale me ne tu’a volô bôte ma tôbane be abôta nkañete ya akônda dam. Ja volô fe ma na me dañe simesan ve mbamba be mam ba yange ma ôsu.”

11-13. (a) Mam mevé minlôman a bôte befe be nga bo me liti’i na be ne benya bemvôé asu Yésus? (b) Aval avé mam mete me nga volô nye?

¹¹ Nté ôse Yésus a mbe a bo’o ésaé nkañete, minlômane mié mi nga kôme liti na mi ne benya bemvôé asu dé. Be nga kôme liti na ba tôñe mejô ma: “Mvôé éziñ é ne kabetane wo a dañe monyoñ.” (Min. 18:24, Mfefé Nkôñelan) Yésus a mbe a nye’e avale bemvôé ete. Éyoñ a mbe si va, teke monyañe wôé éziñe ya abume da a nga buni nye. (Jean 7:3-5) E nga kui kui na bivuvumane bié bi simesane na a so’o étyi. (Marc 3:21) Ve Yésus a nga jô minlômane mié alu a nga kandane lôt a be na: “Mia mi ne ba be nga jibi a ma meve’ele mam été.”​—Luc 22:28, Mfefé Nkôñelan.

¹² E nga kui na minlôman mi kolé Yésus ôbak, ve a nji beme mis bikobe biap, a nga dañe fombô ve mbunane wop. (Mt. 26:40; Marc 10:13, 14; Jean 6:66-69) Alu a nga kandane lôt a be, a nga jô ba be nga wulu ba’aba’a a nye akekui memane na: “Me nga loone mia na bemvôé, amu na mam mese me nga wôk be Ésaa wom, me maneya bo na mi yeme me.” (Jean 15:15, Mfefé Nkôñelan) Teke bisô na bemvôé be Yésus be mbe be va’a nye ngule nyôl. Mvolane wob ésaé nkañete ô nga ve nye nlem angôndô ya avak.​—Luc 10:17, 21.

¹³ Ane ô vaa minlômane mié, Yésus a mbe a bili bemvôé befe, befam a binga, be nga volô nye asu abui mam afe. Abui ya be be e nga bañete nye menda map a ve nye jôme ya di. (Luc 10:38-42; Jean  12:1, 2) Bevok be mbe be kele’e litane nye mulu. (Luc 8:3) Yésus a mbe a bili mbamba bemvôé amu émien a mbe fe mbamba mvôé. A mbe a bo’o bemvôé bé mbamba be mam, teke sili na be bo mam me mbe me lôte be nkôñ. Nde fe, akusa bo na Yésus a mbe teke atañ ayeñ, a nga kañese na zezé bone be bôt é volô nye. A teke bisô na be nga volô nye na a ba’ale mvo’é jé éyoñ a mbe a tele minju’u été.

14-15. Aval avé bi ne bi mbamba bemvôé, a aval avé be ne volô bia?

¹⁴ Mbamba bemvôé ba ye volô bia na bi wulu ba’aba’a a Yéhôva. A mbamba zene ya bi mbamba bemvôé a ne na womien ô tate bo mbamba mvoé. (Mt. 7:12) Jôm ete Kalate Zambe a ye’ele bia na bi belan éyoñ jangan a ngule jangan na bi volô bôte bevok, e dañedañ “bôte be ne tee jôm.” (Beép. 4:28, Mfefé Nkôñelan) Ye wo simesan môt éziñ ya akônda dôé a yi mvolan? Ye ô ne fo’o ke nya môtô nge nkôkon éziñe nlôman? Ye ô ne ke ve nda bôt é ne azoé ésua bidi? Nge wo yeme belane menjeñe mefoé mangan ane jw.org^® a JW Library^®, ye ô ne fo’o volô bobejañ na be’e fe be bu’uban a bidima bi mam bi ne été? Éyoñ bia nyoñ éyoñe ya volô bôte bevok, nalé a soo bia abui mevak.​—Mam. 20:35.

¹⁵ Mbamba bemvôé ba ye su’u bia éyoñ ya minjuk, a volô bia na bi ba’ale mvo’é jangan. Aval Élihu a nga vô’ôlô Job éyoñ a mbe a kobô’ô, bemvôé bangan fe ba ye nyoñ éyoñe ya vô’ôlô bia nté bia kate be  mam bia wô’ôtan. (Job 32:4) Bi nji yiane yange na bemvôé bangan mbe be nyoñe mintyi’an asu dangan, ve nge bi ne fek, bia ye vô’ôlô mbamba melebe ba ve bia, me so’o Kalate Zambe été. (Min. 15:22) David a nga kañese mvolane bemvôé bé teke bo mebun; bia fe bi nji yiane bo mebun éyoñ bemvôé bangan ba yene na jôm éziñ ja jembane bia, bia yiane kañese mvolane wop. (2 Sa. 17:27-29) Te bia ve’ele vuane na avale bemvôé ete e ne dase da so be Yéhôva.​—Jc. 1:17.

16. Kalate Bephilippien 4:6, 7 a liti na a zene fé étam bi ne bi mvo’é ya nlem? Timi’in.

¹⁶ Lañe’e Bephilippien 4:6, 7. Amu jé Yéhôva a jô na bi ne bi mvo’é jé a zene ya “be Krist Yésus”? Amu na mvo’é jangan ja ye libi vengevenge ve bia tu’a wôk a kañese ésaé Yésus a bo mfa’a ya tôé nsôñane Yéhôva. Jame da é ne na, Yéhôva a jamé bia abé dangan a zene ya ntañe Yésus a nga ya’an. (1 Jean 2:12) Nga bia bi ngule nyul éyoñ bia wô’ô jam ete? Jam afe é ne na, Yésus, Njôô ya Éjôé Zambe a ye mane kôme mbia be mam bese Satan ba mbia émo wé ba bo na bi tôbane me. (És. 65:17; 1 Jean 3:8; Nli. 21:3, 4) Nga mejô mete ma yemete ndi nleme jangan? Ja’a na ésaé Yésus a nga ve bia é nji bo tyi’ibi, bi ne tabe ndi na a ne a bia, a na a su’u bia mbia biyoñe bia nyiñe bi. (Mt. 28:19, 20) Nga e yeme nalé a bo na bi bi ayo’o nlem? Ye é se ke été na, éyoñ bi bili ngule nyul, ndi nlem a ayo’o nlem, nalé a bo na mvo’é ya minleme jangan é yem a ne sen ékanga?

17. (a) Aval avé Kristen é ne ba’ale mvo’é ya nleme jé? (b) Mejô me Yésus ya kalate Jean 16:33 ma liti na bi ne ngule ya bo jé?

¹⁷ Nde ñhe, aval avé ô ne ba’ale mvo’é ya nleme jôé to’o éyoñ minju’u mi kuiya wo afôla afe? Wo yiane jeñe na ô vu Yésus. Jam ôsu, ye’elan, ye’elan, ye’elane Zambe mban teke jô’é. Jame baa, kele’ ôsu a bo Yéhôva mewôk, a kañete’ a ayoñ ése to’o éyoñ nalé a ne ayaé. Jame lale, sili’i bemvôé bôé mvolan éyoñ ô tele meve’ele. Nalé é bo na mvo’é Yéhôva é ba’ale nleme wôé a asimesane dôé. Nge ô bo mam mete mese, ane Yésus, teke meve’ele méziñe wo ye kate dañ.​—Lañe’e Jean 16:33.