BE NE belan éfia be nga kôñelane na “wagon” Nkôñelane ya mfefé émo asu na be kobô ajô aval bewagon ése. (Mame mi. 8:28, 29, 38) Ve jame da wagon mmimia’a ya Éthiopie ô mbe ô bete a mbe a yiane bo anen abui a lôte bone bewagon bezimbi be mbe be bela’ane be asu bita, nge ki asu bone minlôman. Bi tame zu yene mame méziñe me nga bo na bi su’ulane jô nalé.

Mmimia’a ya Éthiopie ô mbe ô bili beta asu ésaé, ô nga bo fe ayap dulu. A mbe “mbo ésaé Candace, njô bôte minga ya Éthiopie, nnye a mbe a jô’é akume dé ése.” (Mame mi. 8:27) Éthiopie é mbe é taté Soudan akekui Sud ya Égypte ya melu ma. To’o môte ate a nji yiane mane bo dulu éte ése a bete wagon wua, ve a mbe a yiane bi mimbe’e amu dulu éte é mbe ayap. Bewagone béziñe be mbe be belane be asu mulu ntet mimbu ôsu .É.J., be mbe be bili minka minyine be too fe mbutane yôp. “Avale Bewagon éte é mbe ndam é be’e fe abui mimbe’e, é mbe fe é yiane volô na bôte be bo ayabe mulu,” aval kalate Acts—An Exegetical Commentary a jô.

Mmimia’a ya Éthiopie ô mbe ô lañe’ e éyoñe Philippe a nga ke vôm ô mbe. Nkañete wo liti na “Philippe a nga mate fefele wagon a wô’ôk ane môte ya Éthiopie a lañe kalate nkulu mejô Ésaïe tyiñe yôp.” (Mame mi. 8:30) Bewagon asu mulu be nji be be wulu’u avôl. Mbôle bewagon bete be mbe be wulu njem, nalé a mbe ve volô mmimia’a ya Éthiopie na ô bi fane ya lañ, a na Philippe a tôñe wagon ate a mebo a ke koone nye.

Mmimia’a ya Éthiopie ô “nga jô Philippe na a ji’a bet a tabe nye fefel.” (Mame mi. 8:31) Be mbe be kôme’e bewagon béziñe asu nkeane mbil, éyoñe bekee mbile be mbe be dañe été be mbe be tebe’e tetele. Ve bewagon be mbe nkôman asu mulu be mbe be yiane bi bito avale Philippe ba mmimia’a ya Éthiopie be mbe ve tabe si.

A zene ya mame bia koone me kalate Mame minlôman kabetôlô 8 a minkañete mife ya mame me nga bobane melu mvus, bekalate bangane be ndôme liti bive’ela bi mmimia’a ya Éthiopie ô bete beta wagon, sake mone wagon bezimbi be mbe be bela’ane nye asu bita nge nyi be mbe be bela’ane nye asu bone minlôman.