1. Amu jé môse Mesimesa’ane ô ne môse wo dañe mimôse mise ya mbu? (Luc 22:19, 20)

 ASU bebo bisaé be Yéhôva, Mesimesa’ane a ne môse wo dañe mimôse mise ya mbu. Teke jam afe Yésus a nga jô beyé’é bé na be li’i be simesan ane ô vaa jam éte. (Lañe’e Luc 22:19, 20.) Bi bili abui beamu ya tabe Mesimesa’ane, bi tame zu yene beamu béziñe ya été.

2. Beamu bevé ba bo na bi yange Mesimesa’ane a ôjeja’a ôse?

² Mesimesa’ane a volô bia na bi tu’a bindi mfi ya ntañ, a na bi yene bibotane bia bi a zene ya ntañ. A volô fe bia na bi yeme mame bi ne bo asu na bi liti na bia nyane ntañ. (2 Cor. 5:14, 15) A volô fe na bobejañ a besita be bi fane ya veane ngule nyul. (Rom. 1:12) Mbu ôse, bobejañ a besita ba tabe ki fe bisulane be wô’ô zu tabe Mesimesa’ane, bevo’o ya été be wô’ô tyi’i na ba bulane be Yéhôva éyoñe ba yen ane bobejañ a besita ba nyoñe be a meva’a mese. Mame be wô’ô jô a bo Mesimesa’ane me wô’ô nambe abui bôt, a tindi be na be kañese ayé’é Kalate Zambe. Mame mete mese me wô’ô fo’o bo na Mesimesa’ane a bo môs ô ne ngum aval asu dangan!

3. Amu jé bi ne jô na Mesimesa’ane a bo na bobejañe ya si ése be tabe nlatan? (Fombô’ô fe fôtô.)

³ Bia tabe fe Mesimesa’ane amu ma ve bia fane ya kañe Yéhôva ngum aval a bobejañe ya si ése meku’u menyine môse wua. Bengaa be Yéhôva ya si ése be wô’ô sulane mame ngô’é asu Mesimesa’ane éyoñe nlô jôbô a nga ke bômbô si. Bia bese bi wô’ô vô’ôlô nkañete wo liti mfi ya ntañ. Bi wô’ô yia bia ya ékaña’a bibaé mvuse ya valé be wô’ô lôt a fembé a  wone mo mo, be wô’ô bo meye’elane menyin, a memane ya meye’elane mete mese bôte be wô’ô jô a nleme wop ôse na amen. E zañe jôm ane mewolo 24, bikôane bekristene bise ya si bi wô’ô tôñe nta’ane mam ôte. Ye wo ve’ele simesan aval meva’a Yéhôva ba Yésus be ne wôk éyoñe ba yene bi va’a be akiba si ése meku’u menyin aval éte?

4. Jé bia zu yen ayé’é di?

⁴ Ayé’é di, bia zu jeñe biyalane ya minsili mi: Aval avé bi ne kômesane minleme miangan asu Mesimesa’ane? Aval avé bi ne volô bôte bevo’o na be bu’ubane Mesimesa’ane? Aval avé bi ne volô bobejañ a besita ba tabe ki fe bisulane na be zu tabe Mesimesa’ane? Biyalane ya minsili mite bia ye volô bia na bi tabe nkômesan asu beta môs ate.

AVALE BI NE KÔMESANE MINLEME MIANGAN ASU MESIMESA’ANE

5. (a) Amu jé bia yiane bindi mfi ya ntañ? (Besam 49:7, 8) (b)  Jé vidéo Amu jé Yésus a nga wu a te ye’ele wo?

⁵ Beta jame wua a ne volô bia na bi kômesane minleme miangan asu Mesimesa’ane a ne éyoñe bia tu’a bindi mfi ya ntañ Yésus a nga ve. Teke jôm éziñe bi mbe ve bo asu na bi kôté biabebien nsem a awu. (Lañe Besam 49:7, 8; Fombô’ô vidéo a ne nlô ajô na Amu jé Yésus a nga wu?) a Ajô te Yéhôva a nga bo ngume nta’ane mame asu na Yésus a ve ényiñe jé asu na a yii bia. (Rom. 6:23) Yéhôva ba Yésus be nga nyume bebiene mam asu na be bo de, nté bia ye tu’a bindi ntañ Yéhôva ba Yésus be nga ve asu dangan, nalé a ye volô na bi tu’a nyane ntañ. Bi tame zu yene fo’o ve abime bone be mame béziñe Yéhôva ba Yésus be nga nyume bebien asu na bi bi ntañ. Ve ôsusua na bia yene mame mete, bi tame taté jeñe na bi yeme jé ébien é ne ntañ.

6. Jé é ne ntañ?

⁶ Ntañ ô ne tañe ba ya’an asu na be kôté jôm éziñ. Adam, môt a binam ôsu, a nga téban a too teke ayeñ. Éyoñ a nga sem a nga jañele fane ya nyiñe nnôm éto sake ve asu dé étam ve asu bone bé bese. Asu na bi beta bi mame Adam a nga jañele Yésus a nga ve ényiñe jé é mbe teke ayeñe metuna’a. Ényiñe jé ése a nga nyiñe si va, Yésus “a nji bo nsem éziñ, a be nji koone medu’ane méziñ anyu dé.” (1 P. 2:22) Éyoñe Yésus a nga wu a mbe teke ayeñ, ényiñe jé é mbe fo’o ve ane ényiñ Adam a nga jañele.—1 Cor. 15:45; 1 Tim. 2:6.

7. Minju’u mivé Yésus a nga tôbane mie si va ?

⁷ Yésus a nga bo Ésa wé ya yôp été mewôk, akusa bo a nga tôban abui minju’u si va. Éyoñe Yésus a nga too mongô, a nga suu émiene si éjôé bebiaé bé be mbe be be’e metyi ya abé, a too ki na émien a mbe teke ayeñ. (Luc 2:51) Éyoñe Yésus a mbe ésoé, éko éziñe bôte béziñe be nga tindi nye na a bo bebiaé bé a Yéhôva melo, ve Yésus a nji tôñe be. Éyoñ a nga bo nya môtô, Yésus a mbe a yiane tebe ne bip éyoñe Satan a mbe a ve’ele nye, to’o éyoñe Satan Diable a nga jô nye na a bo teke beta kañe Zambe. (Matt. 4:1-11) Satan a nga jeñe mevale mese ya bo na Yésus a sem asu na a bo teke ya’ane ntañ.

8. Minju’u mivé mife Yésus a nga tôbane mie?

⁸ Nté Yésus a mbe a bo’ok ésaé nkañete jé si va, a nga tôban angôndô ya abui meve’ele. Besiñe bé be nga tibili nye a jeñe fe na be wôé nye. (Luc 4:28, 29; 13:31) É nga sili fe na a jibi beyé’é bé amu be mbe be be’e metyi ya abé. (Marc 9:33, 34) Ôsusua na ba wôé nye, be nga tibili nye a samele  nye. Be nga su’ulane tyelé nye élé ane ñwôé bôt, a nga wô’ô angôndô ya mintaé. (Héb. 12:1-3) A nga yiane fe jibi minju’u a nga su’ulane tôbane mie éyoñ a mbe a tyele élé mintaé teke na Yéhôva a kamane nye. b—Matt. 27:46.

9. Wo yene ntañ Yésus a nga ve aya? (1 Pierre 1:8)

⁹ Teke bisô na Yésus a nga wô’ô angôndô ya mintaé éyoñ a nga ve ényiñe jé asu dangan. Éyoñe bia simesane mame mese Yésus a mbe nkômesane ya bo asu dangan, nalé a tindi bia na bi tu’a nye’e nye.—Lañe’e 1 Pierre 1:8.

10. Mame mevé Yéhôva a nga nyum émien éyoñ a nga ve ntañ?

¹⁰ Jé ke bi ne jô a lat a Yéhôva? Mame mevé Yéhôva a nga kañese nyum émien asu na Yésus a ve ényiñe jé asu dangan. (Mink. 8:30) Élat é ne zañe Yésus ba Yéhôva ja dañ aval élat ése ésa ba mon be ne ngule ya bi. Teke bisô na Yéhôva a nga wô’ô angôndô ya mintaé éyoñ a nga yene minju’u mone wé a nga tôbane mie, be nga tibili nye, be bene fe vô’ôlô nye.

11. Nyoñe’ éve’ane ja liti avale Yéhôva a nga wô’ôtan éyoñ be nga wôé mone wé Yésus.

¹¹ Mbiaé ase a jañeleya mon a kôme yem aval avé jam éte da bo mintaé nlem. Bia kôme yeme na ndi nleme ya ñwômane miñwuan é ne été, ve nalé a vaa ki mintaé bia wôk éyoñ môte bia nye’e a wu. Éve’an éte ja volô bia na bi kôme yeme wôk avale Yéhôva a nga wô’ôtan éyoñ a nga yen édima Mone jé é tôbane minjuk a wu mbu 33 É.J. c—Matt. 3:17.

12. Jé bi ne bo ôsusua na Mesimesa’ane a boban?

¹² Ôsusua na Mesimesa’ane a kui, nga ô ne jeñe na ô yé’é abui mam a lat a ntañ ayé’é étame dôé nge ke éyoñe wo bo ayé’é ya nda bôt? Bela’ane Ékpwelé asu ayé’é Bengaa be Yéhôva nge ke bekalate befe ya Tin ékôan asu na ô tu’a fa’a nlô ajô ôte. d Va’a fe ngule ya tôñe nlañane ya Mesimesa’ane bia koone wô Ényiñe bekristen a ésaé nkañete jangan—kalate bisulan. Te vuane yene vidéo a ne ngum avale ya éfuse ya môs asu Mesimesa’ane. Éyoñe bi maneya kômesane nleme wongan asu Mesimesa’ane, nalé a ye ve bia fane ya yeme volô bôte bevo’o na be fe be yene mfi ya Mesimesa’ane.—Esdr. 7:10

 VOLÔ’Ô BÔTE BEVO’O NA BE BU‘UBANE MESIMESA’ANE

13. Jam avé bi ne taté bo asu na bi volô bôte bevo’o na be bu’ubane Mesimesa’ane?

¹³ Aval avé bi ne volô bôte bevo’o na be bu’ubane Mesimesa’ane? Jam ôsu é ne na bi bañete be. Ane ô vaa na bi ne bañete bôte bia kañete, bi ne fe tili biyôlé bi bôte befe bia kômbô bañete. A ne bo bivuvumane biangan, bôte bia bebe bia saé, bongô be sikôlô bevok, nge ke bôte befe. To’o bi nji bi abui mefebe me mbañete, bi ne lôme bôte belien e betéléfône a betablette. Za a yem, éko éziñe bia ye bo fe’e ne vema éyoñe bia ye yen abime bôte da ye zu tabe Mesimesa’ane!—Eccl. 11:6.

14. Va’a éve’ane ja liti na é ne mfi na be ve môt afebe mbañete nge lôme nye lien asu na a zu tabe Mesimesa’ane.

¹⁴ Te bia ve’ele simesane na é nji bo mfi ya beta bañete bôte ba yeme na Mesimesa’ane a ye boban. Môs éziñ, sita nnôm a nji bo Ngaa Yéhôva a mbe fe’e ne vema éyoñe nnôm a nga kate nye na ba nye ba ye tabe Mesimesa’ane ya awu Yésus nsamba. Amu jé sita ate a mbe fe’e ne vema? Amu a mbe a jaéya bañete nnôme na a zu tabe Mesimesa’ane ve a nji bo de môs éziñ. Nde amu jé nnôm a nga kañese zu tabe Mesimesa’ane? A nga yalane minga wé na: “Be nga ve ma afebe mbañete,” mvendé éziñe ba be nye be mbe be maneya yembane nje é nga ve nye afep mbañete. Nnôme sita ate a nga tabe Mesimesa’ane mbu ôte, a nga bo fe de abui mimbu mvuse ya valé.

15. jé bia yiane ba’ale ôsimesan éyoñe bia bañete bôte Mesimesa’ane?

¹⁵ Bia yiane ba’ale ôsimesane na bôte bia bañete be ne bi minsili—e dañedañe nge be ngenane teke tame tabe ésulane jangane môs éziñ. É ne mvo’é na ô simesan avale minsili be ne sili wo a jeñe biyalane ya été. (Col. 4:6) Éve’an é ne na, bôte béziñe be ne sili na: ‘Jé ja ye bobane Mesimesa’ane?’ ‘A ye tabe nté mbé?’ ‘Avale mbot avé ma yiane jaé?’ ‘Ye ba ye sili ma moné?’ ‘Ye ba ye zu ba wulu nkobe mo mo?’ Éyoñe bia bañete môte Mesimesa’ane bi ne jô nye tyi’ibi na: “Ye ô bili minsili miziñ?” Mvuse  ya valé yala’ane minsili mié. Éyoñe bia bañete môte Mesimesa’ane bi ne liti nye vidéo a ne na Simesa’an awu Yésus a nyu a ne na Jé ja boban Aba Éjôé? Ô ne fe liti nye nlô ajô 28 ya kalate Bu’uba’an ényiñ nnôm éto! Nlô ajô ôte ô bili angôndô ya mbamba be mam.

16. Minsili mivé bôte bia bañete Mesimesa’ane be ne bôône bia?

¹⁶ Éyoñ abui bôt é maneya tabe Mesimesa’ane, é wô’ô beta bi minsili mife. Be ne sili amu jé môt éziñ a nji di fembé nge ke nyu won, nge ke amu jé tyôtyoé bôt étame nje ja te di fembé a nyu won. Be ne fe sili na Mesimesa’ane a boban biyoñe tañ aya mbu. Éko éziñe be ne fe jeñe na be yemelane nge nde bisulane Bengaa be Yéhôva bise bia bobane nalé. Akusa bo abui biyalane ya minsili miziñ é wô’ô vebane nkañete ya Mesimesa’ane, ve môt a tabe Mesimesa’ane éyoñ ôsu a yi na a tu’a yeme mame mefe. Nlô ajô ô ne Jw. org na: “Amu jé avale Bengaa be Yéhôva ba bo Mesimesa’ane da selan a avale miñyebe mivo’o mia bo?” ô ne volô wo na ô yalane minsili miap. Bia kômbô bo mame mese bi ne ngule ya bo ôsusua na Mesimesa’ane a boban,—éyoñe Mesimesa’ane a boban, a mvuse Mesimesa’ane—asu na bi volô bôte be bili “mbamba été nsisime” na be yene mfi Mesimesa’ane.—Mame mi. 13:48.

VOLÔ’Ô BÔTE BE VOEYA NSISIM

17. Aval avé bemvendé be ne volô bôte be maneya voé nsisim? (Ézéchiel 34:12, 16)

¹⁷ Éyoñe ya Mesimesa’ane, aval avé bemvendé be ne volô bôte be maneya voé nsisim? Lita’ané be na mia nyoñe ngap a be. (Lañe’e Ézéchiel 34:12, 16.) Ôsusua na Mesimesa’ane a boban, jeñe’e na ô loon abime bôt é maneya voé nsisim ô ne ngule ya loon. Liti’i be na wo nye’e be a na ô bili nkômbane ya bo mame mese ô ne ngule ya bo asu na ô volô be. Bañete’e be na be zu tabe Mesimesa’ane. Nge be so, nyoñe’e be a ôsesa ôse. Mvuse Mesimesa’ane kele’e ôsu a jome bidima bi bobejañ a besita bite, a va’a be mvolane ya nsisime wo sili asu na be beta bulane be Yéhôva.—1 P. 2:25.

18. Aval avé môt ase ya be bia a ne volô bôte be maneya voé nsisim? (Beromain 12:10)

 ¹⁸ Bôte bese ya ékôane bekristene be ne volô bôte be maneya voé nsisime na be zu tabe Mesimesa’ane. Be ne de bo aval avé? Éyoñe ba liti be nye’an, éyoñe ba yeme nyoñe be, a éyoñe ba liti be ésemé. (Lañe’e Beromain 12:10.) Te vuane na é nji be tyi’ibi asu bidima mintômba bite na bi beta zu tabe Mesimesa’ane. Éko éziñe be mbe be ko woñe na ba ye ke nyoñe be mvo’é. e Ajô te, te sili be minsili mi ne ndeñele be nge jô mame me ne kolé be ôbak, nge bo na be wô’ô ôson. (1 Thes. 5:11) Bobejañ a besita bete be ne bobenyañe bangan. Bi ne angôndô ya meva’a ya beta kañe Yéhôva a be.—Bsa. 119:176; Mame mi. 20:35

19. Mfi ôvé bia bi éyoñe bia simesan awu Yésus?

¹⁹ Bi ne mevak amu Yésus a nga jô bia na bi bo bi simesane awu dé éyoñe jia mbu ôse. A bia tu’a kôme wôk amu jé Mesimesa’ane a ne nya mfii. Éyoñe bia tabe Mesimesa’ane, biabebiene bia bu’uban. A bôte bevo’o fe ba bu’ubane nya abuii. (Ésa. 48:17, 18) Nye’ane bia nye’e Yéhôva ba Yésus wo tu’a fe nen. Bia liti abim avé bia nyan édima jame be nga bo asu dangan. Bia yemete élat é ne zañe bia be bobejañ. Bia volô fe bôte bevo’o na be yem aval avé be ne bi mevak a aval avé be ne ngule ya bu’ubane mbamba be mame ba ye so amu ntañ. Ngo’o nge bia bo mame mese bi ne ngule ya bo asu na bi tabe nkômesan asu Mesimesa’ane ya mbu wu, môse wo dañe mfi mbu!