Bobejañe béziñe be nga yaé bevôme ba biasé binga. Hans, njome bikôane bekristene ya Bolivie a jô na: “Befame béziñe be nga yaé bevôme be nga ye’ele befame na ba yiane yene bebien anen. Avale befam éte da biasé binga b a da simesane na da dañe be.” Shengxian, mvendé ya Taïwan, ja jô na: “Vôme ma nyiñe binga be nji ke yiane ve ôsimesane wop éyoñe befame ba kobô. Nge fam é kate befame bevok ôsimesane minga a te ve nye a lat a jam éziñ, befame bevo’o be ne taté na ba kpwe’ele nye. Befame be wô’ô jô mame méziñe fianga été asu na be liti binga na be ne zezé.

Mbamba jam a ne na to’o môt a te yaé avale vôm avé, môt ase a ne ngule ya tyendé. A ne ngule ya tyendé mbia ôsimesan a ne na befame ba dañe binga. (Éphé. 4:22-24) A ne ngule ya bo de nge a vu Yéhôva. Ayé’é di bia zu yen avale Yéhôva a belane binga, aval avé bobejañe be ne vu Yéhôva mfa’a ya yeme belane binga, aval avé bemvendé be ne liti mbamba éve’ela mfa’a ya semé binga.

AVAL AVÉ YÉHÔVA A YENE BINGA?

Yéhôva a liti angôndô ya mbamba éve’ela mfa’a ya yeme belane binga. Aval ane mbamba Ésa, Yéhôva a nye’e bone bé bese. (Jean 3:16) Bitôtôlô besita bi ne bidima bengone bi Yéhôva. Bi tame zu yene mame méziñe Yéhôva a bo ma liti na a semé binga.

A bo ki ôbangam. Yéhôva a nga té befam  a binga bese éve’ela jé. (Mett. 1:27) A nji té befame be too atyeñ abui nge ke fek abui a lôte binga; nde fe a nji dañe nye’e befam a dañe binga. (2 Minl. 19:7) A nga té befam a binga a fane ya kôme yeme wô’ô mejô mé me ne Kalate wé a bese be ne ngule ya vu mbamba mefulu mé. To’o na ndi nleme jap é ne na be nyiñe si va nnôm éto nge na be ke bo beprêtre yôp été,—Yéhôva a yene mbunane befam a wu binga avale da. (2 P. 1:1.) Da kôme fo’o yené na Yéhôva a nji ke bo ôbangam.

A vô’ôlô be. Yéhôva a bôô évevé a miñyiane mi binga a minju’u ba tôbane mie. Éve’an é ne na a nga vô’ôlô a yalan meye’elan me Rachel a Anna. (Mett. 30:22; 1 Sam. 1:10, 11, 19, 20) A zene ya mfufube nsisim, Yéhôva a nga bo na be tili Kalate Zambe minkañete befame be nga vô’ôlô binga. Éve’an é ne na Abraham a nga bo mewôk éyoñe Yéhôva a nga jô nye na a vô’ôlô melebe me Sara, minga wé. (Mett. 21:12-14) Njô bôte David a nga vô’ôlô Abigaïl. A nga wô’ôtane na Yéhôva nnye a nga lôme nye na a zu lebe nye. (1 Sam. 25:32-35) Yésus fe a nga kôme vu mefulu me Ésa wé, a nga vô’ôlô nyia wé, Marie. (Jean 2:3-10) Bive’ela bite bia kôme liti na beta zene wua Yéhôva a liti na a semé binga a ne éyoñ a vô’ôlô be.

A too be ndi. Éve’an é ne na Yéhôva a nga ve Ève mbe’e ya nyoñe ngap a si nyi ése. (Mett. 1:28) Nalé a liti na Yéhôva a nji be a yene’e na Adam a dañe Ève, ve a mbe a yene’e Ève ane mvolô asu Adam. Yéhôva a nga tabe fe ndi a bekulu mejô be binga ane Débora a Houlda na be lebe ayoñe dé to’o betyi’i mejô a bejô bôt. (Betyi’i me. 4:4-9; 2 Bb. 22:14-20) Melu mangane ma Yéhôva a ve binga mbe’e ya nyoñe ngap ésaé jé. Bitôtôlô besita bite bi ne bekañete mbamba foé, bekpwa’a mefan a bemissionnaire. Ba su’u bisaé melôñ, ésaé nkômane Meba mʼ Éjôé a Bebéthel. Binga béziñe ba saé Béthel bevo’o ki ba su’u ésaé nkôñelane bekalate. Besita bete be ne ane beta nkane bezimbi Yéhôva a belane wô asu na a tôé nsôñane wé. (Bsa. 68:11) Da kôme ñhe yené na Yéhôva a nji yene binga zezé nge yene na be ne mintetek.

AVAL AVÉ BOBEJAÑE BE NE YÉ’É NA BA YENE BINGA AVALE YÉHÔVA A YENE BE?

A bobejañ, nge bia yi na bi yeme nge bia yene binga avale Yéhôva a yene be, bia yiane kôme fase biabebien édo’o été, bia yiane fe fas asimesane dangan a mimboone miangan. Asu na bi bo de da sili bia mvolan, avale dokita a wô’ô belane radio asu na a yeme nge nleme môt ô ne mvo’é, avale te fe mbamba bemvôé a Kalate Zambe be ne volô bia na bi yeme nge avale bia yene binga da ve Yéhôva nlem avak. Jé bi ne bo asu na bi bi mvolan ôte?

Sili’i nya mvôé wôé. (Mink. 18:17) Bi ne ke yene mvôé jangane bi too je ndi, nyi bôte ba yeme na é bili mbamba nlem a mbamba ñyenane mame a sili nye minsili mi: “Wo simesane na ma nyoñe besita aya? Ye ô lôô na ma semé be? Jam avé me ne bo asu na me tu’a be nyoñe mvo’é?” Nge nyo mvôé a kate wo mintyendane wo yiane bo, te bo ôdo. Ve va’a ngule ya bo mintyendane mia sili avôl avôl.

Yeké’é Mejô me Zambe. Mbamba zene ya yeme nge bia nyoñe besita avale da yian a ne éyoñe bia jeñe na bi yemelane nge mimboone miangane mia lu’an a miñye’elane ya Kalate Zambe. (Héb. 4:12) Nté bia yé’é Kalate Zambe, bia yene minkañete mi bôte be nga semé binga a ba be nji bo de. Mvuse ya valé bi ne ve’e mimboone mi bôte bete a émiangan. Nté wo bo jam éte, te lañe ve éfuse jia a su’u mbia ôsimesane ya biasé binga, ve jeñe na ô lañ abui bifuse bia kobô ajô binga ndembene wo ye bi ôsimesane Yéhôva a lat a binga. Éve’an é ne na 1 Pierre 3:7 a jô na ba yiane ve binga “duma aval ane ésua ja jiʼa bôlé.” c Ye nalé a tinane na fam é ne  atyeñ a dañe minga? Teke jôm! Ve’e mejô me Pierre a ma bia koone me Begalate 3:26-29 ma liti na, Yéhôva a nga tobe befam a binga na be ke jôé yôp a Yésus. Éyoñe bia yé’é Kalate Zambe a sili mvôé jangan éziñe bi too je ndi na é kate bia avale bia nyoñe binga, bi ne yé’é na bia ve besita bangan ésemé ja yiane be.

AVAL AVÉ BEMVENDÉ BA LITI NA BA SEMÉ BESITA?

Bobejañe ya ékôane bekristene fe be ne yé’é avale be ne nyoñe besita éyoñe ba vu mbamba éve’ela bemvendé. Aval avé bemvendé ba liti mbamba éve’ela mfa’a ya semé besita? Bi tame zu yene mezene méziñ.

Ba se’e besita. Nlômane Paul ô nga li’i Bemvendé mbamba éve’ela mfa’a ôte. A nga se’e besita mengana bôt été kalate a nga tili ékôane bekristene ya Rome. (Rom. 16:12) Tame ve’ele simesan abime meva’a besita bete be nga wôk éyoñe be nga lañe kalate ate ékôane bekristene jap? Avale te dada bemvendé ba se’e besita asu mbamba mefulu map a ésaé ba bo Yéhôva. Mame bemvendé be ne jô besita me ne bo jam ébiene da sili be asu na be ke ôsu a kañe Yéhôva.—Mink. 15:23.

Éyoñe bemvendé ba se’e besita ba bo de a nlem ôse a ba kôme kate be amu jé ba se’e be. Amu jé? Sita a ne jôé na Jessica a jô na: “É ne angôndô ya mbamba jam éyoñe bobejañe ba jô bia na ‘mbamba ésaé!’ Ve bia dañe nye’e éyoñe bobejañe ba se’e bia asu ngume jame bia bo, ane éyoñe bia bo na bone bangane be tabe ne séé bisulan, nge ke éyoñe bia ve ngule na bi ke nyoñe ñyé’é Kalate Zambe a zu nye Aba Éjôé.” Éyoñe bemvendé ba se’e besita asu ngume jame ba  bo, nalé a bo na be wô’ôtane na be ne édima a na be ne mfi ékôane bekristen.

Ba vô’ôlô besita. Bemvendé be ne éjote nyule ba yeme na ba yeme ki mame mese. Avale bemvendé éte é wô’ô sili besita asimesane dap, be wô’ô kôme baa alo éyoñe besita ba kobô. Éyoñe ba bo de bemvendé ba ve besita ngule nyul a bebiene ba yene mfi ya jam éte. Aval avé? Gerardo, mvendé éziñe ja saé Béthel ja jô na: “Me nga yene na éyoñe ma sili ôsimesane besita, nalé a volô ma na me tu’a yeme bo ésaé jam. Abui biyoñ é wô’ô kui na besita be boya ésaé éziñ ayap a lôt abui bobejañ.” Abui besita é ne bekpwa’a mefane bikôane bekristen, ajô te ba kôme yeme bôte ya mebôta me nkañete ya afôla te. Mvendé éziñ é too jôé na Bryan ja jô na: “Besita bangane be bili angôndô ya abeñe mefulu a mbamba ñyenane mam, be ne nya mfii asu ékôane Yéhôva. Nde ñhe mbu’ubané a ñyemane woba!”

Bemvendé be ne fek ba biasé ki asimesane besita. Amu jé? Mvendé éziñ Edward ja jô na: “Ôsimesane besita ô ne volô bobejañe na be tu’a yeme wô’ô jam éziñ, a nalé a ne volô be na be yeme avale bôte bevo’o ba wô’ôtan.” (Mink. 1:5) To’o mvendé ja ye ke tôñ ôsimesane sita a te ve, ve a yiane nye ve akiba asu ôsimesane wé.

Ba yañele besita. Bemvendé be ne fek ba jeñe fane ya yañele besita. Éve’an é ne na be ne yañele besita na be tabe nkômesane ya wulu bisulane minkañete éyoñe mojañ a ne nduban a nji bo. Be ne fe yañele be na be yeme belane bikpwelé a beminsini asu na be tabe nkômesane ya bo bisaé melôñe nge ke ésaé ya kôme Meba m’Éjôé. Bobejañe ba wulu bisaé Béthel ba yañele besita na be bo abui bisaé aval ane, e yeme ba’ale Béthel, nkusane biôm, mame me moné, e belane beordinateur, a bisaé bife. Bemvendé ba yañele besita ba liti be na be ne mfi a na be too be ndi.

Éyoñe bemvendé be maneya yañele besita, abui ya bebe é wô’ô belane ñyeman ôte asu na be volô bôte bevok. Éve’an é ne na, besita béziñe ba belane atyeñe nlôñane menda dap asu na be volô bôte be nga jañele menda map éyoñ beta ébubua éziñ a nga kui. Besita bevo’o ba belane mame be nga ye’ele be asu na be bo atyeñe ésaé nkañete a asu na be yañele abui besita ésaé éte. Aval avé besita ba yene bemvendé be nga yañele be? Sita Jennifer a jô na: “Éyoñe me mbe me nyoñe’e ngabe nlôñane Meba m’ Éjôé, mojañ a mbe a tebele’ ésaé a mbe a nyoñe’e éyoñe ya yañele ma. A mbe a fombô ésaé ma bo, a se’e fe ma. Me mbe me nye’e me saék a nye, me mbe me wô’ôtane fe na me ne mfi a na a too ma ndi.”

BIBOTANE BIA BI ÉYOÑE BIA YENE BESITA ANE BEKALE BANGAN

Aval ane Yéhôva, bia nye’e biwôlô besita biangan, ajô te bia yene be ane bibu’a ya nda bôte jangan. (1 Tim. 5:1, 2) Bi ne mengo’o dol éyoñe bia saé a be, bia yene fe fane ya saé fufulu a be ane beta mvom. Bi ne mevak éyoñe ba wô’ôtane na bia nye’e be a na bia su’u be. Sita Vanessa a jô na: “Ma ve Yéhôva akiba amu a nga ve ma fane ya bo ébu’a ya nda bôte jé, nje éte é ne njalan a bobejañe ba volô ma na me yeme nsisim.” Sita éziñe ya Taïwan a jô na: “Ma ve Yéhôva a ékôane jé akiba amu ba semé binga, a amu ba nyoñe ngap a be a bo teke biasé asimesane dap. Jam éte da yemete mbunane wom a bo na me tu’a nyane mvome me bili ya bo ébu’a ya nda bôte Yéhôva.”

Yéhôva a ne mevak éyoñ a yene biwôlô bi bobejañe bi bili ôsimesane wé a lat a binga, a éyoñ ba nyoñe be aval émien a nyoñe be. (Mink. 27:11) Benjamin, mojañe ya Écosse a jô na: “Émo ja biasé binga, ve éyoñe binga ba zu nyiin Aba Éjôé, ba kôme yene beta nsela’ane.” Ngo’o nge bia bese bia vu Yéhôva a ve ngule ya nye’e binga, ya semé be a nyane be.—Rom. 12:10.