ASU AYÉ’É 30
Tuka’a nye’e Yéhôva a bôte bevok
“Bi yaé fe nye’an été mfa’a ya mame mese.”—ÉPHÉ. 4:15.
JIA 2 Jôé dôé é ne Yéhôva
ÔBALEBAS a
1. Mame mevé ô nga yem éyoñ ô nga taté na wo yé’é Kalate Zambe?
YE Ô ngenan ô simesan éyoñ ô ga taté na wo yé’é Kalate Zambe? Éko éziñ ô mbe fe’e ne vema éyoñ ô nga yeme na Zambe a bili éyôlé. Nge ki na nlem ô nga bômbô wo si éyoñ ô nga wô’ô na Zambe a di’i ki bôte nkaba’a nduan. Éko éziñ ô mbe ô ye’e wu a mevak éyoñ ô nga wô’ô na ô ne beta yene bôte bôé be nga mane wu a nyiñ a be si va e Paradis.
2. Ane ô vaa na ô nga yé’é benya mejôô ya Kalate Zambe, mintyendane mivé ô nga bo? (Beéphésien 5:1, 2)
2 Nté ô nga ke ôsu a yé’é Kalate Zambe, nté ôte ôse nye’ane wo nye’e Yéhova ô nga tu’a bo ngul. Nye’an ôte ô nga tindi wo na ô tôñe mam ô nga yé’é. Miñye’elane ya Kalate Zambe mi nga volô wo na ô nyoñe mbamba mintyi’an. Ô nga yé’é na wo bo mame me ne zôsô amu wo kômbô ve Zambe nlem avak. Fo’o ve ane mon a vu ésa wé a nye’e, wo fe ô nga vu Ésa wôé ya yôp été.—Lañe’e Beéphésien 5:1, 2.
3. Minsili mivé bi ne sili biabebien?
3 Bi ne sili biabebiene na: ‘Ye nye’ane ma nye’e Yéhôva ô tu’aya bo ngule den a lôt aval ô mbe éyoñe me nga duban? Ane me nga duban, ye ma jeñe na asimesane dam a mimboone miame mi tu’a lu’an a metiñe me Yéhôva—e dañe dañ avale ma liti bobejañ a besita nye’an?’ Nge wo yene na “nye’an ô mbe ô bili atata’a” ô nga voé, te ve’ele bili atek. Bekristene ya ntete mimbu ôsu fe be nga tebe aval été éte. Ve Yésus a nji wua be fé, ajô te bi ne tabe ndi na a ye ke bia wua fé môs éziñ. (Nlitan. 2:4, 7) A yeme na bi ne beta ve ngule na nye’ane bi mbe bi bili atata’a ô beta bo ngul.
4. Jé bia zu yen ayé’é di?
4 Ayé’é di bia zu yen aval avé bi ne ke ôsu a bo na nye’ane bia nye’e Yéhôva a bôte bevok ô ke ôsu a bo ngul. Bia zu yene bibotane biziñe bi ne bi éyoñe bia jeñe na bi tu’a nye’e Yéhôva a bobejañ a besita bangan.
TUKA’A NYE’E YÉHÔVA
5-6. Minju’u mivé Paul a nga tôbane mie nté a mbe a bo’ok ésaé nkañete jé, ve jé é nga volô nye na a ke ôsu a bo Yéhôva ésaé?
5 Nlômane Paul ô mbe meva’a ya bo Yéhôva ésaé, ve jam éte é nji be tyi’ibi éyoñ ése. Paul a mbe a bo’o ayabe mulu, a mulu me nji be tyi’ibi melu mete. Éyoñ a mbe a kele’e mulu mete, biyoñe biziñe Paul a mbe “beangôndô été asôé” a “beangôndô été be so’o be beze mimfaka.” É nga kui fe biyoñe biziñe na besiñe bé be bôme nye. (2 Cor. 11:23-27) Nde fe bobenyañe bé ya nsisime be nji be be liti éyoñ ése na ba ve nye akiba amu mbamba be mame a mbe a bo’ok asu dap.—2 Cor. 10:10; Philip. 4:15.
6 Jé é nga volô Paul na a ke ôsu a bo Yéhôva ésaé? Mame Paul a nga yé’é Kalate Zambe a ma a nga tôbane me ényiñe jé me nga volô nye na a yem avale môte Yéhôva a ne. Paul a mbe a kôme yeme na Yéhôva a mbe a nye’e nye. (Rom. 8:38, 39; Éphé. 2:4, 5) A nalé a nga volô nye na a nye’e Yéhôva angôndô ya abui. Paul a nga liti na a nye’e Yéhôva a zene ya ‘ésaé a nga bo, a nga ke ôsu a saane mimfufup.’—Héb. 6:10.
7. Jé é ne bo na nye’ane bia nye’e Yéhôva ô tu’a bo ngul?
7 Bi ne bo na nye’ane bia nye’e Zambe ô tu’a yaé éyoñe bia yé’é Mejô mé édok été. Éyoñe wo lañe Kalate Zambe, jeñe na ô yemelane jam éfus ése wo lañ é ne ye’ele wo a lat a Yéhôva. Sili’i womiene na: ‘Aval avé nkañete wu wo liti na Yéhôva a nye’e ma? Mame mevé ya nkañete wu ma bo na me nye’e Yéhôva?’
8. Aval avé meye’elane me ne volô na nye’ane bia nye’e Zambe ô tu’a bo ngul?
8 Jam afe é ne bo na nye’ane bia nye’e Yéhôva ô tu’a bo ngul é ne éyoñe bia ye’elane nye môs ôse a kate nye mame mese me ne bia nlem été. (Bsa. 25:4, 5) Mvuse ya valé, Yéhôva a ye yalane meye’elane mangan. (1 Jean 3:21, 22) Khanh, sita ya Asie, a jô na: “Atata’a me mbe me nye’e Yéhôva amu me mbe me yeme nye, ve nye’an ôte ô nga tu’a bo ngul éyoñe me nga yen ane a yalane meye’elane mam. Nalé a nga bo na me bi nkômbane ya bo mame ma ve nye nlem avak.” b
TUKA’A NYE’E BÔTE BEVOK
9. Aval avé Timothée a nga liti na nye’an a mbe a nye’e bobejañ a besita ô tu’aya bo ngul?
9 Éyoñe Paul a nga bo kristen, a nga tôban ésoé ndôman éziñ é too jôé na Timothée. Timothée a mbe a nye’e Yéhôva, a nye’e fe bôte bevok. Ajô te, Paul a nga jô bekristene ya Philipe na: “Me nji bi môte mfe a ne ane [Timothée], nyu a wô’ô mia mintaé.” (Philip. 2:20) Paul a nji se’e Timothée amu a mbe a yeme ta’a mame nge ki amu a mbe a yeme bo minkañete, ve jam é nga dañe nambe Paul é mbe na Timothée a mbe a nye’e bobejañ a besita angôndô ya abui. Teke bisô na bobejañe ya bikôane bekristen a mbe a jome’e be mbe be yange nye a ôjeja’a ôse.—1 Cor. 4:17.
10. Aval avé Anna ba nnôme be nga liti na ba nye’e bobejañ a besita?
10 Bia fe bia jeñe mezene mese na bi volô bobejañ a besita bangan. (Héb. 13:16) Bi tame zu yene jam é nga kui Anna bi nga jô nye ayé’é ya mvus. Anna ba nnôme be nga ke jome bobejañe béziñe mvuse beta ôkôs, ane be nga koone na beta ôkôs ate a nga mane ndaman andile ya nda jap. Ajô te nda bôt éte é nji be é bili mimfubane biyé ya jaé. Anna a jô na: “Bi nga nyoñe biyé biap bi mane bie sôp, bi mane bie kok, a ba’a bie. Mfa’a wongane bi nji yene na bi nga bo étua jam, ve jam éte é nga nambe be a bo na bi bo beta bemvôé azukui den.” Nye’an Anna ba nnôme ba nye’e bobejañ a besita ô nga tindi be na be volô be.—1 Jean 3:17, 18.
11. (a) Aval avé bôte bevo’o ba wô’ôtan éyoñe bia liti na bia nye’e be? (b) Kalate Minkana 19:17 a liti na Yéhôva a wô’ôtan aya éyoñe bia liti bôte bevo’o nye’an?
11 Éyoñe bi ne mbamba nlem a liti bôte bevo’o nye’an, be ne yene na bia ve ngule ya vu Yéhôva. Éko éziñe mbamba nleme wongan a ne nambe be avale biabebiene bi nji be ngule ya simesan. Khanh bia te jô nye yôp a ne mevak éyoñ ése a simesane bôte be nga volô nye. A jô na: “Ma ve bidima besita bise bi nga volô ma abui akiba. Be nga zu me nyoñe nda, be nga bañete ma na me ke di nsamba a be, be nga vé fe mise na me bulane nda mvo’é. Éyoñe di ma kôme yene na ésaé be nga bo é nji be tyi’ibi asu dap. A be nga bo je a nye’an ôse.” É ne été na, sake bôte bese mbe ba ye ve bia akiba amu mvaé bia bo be. Khanh a kobô ajô bôte be nga volô nye a jô’ô na: “Ma yi na me tu’a kôme liti be abim avé me nga nye’e mbamba nleme be nga liti ma, ve ma yeme ki vôme bese be too. Ve Yéhôva a yem, a ma ye’elane nye asu na a ya’ane be señe jam.” Khanh a bele. Yéhôva a yeme mone jam ase bia bo asu na bi liti bôte bevok mbamba nlem, to’o a ne angôndô ya tyôtyoé. A yene mboon ôte ane bia kôlé nye jôm éziñ, a ane mvôla a yiane ya’an.—Lañe’e Minkana 19:17.
Éyoñe môt a yaé nsisim, a jeñe mezene ya volô bôte bevok (Fombô’ô abeñ 12)
12. Aval avé bobejañe be ne liti na ba nye’e ékôane bekristen? (Fombô’ô fe befôtô.)
12 Nge ô ne mojañ, aval avé ô ne liti bôte bevo’o na wo nye’e be a jeñe mezene ya volô be? Ésoé mojañ é too jôé na Jordan é nga sili mvendé éziñ jam a ne bo asu na a tu’a volô ékôane bekristen. Ane mvendé é nga se’e nye asu mintyendan a mbe a boya, a kate nye bone be mame befe a ne ngule ya bo asu na a tu’a bo mfi asu ékôane bekristen. Éve’an é ne na, a nga lebe Jordan na é ne mvo’é na a kui Aba Éjôé ôsusua na ésulane ja taté a batane bôte bevok, na a ve biyalane bisulan, a kañete mban abeñe nkañete dé, a na a jeñe mezene mefe ya volô bôte bevok. Éyoñe Jordan a nga tôñe melebe mete, ane ô vaa na a nga yé’é aval avé a ne bo mame mefe, ve a nga yé’é fe aval a ne tu’a liti bobejañ a besita na a nye’e be. Jordan a nga yé’é na, éyoñe mojañ a bo mvolô ya ékôane bekristen, sake éyoñ éte nje a taté na a volô bobejañ, ve a ke ôsu a volô be.—1 Tim. 3:8-10, 13.
13. Aval avé nye’an ô nga volô Mojañe Christian na a beta bo mvendé?
13 Ye ô nga saé éyoñ éziñ ane mvolô ya ékôane bekristene nge ki ane mvendé? Yéhôva a nji vuan ésaé ô nga bo melu mvus a nye’an ô nga tindi wo na ô bo ésaé éte. (1 Cor. 15:58) A yene fe nye’ane wo ke ôsu a liti. Mojañ a ne jôé na Christian a nga wôk ôlun éyoñe be nga vaa nye mbe’e mvendé. Ve, a jô na: “Me nga tyi’i na ma zu bo jam ése me ne ngule ya bo asu na me ke ôsu a bo Yéhôva ésaé—to’o me nji beta bo mvendé.” Ane éyoñ é nga lôt, a nga beta bo mvendé. Christian a jô na: “Me mbe me ko woñe ya beta bo ésaé mvendé. Ve me nga tyi’i na nge Yéhôva a ko me éngôngol a beta kañese na me beta saé ane mvendé, ma ye bo ésaé éte amu ma nye’e nye a amu ma nye’e bobejañ a besita.”
14. Jé jame sita ya Géorgie a jô é ne ye’ele wo?
14 Bebo bisaé be Yéhôva fe ba yiane nye’e bôte be too be bebé. (Matt. 22:37-39) Éve’an é ne na Élena, sita éziñ a nyiñe Géorgie a jô na: “Atata’a, jam étam é mbe é tindi’i ma na me kañete é mbe nye’ane me mbe me nye’e Yéhôva. Ve avale nye’ane ma nye’e Ésa wome ya yôp été ô nga yaé, nde fe nye’ane ma nye’e bôte bevok ô nga yaé nalé. Me nga ve ngule ya yemelane minju’u be mbe be tôba’ane mie a jam me mbe ve jô be asu na me nambe be minlem. Éyoñ ése ma simesane be, nde fe ma tu’a bi nkômbane ya vôlo be nalé.”—Rom. 10:13-15.
YÉHÔVA A YE BOTANE BIA ÉYOÑE BIA NYE’E BÔTE BEVOK
To’o mone jame wua bia bo asu na bi liti bôte bevo’o nye’an a ne so abui bôt afe bibotan (Fombô’ô abeñ 15-16)
15-16. Avale befôtô ba liti, bibotane bivé bia bi éyoñe bia liti bôte bevo’o na bia nye’e be?
15 Éyoñe bia liti bobejañe na bia nye’e be bia bese bia yene mvom. Éyoñ ébubua ôkone COVID-19 é mbe é ndôme taté, mojañ éziñ a too jôé na Paolo ba minga wé be nga ye’ele abui besita é mbe é ntoo benya bôtô avale be ne yeme kañete a zene ya betéléfôn, betablette, a beordinateur. Sita éziñ a nga taté yen ayaé ya belane minsini wé, mvuse ya valé a nga su’ulane yeme belane nye. A nga belane nye asu na a bañete bibu’a ya nda bôte jé Mesimesa’ane. Bôte ya nda bôte jé 60 be nga tabe Mesimesa’ane a zene ya vidéo conférence. Ngule Paolo ba ngale be nga ve é nga bo mfi asu sita ate a bibu’a ya nda bôte jé. Mvuse ya valé, sita a nga tili Paolo a jô’ô nye na: “Akiba abui amu ô nga ye’ele minnôme mi bôt ane bia. Me vo’o vuan éyoñ éziñ abim avé Yéhôva a nyoñe ngap a bia a abim avé ô nga saé a ngule jôé ése asu na ô volô bia.”
16 Avale minkañete éte é nga ve Paolo beta ñye’elan. Nkañete ôte ô nga volô nye na a bo teke vuane na, nye’ane ñwô wo dañe mfi a lôte ñyemane nge ki atyeñ mboone mame bi nga bialé de. A jô na: “Me nga too njome bikôane bekristen. Ve, ma kôme yene dene na to’o é nga kui na bobejañ a besita be vuane minkañete miam, ve ba ke ôsu a simesane mbamba be mame me nga bo asu dap.”
17. Bibotane bivé bia ye bi éyoñe bia liti bôte bevo’o na bia nye’e be?
17 Éyoñe bia liti bôte bevo’o na bia nye’e be, bi wô’ô bi bibotan éyoñe bi nji bunan. Jonathan, a nyiñe Nouvelle-Zélande a yemete jam éte. Môs Éwônga éziñ e mame ngô’é, me nga yene mojañ a ne nkpwa’a mefan a kañete étame njoñe njoñ e viane si. Ane Jonathan a nga tyi’i na é bo a kañete ba mojañ ate mame ngô’é mese ya môs Éwônga. Éyoñ éte Jonathan a mbe a ngenane teke yem abim avé mvam a nga liti mojañ ate ja ye so nye abui bibotan. Jonathan a jô na: “Éyoñ éte me mbe teke dañe nye’e ésaé nkañete. Ve éyoñe me nga wôk ane mojañ ate a ye’ele, a yen aval avé ésaé nkañete jé é mbe é wumu’u mbamba bibuma, me nga taté na ma kôme nye’e ésaé nkañete. Nde fe bia mojañ ate bi nga bo beta bemvôé, a nga volô ma na me yaé nsisim, na me nye’e ésaé nkañete a na me subu Yéhôva bebé.”
18. Jé Yéhôva a yi na bi bo?
18 Yéhôva a yi na bia bese bi tu’a nye’e nye, a na bi nye’e fe bôte bevok. Avale bia te yé’é bi ne tu’a nye’e Yéhôva éyoñe bia lañe Kalate Zambe, éyoñe bia bindi mame bia lañ, a éyoñe bia ye’elane nye mban. Bi ne tu’a nye’e bobejañ a besita bangan éyoñe bia volô be. Nté nye’ane wongane wo ye yaé, nté ôte ôse bia ye tu’a subu Yéhôva bebé a nda bôte jangane ya nsisim. A bia ye bu’ubane memvôé mangane nnôm éto!
JIA 109 Eñye’ané a nlem ôse
a To’o bi ne mfefé benya mejôô nge ki na bi boya Yéhôva ésaé den a ntoo abui mimbu, bia bese bi ne ke ôsu a yaé nsisim. Ayé’é di bia zu yen aval avé nye’ane bia nye’e Yéhôva a bôte bevok ô ne volô bia na bi ke ôsu a yaé nsisim. Nté bia zu nyoñ éyoñe ya bindi mame mete, jeñe na ô yem abim avé ô yaéya nsisim a aval avé ô ne ke ôsu a bo de.
b Bia te tyendé biyôlé biziñ.