Salomon, ésaa Roboam a nga jôé Israël tañe mimbu 40. (1 Bb. 11:42) A nga wu mbu 997 Ô.É.J. Éyoñ ésaa a wuya, Roboam a nga téé nord ya Jérusalem na a ke nyoñ éto njôé e Sichem. (2 Mka. 10:1) Bi ne simesane na a mbe a sili’i émien nge a ye fo’o kui na, a bi abime fe’e Salomon a mbe a bili. A nji be a buni’i na a ye ji’a tebe aval été da ye sili na, a liti atyeñe meyen mfa’a ya kôme ngule mejô.

Éyoñ Roboam a nga taté na a jôé Israël, ôlun ô mbe ô ngenan abui bôte minlem. Môs éziñ, ayoñ é nga lôme mingume mi bôt mi zu jô nye ne ngeññ na: “Éso a nga bo mbe’e wongan adit: ajô te éyoñe ji, tame bo mbia ésaé éso, a adit mbe’e a nga beté bia, éveves, wôna bi aye bo wo ésaé.”​—2 Mka. 10:3, 4.

Za avale mbia été Roboam a tebe di? Nge a bo ane bôte ba ba jô, nkôñ ényiñe ya nda bôte jé, a wu ya bôte ba saé nda njôô bôt, wo ye sise si. Wôna nge a bene, bôte be ne tebe nye ngame yat. Nde ñhe Roboam a zu bo aya? A nga taté ke yene benya bôtô be mbe bevee melep be ésaa. Ve a nga ke fe yene bisoé ba be nye be mbe ôkala. Ane a nga tôñe melebe map a tyi’i na ayoñ Israël da zu bi éyañ. A nga yalane na: “M’aye kô’ôlane mia mbe’e: ésa wom a nga bôme mia a minkasa, ve ma ma ye bôme mia a alé.”​—2 Mka. 10:6-14.

Sikôlô mbé bi ne nyoñ valé? É ne nya mfii na bi vô’ôlô benya bôtô, Bekristen be ne bitôtôlô nsisim. Mbôle be jaéya yene mam, be ne ji’a yemelan minju’u ntyi’an éziñ ô ne soo bia, a ve bia mbamba melep.​—Job 12:12.

Roboam ve sulan nkane bita wé na ô zu wosane a menda me bôte ma bo éjôé jé éngana’a. Ve Yéhôva a nga lôme nkulu mejô  Schemaeja a ke kate nye na: “Te betan nge ke wosane bobenyoñ bone be Israël: môt ase a bula’an nda jé; amu jam ete da so be ma.”​—1 Bb. 12:21-24. *

E bo te wosan aa? Jam ete e nga yiane ndeñele Roboam abui. Ye sa ke émien nnye a nga kuli anyu na, a ye bôme bôte be ne éjôé jé si “a alé”? Nde ba ye yene nye aya éyoñe ji, nge a bo te wosan a bôte ba bo nye éngana’a? (Ve’e a 2 Minkañete 13:7.) To’o nalé, njôô ba nkane bita wé “be nga vô’ôlô njôane Yéhôva, ve bulan a ke mfa’a be nga ke, aval ane Yéhôva a nga jô.”

Jé jam ete da ye’ele bia? E ne mvo’é na bi vô’ôlô Zambe, to’o mboon ôte wo samele bia mise me bôt. Zambe a botane bôte ba bo nye mewôk, a mvamane fe be.​—Dt. 28:2.

Mboon ôte ô nga soo Roboam za jômô? Roboam a nga jô’é ôvañe wé ya ke wosane mfefé éjôé ya Israël, a taté ñhe na a lôñe bitisone Juda a Benjamin, vôm éjôé jé é mbe. A nga yemete abui bitisone ya été a bo bie “étua ngu.” (2 Mka. 11:5-12) Jam da dañ é ne na, a nga tôñe metiñe me Yéhôva abim éyoñ éziñ. Mbôle menda me bôt awôme ya Israël me mbe éjôé Jéroboam si me nga taté na ma kañe bivuse bezambe, abui bone b’Israël e nga zu Jérusalem na ba zu ‘ve Roboam ngu,’ a su’u nya ékaña’a. (2 Mka. 11:16, 17) Roboam a nga yemete éjôé jé amu a nga bo Yéhôva mewôk.

Ve éyoñ éjôé jé é kômeya tebe ne bip, Roboam a nga bo étua jam. A nga lume nya ékaña’a mvus a taté na a kañe bivuse bezambe. Amu jé a nga bo avale jam ete? Ye nyia wé nnye a nga wone nye, amu a mbe ngon Ammonite? (1 Bb. 14:21) Jam bia yem é ne na, ayoñ ése é nga tôñe nye. Ane Yéhôva a nga jô’é na Shischak, njôô bôte ya Égypte a wôlé abui bitisone ya Juda, akusa bo Roboam a nga yemete bie.​—1 Bb. 14:22-24; 2 Mka. 12:1-4.

Ajô é nga tu’a ndaman éyoñ Shischak a nga suane Jérusalem, vôm éjôé Roboam é mbe é tele. Ane Yéhôva a nga lôme Schemaeja a ke kate Roboam a bivete bié foé nyi: “Mi li’iya ma, ajô te ma fe me li’iya mia mo be Schischak.” Roboam a nga bo aya éyoñe Yéhôva a komekaneya nye nalé? Bible a liti na a nga yeme nyoñe minkomekan, a jô na: “Bivete ya Israël ba be njô bôt be nga je’ebe minleme si, ane be nga jô na, Yéhôva a ne zôsô.” Ane Yéhôva a nga kôté Jérusalem a njôé wé.​—2 Mka. 12:5-7, 12.

Mvuse ya valé, Roboam a nga ke ôsu a jôé Israël ya Sud. Ôsusua na a wu, a nga mane dase bone bé abui biôm, amu a nji be a yii na be ndeñele Abija, ndômane jé é nga li’i a éto njôô bôt. (2 Mka. 11:21-23) Valé nye ñhe Roboam a nga yeme bo.

Akusa bo nalé, Yéhôva a nji mvamane Roboam. Kalate Zambe a wôlôkan éjôé jé a jô’ô na: “A nga bo mam me ne abé.” Amu jé? “Amu a nji ve nleme wé na a, a jeñe Yéhôva.”​—2 Mka. 12:14.

Entame fasané: Roboam a nga bo Zambe mewôk biyoñ biziñ. A nga bo fe mbamba be mam béziñ asu ayoñe Yéhôva. Ve a nji be a bili ngul élat a Yéhôva, nge ke nkômbane ya ve nye nlem avak. Ane a nga taté na a sem, a kañe bezambe befe. Ô ne sili na: ‘Roboam a mbe a vô’ôlô’ô Yéhôva amu jé, ye amu mise me bôt, ye amu a mbe a kômbô’ô ve Yéhôva nlem avak? (2 Mka. 11:3, 4; 12:6) E memane ya ényiñ jé, a nga beta bo mbia be mam. A nji fo’o vu émvame jé, njôô bôte  David. David a nga kobe fo’o biyoñ biziñ, ve é nga yené ne sañesañ na a nye’e Yéhôva nya nye’ane, na a  telé nya ékaña’a ôsu, a na a jôban abé dé nya njôbane.​—1 Bb. 14:8; Bs. 51:1, 17; 63:1.

Teke bisô na, ényiñe Roboam é ne ve bia abui miñye’elan. A ne mbamba jam na, môt a nyoñ ngap a nda bôt jé, a na, a jeñe na a bo mbamba jam. Ve jam da dañe mfi, a jam bia yiane taté bo é ne na, bi su’u nya ékaña’a.

Bia bo de éyoñ bia ba’ale ngul élat a Yéhôva. Avale bia sulu nduan na nkaba’a ô bo te dim, aval te fe bia yiane yé’é Bible mban, bi bindi’i a ye’elan Yéhôva, na nye’an bia nye’e nye ô bo te sé’éban. (Bs. 1:2; Bero. 12:12) Nye’an ôte nwô wo ye tindi bia na bi kômbô ve Yéhôva nlem mvaé éyoñ ése. Nwô fe wo ye tindi bia na bi jôban éyoñ bia te bo abé. Bia bene vu Roboam, bi bia ye ke ôsu a su’u nya ékaña’a.​—Jd. 20, 21.