1. Jam avé da bo na bôt be dañe betit?

JAME da da bo na bôte ba betit be selan é ne na, Zambe a nga ve môta binam mone môte ya nlem. Nalé a so ôteñ. Adam ba Ève be nga sobô éyoñ be nga tyam atiñe Yéhôva. Nalé a liti na mone môte ya nleme wop a mbe a bôme’e be.

2. Amu jé bia jô na mone môte ya nleme wongan a ne ane vôlañ? (Fombô’ô fôtô ya atata’a.)

² Bôte be nji kôme ye’ele mone môte ya nleme wop ba funane sitima a bili vôlañ a ndamaneya. E wulu a avale sitima ete a ne telé môt mbia été. Mfebe a ndene mañ bi ne volô na sitima a téé tyi’ibi. Éyoñ vôlañ ya sitima a ne mvo’é, a volô ndutu sitima na a yeme wulu sitima. Bi ne jô na mone môte ya nlem a ne ane vôlañ. Mone môte ya nlem a ne jôm ja tindi bia na bi yemelan jam é ne mvaé a di e ne abé; a ne fe volô bia na bi nyoñe mbamba mintyi’an. Ve asu na a volô bia, bia yiane kôme ba’ale nye.

3. Jé é ne kui bia nge bi nji kôme ye’ele mone môte ya nleme wongan?

 ³ Éyoñ bi nji kôme ye’ele nye, mone môte ya nleme wongan a vo’o kamane bia na bi bo mbia jam. (1 Tim. 4:1, 2) Avale mone môte ya nlem ete e ne bo bo na, bi yene na ‘abé é ne mvaé.’ (És. 5:20) Yésus a nga bemene beyé’é bé na: “Awolo de aye bo éyoñ bôt be aye wôé mia, be aye simesane na be abo Zambe ésaé.” (Jean 16:2) Jam ete é nga kui bôte be nga wôé Étienne, a bôte befe be mbe ane be. (Mam. 6:8, 12; 7:54-60) Nne môt a jô na a kañe Zambe a ne yeme buni aya na, a bo mvaé, a too ke na a tyame metiñe mé bôsa avale di? (Nk. 20:13) Teke fo’o bisô, mône môte ya nleme wop a ne ndaman.

4. Jé é ne volô bia na bi ba’ale mone môte ya nleme wongane mvo’é?

⁴ Jé é ne volô bia na bi ba’ale mone môte ya nleme wongane mvo’é? Metiñ a miñye’elane ya Bible mi ne nya mfii “mfa’a ya ñye’elan, mfa’a ya nleban, mfa’a ya sôane bôte zôsô.” (2 Tim. 3:16) Ajô te, bia yiane kôme yé’é Bible, bi bindi’i mam me ne été, bi va’a fe ngule ya bo me, ndembene mone môte ya nleme wongan a ye ji’a kate bia ôsimesane Zambe, a volô bia na bi nyoñ mbamba mintyi’an. Bi tame zu yene metiñ me Yéhôva a miñye’elane ya Bible mi ne volô bia na bi ye’ele mone môte ya nlem wongan.

5, 6. Aval avé metiñe me Yéhôva me ne soo bia mvolan?

⁵ Asu na metiñe me Zambe me volô bia, bi nji yiane su’u ve na bia lañe me, nge ke kôme yeme me. Bia yiane fe kôme nye’e me, a semé me. Mejô me Zambe ma jô na: “Vina’an abé, a nye’e mvaé.” (Amos 5:15) Nne bi ne bo de aya? Bia yiane jeñe na bi yene mam ane Yéhôva. Bi tame nyoñ éve’an: Bi tame jô na wo kate kôme ke ôyo. Éyoñ éte dokita a tili wo sport, bidi wo yiane di, a mintyéndane wo yiane soo mie ényiñe jôé. Éyoñ ô tatéya biañ éte, ô nga yene mvolan. Nga wo ye tu’a nye’e dokita ate amu biañ a te tili wo ja volô wo?

⁶ Aval ete fe, Nté wongan a nga ve bia metiñ me ne volô bia na bi nyiñe mvo’é, a sa’ale minju’u miziñ. Tame simesan abime mbamba be mam bia bi, éyoñ bia sa’ale minsos, nkpwala, wup, mbia nkeane binoñ, évô, a mam bemvi’i. (Lañe’e Minkana 6:16-19; Nli. 21:8) Éyoñ mbamba jam a kui bia, amu bia te tôñ atiñe Yéhôva, nalé a bo na bi tu’a nye’e nye, a na, bi tu’a fe nye’e metiñe mé.

7. Nlañan a mbidan minkañete miziñe ya Bible bi ne volô bia na bi bo jé?

⁷ Nte’e na bi nji bo ntindane ya taté yô nkôñ ôsusua na bia tyi wô. Bive’ela ya Bible biziñ bi ne volô bia na bi nyoñ ñye’elane ya mbia mimboon. Minkana 1:5 a jô na: “Ñyeme mam a ye wôk, a kô’ôlan ñyeman.” Éyoñ bia lañ a bindi minkañete mi bôt mi ne Bible été, bia nyoñ mbamba miñye’elan. Tame simesane mintaé David a nga wôk éyoñ a nga tyam atiñe Yéhôva, a bo mejian a Bath-schéba. (2 Sa. 12:7-14) Éyoñ bia lañ nkañete ôte a bindi wô, bi ne sili biabebiene na: ‘Aval avé David a mbe ve sa’ale mintaé mite? Nge ma fe ma tebe aval été éte, ye ma ye fo’o bo  ngule ya sa’ale mie? Ye ma ye tup ane Joseph, ye ma ye ku ébé ane David?’ (Met. 39:11-15) Éyoñ bia simesane minju’u bi ne tôbane mie nge bia tyam atiñe Yéhôva, nalé a ve bia ngule ya ‘vini abé.’

8, 9. (a) Mone môte ya nlem a volô bia jé? (b) Aval avé miñye’elane mi Yéhôva a mone môte ya nlem ba saé fufulu?

⁸ Bi ne fo’o bo ngule ya sa’ale mam Zambe a vini. Ve Bible a nji mane la’ase mam mese bia yiane sa’ale. Nde ñhe, aval avé bi ne yeme na jame si, jame ka, é ne mvo’é nge abé mise me Zambe? Éyoñ éte nje ñhe mone môte ya nleme wongan a yiane taté ésaé jé.

⁹ Yéhôva a nga ve bia mbamba miñye’elan mia yañele mone môte ya nleme wongan. Émien a jô na: “Me ne Yéhôva Zambe wôé, nyô a ye’ele wo ane w’aye yen mvolan, nyô a wulu wo zene wo yiane ke.” (És. 48:17, 18) Éyoñ bia tu’a fase miñye’elane ya Bible, bia sôan, a mé, a yañele mone môte ya nleme wongan. Nalé a volô bia na bi nyoñ mbamba mintyi’an.

10. Jé ba loone na miñye’elane ya Kalate Zambe, a aval avé Yésus a nga yeme belane mie?

¹⁰ Miñye’elane ya Kalate Zambe mi ne benya mejôô ba volô môte na a fas ôsusua na a nyoñ ntyi’an éziñ. Asu na bi wô’ô miñye’elane ya Kalate Zambe, bia yiane taté wô’ ôsimesane Môt a ve mie, a amu jé a ve bia mie. Éyoñ a mbe si va, Yésus a nga ve beyé’é bé miñye’elan miziñ, na a volô be na, be yemelan mam mintyi’ane miziñ mi ne soo be. A nga liti na ôlun ô ne tindi môte na a bo évô, a na, mbia minkômbane mi ne tindi môte na a bo mejian. (Mt. 5:21, 22, 27, 28) Nge bia yi na mone môte ya nleme wongan a bo mvo’é, bia yiane jô’é na miñye’elane ya Bible mi wulu bia, mfa’a ya duma Zambe.​—1 Bec. 10:31.

11. Aval avé mone môte ya nleme Bekristene bebaé a ne selan?

¹¹ E ne kui na, bitôtôlô Bekristen bibaé bi bo te yene jam éziñ avale da. Bi tame kobô ajô bilam. Bible a nji tyili bia meyok. Ve a tyili mbia ñyuan a nso’ane meyok. (Min. 20:1; 1 Tim. 3:8) Ye nalé a tinane na, teke jam afe Kristen ja yiane fas, to’o a ne teke bili meyok? Momo. Kristen a yiane fo’o bi mbamba mone môte ya nlem, ve a yiane fe semé mone môte ya nleme bôte bevok.

12. Aval avé mejô ya Beromain 14:21 ma tindi bia na bi semé mone môte ya nleme bôte bevok?

¹² Paul a nga liti na bia yiane semé mone môte ya nleme bôte bevok éyoñ a nga jô na: “A ne mvaé na, te di tit, nge nyu vin, nge bo jam éziñ, nde te monyoñe wôé a kolé ôbak.” (Bero. 14:21) Ye wo ye fo’o kañese na ô jô’é mam méziñ ô ne fili ya bo, amu ô nji kômbô kolé monyoñ ôbak? Bia buni na wo ye de bo. Ôsusua na ba bo Bengaa, bobejañe béziñ be mbe be viba’ane meyok, ve éyoñe ji, be tyi’iya na ba ye ke beta tye’e ve atoé. Môt éziñe ya be bia a nji yiane tindi avale mojañ ete na a beta ku ôlam meyok. (1 Bec. 6:9, 10) Ajô te, môt a yemete nneñe wé na a nyu meyok, a liti na a nji nye’e nye.

13. Aval avé Timothée a liti bia mbamba éve’ela mfa’a ya telé mame ya Éjôé ôsu?

 ¹³ Valé a too zia mimbu 20, Timothée a nga kañese tyi’iban atyel, amu a nji kômbô kolé Bejuif a mbe na a kañete ôbak. Paul fe a mbe a tatéya bo de. (Mam. 16:3; 1 Bec. 9:19-23) Ye wo fe ô bili fo’o nkômbane ya jibi mam méziñ amu wo jeñe mvaé bôte bevok?

14, 15. (a) Jé ja tinane na e bo étôtôlô Kristen? (b) Amu jé bia jô na bi ne bitôtôlô Bekristen éyoñe bia liti bôte bevo’o nye’an?

¹⁴ Bekristene bese ba yiane li’i “ñye’elane ya atata’a bifia bi Krist,” a jeñe na be bo bitôtôlô nsisim. (Beh. 6:1) Jam ete da kui ki atemetem. Bia yiane ‘ke ôsu’ a ve ngul. E bo bitôtôlô a tinane na bi kô’ôlane ñyemane ya Mejô me Zambe, a na bi tu’a bi fe’e meyen. Jôm éte nje ba ju’u ba’alane bia na bi lañ Bible môs ôse. (Bs. 1:1-3) Ye wo bo fo’o de? Mboon ôte ô ne bo na, ô tu’a wôk metiñe me Yéhôva a miñye’elane ya Kalate Zambe.

¹⁵ Atiñe da dañe metiñe mese é ne atiñe ya nye’an. Yésus a nga jô beyé’é bé na: “Zene nyô bôte bese be aye yeme na mi ne beyé’é bam, nge mi anye’esan.” (Jean 13:35) Jacques, monyañ Yésus, a nga loon atiñ ete na “atiñ de ajôô.” (Jc. 2:8) Paul ki a nga jô na: “Ñye’an ô ne njalan ôse ya metiñ.” (Bero. 13:10) Ye bia kam ajô te? Momo, amu Bible a kate bia na “Zambe a ne nye’an.” (1 Jean 4:8) Nye’ane Zambe ô nji su’u ve nlem été. Jean a nga tili na: “Vôme nyôna nye’ane Zambe ô nga yené be bia na, Zambe a nga lôm atyi’i Mone dé . . . si nyô, nde bi aye nyiñ amu nye.” (1 Jean 4:9) Nye’an ô nga tindi Zambe na a bo ngume jam. Éyoñ bia fe bia liti Yéhôva ba Yésus, bobenyañ bangan a bôte bia kañete, na bia nye’e be, nalé a liti na bi ne bitôtôlô Bekristen.​—Mt. 22:37-39.

16. Amu jé bia jô na miñye’elane mmie mia dañe mfi asu étôtôlô Kristen?

¹⁶ Nté wo ke ôsu a yaé nsisim, wo ye  yene na miñye’elane ya Bible mi ne mfi adañe metiñ. Amu atiñe de da fombô ve ngume jam, miñye’elane ki mia nambe abui mame ya ényiñe môt. Bi tame nyoñ éve’an: mone mongô a nji yem minju’u mbia mewoso me ne soo nye, jôm été nje bebiaé ba ye tyili nye mam méziñ, mfa’a ya kamane nye. (1 Bec. 15:33) Ve nté mon ate a yaé, a tu’a bi fek, a a su’ulane bo ngule ya yemelane mfi ya miñye’elane ya Kalate Zambe. Ke ô lôô ane émien a ne yeme tobe mbamba mewoso. (Lañe’e 1 Becorinthien 13:11; 14:20.) Éyoñ bia nyoñ mintyi’an mia lu’an a miñye’elane ya Bible, bia ye’ele mone môte ya nleme wongane na a yeme wulu bia.

17. Amu jé bi ne jô na bi bili mam ma sili bia na bi nyoñe mbamba mintyi’an?

¹⁷ Ye bi bili fo’o jôm ése ja sili na bi nyoñe mbamba mintyi’an? Ôwé. Éyoñ bia yeme belane metiñe me Yéhôva a miñye’elane ya Kalate Zambe, bia bo “ngumba nkômesan mfa’a ya mbamba mboan ase.” (2 Tim. 3:16, 17) Ajô te, enjeñané na bi yé’é Bible a nsôñane ya ‘yem avale nkômbane Zambe ô né.’ (Beép. 5:17) Bia yiane belane bikpwelé bise Tin Ékôane ja ve bia, ane Index des publications des Témoins de Jéhovah, Guide de recherche pour les Témoins de Jéhovah, Watchtower Library, Nda bekalate ya internet, a application JW Library. A ne mbamba bikpwelé asu ayé’é dangan biabebien, a di ya nda bôte jangan.

18. Bibotane bivé bia bi éyoñ bia tôñe metiñe me Yéhôva a miñye’elane mié?

¹⁸ Avale kalate Besam 119:97-100 a jô, bia bi abui bibotan éyoñ bia tôñ metiñ me Yéhôva a miñye’elane ya Kalate Zambe. Bifuse bite bia jô na: “Ngo’o aka’a nye’an m’anye’e metiñe môé! Me ne jôm m’asimesan nlem ngum nté môs. Mebendé môé m’abo me ñyeman a dañe besiñe bam; amu me ne be ma éyoñ ése. Me ne fek a dañe beye’ele bam bese; amu minkañete miôé mi ne jôm m’asimesan nlem. M’ayeme mam a dañe bemvendé, amu me ba’aleya miñye’elane miôé.” Yaa, bi ne kô’ôlane ñyemane wongan, fe’e jangan, a atyeñe meyene dangan, nge bia ke ôsu a bindi metiñ a miñye’elane ya Kalate Zambe. Nge bi bo mbane ya ye’ele mone môte ya nleme wongan, bia ye yaé nsisim a kui “nné ya abime ya njaéane Krist.”​—Beép. 4:13.