Bifuse bite bia ngôné mbamba mefulu ébul: ‘Ébuma ya nsisim é ne nye’an, mevak, mvo’é, njiban, mbamba nlem, mvam, mbunan, évôvoé, njôane nlem.’ Ve bi nji yiane simesane na susu’a mefulu nsisime Zambe wo volô bia na bi bi le.

Tame yene jame Paul a jô bifuse ya mvus: “Mimboane mi mame ya minsôn mia yené, mmie mi ne na: mejian, mvin, bisôk, nkañane bezambe befe, mboane bemvi’i, ziñ, ntañete, mesengan, ayaa, metyama’ane, minkandan, mengam, minyamete, nso’ane bilam, mbia ndian, a avale mam ete.” (Beg. 5:19-21) Paul a mbe ngule ya beta lañe mbia mefulu me tii a “mimboane mi mame ya minsôn,” ane ma bia koone me Becolossien 3:5. To’o éyoñ a nga mane lañe mbamba mefulu ébule ya ébuma ya nsisim, a nga ke suu na: “Atiñe da vini avale mam ete e ne momo.” Nalé a liti na Paul a nji mane tote mbamba mefulu mese mbamba nsisim a volô bia na bi bi.

Bia tu’a wô’ô de éyoñe bia lañe mejô a nga tili akônda ya Éphèse a jô’ô na: ‘Ébuma ya éfufup é too a mvam, a zôsôô a benya mejôô.’ (Beép. 5: 8, 9) Bi lôô valé na “mvam” mfula’ane a zôsôô a benya mejôô, é ne ngabe ya ‘ébuma ya éfufup’ é too fe ngabe ya ‘ébuma ya nsisim.’

Wônaa, Paul a nga lebe fe Timothée na a “tôñe mame ya zôsôô, mame ya Zambe, mbunan, nye’an, [mban, nwt-F], évôvoé nlem.” (1 Tim. 6:11) E mefulu mesamane mete mese, a nga tote ve melal (mbunan, nye’an, a évôvoé nlem) éyoñ a nga kobô ajô ébuma ya nsisim. Ve mbamba nsisime fe nnye a nga ye volô Timothée na a bo mame melale mevok: mame ya zôsôô, mame ya Zambe, a mban.​—Ô ne fe lañe Becolossien 3:12; 2 Pierre 1:5-7.

Nde bi vo’o jô na Begalate 5:22, 23 a lañe mefulu mese Bekristene ba yiane bi. Mbamba nsisim a ne volô na bi bi fo’o mefulu ébule ya ‘ébuma ya nsisim.’ Ve bitôtôlô Bekristene bia yiane jeñe na bi bi mbamba mefulu mefe, a na bi “jaé mfefé môt, ñwô ô nga téban ô funa’ane Zambe mfa’a ya zôsôô a mfubane ya benya mejôô.”​—Beép. 4:24.