BIA yeme na Yéhôva a su’u bebo bisaé bé “melu ma su’ulane” ma, a na émiene nnye a wulu be. (2 Tim. 3:1) Ve bia bese bia yiane jeñe na bi tôñe zene Yéhôva a liti bia. Été jangan é ne ane ji bone b’Israël éyoñe be mbe nkôte si. Be mbe be yiane téé dulu éyoñ ése ba wô’ô tyiñe toñ.

Yéhôva a nga jô Moïse na a kôm metoñ me argent mebaé “mfa’a ya loone nsamba bôt, a mfa’a ya dulu ya minkan.” (Nb. 10:2) Beprêtre be mbe be yiane loñe toñ abui meval asu na be kate nsamba bôte jame wo yiane bo. (Nb. 10:3-8) Yéhôva a belane fe abui mezene dene na a wulu bebo bisaé bé. Nlô ajô wu wo zu ngôné mezene melale ya été, a bia zu yene nja ô ne zañe mezene mete a tyiñe toñe ya Israël melu mvus. Yéhôva a yi na bebo bisaé bé ya den be sulan asu beta bitôkan, a yañele betebe ôsu ya mekônda, a bo fe mintyéndane miziñ ékôane jé éyoñe nalé a sili.

Éyoñ ése Yéhôva a mbe a yi na “ngume nsamba ôse ô sulane” mbé si ya tabernacle, beprêtre be mbe be loñe’e metoñe mete mebaane. (Nb. 10:3) Menda me bôte mese me mbe me too mbôma’ane meku’u menyine ya tabernacle, me mbe me kôme’e wô’ô tyiñe metoñ mete. E nji be e sili’i abui éyoñ asu na bôte be mbe be too fefele anyiine mbé ya tabernacle be so. Wônaa ba be mbe be too ôbe ôyap be mbe be yiane wulu abui. Ve Yéhôva a mbe a yi na bese be sulan a vô’ôlô mejô mé.

Bia sulane ki fo’o fe betabernacle den, ve Yéhôva a ngenan a yi na bi bo bi sula’an a bebo bisaé bé bevok. Bia bo de éyoñe bia tabe beta bitôkan, nge ke bitôkane bife bi ne ngum aval, vôme Yéhôva a ve bia melebe me ne mfi. Bebo bisaé be Yéhôva bese ya meku’u mesi menyin ba bu’ubane nta’ane mam ôte. Ba bese ba tabe bitôkane bite ba wô’ôtan ayôñe ya beta nda bôte wongane ya nsisim. Bevo’o ya be be be wô’ô kôme so nya ôyabe. Ve to’o nalé, be ne étyi te jôban.

Ye bobejañe be ne bone mengôse minlame mvus be’e fe be ne bu’ubane beta bitôkane bite? Mvo’é mvo’é. A zene ya beminsini ba kuli den, bobejañe bete be ne ngule ya bu’ubane bitôkane bite vôm be too, a kôme wô’ôtane na ba be bobejañe bevok be ne nsamba. Éve’an é ne na, éyoñe nlômane ya Tin ékôan ô nga jome wofise ya Bénin, bobejañe ba wulu ésaé si éte be nga bo ngume nta’ane mam asu na bobejañe ya Arlit, mone tisone ya Désert ya Sahara e Niger, be bu’ubane fe étôkan éte be too nlame wop. Bôte mewôm  mebaé a wua (Bengaa betan a bôte befe awôm a besaman) be nga tabe étôkan éte. Akusa bo be mbe nlame mvus, be nga kôme wô’ôtane ve ane ba be bôte 44 131 be ne nlatane jôme jia. Mojañe wua ya be be a nga tili na: “Ma ve mia angôndô ya abui akiba amu mi nga bo na bia fe bi bu’ubane beta jam ate. Nalé a bo na bi yem abim avé mia nye’e bia.”

Éyoñ beprêtre be mbe be loñe ve toñe jia, “bivet [étam], minlô mi bôte ya betoyini ya Israël,” mbie bi mbe bi yiane sulane tabernacle. (Nb. 10:4) Wôé nnye Moïse a mbe a kala’ane be mam, a yañele be. Ñyañelan ôte ô mbe ô volô’ô be na be yeme wulu menda me bôte map. Nge ô mbe évet éyoñ éte, nga ô nga ye bo mam mese asu na ô tabe tabernacle a bu’ubane miñye’elan mite?

Bemvendé ya akônda be be nji fo’o bo “bivet” nge ke bemasa be bone mintômba Zambe a jô na be ba’ale. (1 P. 5:1-3) Ve ba ve ngul ése na be yeme nyoñe ngab a bia. Jôm ete nje be ne avôle ya yebe na ékôane Yéhôva é yañele be a zene besikôlô ane Sikôlô bemvendé a bediakon. Besikôlô bete, Yéhôva a ye’ele be avale be ne tu’a yeme wulu mekônda. Ñyañelan ôte wo volô bemvendé bete bebien a bobejañe ya mekônda map na be bo bitôtôlô Bekristen. To’o wo tabe ki besikôlô bete, wo fe ô ne yene mfi ya melebe bemvendé ba bi wôé.

Beprêtre be mbe fe be loñe’e toñ éziñe tyiñe yôp. Toñ éte é mbe é tina’ane na nsamba bôt ôse wo yiane téé dulu. (Nb. 10:5, 6) Bone b’Israël be mbe nya nta’ane éyoñ ba bo mulu mete, ve jam ete e mbe fe e sili’i abui ésaé. Bone b’Israël béziñe be mbe ve wô’ô nju’u ya kôlô vôm be too a ke vôme mfe. Amu jé?

Be mbe ve yene na ba kate kôme tabe ngume vôm ôbe nté ve toñ é nga loñ, nge ke na toñ éte ja loñ éyoñ be be nji bo nkômesan. “Melu méziñ nkut ô nga tabe [ve] ataté mame ngô’é akekui mame tyé.” Biyoñ bivo’o ki, ô mbe ô tabe’e “melu mebaé, nge ngume ngon, nge ngume mbu.” (Nb. 9:21, 22) Nsamba bôt ôte ô nga téé dulu biyoñ tañ aya? Kalate Nlañane bôt kabetôlô 33 a liti na bone b’Israël be nga kôm étaba’a mevôme bebé 40.

Biyoñe biziñ be mbe be kele’e tabe vôm évôvoé é né. Angôndô ya mbamba bevôm asu bôte ba wulu “angôndô fé [nge ke nkôte si].” (Dt. 1:19) Éko éziñ bon b’Israël béziñ be mbe ve ko woñe ya kôme beta kôlô avale mbamba vôm ate.

Éyoñ menda me bôte méziñ ma téé dulu, e mbe e sili’i na ma mevok me jibi. Bôte bese be nji be be yiane téé éyoñe jia. Tyiñe toñe jia é mbe é kate’e na menda me bôte ya est (nda bôte Juda, Issacar, a Zabulon) me nto ve téé. (Nb. 2:3-7; 10:5, 6) Éyoñ balé be tééya, beprêtre be mbe be beta loñe toñ asu menda me bôte melale ya sud. Be mbe be kele’ ôsu a loñe toñ nalé akekui nsamba bôt ôse wo téé dulu.

Éko éziñe wo fe wo yen ayaé ya tôñ abo dulu ékôane Yéhôva ja ve bia. Ô ne simesane na Tin ékôan ja bo aka’a abui mintyéndan. E ne fe bo na wo nye’e ngum avale mboane mam, a ô nji yi na be tyendé wô. Mam mete ma liti na wo yen ayaé ya kañese mintyéndan, a na da sili wo ôbe éyoñ asu na ô su’u mie. Ve nge wo sutane su’u mintyéndane mite a nlem ôse, wo ye bu’ubane mfi ya été, a wô’ôtan abim avé Yéhôva a botane bia.

Melu me Moïse, Yéhôva a nga wulu bemillion befam, a binga, a bongô nkôte si. Nge a nji ye be a be, wônaa bese be nga ye mane wu. Aval ete da da, bi ne bevevee mfa’a ya nsisime den amu Yéhôva émiene nnye a wulu bia. Nya ajôô a ne na, a noo bia bibotan! Nde ñhe bi ne fo’o kôme bo teke vô’ôlô tyiñe toñ aya a téé dulu!