Asu na bi ve Yéhôva nlem avak, bia yiane bi mbunan. Ve Kalate Zambe a jô na “mbunan ô nji bo jôme bôte bese.” (2 Thes. 3:2) Éyoñe nlômane Paul ô nga kobô mejô mete, ô mbe ô kobô’ô ajô “mbia be bôte” be mbe be tibili’i nye. Ve jam a jô a lat a mbunan é ne fe fombô bôte befe. Bôte béziñe ba tyi’i na ba kañese ki mame ma bo’olô na Zambe nnye a nga té biôme bise. (Rom. 1:20) Bôte bevo’o be ne jô na be bili mbunan éyoñe ba wô’ôtan na be bili ngul éziñe ja dañe nyi be wô’ô ja zu ba bi. Ve sake avale mbunane te étame nde é ne bo na bi yené mvaé mise me Yéhôva.

Bia yiane kôme tabe ndi na Yéhôva a ne, a na a ne nyi a “ya’ane” bôte be bili ngule mbunane be nye. (Héb. 11:6) Mbunan ô ne ngabe jia ya ébuma ya mfufube nsisime Zambe. Nge bia yi na bi bi mfufube nsisim, bia yiane ye’elane Yéhôva na a ve bia wô. (Luc 11:​9, 10, 13) Jam afe bi ne bo asu na bi bi mfufube nsisim é ne na bi lañe Kalate Zambe mban, nnye ate be nga tili a ngule ya mfufube nsisim. Mvuse ya valé, bi ne fe nyoñ éyoñe ya bindi mame bia te lañ a tôñe me binyiñe biangan. Nsisime Yéhôva ô ne wulu binyiñe biangan a volô bia na bi bi avale mbunane Yéhôva a yene mvaé.