1. Jé bia yiane bo asu na bi nyiñe môse Yéhôva?

 ÉYOÑE Kalate Zambe a kobô ajô “môse Yéhôva,” a kobô ajô ya éyoñe Yéhôva a ye zu tyi’i besiñe bé mejô a nyii bebo bisaé bé. Yéhôva a nga foñesô meyoñe méziñe melu mvus. (Ésa. 13:1, 6; Ézé. 13:5; Soph. 1:8) Melu mangane ma, “môse Yéhôva” wo ye taté éyoñe bijôé bi pôlitik bia ye tyame beta Babylone, a wo ye mane bita ya Armaguédon. Asu na bi nyiñe “môs” ôte, bia yiane taté na bia kômesan éyoñe ji. Yésus a nga jô bia na bi nji yiane tabe nkômesane fo’o ve asu “beta étibila’a” étam, bia yiane fe ‘tabe nkômesan’ asu môse Yéhôva.​—Matt. 24:21; Luc 12:40.

2. Aval avé kalate 1 Bethessalonicien a ne volô bia?

² Kalate ôsu nlômane Paul ô nga tili bekristene ya Thessalonique a ngule ya mfufube nsisim, a nga belan abui bive’ela asu na a volô bekristene bete na be tabe nkômesan asu beta môse ya ntyi’ane mejô Yéhôva. Paul a mbe a yeme’e na môse Yéhôva wo ye ke so été été. (2 Thes. 2:1-3) Ve a nga jô bobenyañe na be tabe nkômesan asu môs ôte, a yene ve ane nge wo ye so akiti. Bia fe bi ne ngule ya tôñe melebe mete. Bi tame zu yene mam a nga jô a lat a môse Yéhôva: (1) avale môse Yéhôva wo ye so, (2) bôte ba ye nyiñe môs ôte, a (3) avale bi ne tabe nkômesan asu na bi nyiñe môs ôte.

3. Aval avé môse Yéhôva wo ye so aval ane ñwuwube wo so alu? (Fombô’ô fe fôtô.)

³ “Aval ane ñwuwube wo so alu.” (1 Thes. 5:2) A ne éve’ela jia ya bive’ela bilale Kalate Zambe a belane bie asu na a liti aval avé môse Yéhôva wo ye so. Miñwuwube mi wô’ô so atemetem, e dibi si éyoñe bôte be nji bunan. Môse Yéhôva  fe wo ye so atemetem éyoñ abui bôt é nji bunan. To’o benya bekristene fe ba ye bo fe’e ne vema éyoñe ba ye yen avale mame ma ye boban avôl avôl. Ve nsela’ane a ne na mbia be bôt étame mbe ba ye wu, benya bekristene ki ba ye nyiñ.

4. Amu jé bi ne ve’e môse Yéhôva a mintaé ya abiaé?

⁴ “Aval ane mintaé mi abiaé mia bi minga a ne abum.” (1 Thes. 5:3) Minga a ne abum a vo’o ke yem éyoñ a ye biaé, ve teke bisô na a yeme na ne kee kee a ye su’ulane biaé. Éyoñ awolo ya biaé é kuiya, a taté na a kô’ôlô mie atemetem, mintaé mi nga bet teke avale ya telé mie. Avale te fe, bi nji yeme éyoñe nge ke awolo môse Yéhôva wo ye so. Ve bi too ndi na môse Zambe a ye tyi’i mbia be bôte mejô atemetem wo ye kui, a teke môt éziñe a ne kamane nye na a bo de.

5. Amu jé bi ne ve’e beta étibila’a a melende me tyé?

⁵ Ane melende me tyé. Éve’ela lale, Paul a beta kobô ajô miñwuwube mia wup alu. Ve éyoñe ji, da yené ve ane Paul a ve’e môse Yéhôva a melende me tyé. (1 Thes. 5:4) É ne kui na miñwuwube mia te zu wup alu mi bo teke yen ane éyoñe ja lôt. Éyoñ éte éfufube ya môse ja jilane be a bo na be tebe éndedañ été. Avale te fe beta étibila’a a ye telé bôte ba funane miñwuwube den éndedañ été, mbe bete ba ke ôsu a bo mame Zambe a vini dibi si. Bia selan a bôte bete amu bia ve ngule ya bo mame ma ve Yéhôva nlem avak, a bia tôñesan “mbamba be mam [bese] a zôsô a benya mejôô.” (Éphé. 5:8-12) Paul a nga beta belane bive’ane bibaé asu na a kobô ajô ya bôte ba ye wu éyoñe môse Yéhôva wo ye so.

6. Mfa’a ôvé abui bôte da ke ôyo den? (1 Bethessalonicien 5:6, 7)

⁶ “Bôte ba ke ôyo.” (Lañe’e 1 Bethessalonicien 5:6, 7.) Paul a nga ve’e bôte ba ye jañe môse Yéhôva a bôte ba ke ôyo. Be nji yeme mame ma bobane fefele jap nge ki awolo é ne. Ajô te, be nji yem éyoñe jam é ne mfi ja boban a be vo’o jô jôm éziñ. Abui bôte ya melu ma da ke ôyo mfa’a ya nsisim. (Rom. 11:8) Ba bene kañese mendeme ma liti na bi nga nyiñe “melu ma su’ulan” a na beta étibila’a a ntoo bebé. beta be mame ba boban émo be ne volô bôte béziñe na be vee ôyo ya nsisim a tindi be na be baé alo foé ya Éjôé Zambe bia kañete. Abui ya be be é wô’ô viane beta ke ôyo, be li’i mombô. To’o bôte ba kañese na môse ntyi’ane mejô wo ye boban, ve ba buni na ô ngenan étua ôyap. (2 P. 3:3, 4) Ve mfa’a wongan, bia yeme na é ne nya mfii na bi mombô môs ôse.

7. Amu jé bôte ba ye jañe môse Yéhôva ba funane beso’o meyok?

⁷ “Ba ba so’o meyok.” Nlômane Paul ô nga ve’e fe bôte ba ye jañe môse Zambe a beso’o meyok. Beso’o meyok be ne te ke ji’a yemelane mame ma bobane fefele jap, a ba nyoñe mbia mintyi’an. Avale te fe mbia be bôte ba kañese ki mebendé me Zambe. Ba tobe zene ja kee be njañan. Ve Kalate Zambe a lebe bekristene na be nyiñ ane mimfefek. (1 Thes. 5:6) Ñyeme mam éziñ a nga jô na môt a ne fek a ne nyi a yeme jôé émien a tabe ne “mieññ, a ne teke nyeñeban, a bili mbamba ñyenane mam a ne volô nye na a nyoñe mbamba mintyi’an.” Amu jé bia yiane tabe ne mieññ a tebe ne bip? Amu bi nji kômbô nyoñe ngap a mame me pôlitik nge ki a mame mefe ma boban émo ji. Nté môse Yéhôva wo subu bebé, ba ye tu’a jeñe na be tindi bia na bi nyoñe ngap a mame mete. Ve bi nji yiane ko woñ a sili biabebien aval avé bia ye yalane be. Mfufube nsisime Zambe a ne volô bia na bi tabe ne mieññ, bi tebe ne bip a nyoñe mbamba mintyi’an.​—Luc 12:11, 12.

8. Mame mevé bia koone me kalate 1 Bethessalonicien 5:8 me ne volô bia na bi mombô a ba’ale mbamba mfasane wongan? (Fombô’ô fe fôtô.)

⁸ ‘Jaék ében . . . a . . . ndi nleme ya kôtéban.’ Paul a ve’e bia a bezimbi be ne nkômesane ya bo bita. (Lañe’e 1 Bethessalonicien 5:8.) Mone bezimbi a yiane tabe nkômesane ya wosan aval éyoñ ése. Bia fe bia yiane bo avale da. Bia liti na bi ne nkômesan asu môse Yéhôva éyoñe bia jaé ébene ya mbunan a nye’an. Bia yiane fe jaé ndi nleme ya nkôtéban ane ékôngô. Mefulu mete me ne volô bia angôndô ya abui.

9. Aval avé mbunane wongane wo kamane bia?

⁹ Ébene ja kamane nleme mone bezimbi. Mbunan a nye’ane bia kamane nleme wongane ya nsisim. Mefulu mete ma volô bia na bi ke ôsu a kañe Zambe a tôñe bibô’a mebo bi Yésus. Mbunane wo ve bia ndi nleme na Yéhôva a ye ya’ane bia amu bia te ve ngule ya jeñe nye a nlem ôse. (Héb. 11:6) Wo volô bia na bi ke ôsu a wulu ba’aba’a a ntebe ôsu wongane Yésus, to’o bia tôban avale minju’u avé. Éyoñe bia tôbane minjuk, bi ne yemete mbunane wongan éyoñe bia nyoñ éyoñe ya bindi minkañete mi bobejañe be nga ke ôsu a wulu ba’aba’a a Yéhôva akusa bo étibila’a a azoé. A bi ne sa’ale ôlame ya ôzañ akum éyoñe bia vu bôte be nga sé’é nkôñ ényiñe wop asu na be telé mame ya nsisim ôsu ényiñe jap. b

10. Aval avé nye’ane bia nye’e Zambe a bôte bevok wo volô bia na bi jibi?

 ¹⁰ Nye’ane wo volô fe bia na bi mombô a ba’ale mbamba mfasane wongan. (Matt. 22:37-39) Nye’ane bia nye’e Zambe wo volô bia na bi ke ôsu a kañete akusa bo minju’u bi ne tôbane mie. (2 Tim. 1:7, 8) Nye’ane bia nye’e bôte be nji kañe Yéhôva wo tindi bia na bi ke ôsu a kañete mebeñe me nkañete mangan, a zene ya téléfôn a bekalate. Bia jañele ki ndi nleme na bôte bete be ne tyendé a taté na ba bo mame me ne zôsô.​—Ézé. 18:27, 28.

11. Nye’ane bia nye’e bobejañ a besita wo volô bia na bi bo jé? (1 Bethessalonicien 5:11)

¹¹ Bia nye’e fe bobejañ a besita bangan. Bia liti avale nye’an éte éyoñe môt ase ya be bia a “ve nyu mbo’o ngule nyul, a ke fe ôsu a lôñe nyu mbok.” (Lañe’e 1 Bethessalonicien 5:11.) Aval ane bezimbi ba su’ane bita, bia fe bia veane ngule nyul. É ne été na mone bezimbi a ne balé nyi mbok éyoñe be ne bita, ve teke na a ne vañe bo de éyoñ éziñ. Aval éte fe bi vo’o ki vañe balé mojañe nge ki sita wongan, a teke éyoñ éziñe bi ne ve’ele jeñe na bi bulan abé ba abé. (1 Thes. 5:13, 15) Bia liti fe na bi bili fulu nye’an éyoñe bia semé bobejañe ba tebele ékôane bekristen. (1 Thes. 5:12) Éyoñe Paul a nga tili ékôane bekristene ya Thessalonique kalate, ékôan éte é mbe é ngenane teke tebe ngume mbu. Bôte be mbe be wulu’u je be nji be be yiane bi mfañe ñyeman, a be nga yiane fe bo abui bikop. Ve be mbe be yian ésemé. Nté beta étibila’a a subu bebé, éko éziñe da ye sili na mebendé me so bia ve be bemvendé ya ékôane bekristene jangan étam a da ye sili na bi tu’a bo mewôk a lôt avale bia bo den. Éko éziñe bia ye beta bi melebe ma so Tin ékôane nge wofise wo tebele ésaé, ajô te é ne nya mfii na bi ve ngule ya nye’e a taté na bia semé bemvendé bangan éyoñe ji. To’o da kui aya, nkelané ôsu a ba’ale mbamba mfasane wongan a ve ngule ya bo te bem ôsimesane wongane bikobe biap. Ve bia yiane ke ôsu a yene be ane bitôtôlô bekristene Yéhôva a belane bie a zene ya be Yésus.

12. Aval avé ndi nleme jangane ja kaman asimesane dangan?

 ¹² Aval ane ébene ja kamane nlô mone bezimbi, ndi nleme jangane ya nyiane ja kamane fe asimesane dangan. Éyoñe bi bili ngule ndi nlem, nalé a volô bia na bi yene na mame ya émo ji me ne zezé. (Philip. 3:8) Ndi nleme jangane ja volô bia na bi tebe ne bip a tabe ne mieññ. Wallace ba Laurinda, ba saé Afrika be nga kôme yene na mejô mete me ne été. Fo’o ve zañe sondô élal, Laurinda a nga jañele nyia, Wallace ki a jañele ésa wé. Mbôl ébubua ôkone COVID-19 é mbe é ngenane ngul, be nji be ngule ya bulane si jap asu na be ke yene menda me bôte map asu na be ve be ngule nyul a volô be minlem. Wallace a jô na: “Ndi nleme ya ñwômane miñwuan é nga volô ma na me simesane be, sake avale be mbe melu be nga kandane nyiñ ntyu émo wu, ve avale ba ye bo éyoñe ba ye nyiñe mfefé émo. Ndi nlem éte ja bôône ma nleme si éyoñ ése me ne éyôé, nge ki éyoñe ma simesane na be nji beta bo.”

13. Jé bi ne bo asu na bi bi mfufube nsisim?

¹³ “Te dimané nduane ya nsisim.” (1 Thes. 5:19) Paul a nga ve’e mfufube nsisim a nduane ja yôñe bia menyul été. Éyoñe bi bili mfufube nsisim Zambe, bi ne ayôñ a bi bili éva’a ya bo mame me ne zôsô. Bi bili fe abime ngule da sili asu na bi bo Yéhôva ésaé. (Rom. 12:11) Jé bi ne bo asu na bi bi mfufube nsisim? Bi ne sili nye meye’elan été, bi ne yé’é Kalate Zambe, bi ne fe sulane vôma wua a bibu’a ya ékôane Yéhôva ja wulu a ngule ya mfufube nsisim. Mame mete ma ye volô bia na bi bi “mefulu ya ébuma ya nsisim.”​—Gal. 5:22, 23.

14. Mame mevé bia yiane sa’ale nge bia yi na Yéhôva a ke ôsu a ve bia mfufube nsisime wé? (Fombô’ô fe fôtô.)

¹⁴ Éyoñe Zambe a maneya bia ve mfufube nsisim wé, bia yiane tabe ntyele ya bo ‘te dim nduane ya nsisim.’ Bôte be bili mbamba ntaban a ba ba ve ngule ya bi mbamba b’asimesane mbe Zambe a ve mfufube nsisime wé. Zambe a vo’o ke ôsu a ve bia mfufube nsisime wé nge bia ke ôsu  a bi mvit asimesan a bo mbia be mam. (1 Thes. 4:7, 8) Nge bia kômbô ke ôsu a bi mfufube nsisime, bi nji yiane ‘biasé minkulane mejô.’ (1 Thes. 5:20) Bifia “minkulane mejô” ba belane bie va bi ne mefoé Yéhôva a kate bia a zene ya mfufube nsisime wé, to’o minkulane mejô mia kobô ajô ya môse Yéhôva a mi mia liti na môs ôte ô too bebé. Bi nji yiane simesane na môs ôte ô ngenan ôyap nge ke na Armaguédon a ye ke koone bia bi vee. Nde fe bi nji yiane su’u ve na bia simesane na môse Yéhôva ô ntoo bebé, bia yiane fe wô ba’ale ôsimesan a bi “mimboone mia liti na [bia] ko Zambe woñ” môs ôse.​—2 P. 3:11, 12.

15. Jé bi ne bo asu na bi sa’ale minsos mimbia minsisime mia mias? (1 Bethessalonicien 5:21)

¹⁵ Ana’ana, besiñe be Zambe ba ye yôtane na: “Mvo’é a teke jame ya ko woñ!” (1 Thes. 5:3) Mimbia minsisime mia ye laane minsose mia ye jaé si a du’u abui bôt. (Nlitan 16:13, 14) Ye bia fe bia ye du’uban? Bia ye bo te du’ubane nge bia ‘tuka’a fase mame mese.’ (Lañe’e 1 Bethessalonicien 5:21.) Éfia ya nkobô Grec be nga kôñelane na e ‘tu’a fase mame mese,’ be nga belane je asu na be liti avale bôte be mbe be bo’o asu na be fase meko’o me ne édima a yemelane nge a ne nya argent nge nya or. Avale te fe bia yiane nyoñ éyoñe ya fase nge mame bia wôk a mame bia lañe me ne fo’o été. Jam éte é mbe nya mfii asu bekristene ya Thessalonique, a da ye dañe bo mfi asu dangane nté bia yange beta étibila’a. A lôte na bi buni mame mese bia wôk, bia yiane belane boo wongan asu na bi ve’e mame bia lañe nge ki mame bia wôk a mame Kalate Zambe a ékôane Yéhôva ba ye’ele bia. Nge bia bo de, nalé a ye volô na bi bo teke du’uban a na minsos mimbia minsisime mia miase mi bo teke wone bia.​—Mink. 14:15; 1 Tim. 4:1.

16. Ndi nleme fé bi bili, a jé bia yiane bo?

¹⁶ Bia yeme na bebo bisaé be Yéhôva ba ye nyiñe beta étibila’a. Ve bi nji yeme jam é ne kui môt ase ya be bia akiti ôjan. (Jacq. 4:14) To’o bia Tulane beta étibila’a nge ke wu ôsusua na a taté, Yéhôva a ye ve bia ényiñe ya melu mese nge bia ke ôsu a wulu ba’aba’a a nye. Miñwo’one mia yiane ke nyiñe yôp été a Yésus. Mintômba mife ki mia ye nyiñe nnôm éto si va, e Paradis. Ngo’o nge bia bese bia ke ôsu a bem ôsimesane wongane mbamba ndi nleme bi bili a ke ôsu a tabe nkômesan asu môse Yéhôva!