1, 2. (a) Mejô me Yésus me ne kalate Matthieu 24:12 me mbe me taté’é fombô beza? (b) Aval avé kalate Mam Minlôman a liti na, abui Bekristen ya ntete mimbu ôsu e nga ba’ale nye’ane wop? (Fombô’ô fôtô ya atata’a ya ayé’é di.)

YÉSUS a nga jô na, ndeme jia ya mam ma ye liti na “asu’ulane ya [si nyô]” e nto bebé é ne na, “nye’an abui bôt wo ye bo avoé.” (Mt. 24:3, 12, Mfefé Nkôñelan.) Ntete mimbu ôsu, Bejuif be mbe be jô’ô na be ne bebo bisaé be Zambe, be nga jô’é na, nye’ane ba nye’e Zambe ô voé.

² Ve abui Bekristen ya éyoñ éte e nga ke ôsu a “kañete [. . .] bôt mbamba foé Mesie.” Be nga liti na ba nye’e Zambe, ba nye’e bobenyañe bap, to’o ba be nji be bebo bisaé be Yéhôva. (Mam. 2:44-47; 5:42, Mfefé Nkôñelan.) Éngôngole jam é ne na, beyé’é be Yésus béziñe ya ntete mimbu ôsu, be nga jô’é na nye’ane wop ô voé.

3. Jé é nga yiane bo na nye’ane Bekristen béziñ be mbe be bili ô voé?

³ Éyoñe Yésus a wômôya, a nga jô akônda Bekristen ya  ntete mimbu ôsu é mbe Éphèse na: “Me bili wo ajô dina na, ô li’iya nye’ane wôé ya atata’a.” (Nli. 2:4) Amu jé a nga kobô nalé? Éko éziñ amu, Bekristen bete be nga jô’é na asimesane ya minsôn e jôé be. (Beép. 2:2, 3) Éphèse a mbe ane abui bitisone ya melu ma, a mbe njalan a mbia mimboon. E tisone ya Éphèse, mam me mbe me dañe mfi asu bôte me mbe akum, mimvôman, a mbamba ényiñ. Mbia nkômbane mame ya minsôn, ô nga tindi be na be dañe nye’e bebien. Nde fe, mbia mimboon a ényiñe bisôk bi nga mane jaé vôm ase.

4. (a) Jé ja bo na nye’an ô voé melu ma? (b) Nye’ane wongan ô ne voé bevôm bela, bevé?

⁴ Nkulane mejô Yésus ôte wo nambe fe bia den. Bôte ya melu ma be nji dañe beta nye’e Zambe. Bemillion be bôt be lumeya Zambe mvus, be too ndi na bijôé ya si nyi, mbie bia ye mane vaa minju’u mise. Nalé a bo na, nye’ane wop ô voé. Ve aval e nga kui Bekristen ya akônda ya Éphèse ntete mimbu ôsu, Bekristen ya melu ma fe, be ne taté na ba tabe ndi a bebien, a jô’é na nye’ane wop ô voé. Bia zu yene bevôm nye’ane wongan ô ne voé: (1) Nye’an bia nye’e Yéhôva, (2) nye’an bia nye’e Mejô me Zambe, (3) a nye’an bia nye’e bobejañ.

5. Amu jé bia yiane nye’e Yéhôva?

⁵ Môs ôbien Yésus a nga ve nkulane mejô ôte, ñwô ôfe a nga ye’ele beyé’é bé nye’an wo dañ. A nga jô na: “Nyeke’e Éso Zambe wôé a nleme wôé ôse, a nsisime wôé ôse, a [ényiñe jôé ése]. Dina nde de adañ e tele’metiñe mese ôsu.” (Mt. 22:37, 38) E nye’e Zambe nya nye’ane a volô bia na, bi bo metiñe mé mewôk, bi jibi, a bi vini mam me ne abé. (Lañe Besam 97:10.) Ve Satan a émo jé ba jeñ a mezene mese na, nye’ane bia nye’e Yéhôva ô voé.

6. Jé ja kui éyoñe bôt be nji beta nye’e Zambe?

⁶ Ôsimesane bôte ya émo be bili a lat a nye’an ô ne nkot. Bôte ba viane “nye’e bebien,” a lôte na be nye’e Nté wop. (2 Tim. 3:2) Émo Satan a jôé ji, ja wumulu “mbia minkômbane ya minsôn a mbia nkômbane ya mis a duma mebune ya ényiñ.” (1 Jn. 2:16) Nlômane Paul ô nga ve Bekristen abendé na, be wosane nye’ane mame ya minsôn, a jô’ô na: “Ôsimesane ya minsôn ô ne awu . . . Amu na, ôsimesane ya minsôn vi asiñe Zambe.” (Bero. 8:6, 7) Nde fe, bôte ba jeñe biôm bi mo, nge jalé miñyiane ya mam bisôk ényiñe jap ése, ba bo bebien abé, ba su’ulane fe jôban.—1 Bec. 6:18; 1 Tim. 6:9, 10.

7. Jé ja ndeñele Bekristen ya melu ma?

⁷ Mesi méziñ, bôte be nji buni na Zambe a ne, bôte ba jô na, ba buni ve mam be ne ngule ya yen, a bôte ba buni na biôm bi nga so atemetem, ba ye’ele bôte mam ma tindi be na, be bo teke nye’e, a buni Zambe. Be nga ye’ele abui bôte na, bôt be ne biyebeyebe, a ba be ne mekut, mbe étam be ne beta buni na Nté biôm a ne. Ba kañe fe beta beyeme mam, nalé a bo na, bôt be bo teke beta bisi Nté biôm. (Bero. 1:25) Nge bia vô’ôlô avale miñye’elan ete, bi ne lume Yéhôva mvus, a nye’ane wongan ô ne voé.—Beh. 3:12.

8. (a) Mam mevé ma te’e abui bebo bisaé be Yéhôva? (b) Ndi nleme fé bia koone je e kalate Besam 136?

 ⁸ E bili atek a ne fe te’e mbunane wongan, a bo na, nye’ane bia nye’e Zambe ô voé. Môt ase ya be bia a ne bili atek biyoñe biziñ, amu bia nyiñe mbia émo Satan a jôé. (1 Jn. 5:19) Éko éziñe na bi ne nnôm, bia kon, nge ke na bi ne azoé. Bi ne juan ôsimesane ya na, bi nji bo mfi éziñ, bi ne juane bikobe biangan, bi ne fe bili atek amu bi nji kui na, bi tôé minsôñane miangan. Ve bi nji yiane jô’é na mam mete, nge asimesan ete e bo na, bi buni na Yéhôva a lumeya bia mvus. Ajô te, bia yiane bindi mejô ma liti na, nye’ane Yéhôva a nye’e bia ô ne teke man. Bia koon avale mejô ete e kalate Besam 136:23, nnye a jô na: “[Yéhôva] a nga simesane bia éyoñ bi nga to éngôngo; amu mvame jé é to nnôm éto.” Ôwé, Yéhôva a liti bebo bisaé bé nye’an ô ne mban. Bi ne tabe ndi na, a wô’ô “minja’ane” miangan, a yalane fe mie.—Bs. 116:1; 136:24-26.

9. Jé é nga ve Paul ngule ya ba’ale nye’an a mbe a nye’e Zambe?

⁹ Aval ane ntili Besam, Paul a nga bi ngule nyul amu a mbe a too ndi a nsu’ane Yéhôva a mbe a su’u nye. A nga tili na: “Tate a ne mvolô wom; me aye ke ko woñ: Môt a ye bo me jé?” (Beh. 13:6) Beta ndi nlem a mbe a bili na Yéhôva a nyoñe nye ngap, a nga volô Paul na, a dañe minju’u mié. A nji jô’é na, mbia be mam be te’e nye. Ve éyoñ a mbe a fete nda mimbôk, a nga tili abui bekalate e nga ve bobenyañe bé ngule nyul. (Beép. 4:1; Beph. 1:7; Phm. 1) To’o éyoñe minjuk mi nga lôte nye nkôñ, Paul a nga ke ôsu a nye’e Yéhôva. Jé é nga ve nye ngule ya bo de? A mbe a too ndi a “Zambe ya mvolane minlem ôse; nnye a volô bia minlem nju’u wongan ôse été.” (2 Bec. 1:3, 4) Aval avé bi ne vu éve’ela Paul, a ke ôsu a yemete nye’an bia nye’e Yéhôva?

10. Aval avé bi ne yemete nye’an bia nye’e Yéhôva?

¹⁰ Paul émien nnye a kate bia beta zene wua ya yemete nye’an bia nye’e Yéhôva. A nga tili bobenyañe bé ya nsisime na, be “ye’ela’an, te jô’é.” Mvuse ya valé a nga beta tili na, “Mi bo’an mban meye’elan été.” (1 Bet. 5:17; Bero. 12:12) Éyoñe bia laan a Yéhôva a zene ya meye’elan, bia yemete amvôé dangan a nye. (Bs. 86:3) Éyoñe bia nyoñ éyoñe ya kate nye asimesane dangan, a avale bia wô’ôtane mam, bia subu Ésa wongane ya yôp, “Nyô a wô’ô meye’elan” bebé. (Bs. 65:2) Éyoñe fe bia yene na, Yéhôva a yalane meye’elane mangan, nye’ane bia nye’e nye wo nen. Bia yem éyoñ éte na, “Yéhôva a ne bebé be ba bese b’aloene nye a benya mejôô.” (Bs. 145:18) Ndi nlem éte ja ye volô bia na, bi dañe meve’ele bi ne beta tôbane me.

11, 12. Jé bi ne bo asu ya na, nye’ane bia nye’e Mejô me Zambe ô nen?

¹¹ Benya Bekristen ba nye’e Mejô me Zambe, ba kabetane fe me. Mejô me Zambe me ne ajeñe ya benya mejôô. Éyoñe Yésus a nga ye’elan Ésa wé, a nga jô nye na: “Mejô môé me ne benya mejôô.” (Jn. 17:17) Bia ye ñhe nye’e Mejô me Zambe éyoñe bia ye me tu’a yem. (Beco. 1:10) Ve bia yiane fe bo abui mam afe. Tame yen avale kalate  Besam 119 a volô bia na bi yeme jé ja tinane na, e yeme benya mejôô. (Lañe Besam 119:97-100.) Ye bia nyoñe fo’o éyoñe ya tu’a fase bifuse ya Kalate Zambe môs ôse? Nye’an bia nye’e Mejô me Zambe wo ye nen éyoñe bia bindi mfi bia yen éyoñe bia tôñe miñye’elane ya Kalate Zambe ényiñe jangan.

¹² Ntili Besam a nga jô na: “Ngo’o aka’a zam mejô môé me ne anyu dam! Ya, m’adañe wôé zam anyu dam!” (Bs. 119:103) Bia fe bi ne yene na, miñye’elane bia bi a zene ya ékôane Yéhôva mi ne zam. Bi ne jô’é na miñye’elane mite mi tabe bia menyu, nalé aye volô bia na bi simesane “bifia bi ayian,” a belane bie na, bi volô bôte bevok.—Ec. 12:10.

13. Jé é nga volô Jérémie na a nye’e Mejô me Zambe, a aval avé Mejô me Zambe me mbe me nambe’e nye?

¹³ Nkulu mejô Jérémie a mbe a nye’e Mejô me Zambe. Tame yen avale Mejô me Zambe me mbe me nambe’e nye. “Mejô môé me nga yené, a me nga di me; a mejô môé me mbe meva’a mfa’a wom, a mefône ya nleme wom: amu m’aloban a jôé dôé, a Yéhôva, Zambe ya minsamba mewosan.” (Jr. 15:16) Jérémie a mbe a lañek, a bindi Mejô me Zambe. Mboon ôte ô nga bo na, a ve Yéhôva akéva amu a mbe a bili mvome ya wumulu jôé dé. Ye nye’ane bia nye’e Mejô me Zambe wo tindi fo’o bia na, bi yemelane beta mvome bi bili amu bi be’e éyôlé Zambe, a amu bia kañete Éjôé jé melu ya asu’ulane ma?

14. Aval avé bi ne dañe nye’e Mejô me Zambe?

¹⁴ Nge ô vaa nlañane ya Kalate Zambe a bekalate ya Tin Ékôan, jé bi ne beta bo na, bi dañe nye’e Mejô me Zambe? Bi ne dañe nye’e Mejô me Zambe éyoñe bi ne mban ya tabe bisulan. Ayé’é ya Kalate Zambe bia bo sondô ase a zene ya Nkume mmombô a bete, e ne beta zene ya nyoñe ñye’elan. Bia yiane kôme kômesan ayé’é ya Nkume mmombô a bete, asu ya na, bi kôme wôk mam bia yé’é. Bi ne de bo éyoñe bia lañe bifuse bise ya ayé’é. Den, ô ne limiti Nkume mmombô a bete e jw.org, ô  ne fe ke application JW Library abui minkobô. Nge ô bili Nkume mmombô a bete minsini wôé, ô ne lañe bifuse ya Kalate Zambe tyi’ibi. Avale zen ese wo belane de, e nyoñ éyoñe ya lañe bifuse ya Kalate Zambe, a e bindi bie, aye nene nye’ane wo nye’e Mejô me Zambe.—Lañe Besam 1:2.

15, 16. (a) Kalate Jean 13:34, 35 a liti na bi ne ntindane ya bo jé? (b) Aval avé nye’an bia nye’e bobejañ, ô tii a nye’an bia nye’e Yéhôva a Mejô mé?

¹⁵ Alu a nga kandane lôte si va, Yésus a nga kate beyé’é bé na: “Me ave mia mfefé atiñe na, nye’esan; aval ane me nga nye’e mia, nalé fe miabebien, nye’esan. Zene nyô bôte bese be aye yeme na mi ne beyé’é bam, nge mia nye’esan.”—Jn. 13:34, 35.

¹⁶ Nye’an bia nye’e bobejañ ô tii a nye’an bia nye’e Yéhôva. Bi se ngule ya nye’e Yéhôva, nge bi nji nye’e bobejañ. Nlômane Jean ô nga tili na: “E môt a ne te nye’e monyañ a lôô a mis, a se ngule ya nye’e Zambe a nji yen.” (1 Jn. 4:20, Mfefé Nkôñelan.) Nde fe, nye’an bia nye’e Yéhôva a bobejañ, ô tii a nye’an bia nye’e Mejô me Zambe. Amu jé bia jô nalé? Amu na, nye’ane bia nye’e Mejô me Zambe wo ye tindi bia na, bi tôñ atiñe da jô na bi nye’e Zambe a bobejañ.—1 P. 1:22; 1 Jn. 4:21.

17. Mam mevé bi ne bo na bi liti nye’an akônda été?

¹⁷ Lañe 1 Bethessalonicien 4:9, 10. Mam mevé bi ne bo na, bi liti nye’an akônda dangan? Nnôme mojañ éziñ, nge sita ô ne kômbô tabe bisulan, ve teke moné. Nkuse sita éziñ ô ne yi na, bi volô nye kôme jôm éziñ nda jé. (Jc. 1:27) Mojañ éziñ, nge sita éziñ, ésoé, nge nnôm, a bili atek, nge ke na, a tôbane nju’u wo sili na, bi su’u nye, a ve nye ngule nyul. (Min. 12:25; Beco. 4:11) Éyoñe bi nji jô ve anyu anyu na, bia nye’e bobejañ, bia liti na, “ba be ne ba ya nda mbunan” be ne nya mfi asu dangan.—Beg. 6:10.

18. Jé ja ye volô bia na, bi kôme bone mejô be ne kui zañe bia be bobejañ?

¹⁸ Kalate Zambe a jô na, “melu me asu’ulan” ya mbia nta’ane mame nyi, ma ye bo njalan a nsisime mebun a ôzañ akum. (2 Tim. 3:1, 2) Ajô te, bia yiane ve ngul ése na, nye’ane bia nye’e Zambe, nye’ane bia nye’e Mejô me Zambe, a nye’ane bia nye’e bôte bevok ô nen. E ne été na, bone mejô be ne kui zañe bobenyañ. Ve ngo’o avale bibotan bia bi éyoñe nye’an wo tindi bôte bese ya akônda na, be kôme mejô mese me ne kui zañe jap avale da yian! (Beép. 4:32; Beco. 3:14) Nde ñhe, te bia jô’é môs éziñe na nye’ane wongan ô voé! Ve, enkela’an ôsu a nye’e Yéhôva, Mejô mé, a bobejañ nya nye’ane.