YÉSUS a nga jô na, beyé’é bé ba ye vak, amu ba ye yô abui bitôtôlô bidi melu ya asu’ulan. (Mt. 9:37; 24:14) Bi tame zu yen aval avé mejô mete me nga tôébane ngoto ya si ya Ukraine ba loene na Transcarpatie. Ngoto ya Transcarpatie é bili betisone belal, mekônda bengaa be Yéhôva 50, a bekañete mbamba foé 5 400 a mvuk. * Éyoñe ba bamane bôte bese ya betisone bite, nge ba lañe bôte benyin, wua ya été a ne Ngaa Yéhôva.

Nne nkañete wo bobane ngoto éte aya? Mojañe ya vôm ate, Vasile a yalane na: “Bôte ya va ba semé Kalate Zambe, ba nye’e zôsô, bibu’a ya menda me bôt bia wô’ane mintaé, bia nye’e fe bi volô’ô bôte bevok.” A beta jô na: “Be nji dañe kañese miñye’elane miangan mise. Ve éyoñe wo liti be jôm éziñe Kalate Zambe été, ba kôme fo’o baa alo.”

É ne été na, bobejañ a bekal ba tôbane ngum avale minjuk éyoñe ba kañete vôme Bengaa be Yéhôva be ne abui a lôté ba be nji bo Bengaa. Bi tame nyoñ éve’an. Akônda éziñ é bili bekañete mbamba foé 134, ve abôta nkañete dap ki e bili ve menda 50. Bobejañ be wô’ô bo aya éyoñ ete?

Abui bobejañ a bekal da ke kañete vôme bekañete mbamba foé be ne tyôtyoé. Mojañe Ionash, a mbili mimbu 90 a jô na: “Éyoñe bia lañe bobejañe ya akônda dangan, a abime menda ba yiane kañete, bia yene na Ngaa Yéhôva ase ja yiane kañete nda ébaé. Ma kañete nlame mvus, ve éyoñe me nga bo ntutuñ, me nga wulu kilimeta 160 akekui vôme bekañete mbamba foé ba jemban. Éyoñe me nga kui wôé, nde me nga taté na ma kañete bôte mejô me Zambe nkobô ya Hongrie.” Bekañete mbamba foé ba yiane nyume bebien mam asu ya na, be kañete bevôme befe. Ionash a jô na: “Me wô’ô kôlô si mewolo 4 ya mam me tyé na me ke dañe minsini a minkoñ; me wô’ô kañete akekui mewolo 6 ya mam me ngô’é, awolo minsini a minkoñ a bulan. Me mbe me bo’o nalé biyoñe bibaé nge bilal e sondô.” Ye a mbe a simesa’ane na a wu nju’u zézé? A jô na: “Me mbe me nyeke’e fatane nkañete éte, a me nga wô’ô meva’a ya volô nda bôt éziñ e mbe é too ôyap na be yeme benya mejôô.”

É ne été na, sa ke môt ase ya ngoto éte, nnye a ne wulu na, a ke nté ôte. Ve bôte bese, ja’a bekañete be ntoo minnôm, ba yeme ngule na be nambe môte ase ya abôta nkañete dangan. Mbu 2017, bôte bese be nga tabe mesimesa’ane ya awu Yésus betisone bilal bite, be mbe bebé tañe bekañete mbamba foé biyoñe bibaé, a mbe ane nge wo kabe bôte bese ya bitisone bite bise ngab ébaé. Teke vaa nga beté vôm ase bi ne kañe Yéhôva bia ye yene na mam ya bo asu Yéhôva me ngenane fo’o nya abui.”​—1 Bec. 15:58.