ÉYOÑ Yésus a nga ye’ele beyé’é bé ésaé nkañete, a mbe a yeme’e na, sa ke éyoñ ése nje ba ye nyoñ be mvo’é. (Luc 10:3, 5, 6) E ne kui na môt a yaa a bia éyoñ bi ne nkañete. E wô’ô bo ayaé na bi mvaman avale môt ete.

Môt a ne mvam a jeñe na a yemelan miñyiane mi bôte bevok a minju’u ba tôbane mie, a tebe été jap, a jeñe fe na a volô be. Nge bi nji bi fulu éte, nalé a ne bo na bi bo teke beta bo ayôñ a akap ésaé nkañete. Ve éyoñ bia mvamane bôte bia kañete, a ne ane bia sôé mbone nduan; ôwé mvam ja bo na bi ke ôsu a bo ayôñ ésaé nkañete.​—1 Bet. 5:19.

Aval avé bi ne liti fulu mvam to’o éyoñ nalé a ne ayaé? Bi tame zu yene bôte belal bia yiane kôme vu mfa’a ôte : Yéhôva, Yésus a nlômane Paul.

Den a nto betoyini mimbu ba ve Yéhôva jôé mvit. Ve akôsa bo nalé, Yéhôva a ke ôsu “a mvamane bôt be ne bikalak a mam abé.” (Luc 6:35) Fulu ôjibi jé ja liti na a ne mvam. Yéhôva a yi na “bôte bese” be bi ényiñ. (1 Tim. 2:3, 4) To’o Yéhôva a vini abé, a nye’e bone be bôt, a nji yi na wua ya be be a jañele ényiñ.​—2 P. 3:9.

Yéhôva a yem abim avé Satan a dime bôte mis na be bo teke nye’e Nye. (2 Bec. 4:3, 4) Abui bôt e nga yé’é bivus bedo’oten a mefulu méziñ aso bongô, jôm ete nje e ne ayaé na be kañese benya mejôô. Yéhôva a kômbô volô be. Bia yeme de aval avé?

Tame yene jam e nga kui bôte ya Ninive. Akôsa bo be mbe évô, Yéhôva a nga jô Jonas na: “Ye me nji yiane simesane Ninive, beta nlam ate, nnye ate bôte be to a dañe toyini a ntet a toyini mewôm mebaé, mbe bete be ne te yeme kandé mbo nnôme wop a mbo ngale wop?” (Jonas 4:11) Yéhôva a mbe a yeme’e na, bôte ya Ninive be nji yem mezene mé, jôm ete nje a nga lôme Jonas na, a ke bemene be.

Bia fe bia nye’e bôt. Ajô ete, ane Yéhôva, bia yiane jeñe fane ya volô be, to’o bi lô na ba bo mbia be mam.

Bia fe bi nji yiane tyi’i môt ajô amu a ke bene vô’ôlô bia, ve bia yiane jeñe na bi yem amu jé a bene vô’ôlô bia. Éko éziñ a  ne amu “Bekristen” béziñ ba bo angôndô ya mbia be mam. Be nga laane bôte bevo’o minsos ajô Bengaa be Yéhôva. Ba bevo’o ki ba mate nda bôte jap nge ke bôte befe.

Bôte bevo’o ba bene vô’ôlô bia amu minju’u be nga tôbane mie ényiñ mia tya’a be nlem. Missionnaire éziñ a kate bia na: “Bita bi nga bo na abui bôte ya abôta nkañete dangan é jañele akum dab ése. Ba buni na, ényiñ jap é jaéya ntuk. Be ne ve ôlun ôlun, a be nji bi étabe ndi. Abui ya be be é ne teke vô’ôlô bia éyoñ bia kañete be. Môs éziñ, be nga bôbôme ma.”

Jé é nga volô sita Kim na a ke ôsu a liti mvam akusa bo étibela’a éte? A jô na: “Éyoñ môt a dimine nyoñe ma nkañete, ma jeñe na me simesane mejô ya kalate Minkana 19:11 ma: ‘Nya fe’e ya môt a ve nye ôte’ete’e ya yaa.’ Éyoñ ma tyô’ô fe vôm môt a so, nalé a volô ma na me yeme tebe été jé. Mbamba jam a ne na, bôte bevo’o ba vô’ôlô bia. Bi bili mbamba minjoman.”

Bia yiane sili biabebiene na: ‘Nge me nji be Ngaa, éyoñ éte mone Bengaa a zu ma kañete, me nga ye nyoñe nye aya?’ Bi tame jô na valé ô jaéya wô’ô be kobô’ô Bengaa abé, éko éziñe wo fe ô nga ye dimine nyoñ be, a e nga ye sili na be mvamane wo. Yésus a nga jô fe bia na bi bo bôte bevok avale bia nye’e na be bo bia; melebe mete ma tindi bia na bi mvamane bôte bia kañete, to’o éyoñ nalé a ne ayaé.​—Mt. 7:12.

Nlômane Paul ô nga mvamane bôte be mbe be wosa’ane benya mejôô. Amu jé? Amu a nga simesan aval émien a nga taté be. A nga jô na: “Me mbe mbiasé melu mvus, a nkpwe’ele, a mbo évô: akôsa bo nalé, me nga nyoñ mvam, amu me nga bo nalé amu bisô ya ndiman.” (1 Tim. 1:13) Paul a nga meme na, Yéhôva ba Yésus be nga mvamane nye aka’a abui. Ajô te, éyoñ môt a mbe a vini’i nkañete wé, Paul a mbe a simesa’an aval émien a mbe a bo’o ôsusua na a bo Kristen.

Biyoñ biziñ, Paul a mbe a tôba’ane bôte ba buni bivuse bedo’oten. A mbe a bo’ aya na a kañete be? Mam Minlôman 17:16 a kate bia na, môs éziñ Paul a too Athènes, “a nga wô’ abé nleme wé amu a nga yen  nlam ôte bengunemelan ne lut!” Ve akôsa bo nalé, Paul a nga bo angôndô ya abeñ nkañete môs ôte. (Mam. 17:22, 23) A mbe a jeñe’e na a nambe fatane môt ése nlem, nsôñane wé ô too na a “nyii bevo’o [ya be be] a mezene mese.”​—1 Bec. 9:20-23.

Bi ne vu Paul nge bia bo te kañese na bivuse miñye’elan, a avale môt a nyoñe bia bi kamane bia na bi yeme kañete bôte “mbamba mefoé ya mvaé.” (És. 52:7) Sita Dorothée a jô na: “Abôta nkañete dangan, abui bôt é nga yé’é na Zambe a ne njet a na, a tôñesan mon ékob ase môt a ne bo. Éyoñ ma tôbane môt a simesane nalé, ma taté se’e nye amu a buni na Zambe a ne, mvuse ya valé, ma liti nye mefulu me Zambe wongan ya nye’an, a mengaka’a mé Kalate Zambe été.”

Bia yiane fe fas avale bi ne ve bôte bia be be bia kañete ngule nyul. Jessica a jô na: “Nge be dimine nyoñ môte bia nye bia kañete, ma jeñe na bi laane mam mefe. Ma jeñe na me laane mam ma ve ngule nyul, ane mbamba bibuma ésaé jangan ja wum akôsa bo bôte béziñ ba vini benya mejôô.”

Yéhôva a yem minju’u mise bia tôbane mie nkañete. Ngo’ abime mvaé a ne wôk, éyoñ a yene na bia vu fulu mvame jé! (Luc 6:36) E ne été na, Yéhôva a ye ke mvamane besiñe bé nnôm éto. Bi ne tabe ndi na a ye tyam mbia émo nyi mbamba éyoñ. Nté ôte ôse bi bi ne ve kee nkañete ôsu. (2 Tim. 4:2) Enkelané nja’a ôsu a bo ésaé jangan a ayôñ ése, teke kañese na jôm éziñ é kamane bia na bi mvamane “bôte bese.”