1. Kalate Bephilippien 2:3 a liti na aval avé fulu éjote nyule ja yemete élate bia be Yéhôva a bobejañ?

BIA bo Yéhôva mewôk a nlem ôse amu bia yeme na mam mese a sili bia me ne asu mfi wongane biabebien. (Beép. 4:22-24) Éyoñ bi ne éjote nyul, nkômbane Yéhôva ñwô bia telé ôsu ényiñe jangan, a nalé a bo fe na bi semé bôte bevok adañ abim bia semé biabebien. Ndemben élate bia be Yéhôva a bobejañe ja tu’a bo ngul.​—Lañe’e Bephilippien 2:3.

2. Jé Paul a mbe a yeme’e, a jé bia zu yen ayé’é di?

² Nge bi bo fianga, bi ne teme bi nto mebun a simesane ve biabebien ane bôte ya émo Satan. * A ne ve ane ntete mimbu ôsu, Bekristene béziñe ya Rome be nga ye kôbô nsisim ôte, jôm ete nje Paul a nga tili be na: “Ma jô môt ase ya be mia . . .  na a bo’o te simesan émien adañ abim a yiane simesan; ve simesan ôsimesan [wo yian].” (Bero. 12:3) Mejô me Paul mete ma liti na e nji bo abé na bi semé biabebien abim éziñ. Ve nge bi ne éjote nyul, bia ye ke jeñ a zen éziñe na bi bete biabebiene yôp. Ayé’é di, bia zu yen aval avé fulu éjote nyul é ne volô bia bité bilale bi: (1) nda aluk, (2) éyoñe bi be’e mimbe’e akônda, a (3) éyoñ bia belane beréseaux sociaux.

3. Amu jé jo’ojo’o a ne so nda aluk, a jé belu’u béziñ ba bo éyoñ be bili mejô?

³ Yéhôva a nga té aluk asu na nnôm ba ngal be bu’ubane de. Ve mbôle be be’e metyi ya abé, e ne kui na jo’ojo’o a kui zañe jap biyoñ biziñ. Paul a nga jô jô na beluk ba ye tôbane minju’u miziñ. (1 Bec. 7:28) Belu’u béziñ be ne éyoñ ése ve mejô, a nalé a ne bo na be simesane na be nji yiane lu’an. Nge nsisime ya émo ô nyiin avale belu’u ete nlem, be ne viane kômbô nyab étas. Môt ase ya be be a ne taté na a fase na, asu na a bone vebe, da sili ve na a tyame betaa alu’u ate.

4. Jé bia yiane sa’ale?

⁴ Bi nji yiane simesane na teke jam bi ne beta bo asu na alu’u dangan e wulu mvo’é. Bia yeme na mejian étam mme me ne bo na môt a tyam alu’u mise me Yéhôva. (Mt. 5:32) Ajô te, nge mejô ma kui zañe mia môt ô nga luk, te jô’é na mebune me tindi wo na ô sili womien avale minsili di: ‘Alu’u di da soo soo ma jé? Nye’an ôbien me nga zu jeñe va ô ne vé? Nga me ne jibi lu’u lu’u môte mfe?’ Nga minsili mite mia liti na môt a simesane ve émien? Fe’e ya émo é ne tindi wo na ô bo ve avale wo kômbô nlem, a na ô jeñe ve mvaé jôé, to’o da sili na ô tyam alu’u dôé. Ve Bible ki a jô na môt a nji yiane “fombô ve mfa’a ya mam mé émien, ve [na] môt ase . . .  a fombô’ô fe mam me nyi mbok. (Beph. 2:4) Yéhôva a nji yi na ô tyam alu’u dôé, ve a yi na ô bibane na ô ba’ale de. (Mt. 19:6) A yi na ô taté simesane nye, sa ke womien.

5. Bela’ane Beéphésien 5:33 na ô liti aval avé nlu’ ase a yiane nyoñe nyô mbok.

⁵ Môt ase a yiane semé a nye’e nyô  mbo’o nda aluk. (Lañe’e Beéphésien 5:33.) Kalate Zambe a lebe bia na bi ve adañ abim bia nyoñ. (Mam. 20:35) Jé é ne volô nlu’ase na a nye’e a semé nyô mbok? Éjote nyul! Éyoñ belu’u be ne éjote nyul, môt ase ya be be a dañe jeñe ve ‘mvaé môte mbok.’​—1 Bec. 10:24.

6. Jé jame Steven ba Stephanie ba jô da ye’ele wo?

⁶ Fulu éjote nyul é volôya abui Bekristene na e bu’uban alu’u dap. Mojañ Steven a jô na: “Nnôm ba ngale ba yiane saé nsamba, e dañe dañ éyoñ be bili mejô. Te simesane ve na ‘jé é ne mvo’é asu dam?’ ve na, ‘jé é ne mvo’é asu dangan?’” Minga wé Stephanie fe a simesane ve avale da. A jô na: “Ô vo’o nye’e ô too a môt a ne éyoñ ése ve meluman. Éyoñe jo’ojo’o a kui zañe jañ, bia nnôme wom bia jeñe na bi yeme jé ja te soo jo’ojo’o ate. Ôsusua na bia zu kobô ajô, bia taté ye’elan a jeñe jôme bekalate bangan ba jô a lat a jam ete. Éyoñ éte bia tebe ñhe ngame jia, a jeñe na bi wosane jam da kômbô ndaman élate jangan.” Wo fe wo ye tu’a bu’uban alu’u dôé nge wo semé môt ô nga luk adañ abime wo semé womien.

7. Mojañ a be’e mimbe’e akônda a yiane yen émien aya?

⁷ Bia yen ésaé ése bi ne bo asu Yéhôva ane beta mvom. (Bs. 27:4; 84:10) E nji bo abé na mojañ a bibane na a be’e mimbe’e ékôane Yéhôva. Bible émien a jô na: ‘Nge môt a jeñe na a be’e mbe’e mvendé, a kômbô mbamba ésaé.’ (1 Tim. 3:1) Ve môt a nji yiane ve’ele bete émiene yôp amu a be’e mbe’e éziñ akônda. (Luc 17:7-10) A yiane yeme na Yéhôva a ve nye mbe’e ôte asu na a saane bôte bevok.​—2 Bec. 12:15.

8. Jé minkañete mi Diotrèphe, Ozias, a Absalom mia ye’ele bia?

⁸ Kalate Zambe a kobô ajô bôte béziñ be nga bete bebiene yôp. Diotrèphe a ne wua ya été; a mbe a yi ve na nnye be ‘telé ôsu’ akônda. (3 Jean 9) Mebun me nga tindi fe Ozias na a bo ésaé é nji be énjé. (2 Mka. 26:16-21) Absalom ki a nga jeñe na a wone minlem mi bôte ya Israël amu a mbe a nyamete éto njôô. (2 Sa. 15:2-6) Minkañete mite mise mia kôme liti na Yéhôva a feme bôte bese ba jeñe na be wumulu bebien. (Min. 25:27) Be bete be sisi, avale bôt ete da ye su’ulane tôbane jé é bo ma!​—Min. 16:18.

9. Mbamba éve’ela mbé Yésus a nga li’i bia?

⁹ Ve tame yen avale môte Yésus nye a mbe. Akusa bo a mbe éfuna’ane Zambe, a nji simesane môs éziñe na ba Zambe be ne bo nkôñe wua. (Beph. 2:6) Nya ajôô ki a ne na, ane ô kôlô be Yéhôva, ô suane ve be Yésus; ve to’o nalé, Yésus a nji bete émiene yôbe môs éziñ. A nga lebe beyé’é bé na: “Mia bese, môt a dañe tyôtyoé nnye a ne anen [nge ke na nnye a dañ, Mfefé Nkôñelan].” (Luc 9:48) Bi bili ma’a na bekpwa’a mefane bia be be bia saé fufulu, a bemvendé, a bediakon, a bejome mekônda ba vu fulu éjote nyule Yésus. Nge bi ne éjote nyul, bia ye tu’a nye’e bôte bevok. Yésus ki a nga jô na, nye’ane wo ye yené zañe jangan ñwô wo ye bo’olô na bi ne benya bebo bisaé be Zambe.​—Jean 13:35.

10. Wo yiane bo aya nge mfa’a wôé bemvendé be nji kôme mam ma ndeñele akônda avale da yian?

¹⁰ Jé ô ne bo nge wo yene ve ane bemvendé ba kôme ki mam méziñe ma  ndeñele akônda avale da sili? Te taté na wo tatan. Fulu éjote nyule ja yiane tindi wo na ô suk ba ba tebele akônda. (Beh. 13:17) Minsili mi mi ne volô wo: ‘Ye sa ke ma ma beté ôdo’é nga? Nge e ne ne ke na ajô é ne akônda, ye mbamba éyoñe ya kôme de le? Ye ma me bili na ma kôm ajô te nga? Nya ajôô fo’o, ma jeñe jeñe jé: ye mvo’é ya akônda, ye na me wumulu mamien?’

11. Kalate Beéphésien 4:2, 3 a liti na jé ja ye kui nge bi ne éjote nyul?

¹¹ E mise me Yéhôva, éjote nyul é ne mfi adañ atyeñe mboane mam, élate jangane ki adañe mbamba bibuma bise ésaé jangan é ne wum. Ajô te, va’a ngule ya bo éjote nyul éyoñe wo kañe Yéhôva. Nge ô bo de, wo ye yemete élat é ne akônda Yéhôva été. (Lañe’e Beéphésien 4:2, 3.) Bo’o ayôñ ésaé nkañete. Fase’e bone be mam ô ne bo asu na ô volô bôte bevok. Liti’i môt ase fulu anyep, to’o ba be nji bi atañe mbe’e akônda. (Mt. 6:1-4; Luc 14:12-14) Éyoñ wo saé a nlem ôse nalé, bôte ba ye ke dañe yene ve atyeñe mboane mame dôé, ba ye fe yene na ô ne éjote nyul.

12. Ye Yéhôva a yi na bi bi bemvôé? Timi’in.

¹² Yéhôva a yi na bi bu’ubane mbamba biyoñ a bemvôé bangan nge ke a nda bôte jangan. (Bs. 133:1) Yésus fe a mbe a bili mbamba bemvôé. (Jean 15:15) Bible a liti bia mfi ya bi mbamba bemvôé. (Min. 17:17; 18:24) A jô fe bia na bi nji yiane tabe vôme wongan étam. (Min. 18:1) Abui bôte da simesane na  beréseaux sociaux be ne volô be na be bi abui bemvôé a na be bo teke wô’ôtane na be ne étam. Ve bia yiane tabe ntyel a avale bia belane be.

13. Aval avé beréseaux sociaux be ne bo na môt a wô’ô émien éngôngol a na a kone nlem?

¹³ Beyeme mam ba jô na bôte ba lôt éyoñe na ba lañe mam bôte bevo’o ba tili beréseaux sociaux, nge ke yene befôtô a bevidéo ba lôme wôé, be wô’ô su’ulan éngôngol a minkôkone minlem. Amu jé? E ne kui nalé amu bôte ba lôme befôtô internet be wô’ô kôme tobe befôtô ba ngôné beta be mam ba kui be ényiñ; be wô’ô fiale mbamba befôtô, vôm ba bu’uban ényiñ étam nge ki a bemvôé bap, nge ke ba ba liti mbamba bevôm be wô’ô ke ba sambe. Môt a yen avale befôtô ete a ne wô’ô émien éngôngol a simesane na nye a nga zu fo’o si va ve na a zu litane bôte bevok. Sita éziñ a bili mimbu 19 a meme na: “Me nga taté na ma kômbô besom amu be ba sambe memane me sondô nté me me zeme nda.”

14. Aval avé melebe bia koone me 1 Pierre 3:8 ma volô bia na bi yeme belane beréseaux sociaux?

¹⁴ Bi nji kômbô jô na môt a vo’o belane beréseaux sociaux na a laan a nda bôte jé nge ke a bemvôé bé. Ve nga miabebiene mia yene na bôte béziñe ba lôme befôtô, a bevidéo, a mam mefe internet asu na be bo éngelezek a wumulu bebien? A ne ve ane ba jô na: “Ye mi lôô fo’o ma nga?” Bôte bevo’o ba kui na be tili mbia be mam befôtô baba si, nge ke befôtô be bôte bevok. Bekristene be nji yiane belane beréseaux sociaux aval ete, amu Bible a jô be na be bo éjote nyul a na be wô’ane mintaé.​—Lañe’e 1 Pierre 3:8.

15. Aval avé Bible a volô bia na bi sa’ale fulu éngelezek?

¹⁵ Nge wo belane beréseaux sociaux, sili’i womiene na: ‘Ye befôtô a bevidéo ma lôm a mam ma tili me ne bo na môt a buni na me ne éngelezek? Ye mam mete me ne bo na môt éziñ a kômbô ma?’ Bible a jô na: “Mam mese [ya émo ji], mbia minkômbane ya minsôn a mbia  nkômbane ya mis a duma mebune ya ényiñ, me nji bo mame ya be Tate, ve ma ya [émo ji.]” (1 Jean 2:16) Kalate Zambe mfe (nkobô Énglis) a kônelane bifia “duma mebune ya ényiñ” avale di: “nkômbane ya bo miñyené.” E nji yiane na Ngaa Yéhôva é bo miñyené nge ke na é kômbô bete ébiene yôp. Benya Bekristene ba tôñe melebe ya Bible ma: “Bo’ane te bo mebune ya momo duma, a soñe miabebien, a sengane miabebien.” (Beg. 5:26) Nge bi ne éjote nyul, bia ye ke vu bôte ya émo ji ba yi ve na be bo miñyené.

16. Amu jé bia yiane sa’ale mebun?

¹⁶ Bia yiane bo éjote nyul amu mebun me ne fulu bôte ba fase ki mvo’é. (Bero. 12:3) Bôte be ne mebun ba nye’e mejô a ba simesane fe ve bebien. Avale ba telé bôte bevo’o minju’ éte, nde fe ba bo bebien abé nalé. Nge be bo fianga, Satan a ye ndamane be mfasan, a mebune ma ye zu kôm étaba’a minlem miap. (2 Bec. 4:4; 11:3) Ve môt a ne éjote nyul nye a bili mbamba mfasan. A yene ki émiene nkenge, ve a yeme na bôte bevo’o ba dañe nye mimfa’a abui. (Beph. 2:3) A yeme fe na “Zambe a tele bôte be ne mebune ngame yat, ve a mvamane ba be ne [éjote nyul.]” (1 P. 5:5) Môt a fase mvo’é a kôme sa’ale jam ese e ne bo na Yéhôva a tebe nye ngame yat.

17. Jé ja ye volô bia na bi ba’ale fulu éjote nyul?

¹⁷ Asu na bi ba’ale fulu éjote nyul, bia yiane vaa “nnôme môt [a] . . .  mimboane mi mam mié,” a jaé “mfefé môt.” Jam ete e nji bo tyi’ibi. Asu na bi bo de, bia yiane nyoñ éyoñe ya bindi éve’ela Yésus a jeñ a ngul ése na bi vu nye. (Beco. 3:9, 10; 1 P. 2:21) Nge bi bo de bia ye ke jôban. Nge bia jeñe na bi bo éjote nyul, bia ye bu’ubane mbamba ényiñe nda aluk, bia ye yemete élate ya akônda, a bia ye yeme belane beréseaux sociaux. A jame da dañ é ne na Yéhôva a ye botane bia.