1. Ôsusua na nlômane Pierre wo wu, Yéhôva a nga belane wô na ô bo jé?

 NLÔMANE Pierre ô mbe ô yeme’e na ô mbeme wu. Mimbu mewôm Pierre a nga bo Yéhôva ésaé, a nga wulu a Yésus, a kañete abui bevôm, a su’ulane fe bo ébu’a jia ya tin ékôan. Ve, Yéhôva a nga beta ve nye ésaé éfe. Bebé mbu 62-64 É.J., Yéhôva a nga belane Pierre na a tili bekalate bebaé ya Kalate Zambe, kalate 1 Pierre a 2 Pierre. Pierre a mbe a too ndi na bekalate bete ba ye volô bekristene bese mvuse awu dé.—2 P. 1:12-15.

2. Amu jé bekalate Pierre a nga tili be mbe mfi éyoñ éte?

² Pierre a nga tili bekalate bete a ngule ya mfufube nsisim, éyoñe bekristene bevo’o be mbe be too éyôé amu ‘be mbe be tôba’ane meve’ele mevale meval.’ (1 P. 1:6) Mbia be bôte be nga soo bivuse miñye’elan a mvite ntaban ékôane bekristen été. (2 P. 2:1, 2, 14) Bekristene be mbe be nyiñi’i Jérusalem be mbe be nga zu yen “memane ya mame mese,” nalé a tinane na nkane bita beromain ô mbe ô nga zu tyame Jérusalem a temple wé. (1 P. 4:7) Teke bisô na bekalate Pierre a nga tili be nga volô bekristene na be yeme jame be ne bo asu na be jibi minju’u be mbe be tôba’ane mie, a na be tabe nkômesan asu minju’u be mbe be yiane tôbane mie melu ma zu. b

3. Amu jé bia yiane yé’é bekalate Pierre a nga tili?

³ Akusa bo na Pierre a nga tili bekristene be mbe be nyiñi’i éyoñ éte, ve Yéhôva a nga bo na be tili bekalate bete Kalate Zambe. Ajô te, bia fe bi ne yene mfi ya bekalate bete den. (Rom. 15:4) Aval ane bekristene bete, bia fe bia nyiñ  émo é ne njalan a mvite mimboon, bia tôbane fe minju’u mi ne bo na bi kate bo Yéhôva ésaé tyi’ibi. Nde fe ana’ana, bia zu tôbane beta étibila’a a ye dañe nyi a nga bo na nta’ane mame bejuif ô tyamban. Bekalate bebaé Pierre a nga tili ba ve bia mebendé me ne bo bia nya mfii. Mebendé mete ma ye volô bia na bi yange môse Yéhôva, bi dañe woñe bôt, a na bi nye’e bôte bevo’o nya nye’ane. Mebendé mete me ne fe volô bemvendé na be yen aval avé be ne volô bobenyañ a besita ya ékôane bekristene na be tebe ne bip mbunan été.

4. Avale kalate 2 Pierre 3:3, 4 a liti, jé é ne te’e mbunane wongan?

⁴ Bia nyiñe zañe bôte ba buni ki minkulane mejô ya Kalate Zambe. Besiñe bangane be ne kpwe’ele bia amu bi nga jô den a ntoo abui mimbu na asu’ulan é mbeme so. Bôte béziñe ba jô na asu’ulane da ye ke ve’ele so môs éziñ. (Lañe’e 2 Pierre 3:3, 4.) Nge bia wô’ô avale mejô éte é so’o menyu me bôte bia kañete, bôte bia be be bia saé, bibu’a ya menda me bôte mangan, mbunane wongan ô ne su’ulane tek. Ve Pierre a nga kate jam é ne volô bia.

5. Jé é ne volô bia na bi ke ôsu a yange asu’ulane ya émo ji a ôjibi ôse? (2 Pierre 3:8, 9)

⁵ Bôte béziñe be ne simesane na Yéhôva a ji’a ke jiane mbia émo nyi. Ve mejô Pierre a nga tili me ne volô bia na bi bi mbamba ñyenane mam. Ma volô bia na bi yeme na Yéhôva ba môta biname ba yene ki éyoñ avale da. (Lañe’e 2 Pierre 3:8, 9.) Mfa’a Yéhôva, toyini mimbu é ne ane môse wua. Yéhôva a ne ôjibi, a a nji yi na môt éziñ a wu. Ve éyoñe môse wé wo ye kui, nta’ane mame wu wo ye jañ. Ngo’o abim ébotane bi bili na bi belane mone éyoñ a li’iya asu na bi kañete bôte ya meyoñe mese ya si va.

6. Aval avé bi ne ke ôsu a ba’ale môse Yéhôva ôsimesane wongan? (2 Pierre 3:11, 12)

⁶ Pierre a jô bia na bi “ba’ale ôsimesane” wongane na môse Yéhôva ô ntoo bebé. (Lañe’e 2 Pierre 3:11, 12.) Aval avé? Bi ne de bo éyoñe bia jeñe môs ôse na bi simesane bibotane bia ye bi mfefé émo. Tame ve’ele simesane womiene mfefé émo, ô vebe’e mbamba mfebe, ô ja’a mbamba bidi, ô kele’e wuba’ane bôte bôé be nga mane wu ba wômô mesoñ, ô volô’ô fe bizu’u bi bôte bi nga nyiñe melu mvuse na bi yeme aval avé minkulane mejô ya Kalate Zambe mi nga tôéban. Éyoñe bia nyoñ éyoñe ya fase mame mete, nalé a ye volô bia na bi yange môse Yéhôva a ôjeja’a ôse, a na bi tabe ndi na asu’ulan é ntoo bebé. Mbôle bi “nga yeme jam éte,” melu ma zu bia ye “bo teke yale fé,” a bo te du’uban a bivuse miñye’elan.—2 P. 3:17.

7. Aval avé woñe bôt ô ne ndeñele bia?

⁷ Mbôle bia yeme na môse Yéhôva ô mbeme so, nalé a ve bia éva’a ya kañete bôte bevo’o mbamba foé. Ve biyoñe biziñe bi ne ko woñe ya kobô ajô Yéhôva. Amu jé? Amu bi nji yem avale bôte bevo’o ba yene bia a ésaé nkañete bia bo, nalé a bo na bi ko woñ. Nlômane Pierre ô nga tebe aval été éte. Alu be nga bi Yésus, Pierre a nga ko woñe ya kañese na a ne ñyé’é wé, a nga jô fe abui biyoñe na a nji yeme Yésus. (Matt. 26:69-75) Nlôman ôte wua wua ô nga su’ulane jô na: “Te koane beangôndô be mame bap woñ, nalé fe te fô’ôban.” (1 P. 3:14) Mejô me Pierre mete ma liti bia na bi ne dañe woñe bôt.

8. Jé é ne volô bia na bi dañe woñe bôt? (1 Pierre 3:15)

 ⁸ Jé é nga volô Pierre na a dañe woñe bôt? Pierre a lebe bia na: “Tela’ané Krist étyi ane Tate e minleme mienan été.” (Lañe’e 1 Pierre 3:15.) Nalé a tinane na bia yiane ba’ale ôsimesane wongane na Yésus Krist nnye a ne Njôô wongan, a na a bili abui ngul. Nge wo ko woñe ya kate môt éziñe mbamba foé, simesa’ane Njôô wongan, tame ve’ele simesane Njôô wongane yôp été a too zañe bemilion beéngele. Simesa’ane na nnye a bili “éjôé ése yôp a si,” a na a ye tabe “a mia môs ôse, akekui memane ya émo.” (Matt. 28:18-20) Pierre a jô bia na bi tabe “nkômesane kom ése” ya kamane mbunane wongan. Ye wo kômbô kañete môt éziñe nda bisaé jôé, e sikôlô, nge ke vôme mfe? Nyoñe’e éyoñe ya fas éyoñ ô ne bo de, a kômesa’ane jam ô ne jô nye. Ye’ela’ane Yéhôva na a volô wo na ô bo ayok, a tabe’e ndi na a ye volô wo na ô dañe woñe bôt.—Mame mi. 4:29.

9. Jam avé Pierre a nga bo môs éziñ é nga liti na a nji nye’e bôte bevok? (Fombô’ô fe fôtô.)

⁹ Pierre a nga yé’é aval avé a ne nye’e bôte bevok. Pierre a mbe valé éyoñe Yésus a nga jô na: “Ma ve mia mfefé atiñe  na, mi nye’esan, avale me nga nye’e mia, mia fe mi nye’esan.” (Jean 13:34) Mvuse ya valé, Pierre a nga bene di a bobenyañ a besita be mbe begentil amu a mbe a ko bekristene be mbe bejuif woñ. Nlômane Paul ô nga loone jame Pierre a nga bo na “medu’an.” (Gal. 2:11-14) Pierre a nga kañese melebe Paul a nga ve nye, a melebe mete me nga volô nye. Bekalate bebaé a nga tili, a nga kôme liti na bi nji yiane jô ve anyu anyu na bia nye’e bobejañ a besita bangan, bia yiane fe de liti mimboon.

10. Jé é ne volô môte na a bi “nye’an ô ne te medu’an”? Timi’in. (1 Pierre 1:22)

¹⁰ Pierre a jô na bia yiane nye’e bobejañe “nye’ane . . . ô ne te medu’an.” (Lañe’e 1 Pierre 1:22.) Avale nye’an éte da so “mewô’ô [bia] bo benya mejôô.” Nya ñye’elane wua ya été a ne na “Zambe a nji bo ôbangam.” (Mame mi. 10:34, 35) Bi vo’o jô na bia tôñ atiñe Yésus a nga ve bia na bi nye’e bôte bevo’o nge bia tyi’i na bia nye’e fo’o ve bôte béziñ ékôane bekristen été, bi teke ki nye’e ba bevok. Ve avale Yésus a nga bo, é ne kui na bia be bôte béziñe bi dañe kui a lôte ba bevok. (Jean 13:23; 20:2) Ve Pierre a lebe bia na bi nye’esan ane bibu’a ya nda bôte jia. Bia ve ngule ya nye’e bobejañ a besita bangane bese amu be ne bibu’a ya nda bôte jangan.—1 P. 2:17.

11. Éyoñe bia nye’e bôte bevo’o “nya nye’ane,” nalé a tindi bia na bi bo jé?

¹¹ Pierre a nga jô bia na: “Môt ase a nyeke’e nyu mbo’o nya nye’ane a nlem ôse.” Éyoñe Pierre a kobô ajô e nye’e a “nlem ôse” éfuse ji, a kômbô jô na bia yiane nye’e avale môt ése, to’o môte bia be nye metyi ma tôbane ki. Bi ne sili biabebiene na, bia ye bo aya nge mojañ a bo bia jame da bo bia nleme mintaé? Jame bi ne taté simesan é ne na bia fe bi bo nye abé a lôte na bi liti nye nye’an. Ve Yésus a nga ye’ele Pierre na mboone ôte ô ne abé mise me Zambe. (Jean 18:10, 11) Pierre a nga jô na: “Te bulané abé a abé, nge ata a ata, ve mi yalane bôt a bibotan.” (1 P. 3:9) Éyoñe bia nye’e bôte bevok a nlem ôse, bia ye mvamane be to’o bôte ba bo bia mbia jam.

12. (a) Nya nye’ane a ne tindi bia na bi bo jé? (b) Avale vidéo a liti, jé wo kômbô ve ngule ya bo?

¹² Éyoñe Pierre a nga tili kalate ôsu, a nga belan éfia “nya nye’ane.” Avale nye’an éte é nji buti fo’o ve bone minsem, ve ja buti fe “abui minsem.” (1 P. 4:8) Éko éziñe Pierre a nga simesane mame Yésus a nga ye’ele nye a lat a njaman. Éyoñe Pierre a nga yalane Yésus na a yiane jamé môt a te bo nye abé biyoñe zangbwal, a mbe a simesa’ane na a ne angôndô ya mvam. Ve ñye’elane Yésus a nga ve Pierre a wu a ve bia den ô ne na, bia yiane jamé “biyoñe 77,” nalé a tinane na bia yiane jamé éyoñ ése. (Matt. 18:21, 22) Nge wo yen ayaé ya tôñe melebe mete, te ve’ele sili mo si! Bebo bisaé be Yéhôva bese be be’e metyi ya abé, a be wô’ô yen ayaé ya jamé biyoñe biziñ. Jame da dañe mfi éyoñe ji é ne na, ô bo jam ése ô ne ngule ya bo asu na ô jamé monyoñ a tabe mvo’é a nye. c

13. Jé é ne bo na bemvendé be yen ayaé ya nyoñe ngap a bobejañ a besita?

¹³ Éyoñe Yésus a nga wômô a nga jô Pierre na: “Ba’ale’e bone mintômba bam.” Teke bisô na Pierre a nji ve’ele vuane mejô mete. (Jean 21:16) Nge ô ne mvendé, wo  yeme na mejô mete ma fombô fe wo. Ve é ne bo ayaé asu mvendé na é bi éyoñe ya bo beta ésaé ate. Bemvendé ba yiane taté jalé miñyiane ya minsône ya menda me bôte map, ba yiane fe liti na ba nye’e be, a volô be na be subu Yéhôva bebé. Ba yiane liti mbamba éve’ela ésaé nkañete a kômesane bisaé ba ve be bisulan, bitôkan a beta bitôkan. Ba bevo’o be ne bibu’a ya émo’o ja su’u bobejañe ba ke menda mebiañ (comité de liaison hospitalier) bevo’o ki ba saé LDC. Bemvendé be ne fo’o bôte be bili abui mame ya bo!

14. Jé é ne tindi bemvendé na be nyoñe ngap a abemba? (1 Pierre 5:1-4)

¹⁴ Pierre a nga jô bemvendé bevo’o na: “Ba’alané mbame mintômba Zambe.” (Lañe’e 1 Pierre 5:1-4.) Nge ô ne mvendé, bia yeme na wo nye’e bobejañ a besita a na wo kômbô nyoñe ngap a be. Ve biyoñe biziñ, ô ne wô’ôtane na ô yeme a abui mame nge ke na ô ne nte’an aval é ne na ô vo’o ki mane bo mame mete mese. Jé ô ne bo? Kate’e Yéhôva avale wo wô’ôtan a abim avé wo kômbô volô bobejañ a besita. Pierre a nga jô na: “Nge môt éziñ a bo ésaé, a bo’o je a ngule ja so nye be Zambe.” (1 P. 4:11) Bobenyoñ a benyo bekale be ne tôbane avale minjuk é vo’o mane émo ji. Ve te vuane na “masa beba’ale mintômba,” Yésus Krist, a ne volô be a lôt abim ô ne ngule ya bo. A ne de bo éyoñe ji, a ye fe de bo mfefé émo. Jame Yéhôva a yange be bemvendé é ne ve na be nye’e bobejañ, be nyoñe ngap a be, a na be bo “bive’ela asu mbam.”

15. Aval avé mvendé ja ba’ale abemba? (Fombô’ô fe fôtô.)

¹⁵ William a ne mvendé den a ntoo ayap éyoñ, a kôme yene mfi ya nyoñe ngap a bobejañ a besita. Éyoñ ébubua ôkone COVID-19 é nga taté, William a bemvendé bevo’o be nga yene na é ne nya mfii na be loone mojañ ase ya angôse nkañete dap sondô ase. A kate jam é nga tindi be na be nyoñe ntyi’an ôte a jô’ô na: “Abui bobejañ a besita é mbe menda map étam, a nalé a mbe ve bo na be taté na ba bi mbia be asimesan.” Éyoñe mojañe nge sita éziñ a mbe a bili njuk, William a mbe a kôme nyoñ éyoñe ya vô’ôlô nye, a ve ngule ya  jalé miñyiane mié. A nga jeñe bekalate béziñ a bevidéo anjeñe mefoé dangan asu na a ve bobejañ a besita ngule nyul. A jô na: “Éyoñe ji nje ja dañe mfi na bemvendé be nyoñe ngap a bobejañ a besita a lôte melu mvus. Bia saé a ngul ése na bi volô bôte na be yeme Yéhôva. Bia yiane saé avale da asu na bi nyoñe ngap a abemba, bia yiane volô bone mintômba mi Yéhôva na mi ke ôsu a tabe benya mejôô été.”

16. Aval avé wo kômbô tôñe melebe bia te nyoñe bekalate Pierre a nga tili?

¹⁶ Bia ke fo’o yene ve bone miñye’elane miziñe ya bekalate bebaé Pierre a nga tili. Éko éziñe wo te yene vôm éziñe wo yi na ô bo mintyendan ényiñe jôé. Ye wo yi na ô tu’a bi éyoñe ya bindi bibotane wo ye bi mfefé émo wo zu? Ye wo te bi nsôñane ya kañete sikôlô, e nda bisaé, nge ke bo fatane nkañete éfe? Ye wo te yene mam ô ne bo asu na ô liti bobejañ a besita nya nye’ane? A bemvendé ye mia te bi éva’a ya tu’a nyoñe ngap a bone mintômba mi Yéhôva? Éyoñe bia kôme nyoñ éyoñe ya fase biabebien, bia ye yene bevôme béziñe bi ne atek, ve bi nji yiane sili mo si. “Tate a ne mbamba môt,” a ne volô bia na bi bo mintyendane mia sili. (1 P. 2:3) Pierre a jô na: “Zambe . . . a ye sondô yañele mia. A ye bo na mi tebe ne bip, a ye ve mia ngul a ye yemete mia e nya mbôka’a yôp.”—1 P. 5:10.

17. Bibotane bivé wo ye bi nge wo ke ôsu a kañese na Yéhôva a yañele wo?

¹⁷ Atata’a, Pierre a mbe a simesa’ane na a nji be avale môte da yiane wulu a Mone Zambe. (Luc 5:8) Ve Yéhôva ba Yésus be nga su’u nye, nalé a nga volô Pierre na a ke ôsu a wulu a Yésus. Ane Pierre a nga beta bi mvome ya “nyiin Éjôé ya nnôm éto Tate wongan a Nyii wongane Yésus Krist.” (2 P. 1:11) Mbamba ma’ane fo’o! Nge wo ke ôsu a ve ngul avale Pierre a nga bo, a kañese na Yéhôva a yañele wo, wo fe wo ye bi ényiñe ya melu mese. Wo ye tôé “nsôñane ya mbunane [wôé], nwô ôte ô ne nkôtane wônan.”—1 P. 1:9.