DIANA a lôteya mimbu 80. Nnôm a nga kon Alzheimer, ane be nga toé nye nda biañ akekui a nga wu. A nga jañele fe bone bé bebaé, befam, émien a kone fe cancer ya boo. Ve éyoñe bobejañe be mbe be yene’ nye bisulan, a mbe kom ése ve mevak.

Jean a nga bo mimbu 43 a étun a jome’e mekônda. Ésaé éte é mbe ényiñe jé, a mbe a nye’e je angôndô! Môs éziñ évuvumane jé é nga fame ôkon, ane a nga telé ésaé njome mekônda na a ke nyoñe ngab a je. Éyoñ bobejañ be mbe be tôba’ane nye bitôkan, a mbe fo’o ve Jean ba zu ba yem. A mbe kom ése ve mevak.

Jé ja volô Diana ba Jean na be bi avak? Aval avé môt a ne tabe mevak to’o a ne nkôkon, nge ke na jam éziñ da tya’a nye nlem? A aval avé môt a ne tabe mevak to’o a jañele mbe’e akônda? Bible a yalane na: “Bôte be ne zôsôô b’aye va’a be Yéhôva.” (Bs. 64:10) Bi ne tu’a wô’ô bido’o mejô mete nge bia kôme yem mam ma soo môt avak, a mam me vo’o soo bia avak.

Bia bese bia yeme na mam méziñ me ne soo môt avak. Ane éyoñe bôte bebaé ba nye’esan ba lu’an. A éyoñ môt a biaé mon, nge ke éyoñ a bi mimbe’e akônda. Mam mete ma soo fo’o mevak amu Yéhôva nnye a nga bôndé me. A nga bôndé aluk, éko éziñ asu na bôte be fôé; nnye fe a ve bia mimbe’e miziñ a zene ya akônda dé.​—Met. 2:18, 22; Bs. 127:3; 1 Tim. 3:1.

Ve meva’a mam mete ma soo bia me ne bo te libi. E ne kui na, môte bia luk a su’ulane bo mejian nge ke wu. (Éz. 24:18; Os. 3:1) Bone béziñ ki be wô’ô bo bebiaé bap a Yéhôva melo, a su’ulane tebe feñ. Bone be Samuel be nji be benya bebo bisaé be Yéhôva, a mimboane mi David mi nga soo minju’u nda bôte jé. (1 Sa. 8:1-3; 2 Sa. 12:11) Aval mam ete da bo nlem mintaé. E vo’o soo bia mevak.

 Aval ete fe, be ne vaa bia mimbe’e, éko éziñ amu bia te fame ôkon, nge amu bia yiane nyoñe ngab a nda bôte jangan, nge ke amu mam méziñ ma te tyendé ékôane Yéhôva. Abui bobejañ ba jañele mimbe’e aval ete ba meme na mimbe’e miap mia jembane be.

Ajô te, meva’a mam mete me ne soo bia me ne ve asu étun éyoñ. Ve bia kômbô kobô ajô fatan ava’a afe, ava’a da libi to’ éyoñ minju’u miziñ mia kui bia ényiñ atemetem. Samuel, David a bôte befe be nga bi avale meva’a ete, bi tame zu yen avale bia fe bi ne bi me.

Yésus a mbe a yeme’e jôm é ne benya meva’a. Éyoñ a mbe yôp ‘a mbe a va’a mise me Yéhôva éyoñ ése.’ (Min. 8:30) Ve éyoñ a nga zu si, a nga tôban abui minjuk. Ve a nga bi meva’a ya bo nkômban Ésaa. (Jean 4:34) A nga ba’ale ava’a dé to’o éyoñ a mbe a nga zu wu awu mintaé. Bible a jô na: “Amu meva’a me mbe nye ôsu, a nga jibi [élé mintaé].” (Beh. 12:2) Bi tame ñhe zu yene mam mebaé Yésus a nga jô a lat a benya meva’a.

Môs éziñ beyé’é bé 70 be mbe be so’o nkañete. Be mbe be wô’ô mvaé amu be nga bo abui mesimba, be nga kui kui na be vaa bôte mimbia minsisim. Ve Yésus a nga jô be na: “Te mia vak amu minsisim mia wô’ô mia, ve va’an amu môé menan me ntoo ntilane yôp.” (Luc 10:1-9, 17, 20, Mfefé Nkôñelan) Yaa, Yésus a liti valé na, sa ke beta mimbe’e mmie mia soo bia mevak, ve na bia bi benya meva’a éyoñ Yéhôva a wô’ô bia mvaé. Yéhôva a nji be ve vuane mbamba ésaé beyé’é be nga bo, jame ya kôme va’a de, nde ñhe le!

Môs ôfe, Yésus a mbe a ye’ele nsamba bôt. Ane minga éziñ a nga jô na nyia Yésus a yiane bi abui mevak, amu som a nga biaé ntyetyeñ ñye’ele. Ve Yésus a nga sôan ôsimesane wé a jô nye na: “Ajô de adañe di[li] e ne na, ébotan [nge ke avak] a bôte be awô’ô mejô me Zambe a ba’ale me.”  (Luc 11:27, 28) E ne été na, mbiaé a bili mbamba be bon a ne bi abim ava’a éziñ, ve mewôk mme ma soo bia benya meva’a ényiñ.

Bi ne ñhe jô na, bia bi benya meva’a éyoñe bia yeme na Yéhôva a wô’ô bia mvaé. To’o bia tôbane minju’u aval avé, bia vuane ki na Yéhôva a nye’e bia. Ve bia jibi minju’u mite mise mban, amu bi bili mbamba été nlem. (Bero. 5:3-5) Jam afe é ne na, Yéhôva a ve ba bese be too nye mebun mbamba nsisime wé, ava’a ki é ne fulu jia ya ébuma ya nsisim. (Beg. 5:22) Bia kôme wô’ô éyoñ éte amu jé Besam 64:10 a jô na: “Bôte be ne zôsôô b’aye va’a be Yéhôva.”

Bi ne wô’ô amu jé Diana ba Jean bia te jôô be atata’a be nga kui na be ba’ale ava’a dap akusa bo beta minjuk. Diana a jô na: “Me nga ba’abe Yéhôva nyul, fo’o ve avale mon a ba’abe ésaa nyul.” Aval avé a nga yemelane na Yéhôva a wô’ô nye mvaé? A jô na: “Yéhôva a nga volô me na me ke ôsu a kañete asu é too me mevak.” Jean fe a kate bia jam é nga volô nye na a bo mbane nkañete éyoñ a jô’éya ésaé njome mekônda: “Éyoñ me nga tabe École de formation ministérielle mbu 1998, me nga yé’é Bible avale me mbe me ngenane te tame yé’é nye éyoñ éfe.” A kobô ajô ba ngal a jô’ô na: “Mbôle bi nga tyi’i na bia ye bo Yéhôva ésaé a ngule jangan ése, bi nji dañe wô’ôtan ntyéndan ôte adit. Bi nji wô’ô abé éyoñ be nga vaa bia mbe’e wongan.”

Mejô ya Besam 64:10 me nga jaléban be bobejañe befe. Bi tame kobô ajô mojañ éziñ ba ngal, be nga saé mimbu 30 a mvuk Béthel ya Amelka. Ane be nga su’ulane lôme be bekpwa’a mefane be ne ngum aval. Ba meme na: “Môt a ne fo’o wô’ô nlem mintaé éyoñ a jañele jôm a nye’e, ve mintaé mite mi nji yiane tabe ayap.” Ane be nga ji’a taté na ba su’u ésaé nkañete akônda dap. Ba jô fe na: “Bia kôme kate Yéhôva mam bia yi éyoñe bia ye’elane nye. Éyoñ a yalane bia, nalé a ve bia ngule nyul, a bo na bi ba’ale ava’a dangan. Bi ndeme ke suane suan akônda, bobejañe befe be taté ki na ba nyoñ ésaé nkpwa’a mefan; bi nga bi fe ma’a ya volô beyé’é Bible bebaé na be yaé nsisim.”

E ne été na, e nji bo tyi’ibi na bi tabe meva’ éyoñ ése. Ve Yéhôva a bôône bia nleme si a mejô ya kalate Besam 64:10. To’o da kui na bi bili ate’e biyoñ biziñ, bi nji yiane vuane na, “bôte be ne zôsôô b’aye va’a be Yéhôva” to’o éyoñ ba tôbane minjuk. Bia yiane fe simesan môse Yéhôva a ye soo bia “[mi]mfefé mi yôp a mfefé si” aval a nga ka’ale bia. Éyoñ éte, abé é ne bia metyi da ye vas. Bebo bisaé be Yéhôva bese ba ye ‘vak a fôn nnôm éto’ amu mbamba be mam a ye ve be.​—És. 65:17, 18.

Tame simesan aval ényiñe ja ye bo éyoñ éte: bia ye ke beta wô’ô na môt a kon, môs ôse bia ye kôlô si nyul é to bia nya mvo’é. Bia ye vuane minju’u mise bi nga tôbane mie nnôm émo. Kalate Zambe a bo’olô de a jô’ô na: “B’aye bo te simesane mame ya mvus, nge zuu me nlem.” Bia ye beta yene bôte bangan be nga wu. Bemillion be bôt ba ye wô’ôtan avale Jaïrus ba ngal be nga wô’ôtan éyoñ Yésus a nga wômôlô ngo jap é mbe mimbu 12; Bible a jô na “be nga semé beta nseman [be wô’ abui avak.]” (Marc 5:42) Ane si ja ye jaé ve a “bôte be ne zôsôô,” nya nya zôsôô, bôte bete “b’aye va’a be Yéhôva” nnôm éto a nnôm éto.